ଭୁବନେଶ୍ବର: ରୁଷିଆ-ୟୁକ୍ରାଇନ୍ ଯୁଦ୍ଧ ହେଉଛି ଏକ ଅନ୍ତର୍ଜାତୀୟ ଦ୍ବନ୍ଦ୍ବ, ଯାହାକି ୨୦୧୪ ଫେବ୍ରୁଆରି ଠାରୁ ଆରମ୍ଭ ହୋଇଛି। କିନ୍ତୁ ୨୦୨୨ ଫେବ୍ରୁଆରି ୨୪ ଠାରୁ ଏହା ଅଧିକ ତୀବ୍ରତର ହୋଇଛି। ଏହି ମାମଲାର ସମାଧାନ ପାଇଁ ଅନ୍ତର୍ଜାତୀୟ ସ୍ତରରେ ନେତାମାନେ ଉଦ୍ୟମ କରିଥିବା ବେଳେ ସଂଘର୍ଷରେ ବିରାମ ପଡୁନାହିଁ। ଏହାରି ମଧ୍ୟରେ ଏହି ଯୁଦ୍ଧକୁ ନେଇ ବଡ଼ ଖବର ଆସୁଛି, ଯେଉଁଥିରେ କୁହାଯାଉଛି ଯେ, ୨୦୨୨ ଶେଷ ବେଳେକୁ ୟୁକ୍ରେନ୍ ଉପରେ ରୁଷିଆ ପରମାଣୁ ଆକ୍ରମଣ ପାଇଁ ଯୋଜନା କରିଥିଲା। ଏହି ମାମଲାକୁ ଅଟକାଇବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ କିଛି ଦେଶର ନେତାଙ୍କ ଭୂମିକା ଥିଲା। ସିଏନ୍ଏନ୍ ରବିବାର ଏକ ରିପୋର୍ଟରେ ଏହା କହିଛି, ଯେଉଁଥିରେ ୨୦୨୨ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ କିଛି ଦେଶର ନେତା ରୁଷିଆର ରାଷ୍ଟ୍ରପତିଙ୍କ ସହିତ ଆଲୋଚନା କରି ପରମାଣୁ ଆକ୍ରମଣ ଅଟକାଇବାରେ ସହାୟକ ହୋଇଥିଲେ।
ରୁଷିଆ-ୟୁକ୍ରେନ୍ ଯୁଦ୍ଧ କାରଣରୁ ହଜାର ହଜାର ଲୋକଙ୍କର ମୃତ୍ୟୁ ହୋଇଛି। ୨୦୨୨ ସେପ୍ଟେମ୍ବରରେ ରୁଷୀୟ ପ୍ରତିରକ୍ଷା ମନ୍ତ୍ରାଳୟ କହିଥିଲା ଯେ, ରୁଷିଆର ୫୯୩୭ ଲୋକଙ୍କର ସହିଦ ହୋଇଥିଲା। ୬୧,୨୦୭ ଜଣ ୟୁକ୍ରେନ୍ ସୈନିକ ସହିଦ ହୋଇଥିଲେ। ୪୯,୨୦୭ ନିଖୋଜ ଥିଲେ। ଗତ ଫେବ୍ରୁଆରିରେ ମନ୍ତ୍ରାଳୟ ପକ୍ଷରୁ କୁହାଯାଇଥିଲା ଯେ, ଯୁଦ୍ଧ ଯୋଗୁଁ ୪,୪୪,୦୦୦ ଲୋକଙ୍କର ମୃତ୍ୟୁ ହୋଇଛି। ବିଶ୍ବର ବିକାଶ କ୍ଷେତ୍ରରେ ରୁଷିଆ ଓ ୟୁକ୍ରେନ୍ର ଅବଦାନ ଗୁରୁତ୍ବ ଥିବାରୁ ଏହି ଯୁଦ୍ଧ ପରେ ସମଗ୍ର ବିଶ୍ବବାସୀ ପ୍ରଭାବିତ ହୋଇଛନ୍ତି। ଯୁଦ୍ଧରେ ରୁଷିଆର ପ୍ରଭାବ ଥିବା ବେଳେ ୟୁକ୍ରେନ୍ ସର୍ବାଧିକ ପ୍ରଭାବିତ ହୋଇଛି। ଶିକ୍ଷ, ସ୍ବାସ୍ଥ୍ୟ ଓ ଟେକ୍ନୋଲୋଜି କ୍ଷେତ୍ରରେ ବିଶ୍ବ ପ୍ରତି ୟୁକ୍ରେନ୍ର ଯୋଗାଦାନ ଅତୁଳନୀୟ। କିନ୍ତୁ ଯୁଦ୍ଧ ପରଠାରୁ ସେଠାକାର ଅବସ୍ଥା ସଂକଟାପନ୍ନ ରହିଛି। ୟୁକ୍ରେନ୍ ଉପରେ ନିର୍ଭରଶୀଳ ଦେଶଗୁଡ଼ିକ ଆର୍ଥିକ ଦୃଷ୍ଟିକୋଣରୁ ପ୍ରଭାବିତ ହୋଇଛନ୍ତି। ଏହାର କାରଣ ହେଲା ଯୁଦ୍ଧ ପରେ ସେଠାରୁ ବିଦେଶକୁ ଜିନିଷପତ୍ର ରପ୍ତାନୀ ହୋଇପାରି ନାହିଁ।
ଚିନ୍ତିତ ଥିଲା ଆମେରିକା
ରିପୋର୍ଟ ଅନୁସାରେ ଆମେରିକାର ରାଷ୍ଟ୍ରପତି ଜୋ ବାଇଡେନ୍ ପ୍ରଶାସନ ଚିନ୍ତିତ ଥିଲା ଯେ, ୟୁକ୍ରେନ୍କୁ ଶେଷ କରିବା ପାଇଁ ରୁଷିଆ ପରମାଣୁ ଅସ୍ତ୍ର ବ୍ୟବହାର କରିପାରେ। ଏହାକୁ ନେଇ ଆମେରିକା ପ୍ରଶାସନ ଭାରତର ପ୍ରଧାନମନ୍ତ୍ରୀ ମୋଦୀ ଓ ଅନ୍ୟ ଦେଶର ନେତାଙ୍କ ସହିତ ସଂପର୍କ କରିଥିଲା। ଫଳରେ ଏହି ବିପଦ ଟଳିବାରେ ବଡ଼ ସହାୟକ ହୋଇଥିଲା। ରିଷିଆର ଏହି ପଦକ୍ଷେପ ସଂପର୍କରେ ୨୦୨୨ ଶେଷରେ ଜଣାପଡ଼ିଥିଲା। ଯେତେବେଳେ ଦକ୍ଷିଣରେ ରୁଷିଆ ନିୟନ୍ତ୍ରଣରେ ଥିବା ଖେରସନ ଉପରେ ଆଗକୁ ବଢ଼ୁଥିଲା ଏବଂ ପୂରା ରୁଷୀୟ ସେନା ଘେରିଥିଲା।
୨୦୧୪ରୁ ଆରମ୍ଭ ହୋଇଥିଲା ବିବାଦ
୨୦୨୨ ଫେବ୍ରୁଆରି ୨୪ରେ ଆରମ୍ଭ ହୋଇଥିବା ଯୁଦ୍ଧ ଏପର୍ଯ୍ୟନ୍ତ ଜାରି ରହିଛି। ଦୁଇ ବର୍ଷରୁ ଅଧିକ ସମୟ ବିତିଯାଇଥିଲେ ମଧ୍ୟ ୟୁ୍କେନ୍ରୁ ଫେରି ଆସିବାକୁ ରୁଷିଆ ଚାହୁଁନାହିଁ। ରୁଷୀୟ ସେନା ଏବେ ୟୁକ୍ରେନ୍ର ଅନେକଗୁଡ଼ିଏ ସହରକୁ ନିଜ ନିୟନ୍ତ୍ରଣକୁ ନେଇସାରିଛନ୍ତି। ଏଥିରେ ବଖମୁତ ମଧ୍ୟ ସାମିଲ ରହିଛି, ଯାହାକି ୟୁକ୍ରେନ୍ର ରାଜନୀତିର କେନ୍ଦ୍ର। ଏହାର ପାଖରେ ଡୋନେଟ୍ରସ୍କର ୨ ବଡ ସହର ମଧ୍ୟ ରୁଷିଆ ନିୟନ୍ତ୍ରଣକୁ ଚାଲିଯାଇଛି। ଲୁହାନସ୍କ ମଧ୍ୟ ରୁଷିଆର ଅଧୀନରେ ରହିଛି। ସେହିଭଳି ୨୦୧୪ ଠାରୁ କ୍ରୀମିୟା ଉପରେ ରୁଷିଆ ଅକ୍ତିଆର କରିସାରିଛି।
ମାମଲା କ’ଣ?
ରୁଷିଆ-ୟୁକ୍ରେନ୍ ମଧ୍ୟରେ ଉତ୍ତେଜନା ୨୦୧୩ ନଭେମ୍ବର ମାସରେ ଆରମ୍ଭ ହୋଇଥିଲା। ୟୁକ୍ରେନ୍ର ତତ୍କାଳୀନ ରାଷ୍ଟ୍ରପତି ଭିକ୍ଟର ୟାନୁକୋଭିକ୍ଙ୍କ କିୱିରେ ବିରୋଧ ଆରମ୍ଭ ହୋଇଥିଲା। ୟାନୁକୋଭିକ୍କୁ ରୁଷିଆର ସମର୍ଥନ ହାସଲ ଥିଲା। ଅନ୍ୟପଟରେ ପ୍ରଦର୍ଶନକାରୀମାନେ ଆମେରିକା ଓ ବ୍ରିଟେନ୍ର ସମର୍ଥରେ ଥିଲେ। ଏହି ଠାରୁ ବିବାଦ ଆରମ୍ଭ ହୋଇଥିଲା। କିଛି ଦିନ ପରେ ଦକ୍ଷିଣ ୟୁକ୍ରେନ୍ କ୍ରୀମିୟା ଉପରେ ରୁଷିଆ ଆକ୍ରମଣ ସହିତ ନିଜ ନିୟନ୍ତ୍ରଣକୁ ନେଇ ଯାଇଥିଲା। କଥା ଏତିକିରେ ସରି ନଥିଲା। ୟୁକ୍ରେନ୍ର ବିଚ୍ଛିନ୍ନତାବାବାଦୀଙ୍କୁ ରୁଷିଆ ଖୋଲାଖୋଲି ସମର୍ଥନ ଦେଇଥିଲା। ତଣେୁ ସେହିଦିନ ଠାରୁ ୟୁକ୍ରେନ୍ ସେନା ଓ ବିଚ୍ଛିନ୍ନତାବାଦୀଙ୍କ ମଧ୍ୟରେ ଲଢ଼େଇ ଜାରି ରହିଛି।
ବିଶ୍ବ ବିକାଶରେ ମୋଦୀ
୨୦୨୨ ଫେବ୍ରୁଆରି ୨୪ ପରେ ରୁଷିଆ-ୟୁକ୍ରେନ୍ ଯୁଦ୍ଧ ତୀବ୍ରତର ହେବାର କମ୍ ଦିନ ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ହସ୍ତକ୍ଷେପ କରିଥିଲେ। ସେ ଉଭୟ ଦେଶର ନେତାଙ୍କ ସହିତ ଏକାଧିକ ଥର ଆଲୋଚନା କରିଥିଲେ। ଶାନ୍ତି ପାଇଁ ଯାହା ଦରକାର, ସେଥିପାଇଁ ଭାରତ ସହଯୋଗ କରିବ ବୋଲି ମଧ୍ୟ ପ୍ରତିଶ୍ରୁତି ଦେଇଥିଲେ। କେବଳ ଏହି ଯୁଦ୍ଧ ପ୍ରସଙ୍ଗ ନୁହେଁ, କରୋନା ପରେ ଯେତେବେଳେ ଶ୍ରୀଲଙ୍କାରେ ଆର୍ଥିକ ସ୍ଥିତି ଦୁର୍ବଳ ହୋଇଯାଇଥିଲା, ଭାରତ ସରକାର ଖାଦ୍ୟ, ଇନ୍ଧନ ଓ ଔଷଧ ପଠାଇଥିଲେ। ବାଂଲାଦେଶ, ନେପାଳ, ଭୁଟାନ, ମ୍ୟାମାର, ୟୁଇଇକୁ ଭାରତ ବିଗତ ଏକ ଦଶନ୍ଧି ମଧ୍ୟରେ ଗୁରୁତ୍ବପୂର୍ଣ୍ଣ ସହଯୋଗ କରିଆସୁଛି। ତେଣୁ ମୋଦୀଙ୍କ ଲୋକପ୍ରିୟତା ବିଶ୍ବରେ ବଢ଼ିଛି।
