Sunday, June 23, 2024
Homeଉଦ୍ଧାର କାମରେ ସାହା ହେଉଛି ଏନ୍‌ଡିଆରଏଫ୍
Array

ଉଦ୍ଧାର କାମରେ ସାହା ହେଉଛି ଏନ୍‌ଡିଆରଏଫ୍

ଭୁବନେଶ୍ବର: ବନ୍ୟା, ବାତ୍ୟା, ଭୂମିକମ୍ପ, ଟ୍ରେନ୍ ଦୁର୍ଘଟଣା, ଭୂସ୍ଖଳନ, କୋଠା ଭୁଶୁଡ଼ିବା ତଥା ଅନ୍ୟ କୌଣସି ବିପର୍ଯ୍ୟୟ ପରେ ଯେତେବେଳେ ଧନଜୀବନକୁ କ୍ଷତି ପହଞ୍ଚିଥାଏ, ସେତେବେଳେ ଉଦ୍ଧାର ପାଇଁ ଜାତୀୟ ବିପର୍ଯ୍ୟୟ ରେସ୍ପନ୍ସ ଫୋର୍ସ (ଏନ୍‌ଡିଆରଏଫ୍) ଟିମ୍ ଦରକାର ପଡ଼ିଥାନ୍ତି। ବିପରୀତ ପରିସ୍ଥିତିରେ ଉପସ୍ଥିତ ବୁଦ୍ଧି ଲଗାଇ ତଥା ଆବଶ୍ୟକତା ଠାରୁ କମ ସମୟ ମଧ୍ୟରେ ବିପନ୍ନଙ୍କୁ ଉଦ୍ଧାର କରିବା ପାଇଁ ଏନ୍‌ଡିଆରଏଫ୍‌ ଟିମ୍‌ ସଦସ୍ୟଙ୍କ ଠାରେ କୌଶଳ ଥିବାରୁ ଏମାନଙ୍କୁ ସରକାର ପ୍ରଥମେ ମନେ ପକାଇଥାନ୍ତି। କୌଣସି ସ୍ଥାନରେ ଉଦ୍ଧାର କାର୍ଯ୍ୟରେ ଯଦିଓ  ଏନ୍‌ଡିଆରଏଫ୍‌ ଟିମ୍‌ ସବୁଠୁ ବଡ଼ ଗୁରୁତ୍ବପୂର୍ଣ୍ଣ ଭୂମିକା ରହିଥାଏ, ତଥାପି ସେମାନଙ୍କୁ ଘଟଣା ଘଟିଥିବା ରାଜ୍ୟର ଏସ୍‌ଡିଆରଏଫ୍, ସ୍ଥାନୀୟ ଅଗ୍ନିଶମ ବାହିନୀ ଓ ପୁଲିସ ସହଯୋଗ କରିଥାନ୍ତି।

୧୭ ବର୍ଷ ପୂର୍ବରୁ ଅର୍ଥାତ ୨୦୦୬ ଜାନୁଆରି ୧୯ ତାରିଖରେ ଏନ୍‌ଡିଆରଏଫ୍‌ର ଗଠନ କରାଯାଇଥିଲା। ଗୃହ ମନ୍ତ୍ରାଳୟ ଅଧିନରେ ପରିଚାଳିତ ଏହି କେନ୍ଦ୍ରୀୟ ସଂସ୍ଥା ଏବେ କଟକର ମୁଣ୍ଡୁଳି ସମେତ ଦେଶର ୧୩ଟି ସ୍ଥାନରେ ଏହାର କାର୍ଯ୍ୟାଳୟ ରହିଛି। ଏତଦ୍ ବ୍ୟତୀତ ଏହାର ଶାଖା କାର୍ଯ୍ୟାଳୟ ରହିଛି। ଏନ୍ଡିଆରଏଫ୍ରେ ବର୍ତ୍ତମାନ ୧୩,୦୦୦ ଯବାନ ରହିଛନ୍ତି, ଯେଉଁମାନେ କି ବିପର୍ଯ୍ୟୟ ସମୟରେ କାଳ ବିଳମ୍ବ ନକରି ଉଦ୍ଧାର କାର୍ଯ୍ୟରେ ଲାଗିପଡ଼ିଥାନ୍ତି। ବିଗତ ୧୭ ବର୍ଷ ମଧ୍ୟରେ ଦେଶରେ ଯେତେ ବଡ଼ ବଡ଼ ବିପର୍ଯ୍ୟୟ ସୃଷ୍ଟି ହୋଇଛି, ସବୁସ୍ଥାନରେ ଏନ୍‌ଡିଆରଏଫ୍ ଟିମ୍‌ ଗୁରୁତ୍ବପୂର୍ଣ୍ଣ ଭୂମିକା ରହିଛି। ଉଦାହରଣ ସ୍ବରୂପ ଗତ ୨ ତାରିଖ ଦିନ ବାଲେଶ୍ବର ଜିଲ୍ଲା ବାହାନଗା ଷ୍ଟେସନ ବଜାରରେ ଶାଲିମାର-ଚେନ୍ନାଇ କରମଣ୍ଡଳ ଏକ୍ସପ୍ରେସ୍, ଯଶବନ୍ତପୁର-ହାୱଡା ଏକ୍ସପ୍ରେସ୍ ଓ ଷ୍ଟେସନରେ ଥିବା ଏକ ମାଲଗାଡ଼ି ଦୁର୍ଘଟଣାରେ ଏନ୍‌ଡିଆରଏଫ୍‌ର ୪ଟିମ୍ ପ୍ରଶଂସନୀୟ କାର୍ଯ୍ୟ କରିଥିଲେ। ଲଗାତାର ୩ଦିନ ଯାଏଁ ଅକ୍ଲାନ୍ତ ପରିଶ୍ରମ କରି ଉଦ୍ଧାର କାର୍ଯ୍ୟରେ ନିଜକୁ ସମର୍ପଣ କରିଦେଇଥିଲେ।

ଓଡ଼ିଶାରେ ଏନ୍‌ଡିଆରଏଫ୍‌

ବାତ୍ୟା ପାଇଁ ଓଡ଼ିଶା ଭଲଭାବରେ ଜଣା। ଓଡ଼ିଶାରେ ହୋଇଥିବା ୧୯୯୯ ମସିହାର ବାତ୍ୟାକୁ ସମଗ୍ର ବିଶ୍ବ ଭୁଲିପାରିବେ ନାହିଁ। ୧ ହଜାରରୁ ଅଧିକ ଲୋକ ମୃତ୍ୟୁ ଏବଂ କୋଟି କୋଟି ଟଙ୍କାର ସମ୍ପତ୍ତି ନଷ୍ଟ କରିଥିବା ଏହି ବାତ୍ୟା ସମୟରେ ଦେଶରେ ଏନ୍ଡିଆରଏଫ୍ ଭଳି ସଂସ୍ଥାର ଗଠନ ହୋଇନଥିଲା। ପରବର୍ତ୍ତୀ ସମୟରେ ଓଡ଼ିଶାରେ ଫାଇଲିନ୍, ହୁଡହୁଡ, ଫନି ଓ ଅମ୍ଫାନ ଭଳି ବାତ୍ୟା ଆସିଛି। ବାତ୍ୟା ପରେ ଏନ୍‌ଡିଆରଏଫ୍ ଟିମ୍ ଉଦ୍ଧାର କାର୍ଯ୍ୟରେ ନିୟୋଜିତ ହୋଇଛନ୍ତି। ନିଜ ଦେହରୁ ଝାଳ ବୁହାଇ ଅନ୍ୟର ଉପକାର କାମରେ ନିୟୋଜିତ ହୋଇଛନ୍ତି। କେବଳ ବାତ୍ୟା ନୁହେଁ, କୋଭିଡ-୧୯ ସମୟରେ ମଧ୍ୟ ଏନଡିଆରଏଫ୍ ଟିମ୍ ସ୍ମରଣୀୟ କାମ କରିଥିଲେ। କରୋନା ସଂକ୍ରମିତ ଗୁରୁତର ରୋଗୀଙ୍କ ଚିକିତ୍ସା କ୍ଷେତ୍ରରେ ଆଶା ସଂଚାର କରିଥିଲା ପ୍ଲାଜ୍ମା ଚିକିତ୍ସା। ଯେଉଁ ଗୁରୁତର ରୋଗୀଙ୍କ ଚିକିତ୍ସାରେ ପ୍ଲାଜମା ବ୍ୟବହାର ହୋଇଥିଲା, ସେମାନଙ୍କର ସ୍ବାସ୍ଥ୍ୟବସ୍ଥାରେ ଯଥେଷ୍ଟ ଉନ୍ନତି ଆସିଥିଲା। ଏନ୍‌ଡିଆରଏଫ୍‌ ଯବାନଙ୍କ ପ୍ଲାଜମା ବ୍ୟାଙ୍କରେ ପ୍ଲାଜମା ଦାନ କରିଥିଲେ।

ରାହୁଲକୁ ଉଦ୍ଧାର କରିଥିଲା ଏନ୍‌ଡିଆରଏଫ୍‌

ଛତିଶଗଡ଼ର ଜାଞ୍ଜଗିରି-ଚାମ୍ପା ଜିଲ୍ଲା ଅନ୍ତର୍ଗତ ପିରହ୍ରିଡ୍ ଗ୍ରାମରେ ୧୧ ବର୍ଷର ଦିବ୍ୟାଙ୍ଗ ବାଳକ ରାହୁଲ୍ ବୋର୍ ୱେଲ୍‌ରେ ଖସି ପଡ଼ିବା ଘଟଣାକୁ ଦେଶବାସୀ ଭୁଲିନାହାନ୍ତି। ଗତବର୍ଷ ଜୁନ୍ ୧୦ ତାରିଖରେ ଘଟିଥିବା ଏହି ଘଟଣାରେ  ଏନ୍‌ଡିଆରଏଫ୍‌ର ଯବାନମାନେ ରାହୁଲକୁ ଉଦ୍ଧାର କରିବା ପାଇଁ ପ୍ରଶଂସନୀୟ କାମ କରିଥିଲେ। ନିଜ ଘର ପଛପଟ ୮୦ ଫୁଟ୍ ଗଭୀର ଏକ ବୋର୍ ୱେଲ୍ ଭିତରରୁ ୧୦୫ ଘଣ୍ଟା ପରେ କଟକର ମୁଣ୍ଡଳୀସ୍ଥିତ ଏନଡିଆରଏଫ୍ର ଯବାନମାନେ ରାହୁଲକୁ ଉଦ୍ଧାର କରିଥିଲେ। ମୁଣ୍ଡୁଳିସ୍ଥିତ ଏନ୍‌ଡିଆରଏଫ୍‌ ଅଧୀନରେ ଛତିଶଗଡ଼ ଭିଲାଇରେ ଏନଡିଆରଏଫ୍ ରିଜିଓନାଲ୍ ରେସପନସ୍ ସେଣ୍ଟର କାମ କରୁଛି।  ରାହୁଲ ଫସି ଥିବା ଖବର ମିଳିବା ପରେ ଭିଲାଇରୁ ସେଦିନ ୨୦ ଜଣ ଘଟଣାସ୍ଥଳକୁ ଯାଇଥିଲେ। ଭିଲାଇରୁ ୨୦୦ କିମି ବାଟ ଅତିକ୍ରମ କରି ଘଟଣାସ୍ଥଳରେ ପହଞ୍ଚି ଥିଲେ। ଅନ୍ୟପଟେ କଟକ ମୁଣ୍ଡଳିରୁ ସ୍ବତନ୍ତ୍ର ତାଲିମପ୍ରାପ୍ତ ୧୦ ଜଣ ବି ସେଠାକୁ ବାହାରି ଯାଇଥିଲେ।  

RELATED ARTICLES

LEAVE A REPLY

Please enter your comment!
Please enter your name here

Most Popular

Recent Comments