Saturday, April 13, 2024
Homeତଥ୍ୟ ଦେଇ ପାକିସ୍ତାନରୁ ଆଣୁଥିଲେ ଅର୍ଥ
Array

ତଥ୍ୟ ଦେଇ ପାକିସ୍ତାନରୁ ଆଣୁଥିଲେ ଅର୍ଥ

ଭୁବନେଶ୍ବର: ଶତ୍ରୁ ଦେଶ ପାକିସ୍ତାନ ସହିତ ଭାରତର କିଛି ଖଳପ୍ରକୃତିର ଲୋକ ସଂପର୍କ ରଖୁଛନ୍ତି। ଅର୍ଥ ଲୋଭରେ ପଡ଼ି ନିଜ ଦେଶର ଗୁରୁତ୍ବପୂର୍ଣ୍ଣ ତଥ୍ୟ ସେୟାର କରୁଛନ୍ତି। ପାକିସ୍ତାନ ସହଜରେ ଭାରତର ଶକ୍ତି ବିଷୟରେ ଅବଗତ ହେବା ସହିତ ମୁକାବିଲା ପାଇଁ ରଣନୀତି ପ୍ରସ୍ତୁତ କରୁଛି। ତେବେ କ୍ଷୋଭର ବିଷୟ ହେଲା ଯେ, ପାକିସ୍ତାନ ସହିତ ଓଡ଼ିଶାର କିଛି ଲୋକ ମଧ୍ୟ ସଂପର୍କ ରଖିବା। ୨୦୧୫ ମସିହାରେ ସମ୍ବଲପୁର ବିଶ୍ବବିଦ୍ୟାଳୟ ହ୍ୟାକ ହେବା ଓ ୨୦୨୧ ମସିହାରେ ବାଲେଶ୍ବର ଜିଲ୍ଲା ଚାନ୍ଦିପୁର ଆଇଟିଆରରୁ ତଥ୍ୟ ଲିକ୍ ହେବା ଘଟଣା ମନରୁ ଲିଭି ନଥିବା ବେଳେ ପାକିସ୍ତାନର ଓଟିପି ଲିଙ୍କ କାରବାର ପର୍ଦ୍ଦାଫାସ ହୋଇଛି। ଓଡ଼ିଶା ଉପରେ ପାକିସ୍ତାନର ନଜର ନେଇ ବୁଦ୍ଧିଜୀବୀ ମହଲରେ ଅସନ୍ତୋଷ ଦେଖାଯାଉଛି।

ଅଳ୍ପ କିଛି ବର୍ଷରେ ପାକିସ୍ତାନ ବାରମ୍ବାର ଭାରତରୁ ଗୁପ୍ତ ତଥ୍ୟ ହାସଲ କରିବାକୁ ଚାହିଁଛି। ଓଡ଼ିଶାରୁ ମଧ୍ୟ ତଥ୍ୟ ହାସଲ କରିଛି। ହ୍ୟାକର ମାଧ୍ୟମରେ ପୂର୍ବରୁ ଓଡ଼ିଶାର ତଥ୍ୟ ହାସଲ କରୁଥିଲା ବେଳେ ଏବେ ଏଜେଣ୍ଟ ମାଧ୍ୟମରେ ଏହି କାମ କରୁଛି। ଏସ୍ଟିଏଫ୍ ଟିମ୍ ଏଭଳି ଏକ ଅଭାବନୀୟ ଘଟଣାର ପର୍ଦ୍ଦାଫାସ କରିଛି। ଏସ୍ଟିଏଫ୍ ଟିମ୍ ନୟାଗଡ଼ର ପଠାଣି ସାମନ୍ତ ଲେଙ୍କା, ସରୋଜ କୁମାର ନାୟକ ଓ ଯାଜପୁରର ସୌମ୍ୟ ପଟ୍ଟନାୟକଙ୍କୁ ଗିରଫ କରିବା ସହିତ ସେମାନଙ୍କ ଠାରୁ ୧୯ଟି ଦାମୀ ମୋବାଇଲ, ୪୭ଟି ସିମକାର୍ଡ, ୬୧ଟି ଏଟିଏମ୍ କାର୍ଡ ଓ ୨୩ଟି ସିମ କଭର ଜବତ କରିଛି। ଏହି ଅଭିଯୁକ୍ତମାନେ ଓଟିପି ସେୟାରିଂ ସ୍କାମ କରି କିଛି ପାକିସ୍ଥାନୀ ଇଣ୍ଟେଲିଜେନ୍ସ ଅଧିକାରୀ ଓ ଆଇଏସଆଇ ଏଜେଣ୍ଟମାନଙ୍କୁ ଲିଙ୍କ ଜେନେରେଟ କରି ତଥ୍ୟ ଦେଉଥିଲେ। ଏଥିପାଇଁ ଭାରତରେ ଥିବା ପାକିସ୍ଥାନୀ ଏଜେଣ୍ଟ ସେମାନଙ୍କୁ ମୋଟା ଅଙ୍କର ଅର୍ଥ ଦେଉଥିଲେ।

ତିନି ଅଭିଯୁକ୍ତ ଗିରଫ

ଗିରଫ ହୋଇଥିବା ଓଡ଼ିଶାର ୩ଜଣ ଅଭିଯୁକ୍ତ ଗତବର୍ଷ ରାଜସ୍ଥାନରେ ହନିଟ୍ରାପ ମାମଲାରେ ଧରାଯାଇଥିବା ମହିଳା ପିଆଇଓ ଏଜେଣ୍ଟଙ୍କ ସହ ଯୋଗାଯୋଗରେ ଥିଲେ।। ସାମାଜିକ ଗଣମାଧ୍ୟମ  ପ୍ଳାଟ ଫର୍ମ ଯଥା ହ୍ବାଟ୍ସଆପ୍, ଟେଲିଗ୍ରାମ, ଇନଷ୍ଟାଗ୍ରାମରେ ବିଭିନ୍ନ ଆକାଉଣ୍ଟ କରି ପାକିସ୍ଥାନୀ ଏଜେଣ୍ଟଙ୍କୁ ଲିଙ୍କ ସେୟାର କରିଥିଲେ। ଏହି ଲିଙ୍କ ମାଧ୍ୟମରେ ପାକିସ୍ଥାନୀ ଏଜେଣ୍ଟମାନେ ଆତଙ୍କବାଦୀମାନଙ୍କ ସହ ଯୋଗାଯୋଗ କରୁଥିଲେ। ମାନବ ଚାଲାଣ, ହନି ଟ୍ରାପିଙ୍ଗ ଓ ଦେଶ ବିରୋଧୀ ପ୍ରଚାର କରୁଥିଲେ ପାକିସ୍ତାନୀ ଏଜେଣ୍ଟ। ଭାରତୀୟ ମୋବାଇଲ ନମ୍ବର ସଂଯୋଗ ଓ ଭାରତୀୟ ଲୋକଙ୍କ ନାଁରେ ସୋସିଆଲ ମିଡ଼ିଆ ଆକାଉଣ୍ଟ ଥିବାରୁ ଲୋକେ ଏହାକୁ ବିଶ୍ୱାସଯୋଗ୍ୟ ବୋଲି ଭାବୁଥିଲେ। ଅନଲାଇନ ସପିଙ୍ଗ ପାଇଁ ଅନେକ ଆକାଉଣ୍ଟ ଖୋଲି ଆତଙ୍କବାଦୀମାନଙ୍କୁ ସାମଗ୍ରୀ ଯୋଗାଣ କରାଯାଉଥିଲା।  

ଚାନ୍ଦିପୁର ତଥ୍ୟ ଲିକ୍

୨୦୨୧ ମସିହାର କଥା।  ଭାରତୀୟ ପ୍ରତିରକ୍ଷା ବିଭାଗର ‘ବ୍ରହ୍ମାସ୍ତ୍ର’ କୁହାଯାଉଥିବା ଅତ୍ୟାଧୁନିକ କ୍ଷେପଣାସ୍ତ୍ର ‘ବ୍ରହ୍ମୋସ୍‌ ଏବଂ ଅନ୍ୟ କ୍ଷେପଣାସ୍ତ୍ର ସମ୍ପର୍କିତ ଗୋପନୀୟ ତଥ୍ୟ ପାକିସ୍ତାନ ହାତରେ ଲାଗିଥିବା ଚର୍ଚ୍ଚା ସାରାଦେଶରେ ଚହଳ ସୃଷ୍ଟି କରିଥିଲା। କ୍ଷେପଣାସ୍ତ୍ର ସମ୍ପର୍କିତ ଯାନ୍ତ୍ରୀକ ଜ୍ଞାନକୌଶଳ ସଂକ୍ରାନ୍ତ ତଥ୍ୟ ଚାନ୍ଦିପୁର ଆଇଟିଆର‌ (ସମନ୍ବିତ ପରୀକ୍ଷଣ କେନ୍ଦ୍ର) ୩ନମ୍ବର ଲଞ୍ଚ୍‌ପ୍ୟାଡ୍‌ରୁ ଗିରଫ ୫ ଅଭିଯୁକ୍ତ ପାକିସ୍ତାନକୁ ବିକ୍ରି କରିଥିବା ଯେଉଁ ଚର୍ଚ୍ଚା ସୃଷ୍ଟି କରିଥିଲା। କ୍ରାଇମବ୍ରାଞ୍ଚ ଏହି ସମ୍ବେଦନଶୀଳ ଘଟଣାର ତଦନ୍ତ କରିଥିଲା। ଏହି ଟିମ୍ରେ ଭାରତୀୟ ବାୟୁସେନାର ତିନିଜଣିଆ ଟିମ୍‌ ମଧ୍ୟ ଥିଲେ। କ୍ରାଇମବ୍ରାଞ୍ଚ ମୁଖ୍ୟତଃ ପାକିସ୍ତାନୀ ଏଜେଣ୍ଟଙ୍କ ସହିତ ସମ୍ପର୍କ, ଟଙ୍କା କାରବାର ଓ ଅନ୍ୟ ସହଯୋଗୀଙ୍କ ବିଷୟରେ ତଥ୍ୟ ହାସଲ କରିଥିଲା। ମୋଟାମୋଟି ଭାବେ ପାକିସ୍ତାନ ଆଇଏସ୍‌ଆଇ ଲିଙ୍କରେ ଆଇଟିଆର‌ର ଏହି କର୍ମଚାରୀମାନେ ଫେସବୁକ୍‌ ମାଧ୍ୟମରେ ସମ୍ପର୍କ ଯୋଡ଼ିଥିଲେ। ପୂରା କାରବାର ଉତ୍ତରପ୍ରଦେଶର ହ୍ୟାଣ୍ତଲର‌ ନିୟନ୍ତ୍ରଣ କରୁଥିଲା। ପାକିସ୍ତାନରୁ ଫୋନ୍‌ କଲ୍‌ ଓ ଟଙ୍କା ଉତ୍ତରପ୍ରଦେଶ ଆସୁଥିଲା। ଚାନ୍ଦିପୁର ଆଇଟିଆର୍‌ରୁ କେଉଁ ତଥ୍ୟ ଚୋରି କରିବାର ଅଛି, ସେ ସମ୍ପର୍କରେ ଉତ୍ତରପ୍ରଦେଶରୁ ଫୋନ୍‌ କରି ହ୍ୟାଣ୍ତଲର‌ ପକ୍ଷରୁ ସେମାନଙ୍କୁ ନିର୍ଦ୍ଦେଶ ଦିଆଯାଉଥିଲା। ଆଇଟିଆର୍‌ କର୍ମଚାରୀଙ୍କ ନିକଟକୁ ଟଙ୍କା ବି ସିଧାସଳଖ ପାକିସ୍ତାନରୁ ନଆସି ଉତ୍ତରପ୍ରଦେଶର ହ୍ୟାଣ୍ତଲର‌ ମାଧ୍ୟମରେ ଆସିଥିଲା।  

ସମ୍ବଲପୁର ବିଶ୍ବବିଦ୍ୟାଳୟ ୱେବସାଇଟ୍ ହ୍ୟାକ

ସେହିପରି ୨୦୨୧ ଅକ୍ଟୋବର ଶେଷ ସପ୍ତାହରେ ସମ୍ବଲପୁର ବିଶ୍ବବିଦ୍ୟାଳୟର ୱେବ୍‌ସାଇଟ୍‌ ହ୍ୟାକ୍‌ ହୋଇଥିଲା। ପାକିସ୍ତାନୀ ସାଇବର୍‌ ଆତଙ୍କୀମାନେ ଏହି ୱେବ୍‌ସାଇଟ୍ ହ୍ୟାକ୍‌ କରିଥିବା ନେଇ ସେହି ସମୟରେ ଚର୍ଚ୍ଚା ହୋଇଥିଲା। ୱେବ୍‌ସାଇଟ୍‌ ହ୍ୟାକ୍ ହେବାପରେ ଛାତ୍ରଛାତ୍ରୀଙ୍କ ସମେତ ବିଶ୍ବବିଦ୍ୟାଳୟର ତଥ୍ୟ ଚୋରି ହୋଇଥିବା ଆଶଙ୍କା ବୃଦ୍ଧି ପାଇଥିଲା। ପାକିସ୍ତାନୀ ହ୍ୟାକର୍‌ ସମ୍ବଲପୁର ବିଶ୍ବବିଦ୍ୟାଳୟର ଗ୍ରିଭାନ୍‌ସ ୱେବ୍‌ସାଇଟ୍କୁ ହ୍ୟାକ୍ କରିଥିଲେ। ଲିଙ୍କ୍ ଖୋଲିଲେ ‘କିଲର୍- ହ୍ୟାକ୍ ବାଏ ଡେଭିଲ୍’ ଲେଖାଯାଉଥିଲା।  

RELATED ARTICLES

LEAVE A REPLY

Please enter your comment!
Please enter your name here

Most Popular

Recent Comments