Tuesday, April 16, 2024
Homeଖବରଆଧ୍ୟାତ୍ମିକ କ୍ଷେତ୍ରକୁ ଯୋଡୁଛି ପୋଲ 

ଆଧ୍ୟାତ୍ମିକ କ୍ଷେତ୍ରକୁ ଯୋଡୁଛି ପୋଲ 

ଭୁବନେଶ୍ବର: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗତ ରବିବାର ଦିନ ଗୁଜରାଟର ଦେବଭୂମି ‘ଦ୍ବାରକା’ ଜିଲ୍ଲାରେ ଭେଟ ଦ୍ବାରକାକୁ ମୁଖ୍ୟଭୂମି ଓଖା ସହିତ ଯୋଡ଼ିବାକୁ ଆରବସାଗରରେ ୨.୩୨ କିମିର ଦେଶର ଦୀର୍ଘତମ କେବୁଲ ଆଧାରିତ ବ୍ରିଜ୍‌ (ସୁଦର୍ଶନ ସେତୁ) ଉଦ୍‌ଘାଟନ କରିଛନ୍ତି। ପ୍ରଧାନମନ୍ତ୍ରୀ ମୋଦୀ ଏହି ପୋଲ ଉଦ୍‌ଘାଟନ ପୂର୍ବରୁ ଦ୍ବାରକାରେ ଭଗବାନ ଶ୍ରୀକୃଷ୍ଣ ମନ୍ଦିରରେ ପୂଜାର୍ଚ୍ଚନା କରିଥିଲେ। ପରେ ‘ସୁଦର୍ଶନ ସେତୁ’ ନାମକ ଚାରିଥାକିଆ କେବୁଲ-ଆଧାରିତ ପୋଲ ଉଦ୍‌ଘାଟନ କରିଥିଲେ, ଯାହାକି ଅଦ୍ବିତୀୟ ଡିଜାଇନ୍‌ ହୋଇଛି। ଏଥିରେ ଶ୍ରୀମଦ୍‌ଭାଗବତ ଗୀତାର ଶ୍ଲୋକ ଓ ଉଭୟ ପାର୍ଶ୍ବରେ ଭଗବାନ କୃଷ୍ଣଙ୍କ ଫଟୋରେ ସଜାଯାଇଥିବା ଫୁଟ୍‌ପାଥ ରହିଛି।

ଭୌଗଳ ଅନୁସାରେ ପୃଥିବୀର ୩ ଭାଗ ହେଉଛି ଜଳ। ଅନ୍ୟ ଏକ ଭାଗ ହେଉଛି ସ୍ଥଳ, ଯେଉଁଥିରେ ସମସ୍ତ, ପାହାଡ଼ ଓ ମାଳଭୂମି ରହିଛି। ସ୍ଥଳଭାଗ ମଧ୍ୟରୁ ମନୁଷ୍ୟମାନେ ବସବାସ କରିବା ପାଇଁ ଭୂଭାଗ ବହୁତ କମ ପରିମାଣରେ ରହିଛି। ତେଣୁ ମନୁଷ୍ୟକୁ ଚାରିଆଡେ ଜଳ ଘେରି ରହିଥିବା ସ୍ଥଳଭାଗରେ ମଧ୍ୟ ରହିବାକୁ ପଡ଼ିଥାଏ। ଭାରତ ସମେତ ବିଦେଶରେ ମଧ୍ୟ ଅନେକ ସ୍ଥାନ ଅଛି ଯେଉଁଠି ଚାରିଆଡ଼େ ଜଳ ଘେରି ରହିଛି। ଆଣ୍ଡାମାନ ନିକୋବର ଦୀପପୁଞ୍ଜ, ଲକ୍ଷାଦ୍ବୀପ, ମାଳଦ୍ବୀପ, ଜାପାନ ହେଉଛି ଏହାର ସବୁଠାରୁ ବଡ଼ ଉଦାହରଣ। ଓଡ଼ିଶାରେ ମଧ୍ୟ ଚିଲିକା ଜଳରାଶି ମଧ୍ୟରେ କିଛି ସ୍ଥଳଭାଗ ରହିଛି ଯେଉଁଠି ଲୋକେ ବସବାସ କରୁଛନ୍ତି।

ସୁଦର୍ଶନ ସେତୁ

୨.୪୫ କିମି ଲମ୍ବ ଆପ୍ରୋଚ୍‌ ରୋଡ ସହିତ ୨.୩୨ କିମି ସୁଦୀର୍ଘ ପୋଲର ନିର୍ମାଣ ପାଇଁ ୯୭୯ କୋଟି ଟଙ୍କା ଖର୍ଚ୍ଚ ହୋଇଛି। ଚାରିଥାକିଆ ୨୭.୨୦ ମିଟର ପ୍ରସସ୍ତ ପୋଲର ଉଭୟ ପାର୍ଶ୍ବରେ୨.୫୦ ମିଟର ଫୁଟ୍‌ପାଥ ରହିଛି। ଏହି ପୋଲକୁ ‘ସିଗ୍ନେଚର ବ୍ରିଜ୍‌’ କରାଯାଇଥିଲା। ପରେ ନାମ ପରିବର୍ତ୍ତନ କରି ‘ସୁଦର୍ଶନ ସେତୁ’ ରଖାଯାଇଛି। ଭେଟ ଦ୍ବାରକା ଓ ଓଖା ବନ୍ଦର ନିକଟରେ ଏକ ଦୀପ ରହିଛି, ଯାହା ଦ୍ବାରକା ସହର ଠାରୁ ୩୦କିମି ଦୂର। ଏଠାରେ ଭଗବାନ କୃଷ୍ଣଙ୍କ ପ୍ରସିଦ୍ଧ ଦ୍ବାରକାଧୀଶ ମନ୍ଦିର ରହିଛି। ପୂର୍ବରୁ ଭେଟ ଦ୍ବାରକା ଯିବା ପାଇଁ କେବଳ ଦିନବେଳା ଅନୁମତି ମିଳୁଥିଲା। ଏବେ ପୋଲ ନିର୍ମାଣ ହେଲା ପରେ ସବୁ ସମୟରେ ଅନୁମତି ମିଳୁଛି।

ଓଡ଼ିଶାର ଜଳଭାଗରେ ସ୍ଥଳଭୂମି

ଜଳ ଭିତରେ ସ୍ଥଳଭାଗ ପ୍ରସଙ୍ଗ ଉଠେ, ସେହି ସମୟରେ ରାମେଶ୍ବରମ ମନକୁ ଆସିଥାଏ। ତାମିଲନାଡୁର ରାମନାଥପୁରମ ଜିଲ୍ଲାରେ ଥିବା ଭାରତର ଅନ୍ୟତମ ପ୍ରସିଦ୍ଧ ଆଧ୍ୟାତ୍ମିକ ପର୍ଯ୍ୟଟନ କ୍ଷେତ୍ର ରାମେଶ୍ବରମ ତୀର୍ଥସ୍ଥଳକୁ ଚାରିପାର୍ଶ୍ବରୁ ଜଳ ଘେରି ରହିଛି। ଅବଶ୍ୟ ରାମେଶ୍ବରମକୁ ରେଳ ଓ ପୋଲ ସହିତ ସଂଯୋଗୀକରଣ କରାଯାଇଛି। ପଂଜାବର ପ୍ରସିଦ୍ଧ ସ୍ବର୍ଣ୍ଣମନ୍ଦିର ଜଳାଶୟ ଭିତରେ ରହିଛି। ତେଣୁ ଶ୍ରଦ୍ଧାଳୁମାନଙ୍କର ଯାତାୟତ ପାଇଁ ଏକ ଫୁଟ୍‌ପାଥ ପ‌ୋଲ ନିର୍ମାଣ କରାଯାଇଛି।

ଓଡ଼ିଶାର ଜଳଭାଗରେ ସ୍ଥଳଭୂମି

ଚିଲିକା ହେଉଛି ଏସିଆ ମହାଦେଶର ସର୍ବବୃହତ ଲବଣାକ୍ତ ହ୍ରଦ, ଏହା ଗଂଜାମ, ଖୋର୍ଦ୍ଧା ଓ ପୁରୀ ଜିଲ୍ଲାର ସୀମାକୁ ଲାଗି ରହିଛି। ଚଲିକା ହ୍ରଦ ଭିତରେ ଅନେକ ଢିପ (ସ୍ଥଳଭୂମି) ରହିଛି, ଯେଉଁଠାରେ ଲୋକମାନେ ରହୁଛନ୍ତି। ପୁରୀ ଜିଲ୍ଲା କୃଷ୍ଣପ୍ରସାଦ ଅଞ୍ଚଳରେ ରହୁଥିବା ଜହ୍ନିକୁଦା, ଅରଖକୁଦର ଲୋକେ ଚିଲିକା ଜଳରାଶି ସହିତ ଘନିଷ୍ଠ ସଂପର୍କ। ଏମାନଙ୍କ ଜୀବନ ନିର୍ଭର କରିଥାଏ ଦେଶୀ ଡଙ୍ଗା ଉପରେ। ଦ୍ବାରକାରେ ନିକଟରେ ଉଦ୍‌ଘାଟିତ ହୋଇଥିବା ସୁଦର୍ଶନ ସେତୁ ଭଳି ଚିଲିକାରେ ମଧ୍ୟ ଏଭଳି ବ୍ୟବସ୍ଥାର ଆବଶ୍ୟକତା ରହିଛି। ବାଲୁଗାଁରୁ ମା’ କାଳିଜାଇକୁ ଯିବା ପାଇଁ ପର୍ଯ୍ୟଟକ ଦେଶୀ ଓ ମୋଟର ବୋଟ୍‌ର ଆବଶ୍ୟକ କରୁଛନ୍ତି। ଅତ୍ୟାଧୁନିକ ପୋଲ ସହିତ ବାଲୁଗାଁରୁ କାଳୀଜାଇ ପୀଠକୁ ସଂଯୋଗୀକରଣ ହୋଇପାରିଲେ ପର୍ଯ୍ୟଟକଙ୍କ ସଂଖ୍ୟା ବଢ଼ିପାରିବ।

RELATED ARTICLES

LEAVE A REPLY

Please enter your comment!
Please enter your name here

Most Popular

Recent Comments