Wednesday, February 21, 2024
Homeଦୋକାନରେ ଓଡ଼ିଆ ଭାଷା ଲେଖିଲେ ବଦଳିବନି ଭାଗ୍ୟ
Array

ଦୋକାନରେ ଓଡ଼ିଆ ଭାଷା ଲେଖିଲେ ବଦଳିବନି ଭାଗ୍ୟ

ଭୁବନେଶ୍ୱର: ରାଜ୍ୟ ସରକାର ପୁଣି ଥରେ ଓଡ଼ିଆ ପ୍ରୀତି ଦେଖାଇଛନ୍ତି । ଦୋକାନ ଓ ବ୍ୟବସାୟ ପ୍ରତିଷ୍ଠାନ ଆଗରେ ନାମଫଳକ ଓଡ଼ିଆରେ ଲେଖିବାକୁ ବାଧ୍ୟତାମୂଳକ କରିଛନ୍ତି । ଏଥି ସହିତ ଅମାନିଆଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବା ପାଇଁ ମଧ୍ୟ ଚେତାବନୀ ଦେଇଛନ୍ତି । ଓଡ଼ିଆ ଭାଷାକୁ କୌଣସି ମାଧ୍ୟମରେ ପ୍ରୋତ୍ସାହନ ଦିଆଯିବା ନିଶ୍ଚିତ ଭାବେ ସ୍ୱାଗତଯୋଗ୍ୟ ପଦକ୍ଷେପ । କିନ୍ତୁ ପ୍ରତିଟି କ୍ଷେତ୍ରରେ ଏହାକୁ ବାଧ୍ୟତାମୂଳକ କରାଯିବା ବୁଦ୍ଧିଜୀବୀମାନେ ସ୍ୱୀକାର କରନ୍ତି ନାହିଁ । ଦୋକାନରେ ନାମ ଫଳକ ଲେଖା ଗଲେ ଯଦିଓ ଲୋକଙ୍କୁ ଜାଣିବା ସୁବିଧା ହୋଇଥାଏ, ତଥାପି ଲୋକମାନେ ଏଠାରେ ଥିବା ଜିନିଷଗୁଡ଼ିକ ଦେଖି ସବୁ ଜାଣିପାରିଥାନ୍ତି । ଦୋକାନ ଆଗରେ ନାମଫଳକ ଓଡ଼ିଆରେ ଲେଖାଯିବାକୁ ନିର୍ଦ୍ଦେଶ ନୂଆ କଥା ନୁହେଁ । ପୂର୍ବରୁ ମଧ୍ୟ ଏହିଭଳି ହୋଇଛି ।  

ରାଜ୍ୟର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିଜେ ଓଡ଼ିଆ ଜାଣନ୍ତି ନାହିଁ । ଦୀର୍ଘ ୨୩ ବର୍ଷ ହେଲା କ୍ଷମତାରେ ରହି ମଧ୍ୟ ସେ ଓଡ଼ିଆ ଶିଖିବାକୁ ଚାହିଁଲେ ନାହିଁ । ପ୍ରଶାସନିକ ଅଧିକାରୀମାନଙ୍କର ଓଡ଼ିଆ ପ୍ରୀତି କମ । ଏପରିକି ମୁଖ୍ୟ ଶାସନ ସଚିବ ମଧ୍ୟ ସଂପୂର୍ଣ୍ଣ ରୂପେ ଓଡ଼ିଆ ଲେଖା ନଥିବା ଏକ ଚିଠି ନିକଟରେ ଭାଇରାଲ ହୋଇଥିଲା । ଅନ୍ୟ ମନ୍ତ୍ରୀ ଓ ଅଧିକାରୀଙ୍କ ଅବସ୍ଥା ନ କହିଲେ ଭଲ । ମୁଖ୍ୟମନ୍ତ୍ରୀ ନିର୍ବାଚନ ପ୍ରଚାର କାର୍ଯ୍ୟକ୍ରମ, ନବନିଯୁକ୍ତ କର୍ମଚାରୀଙ୍କୁ ଦିଗଦର୍ଶନ ଦେବା ବେଳେ ଓ ଅନ୍ୟ କିଛି ଗୁରୁତ୍ୱପୂର୍ଣ୍ଣ ସମୟରେ ବହୁ ସମୟ ଧରି ଓଡ଼ିଆରେ କହୁଥିବା ସମସ୍ତେ ଦେଖିଥିବେ । ଏହା ଭର୍ଚୁଆଲ ମାଧ୍ୟମରେ ହିଁ ସମ୍ଭବ ହୋଇଥାଏ । ତାଙ୍କର ସେହି ଭର୍ଚୁଆଲ କଥାକୁ ବୈତ୍ୟୁତିକ ମାଧ୍ୟମରେ ଉପସ୍ଥାପନା କରାଯାଇଥାଏ । ସଂପାଦନା ହୁଏ । ମୁଖ୍ୟମନ୍ତ୍ରୀଙ୍କ ଓଡ଼ିଆରେ ଭାଷଣ କେବଳ ରାଜ୍ୟବାସୀଙ୍କୁ ନିର୍ବୋଧ କରିବାର ଏକ ଉଦ୍ୟମ କହିଲେ କିଛି ଭୁଲ ହେବ ନାହିଁ ।

ମୁଖ୍ୟମନ୍ତ୍ରୀ କୁହନ୍ତୁ ଓଡ଼ିଆ

ନବୀନ ପଟ୍ଟନାୟକ ଜଣେ ଭଲ ବ୍ୟକ୍ତି ହୋଇଥିବାରୁ ଲଗାତାର ୫ ଥର ମୁଖ୍ୟମନ୍ତ୍ରୀ ହୋଇପାରିଛନ୍ତି । ତାଙ୍କ ଉପରେ ଜନତାଙ୍କର ଭରସାର ରହିଛି । ଏହି ଭରସା ନେଇ ଯେତେବେଳେ ଓଡ଼ିଆ ବ୍ୟକ୍ତି ନବୀନ ନିବାସଙ୍କୁ ଯାଆନ୍ତି, ତାଙ୍କୁ ମୁଖ୍ୟମନ୍ତ୍ରୀ କେବଳ ଥ୍ୟାଙ୍କୟୁ ବୋଲି କୁହନ୍ତି । ଅଧିକ କିଛି ଭଲମନ୍ଦ ପଚାରି ବୁଝନ୍ତି ନାହିଁ । ଜନସାଧାରଣଙ୍କୁ ପ୍ରତକ୍ଷ୍ୟ ଭାବେ ମାତ୍ର ଗୋଟିଏ ବା ଦୁଇ ମିନିଟ ଭେଟି ସେଠାରୁ ଭିତରକୁ ପ୍ରବେଶ କରନ୍ତି । ଆବେଦନକୁ ସଚିବଙ୍କ ମାଧ୍ୟମରେ ବୁଝନ୍ତି । ମହିଳା ସଶକ୍ତୀକରଣ ନାଁରେ ସରକାର ବଡ଼ବଡ଼ ଭାଷଣ କରନ୍ତି । କିନ୍ତୁ ରାଜ୍ୟରେ ମହିଳାମାନେ ଆଦୌ ସୁରକ୍ଷିତ ନୁହଁନ୍ତି । କେବଳ ମିଶସ ଶକ୍ତିର ସଦସ୍ୟ ଥିବା ମହିଳାଙ୍କ ବ୍ୟମୀତ ଅନ୍ୟମାନଙ୍କର ଅବସ୍ଥା କ’ଣ, ମୁଖ୍ୟମନ୍ତ୍ରୀ ତାହା ଜାଣିବାକୁ ଉଦ୍ୟମ କରିନାହାନ୍ତି । ତେଣୁ ପ୍ରଥମେ ମୁଖ୍ୟମନ୍ତ୍ରୀଙ୍କୁ ଓଡ଼ିଆ ଶିଖାଇବାର ଆବଶ୍ୟକତା ଅଛି ଅଥବା ତାଙ୍କୁ ବର୍ଜନ କରିବାର ସମୟ ଆସିଛି ।

ଓଡ଼ିଆରେ ଫଳକ ନରହିଲେ ଜରିମାନା

ରାଜ୍ୟ ସରକାରଙ୍କ ନିଷ୍ପତ୍ତି ଅନୁସାରେ ଦୋକାନ ଓ ବ୍ୟବସାୟିକ ପ୍ରତିଷ୍ଠାନରେ ନାମଫଳକ ଓଡ଼ିଆରେ ନଥିଲେ ସଂପୃକ୍ତ ବ୍ୟବସାୟୀଙ୍କ ବିରୋଧରେ ପ୍ରଶାସନ କଡ଼ାକାର୍ଯ୍ୟାନୁଷ୍ଠାନ ନେବ । ଏହି ମାସ ଠାରୁ ଲାଗୁ ହୋଇଥିବା ନିୟମ ନମାନିଲେ ବ୍ୟବସାୟୀଙ୍କୁ ଜରିମାନା ଦେବାକୁ ପଡ଼ିବ । ଏପରିକି ବ୍ୟବସାୟୀଙ୍କର ଲାଇସେନ୍ସ ବାତିଲ କରିଦିଆଯିବ । ତେବେ ସରକାର ଓଡ଼ିଆ ଭାଷାରେ ନାମଫଳକ ଲେଖିଥିବା ଦୋକାନୀ ଅଥବା ବ୍ୟବସାୟୀଙ୍କୁ କ’ଣ ପ୍ରୋତ୍ସାହନ ଦେବେ, ସେନେଇ କିଛି ଘୋଷଣା କରି ନାହାନ୍ତି । ରାଜ୍ୟର ପୌରାଞ୍ଚରେ ୫୨ ହଜାର ପଂଜୀକୃତ ଦୋକାନ ଥିଲା ବେଳେ ସେଥିରୁ ୪୭ ହଜାର ପ୍ରତିଷ୍ଠାନରେ ଓଡ଼ିଆରେ ନାମଫଳକ ରହିଛି । ଚଳିତ ମାସଠାରୁ ଖିଲାପକାରୀଙ୍କୁ ୭ ଦିନିଆ ନୋଟିସ ଦିଆଯିବ । ନିୟମ ନମାନିଲେ ସେମାନଙ୍କ ଠାରୁ ଜରିମାନା ଆଦାୟ କରାଯିବ । ପ୍ରଥମ ଥର ୫୦୦୦ ଓ ଦ୍ୱିତୀୟ ଥର ୨୫,୦୦୦ ଟଙ୍କା ଜରିମାନା ଆଦାୟ କରାଯିବ ।  

ଆମେ କେତେ ସ୍ୱାଭିମାନୀ

ଦୋକାନ ଆଗରେ ନାମଫଳକ ଓଡ଼ିଆରେ ଲେଖାଇବା ବାଧ୍ୟତାମୂଳକ କରୁଥିବା ବେଳେ ୧୯୩୬ ମସିହାରେ ଭାଷାଭିତ୍ତିକ ଦୃଷ୍ଟିରୁ ଗଠନ ହୋଇଥିବା ଦେଶର ପ୍ରଥମ ରାଜ୍ୟ ବାହାରେ କେତେ ସ୍ୱାଭିମାନ ସେଥି ପ୍ରତି ଦୃଷ୍ଟି ଦେଉନାହାନ୍ତି । ରାଜ୍ୟ ସରକାର ଭାଷଣବାଜିରେ ବିକାଶର ସ୍ୱପ୍ନ ଦେଖୁଛନ୍ତି । କରୋନା ସମୟରେ ୧୦ ଲକ୍ଷରୁ ଉର୍ଦ୍ଧ୍ୱ ପ୍ରବାସୀ ଓଡ଼ିଆ ରାଜ୍ୟକୁ ଫେରିଥିଲେ । କରୋନା ପରିସ୍ଥିତି ସ୍ୱାଭାବିକ ହେଲା ପରେ ପୁଣି ନିଜ ନିଜ କର୍ମସ୍ଥଳକୁ ଫେରିଯାଇଛନ୍ତି । ରାଜ୍ୟରେ ରୋଜଗାରର ଘୋର ସମସ୍ୟା କାରଣରୁ ଓଡ଼ିଆମାନଙ୍କୁ ଦାଦନ ଖଟିବାକୁ ଯାଇ ନିର୍ଯାତନାର ଶିକାର ହେବାକୁ ପଡୁଛି ।

RELATED ARTICLES

LEAVE A REPLY

Please enter your comment!
Please enter your name here

Most Popular

Recent Comments