ଭୁବନେଶ୍ୱର: ବିଳମ୍ବରେ ହେଲେ ବି ରାଜ୍ୟ ସରକାର ଓଡ଼ିଶା ମୋଟରଯାନ ଡ୍ରାଇଭର ଓ କର୍ମଚାରୀ କଲ୍ୟାଣ ଯୋଜନା-୨୦୨୩ ଅନୁମୋଦନ କରିଛନ୍ତି । ଏଥି ସହିତ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କଲ୍ୟାଣ ବୋର୍ଡ ଗଠନକୁ ସ୍ୱୀକୃତି ପ୍ରଦାନ କରିଛନ୍ତି । ବାଣିଜ୍ୟ ଓ ପରିବହନ ମନ୍ତ୍ରୀ ଟୁକୁନି ସାହୁଙ୍କ ଦ୍ୱାରା ଯୋଜନା ଆରମ୍ଭ ହୋଇଯାଇଥିବା ବେଳେ ରାଜ୍ୟର ଲକ୍ଷ ଲକ୍ଷ ଡ୍ରାଇଭର ଓ ସେମାନଙ୍କର ପରିବାରରେ ଖୁସିର ଲହରି ଖେଳି ଯାଇଛି । ଏଣିକି ଡ୍ରାଇଭର, ମୋଟର ଯାନ କର୍ମଚାରୀଙ୍କର ଦୁର୍ଘଟଣାରେ ମୃତ୍ୟୁ ହେଲେ ତାଙ୍କ ନିକଟ ସଂପର୍କୀୟଙ୍କୁ ୪ ଲକ୍ଷ ଟଙ୍କା ଅନୁକମ୍ପାମୂଳକ ରାଶି ମିଳିବ । ଅତି ଗୁରୁତର ଆଘତ କ୍ଷେତ୍ରରେ ୮୦ ହଜାର ଏବଂ ସ୍ଥାୟୀ ଭାବେ ଅକ୍ଷମତା ଯୋଗୁଁ ଦେଢ଼ ଲକ୍ଷ ଟଙ୍କା ପ୍ରଦାନ କରାଯିବ । ମାତ୍ର ସ୍ୱାଭାବିକ ମୃତ୍ୟୁ ହେଲେ ୨ ଲକ୍ଷ ଟଙ୍କା ଅନୁକମ୍ପାମୂଳକ ରାଶି ମିଳିବ ।
ରାଜ୍ୟ ସରକାରଙ୍କ ଏହି ପଦକ୍ଷେପକୁ ବୁଦ୍ଧିଜୀବୀ ମହଲରେ ସ୍ୱାଗତ କରାଯାଉଛି । ଏହାର କାରଣ ହେଲା ଯେ, ଜଣେ ଡ୍ରାଇଭର ତା’ ଜୀବନରେ ସ୍ଥାନୀୟ ଅଞ୍ଚଳ ସହିତ ଦେଶର ଭୂମିକାରେ ବଡ଼ ଯୋଗଦାନ ରଖିଥାଏ । ଟ୍ରକ୍ ଏବଂ ବସ୍ରେ କାର୍ଯ୍ୟରତ କର୍ମଚାରୀମାନେ ପରୋକ୍ଷ ଏବଂ ପ୍ରତକ୍ଷ୍ୟ ଭାବେ ବିକାଶ ଦିଗରେ କାମ କରିଥାନ୍ତି । ଆମ ସମାଜରେ ବସବାସ କରୁଥିବା ଅନେକ ଲୋକେ ଯଦିଓ ପରିବହନ ବିଭାଗରେ କାର୍ଯ୍ୟରତ ଜଣେ କର୍ମଚାରୀଙ୍କ ମୂଲ୍ୟ ବୁଝିପାରନ୍ତି ନାହିଁ, ତଥାପି ସେମାନଙ୍କୁ ଜାଣିବାକୁ ହେବ ଯେ, ସାଧାରଣ ପରିବହନ ଏବଂ ମାଲଗାଡ଼ି ଚଳାଚଳ ବିନା ବହୁତ ବଡ଼ ଅସୁବିଧା ହେବ ।
ସାଧାରଣ ପରିବହନ ବ୍ୟବସ୍ଥା ଶସ୍ତା
ତଥ୍ୟ ଅନୁସାରେ ରାଜ୍ୟରେ ବର୍ତ୍ତମାନ ୫ ଲକ୍ଷରୁ ଊର୍ଦ୍ଧ୍ୱ କର୍ମଚାରୀ ପରିବହନ କ୍ଷେତ୍ରରେ କାର୍ଯ୍ୟରତ ଅଛନ୍ତି । ଏଥିରେ ଡ୍ରାଇଭର, ହେଲ୍ପର, ଅଫିସ ପରିଚାଳନା ଆଦି ସାମିଲ ଅଛନ୍ତି । ସର୍ବସାଧାରଣ ପରିବହନ କ୍ଷେତ୍ରରେ ଡ୍ରାଇଭର ହେଲପରଙ୍କୁ ଆମେ ଜାଣିଛେ । ଏମାନଙ୍କ ମଧ୍ୟରୁ ବସ୍ରେ କାର୍ଯ୍ୟରତ ବସ୍ ଓ ହେଲପରଙ୍କ ପରିଶ୍ରମକୁ ଦେଖିଛେ । ସେମାନେ ସକାଳ ଠାରୁ ସନ୍ଧ୍ରା ପର୍ଯ୍ୟନ୍ତ ଖରା, ବର୍ଷା ଓ ଶୀତକୁ ଖାତିର ନ କରି କାର୍ଯ୍ୟ କରିଥାନ୍ତି । ବସ ଚାଳଚଳ ବନ୍ଦ ହୋଇଗଲେ ଲୋକ ଭାରି ହଇରାଣର ସାମ୍ନା କରିଥାନ୍ତି । କାରଣ ସମସ୍ତଙ୍କ ପାଖରେ ବ୍ୟକ୍ତିଗତ ଯାନବାହନ ନଥାଏ । ଯେଉଁମାନଙ୍କ ପାଖରେ ଯାନବାହନ ଅଛି, ସେମାନେ ମଧ୍ୟ ଦୂରଯାଗାକୁ ଯିବା ପାଇଁ ଆର୍ଥିକ ଦୃଷ୍ଟିରୁ ଅକ୍ଷମତା ସ୍ୱୀକାର କରନ୍ତି । ଉଦାହରଣ ସ୍ୱରୂପ ଜଣେ ବ୍ୟକ୍ତି ମାଲକାନଗିରିରୁ ଭୁବନେଶ୍ୱର ବସ୍ରେ ଆସିଲେ ଯିବା ଆସିବା ପାଇଁ ୨୪୦୦ ଟଙ୍କା ଖର୍ଚ୍ଚ ହୋଇଥାଏ । କିନ୍ତୁ ବ୍ୟକ୍ତିଗତ କାରରେ ଆସିଲେ ପାଖାପାଖି ୧୦,୦୦୦ ଟଙ୍କା ଖର୍ଚ୍ଚ ହେବ । ତେଣୁ ଏଥିରୁ ଅନୁମାନ କରାଯାଇପାରିବ ଯେ, ସାଧାରଣ ପରିବହନ ବ୍ୟବସ୍ଥା ଲୋକଙ୍କ ଖର୍ଚ୍ଚ କେମିତି ହ୍ରାସ କରେ ।
୧୪ ମାସ ପରେ ଫଳ ମିଳିଲା
ସେହିପରି ଟ୍ରକ୍ ଡ୍ରାଇଭର ଏବଂ ହେଲପରଙ୍କ ଭୂମିକାକୁ ଭୁଲି ହେବ ନାହିଁ । ଟ୍ରକ୍ଗୁଡ଼ିକ ଘରୋଇ ସଂସ୍ଥା ଅଥବା ବ୍ୟକ୍ତିଗତ ମାଲିକାନା ଥିବା ସତ୍ତ୍ୱେ ସରକାର ଏବଂ ଘରୋଇ ସଂସ୍ଥା ପାଇଁ ପରିବହନ କରି ଏମାନେ ଦେଶକୁ ଖାଦ୍ୟ ଏବଂ ଅନ୍ୟ ଜିନିଷ ଯୋଗାଇଥାନ୍ତି । ୨୦୨୦ ମାର୍ଚ୍ଚ ୨୫ରେ ଯେତେବେଳେ ଦେଶରେ କୋଭିଡ-୧୯ ପାଇଁ ଲକଡାଉନ୍ ଆରମ୍ଭ ହୋଇଯାଇଥିଲା, ସେହି ସମୟରେ ନିଜ ଜୀବନକୁ ବାଜି ଲଗାଇ ଡ୍ରକ୍ ଡ୍ରାଇଭର ଓ ହେଲପରମାନେ କାର୍ଯ୍ୟ କରୁଥିଲେ । ସେହି ସମୟରେ ଟ୍ରେନ୍, ବସ୍ ଓ ଅନ୍ୟ ସାଧାରଣ ପରିବହନ ବ୍ୟବସ୍ଥା ଠପ୍ ହୋଇଯାଇଥିଲା । ସରକାର ଅନ୍ୟ ସବୁ ବିଭାଗର ସୁରକ୍ଷା ପାଇଁ କାମ କରୁଥିବା ବେଳେ ପରିବହନ ବିଭାଗରେ କାର୍ଯ୍ୟରତ କର୍ମଚାରୀଙ୍କ ଉନ୍ନତି ଏବଂ ବିକାଶ ପାଇଁ କାର୍ଯ୍ୟ କରିବା ଜରୁରୀ ଥିଲା । ଓଡ଼ିଶା ଡ୍ରାଇଭର ସଂଘ ନିଜର ଦାବି ଉଠାଇ ୨୦୨୨ ଏପ୍ରିଲ ୧୮ ତାରିଖରେ ଯେଉଁ ଆନ୍ଦୋଳନ କରିଥିଲେ, ଏବେ ତାହାର ଫଳ ମିଳିଛି ।
ପରିବାରଙ୍କୁ ମିଳିଲା ଆଶ୍ୱସ୍ତି
ଓଡ଼ିଶାର ଡ୍ରାଇଭରମାନେ ମାସିକ ୨୦ରୁ ୩୦ ହଜାର ଟଙ୍କା ରୋଜଗାର କରନ୍ତି । ହେଲପରମାନଙ୍କ ରୋଜଗାର ସେମିତି କିଛି ଧାର୍ଯ୍ୟ ନଥାଏ । ମାଲିକ ଓ ଡ୍ରାଇଭରମାନେ ହାତଖର୍ଚ୍ଚ ଦେଇଥାନ୍ତି । ଦୁଇରୁ ୩ ବର୍ଷ ହେଲପର ଭାବେ କାର୍ଯ୍ୟ କରିବା ପରେ ଗାଡ଼ି ଚଳାଇବାକୁ ସୁଯୋଗ ମିଳିଥାଏ । ଡ୍ରାଇଭରମାନଙ୍କର ଜୀବନ ରାସ୍ତାରେ ହିଁ ବିତିଥାଏ । ତାଙ୍କ ଜୀବନରେ ସେମାନେ ଲକ୍ଷ ଲକ୍ଷ ଲୋକଙ୍କୁ ନେବା ଆଣିବା କରନ୍ତି । ଅଥବା ଲକ୍ଷାଧିକ ଲୋକଙ୍କ ପାଇଁ ଖାଦ୍ୟ ଶସ୍ୟ ଏବଂ ଅନ୍ୟ ଜିନିଷ ପରିବହନ କରିଥାନ୍ତି । କିନ୍ତୁ ଦୁଃଖର ବିଷୟ ହେଲା ଯେ, ଯଦି ଦୁର୍ଘଟଣାରେ ସେମାନଙ୍କର ମୃତ୍ୟୁ ହୋଇଯାଏ, ତାହେଲେ ତାଙ୍କର ପରିବାରର ଅବସ୍ଥା ଦୟନୀୟ ହୋଇଯାଇଥାଏ । ଏପରି କ୍ଷେତ୍ରରେ ରାଜ୍ୟ ସରକାରଙ୍କ ଘୋଷଣାରୁ ସେମାନଙ୍କୁ ସାମାନ୍ୟ ଆଶ୍ୱସ୍ତି ପ୍ରଦାନ କରିବ ।
ଟ୍ରକ ଡ୍ରାଇଭରଙ୍କ ରୋଜଗାର ୮ ଲକ୍ଷ
ଆମେରିକାରେ ଜଣେ ଟ୍ରକ୍ ଡ୍ରାଇଭର ମାସକୁ ଭାରତୀୟ ମୁଦ୍ରା ହିସାବରେ ୮ ଲକ୍ଷ ଟଙ୍କା ରୋଜଗାର କରନ୍ତି । ଭାରତରେ ଜଣେ ବଡ଼ ଡାକ୍ତର ମଧ୍ୟ ମାସକୁ ୮ ଲକ୍ଷ ଟଙ୍କା ରୋଜଗାର କରିବା ସମ୍ଭବ ନୁହେଁ । ଯାହାଙ୍କ ପାଖରେ ବ୍ୟବସାୟ ବିନିଯୋଗ ପାଇଁ ଟଙ୍କା ନାହିଁ, ସେମାନେ ବିକଳ୍ପ ଭାବେ ଟ୍ରକ ଚଲାନ୍ତି । ପୂର୍ବତନ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି ଏହା କହିଛନ୍ତି । ରାହୁଲ କହିଛନ୍ତି ଯେ, ସେ ନିକଟରେ ୱାଶିଂଟନରୁ ନ୍ୟୁୟର୍କ ଏକ ଟ୍ରକରେ ୧୯୦ କିଲୋମିଟର ଯାଇଥିଲେ । ସେ ଯେଉଁ ଟ୍ରକରେ ଯାଇଥିଲେ, ଏହାକୁ ଜଣେ ଭାରତୀୟ ଡ୍ରାଇଭର ତେଜିନ୍ଦର ଗିଲ ଚଳାଉଥିଲେ । ଯାତ୍ରା ସମୟରେ ତେଜିନ୍ଦରଙ୍କ ସହିତ ରାହୁଲ କଥା ହୋଇଥିଲେ । ଗଣମାଧ୍ୟମକୁ ରାହୁଲ କହିଛନ୍ତି ଯେ, ଆମେରିକୀୟ ଟ୍ରକ୍ ଗୁଡ଼ିକ ଆରାମଦାୟକ । ଡ୍ରାଇଭରଙ୍କୁ ସୁହାଇଲା ଭଳି ନିର୍ମାଣ ହୋଇଥାଏ । ଭାରତରେ ସେହିଭଳି ନୁହେଁ । ରାହୁଲ କହିଛନ୍ତି ଭାରତରେ ଟ୍ରକ୍ଗୁଡ଼ିକ ଟ୍ରକ୍ ଡ୍ରାଇଭରଙ୍କ ପାଇଁ ତିଆରି ହୋଇ ନଥାଏ ।
