ଭୁବନେଶ୍ୱର: ସାରା ଓଡ଼ିଶାରେ ଏପ୍ରିଲ ୨୩ ତାରିଖ ଦିନ ପବିତ୍ର ଅକ୍ଷୟ ତୃତୀୟ ଦିବସ ପାଳିତ ହୋଇଯାଇଛି । ଶ୍ରୀମନ୍ଦିର ସମେତ ସମେତ ଅନ୍ୟ ହିନ୍ଦୁ ଧାର୍ମିକ ସ୍ଥଳରେ ଏହି ପର୍ବର ଆୟୋଜନ କରାଯାଇଛି । ଗୃହ ପ୍ରବେଶ, ଗୃହନିର୍ମାଣ କାମ, ବିବାହ, ନିବନ୍ଧ, ବ୍ୟବସାୟ ଆଦି କାର୍ଯ୍ୟ ମଧ୍ୟ ଆରମ୍ଭ ହୋଇଛି । ତେବେ ଅକ୍ଷୟ ତୃତୀୟା କୃଷକମାନଙ୍କ ପାଇଁ ଗୁରୁତ୍ୱପୂର୍ଣ୍ଣ ଦିନ । କାରଣ ଏହି ଦିନ ଚାଷୀ ନିଜର ଚାଷକାମ ଆରମ୍ଭ କରିଥାଏ । ଅଖିମୁଠି ଅନୁକୂଳ କରିବା ସହିତ ଚାଷ ପାଇଁ ବର୍ଷର ଚାଷ ପାଇଁ ଯୋଜନା ଆରମ୍ଭ କରିଦେଇଥାଏ । ଫସଲ ଅଧିକ ଉପାର୍ଜନ କରିବା ପାଇଁ ଆଜିକାଲି ଚାଷୀଭାଇମାନେ ରାସାୟନିକ ସାର ଓ ମାତ୍ରାଧିକ ଔଷଧ ବ୍ୟବହାର କରୁଛନ୍ତି । କିନ୍ତୁ ଏହା ସ୍ୱାସ୍ଥ୍ୟକୁ ଅସୁବିଧା ପହଞ୍ଚାଇଥାଏ । କିନ୍ତୁ ଜୈବିକ ପଦ୍ଧତିରେ ଚାଷ ଉପୁଜାଇବା ଦ୍ୱାରା ଅଧିକ ଉତ୍ପାଦନ ସହ ଏହା ଖାଇବା ଦ୍ୱାରା ସ୍ୱାସ୍ଥ୍ୟକୁ ଉପକାର ମିଳିଥାଏ ।
କୃଷି ଖେତରେ ରାସାୟନିକ ସାରର ବ୍ୟବହାର କରାଯିବା ଦ୍ୱାରା ଜମିର ଉର୍ବରତା ଉପରେ ବଡ଼ ପ୍ରଭାବ ପକାଇଥାଏ । ଫସଲ ଯଦିଓ ଭଲ ଉତ୍ପାଦନ ହୋଇଥାଏ, ତଥାପି ଫସଲରେ ପ୍ରଚୁର ପରିମାଣରେ ସାର ଓ ଔଷଧ ବ୍ୟବହାର କରାଯିବା ଦ୍ୱାରା, ତାହା ଶରୀର ଉପରେ ପ୍ରଭାବ ପକାଇଥାଏ । ତେଣୁ ଜୈବିକ କୃଷି ପଦ୍ଧତିରେ ଚାଷ କରାଯିବା ଦ୍ୱାରା ସମସ୍ତଙ୍କର ପାଇଁ ମଙ୍ଗଳ ହୋଇଥାଏ । ତେଣୁ କିଛି ରାଜ୍ୟର ସରକାର ଖେତରେ ରାସାୟନିକ ସାର ବଦଳରେ ଜୈବିକ ଖାଦ୍ୟର ବ୍ୟବହାର କରିବାକୁ ପ୍ରୋତ୍ସାହନ ଯୋଗାଉଛନ୍ତି । ବିହାର ସରକାର ଜୈବିକ ପଦ୍ଧତିରେ ଚାଷ କରିବା ପାଇଁ ଆର୍ଥିକ ସହାୟତା ପ୍ରଦାନ କରୁଛନ୍ତି । ଅତୀତରେ ଚାଷୀ ପ୍ରାକୃତିକ ଉପାୟତରେ ଚାଷ କାମ କରୁଥିଲେ । ସେଥି ପାଇଁ ସେମାନେ ଉତ୍ପାଦନ କରୁଥିବା ଖାଦ୍ୟଶସ୍ୟ ସେବନ କରିବା ଦ୍ୱାରା ଆଜିକାଲି ଭଳି ରୋଗ ହେଉନଥିଲା । ଆଜିକାଲିର ଲୋକଙ୍କ ତୁଳନାରେ ସେହି ସମୟରେ ଲୋକେ ଅଧିକ ସୁସ୍ଥ ଓ ବଳବାନ ରହୁଥିଲେ ।
ଜୈବିକ କୃଷିକୁ ବିହାରରେ ପ୍ରୋତ୍ସାହନ
ବିହାର କୃଷି ବିଭାଗ ଅନୁସାରେ ଜୈବିକ ଚାଷ କରୁଥିବା ଚାଷୀଙ୍କୁ ଏକର ପିଛା ୬୫୦୦ ଟଙ୍କା ମିଳିବ । ଚାଷୀମାନଙ୍କୁ ଏହି ରାଶି ଜୈବିକ ପ୍ରୋତ୍ସାହନ ଯୋଜନା ଅନୁସାରେ ଦିଆଯିବ । ଏହି ରାଶି ପାଇବା ପାଇଁ ଚାଷୀମାନଙ୍କ ପାଖରେ ୨.୫ ଏକର ଜମି ଥିବା ଦରକାର । ଏଥି ପାଇଁ ଚାଷୀମାନଙ୍କୁ ୧୬ ହଜାର ୨୫୦ ଟଙ୍କା ପ୍ରୋତ୍ସାହନ ରାଶି ଦିଆଯିବ । ବିହାରର ଚାଷୀମାନେ ରାଜ୍ୟ ସରକାରଙ୍କ ୱେବସାଇଟକୁ ଯାଇ ଆବେଦନ କରିପାରିବେ ।
ଜୈବିକ ପଦ୍ଧତିରେ କମ ଖର୍ଚ୍ଚ
ରାସାୟନିକ ଓ ଜୈବିକ ଚାଷ ମଧ୍ୟରେ ଖର୍ଚ୍ଚ ବଡ଼ ବ୍ୟବଧାନ ଦେଖାଯାଇଥାଏ । ଯଦି ଗୋଟିଏ ଏକର ଜମିକୁ ରାସାୟନିକ ପଦ୍ଧତିରେ କରାଯାଏ ୩୦ ହଜାର ପର୍ଯ୍ୟନ୍ତ ଖର୍ଚ୍ଚ ହେବ । କିନ୍ତୁ ଜୈବିକ ପଦ୍ଧତିରେ ମାତ୍ର ୫ ହଜାର ଟଙ୍କା ଲାଗିବ । ଅନ୍ୟପଟରେ ଯଦି ଉତ୍ପାଦନ କଥା କହିବା ରାସାୟନିକ ପଦ୍ଧତି ତୁଳନାରେ ଜୈବିକ ଚାଷରୁ ୨୦ ପ୍ରତିଶତ ଅଧିକ ଅମଳ ହେବ । ସେହିପରି ଜୈବିକ ପଦ୍ଧତିରେ ଉତ୍ପାଦନ ହୋଇଥିବା ଫସଲ କିଣିବାକୁ ଗ୍ରାହକଙ୍କ ଲମ୍ବା ଲାଇନ ଲାଗିଥାଏ, ଯାହା ରାସାୟନିକ ପଦ୍ଧତିରେ ସେହି ପରିମାଣରେ ଗ୍ରାହକ ଉତ୍ସାହିତ ନଥାନ୍ତି । ଜୈବିକ ଚାଷରୁ ଅନେକ ଲାଭ ମିଳିଥାଏ । ଏହି ପଦ୍ଧତି ଅନୁସରଣ କରିବା ଦ୍ୱାରା ମାଟିରୁ ଉର୍ବରତା ବହୁ ବର୍ଷ ପର୍ଯ୍ୟନ୍ତ ହ୍ରାସ ପାଏନାହିଁ । ଏଥି ସହିତ ଜମିରେ ଖର୍ଚ୍ଚ କମ ହୋଇଥାଏ । ପରିବେଶ ଉପରେ ମଧ୍ୟ ଭଲ ପ୍ରଭାବ ପକାଇଥାଏ । ଭୂଜଳକୁ ପ୍ରୋତ୍ସାହନ ମିଳିଥାଏ । ଜୈବିକ ପଦ୍ଧତିରେ ଉତ୍ପାଦିତ ହୋଇଥିବା ଫସଲ ସ୍ୱାସ୍ଥ୍ୟ ପାଇଁ ଅଧିକ ଭଲ ।
ଚାଷରେ ଓଡ଼ିଶା ପଛୁଆ
ଭାରତ ଆଧୁନିକ ସଭ୍ୟତାରେ ପହଞ୍ଚି ଥିଲେ ବି କୃଷି ହେଉଛି ଏହାର ପ୍ରଥମ ଶିଳ୍ପ । ଯାହାକି ପୁରାତନ ସଭ୍ୟତା ମଧ୍ୟ ପ୍ରମାଣ ଦେଇଥାଏ । ୧୨୦ କୋଟିରୁ ଊର୍ଦ୍ଧ୍ୱ ଲୋକଙ୍କୁ ଆହାର ଯୋଗାଇବା ପାଇଁ କୃଷକମାନେ ନିଜ ଶରୀରରୁ ଝାଳ ବୁହାଇ କାମ କରିଥାନ୍ତି । ଦେଶରେ ଚାଷକାର୍ଯ୍ୟ ନହେଲେ ବଡ଼ ସଂକଟ ପଡ଼ିଯିବ । କାରଣ ବିଦେଶରୁ ଖାଦ୍ୟଶସ୍ୟ ଆଣି ବିଶାଳ ଭାରତୀୟ ଲୋକଙ୍କୁ ଖାଇବାକୁ ଦେବା ସହଜ ହେବ ନାହିଁ । ସରକାର ମଧ୍ୟ ଚାଷ ପାଇଁ ପ୍ରୋତ୍ସାହନ ଯୋଗାଉଛନ୍ତି । କିନ୍ତୁ ସବୁ ରାଜ୍ୟରେ ସମସ୍ତ ପ୍ରକାରର ଚାଷ ହୋଇପାରୁ ନଥିବାରୁ ଆବଶ୍ୟକ ଜିନିଷ ଅନ୍ୟ ରାଜ୍ୟରୁ ଆମଦାନୀ କରି ଚାହିଦା ପୂରଣ କରାଯାଇଥାଏ । ଉଦାହରଣ ସ୍ୱରୂପ ଓଡ଼ିଶାର ଆଳୁ ଚାହିଦା ପଶ୍ଚିମବଙ୍ଗ ପୂରଣ କରିଥାଏ । ମହାରାଷ୍ଟ୍ରରୁ ପିଆଜ, ମଧ୍ୟପ୍ରଦେଶରୁ ଡାଲି, ପଂଜାବରୁ ଗହମ, ଆନ୍ଧ୍ରପ୍ରଦେଶରୁ ମାଛ, ଅଣ୍ଡା ଓ ଫଳ ଆଦି ଆସିଥାଏ ।
