ଭୁବନେଶ୍ବର: ଖୁସିର ପର୍ବ ଦୀପାବଳି ହର୍ଷୋଲ୍ଲାସର ସହିତ ପାଳନ କରାଯାଇଛି। ଗାଁରୁ ସହର ଯାଏଁ ବାଣ ଓ ଆତାସବାଜୀ ଫୁଟିଛି। ପୂରା ଭାରତ ବର୍ଷରେ ଦୀପାବଳି ଧୁମ୍ଧାମରେ ପାଳନ କରାଯାଇଥିବା ବେଳେ ଏହି ପର୍ବର ମାହୋଲ ବିଦେଶ ମାଟିରେ ମଧ୍ୟ ଦେଖିବାକୁ ମିଳିଛି। ବିଦେଶରେ ବସବାସ କରୁଥିବା ଭାରତୀୟ ବଂଶୋଦ୍ଭବମାନେ ନିଜ ଘରକୁ ରଂଗୀନ ଆଲୋକରେ ସଜାଇ ଥିବା ବେଳେ ବାଣଫୋଟକା ଫୁଟାଇଛନ୍ତି। ଦୀପାବଳି ଯଦିଓ ଆଲୋକର ପର୍ବ ଏଥି ପାଇଁ ଘରଗୁଡ଼ିକୁ ପାରଂପରିକ ଓ ଇଲେକ୍ଟ୍ରି ଆଲୋକ ଦ୍ବାରା ସୁସଜ୍ଜିତ କରାଯିବା କଥା। ମାତ୍ର କିଛି ଦଶନ୍ଧି ହେଲା ଦେଶର ଏହି ବୃହତ୍ ପର୍ବରେ ବାଣ-ଫୋଟକାକୁ ଯୋଡ଼ି ଦିଆଯାଇଛି।
ଯୁବପିଢ଼ିଙ୍କୁ ଦୀପାବଳି ଯେତିକି ଖୁସି ଦେଉଛି, ସରକାର, ପ୍ରଶାସନ ଓ ପରିବେଶବିତ୍ମାନଙ୍କର ଚିନ୍ତା କେଇ ଗୁଣରେ ବଢ଼ାଇ ଦେଇଛି। ରାଷ୍ଟ୍ରୀୟ ରାଜଧାନୀ ନୂଆଦିଲ୍ଲୀ ଓ ଏହାର ଉପକଣ୍ଠ ଅଞ୍ଚଳରେ ଦୀପାବଳି ଅବସରରେ ବାଣ ଫୁଟାଇବା ପାଇଁ ମାର୍ଗଦର୍ଶିକା ଜାରି କରାଯାଇଥିବା ବେଳେ ସାଧାରଣ ଜନତା ଏହାର ଅବମାନନା କରିଛନ୍ତି। ଅନେକ ସହରରେ ବାଣ ଫୁଟାଇବା ପାଇଁ ଦୀପାବଳି ପାଇଁ ୨୦୨୩ ନଭେମ୍ବର ୧୨ ତାରିଖ ସମୟ ରାତି ୮ଟାରୁ ୧୨ଟା ପର୍ଯ୍ୟନ୍ତ ରଖାଯାଇଥିଲା। କିନ୍ତୁ ଲୋକେ ନିୟମ ଉଲ୍ଲଂଘନ କରିଥିଲେ। ରାତି ୨ଟା ପର୍ଯ୍ୟନ୍ତ ବାଣର ଶବ୍ଦ ଶୁଭୁଥିଲା।
ଆଶ୍ବସ୍ତି ମିଳିଥିଲା, ଚିନ୍ତା ବଢ଼ିଲା
ଦୀପାବଳିର ସନ୍ଧ୍ୟାରେ ଦିଲ୍ଲୀ-ଏନ୍ସିଆରର ଲୋକଙ୍କୁ ପ୍ରାୟ ଏକ ସପ୍ତାହ ପରେ ଖରାପ ବାୟୁ ପ୍ରଦୂଷଣରୁ ଆଶ୍ବସ୍ତି ମିଳିଥିଲା। କିନ୍ତୁ ଦୀପାବଳି ରାତିରେ ଦିଲ୍ଲୀ-ଏନ୍ସିଆରରେ ବାୟୁ ପ୍ରଦୂଷଣ ପୁଣିଥରେ ଗମ୍ଭୀର ସ୍ଥିତିରେ ପହଞ୍ଚିଛି। ସୁପ୍ରିମକୋର୍ଟଙ୍କ ଦ୍ବାରା ଅଧିକ ଶବ୍ଦ କରୁଥିବା ବାଣ ନିଷିଦ୍ଧ କରାଯାଇଥିବା ବେଳେ ଲୋକେ କିନ୍ତୁ ନିୟମକୁ ପାଳନ କରି ନଥିଲେ। ଏହି କାରଣରୁ ନୂଆଦିଲ୍ଲୀ ଓ ଏହାର ଆଖପାଖ ଅଞ୍ଚଳରେ ପ୍ରଦୂଷଣ ସ୍ତର ବଢ଼ିଯାଇଛି।
ଦିଲ୍ଲୀରେ ବାୟୁ ୨୦୦୦ ପିପିଏମ୍
ଦିଲ୍ଲୀ ପ୍ରଦୂଷଣ ନିୟନ୍ତ୍ରଣ ବୋର୍ଡ (ଡିପିସିସି) ଅନୁସାରେ ଆନନ୍ଦବିହାରରେ ପିଏମ୍୨.୫ ସ୍ତରର ସନ୍ଦ୍ରତା ରବିବାର ସନ୍ଧ୍ୟା ୫ଟା ପର୍ଯ୍ୟନ୍ତ ୫୬ପିପିଏମ୍ ଭିତରେ ଥିଲା। ମଧ୍ୟ ରାତ୍ରି ବେଳକୁ ଏହା ୨୦୦୦ ପିପିଏମ୍ ପର୍ଯ୍ୟନ୍ତ ବଢ଼ି ଯାଇଥିଲା। ବାୟୁ ପ୍ରଦୂଷଣ କେବଳ ଦିଲ୍ଲୀବାସୀଙ୍କ ପାଇଁ ନୁହେଁ। ବରଂ ସମଗ୍ର ଦେଶ ପାଇଁ ଚିନ୍ତା ବଢ଼ାଇଛି। ପରିବେଶ ସୁରକ୍ଷା ପାଇଁ ସମଗ୍ର ବିଶ୍ବବାସୀ ଚିନ୍ତା କରୁଥିବା ବେଳେ ଭାରତରେ ସରକାରୀ ନିୟମକୁ ଲୋକେ ଅଣଦେଖା କରୁଥିବାରୁ କୃତିମ ଉପାୟରେ ବାୟୁରେ ବିଷ ମିଶାଯାଉଛି।
ପ୍ରଦୂଷଣ ବଳୟରେ ଓଡ଼ିଶା
ବାୟୁ ପ୍ରଦୂଷଣ ଏକ ବିଶ୍ବସ୍ତରୀୟ ସମସ୍ୟା। ଜଙ୍ଗଲ ଅବକ୍ଷୟ, କଳକାରଖାନାରୁ ନିର୍ଗତ ଧୂଆଁ ବାୟୁ ପ୍ରଦୂଷଣକୁ ବଢ଼ାଉଛି। ଦୀପାବଳିର ପରଦିନ ଅର୍ଥାତ ନଭେମ୍ବର ୧୩ ତାରିଖ (ସୋମବାର ) ଓଡ଼ିଶାର ବଡ଼ବଡ଼ ସହରରେ ବାୟୂ ପ୍ରଦୂଷଣର ମାତ୍ରା ବୃଦ୍ଧି ପାଇଛି। ଭୁବନେଶ୍ବରରେ ଏକ୍ୟୁଆଇ ୩୪୦ ରେକର୍ଡ କରାଯାଇଛି। ସେହିପରି କଟକରେ ୩୧୭, ଅନୁଗୁଳରେ ୩୦୬, ବାଲେଶ୍ବରରେ ୩୩୪, ତାଳଚେରରେ ୩୫୨, ବିହାରର ବେଗୁସରାଇରେ ୩୮୧, ଭାଗଲପୁରରେ ୩୩୬, ଗୟାରେ ୩୧୧, ପାଣଣାରେ ୩୩୮, ପୂର୍ଣ୍ଣିଆରେ ୩୩୮, ରାଜଗିରରେ ୩୫୨, କଟିହାରରେ ୩୧୫, ରାଜସ୍ଥାନର ଧୌଳପୁରରେ ୩୨୦, କୋଟାରେ ୩୦୪, ମହାରାଷ୍ଟ୍ରର ଧୁଲେରେ ୩୧୭ରେ ପହଞ୍ଚିଛି। ତେବେ ଏକ୍ୟୁଆଇ ଶନ୍ୟରୁ ୫୦ ମଧ୍ୟରେ ଭଲ। ୫୧ରୁ ୧୦୦ ମଧ୍ୟରେ ସନ୍ତୋଷଜନକ। ୧୦୧ରୁ ୨୦୦ ମଧ୍ୟରେ ମଧ୍ୟମ, ୨୦୧ରୁ ୩୦୦ ମଧ୍ୟରେ ଖରାପ। ୩୦୧ର ୪୦୦ ମଧ୍ୟରେ ବହୁତ ଖରାପ ଏବଂ ୪୦୧ରୁ ୪୫୦ ଚିନ୍ତଜନକ ବୋଲି ପାରାମିଟରରେ କୁହାଯାଇଛି।
ସୁପ୍ରିମକୋର୍ଟଙ୍କ ନିର୍ଦ୍ଦେଶ ଫୁ’
ଦିଲ୍ଲୀର ଶାହପୁର ଜାଟ, ହୌଜଖାସ, ଡିଫେନ୍ସ କଲୋନି, ଛତରପୁର, ଇଷ୍ଟ ଅଫ୍ କୈଳାଶା, ମନ୍ଦିର ମାର୍ଗ ଓ ପାହାଡ଼ଗଂଜ ଅଞ୍ଚଳରେ ଲୋକେ ବ୍ୟାପକ ପରିମାଣରେ ବାଣ ଫୁଟାଇଛନ୍ତି। ଏଠାରେ ଲୋକେ ସନ୍ଧ୍ୟା ୬ଟା ପରଠାରୁ ଜୋରଦାର ବାଣ ଫୁଟିବା ଆରମ୍ଭ କରିଥିଲା। ବାଣର ଶବ୍ଦ ବିଳମ୍ବିତ ରାତିଯାଏଁ ଶୁଭିଥିଲା। ପରିବେଶବିତ୍ଙ୍କ କହିବା ଅନୁସାରେ ସୁପ୍ରିମ୍କୋର୍ଟଙ୍କ କଡ଼ା ନିର୍ଦ୍ଦେଶ ପରେ ବି ଲୋକେ ମାନିଲେ ନାହିଁ। ଏହାର କାରଣ ପ୍ରଶାସନିକ ଅଧିକାରୀଙ୍କ ଅବହେଳା। ତେବେ କୋର୍ଟଙ୍କ ନିୟମ ନମାନିବା ଠାରୁ ନିଜ ଛୋଟଛୋଟ ପିଲାଙ୍କୁ ପ୍ରଦୂଷିତ ଅଞ୍ଚଳରେ ଜିଇଁବାକୁ ପଡୁଥିବାରୁ ଏହା ଅଧିକ ବିପଦ ବୋଲି ବିବେଚନା କରାଯାଉଛି।
