ଭୁବନେଶ୍ବର: ଇଂଲଣ୍ଡ ଓ ଅଷ୍ଟ୍ରେଲିଆ ଭଳି ଭାରତ ମଧ୍ୟ ହେଉଛି ଏକ କ୍ରିକେଟ ପ୍ରିୟ ଦେଶ। ଏହି କ୍ରମରେ ଓଡ଼ିଶା ମଧ୍ୟ ବାଦ୍ ପଡ଼ିନାହିଁ। ଓଡ଼ିଶାର ଲୋକେ କ୍ରିକେଟକୁ କେତେ ଭଲ ପାଆନ୍ତି ତାହା ଭାରତ-ଦକ୍ଷିଣ ଆଫ୍ରିକା ଟି-୨୦ ଶୃଙ୍ଖଳାରୁ ହିଁ ଜଣାପଡୁଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଖେଳକୁ ଭଲ ପାଆନ୍ତି। ସେ ବାରବାଟୀ ଯାଇ ମ୍ୟାଚ ଦେଖିଛନ୍ତି। ଏହା ପୂର୍ବରୁ ସେ ବିସିସିଆଇ ସଭାପତି ସୌରଭ ଗାଙ୍ଗୁଲିଙ୍କୁ ନିଜ ନିବାସରେ ସୌଜନ୍ୟ ସାକ୍ଷାତ କରିଛନ୍ତି। ଭାରତ-ଦକ୍ଷିଣ ଆଫ୍ରିକା ମ୍ୟାଚ୍ ଜୁନ ୧୨ ତାରିଖରେ ଖେଳାଯାଇଛି। ଏଥି ପାଇଁ ଗତ ୧ ତାରିଖ ଦିନ ଅନ୍ଲାଇନ୍ ଟିକେଟ ବିକ୍ରି ହୋଇଥିଲା। ତେବେ ସମସ୍ତ କ୍ରିକେଟପ୍ରେମୀଙ୍କୁ ଅନ୍ଲାଇନ୍ ଟିକେଟ ମିଳିପାରି ନଥିଲା। କାରଣ ଅନ୍ଲାଇନ୍ ପାଇଁ ୫୦୦୦ ଟିକେଟ ବ୍ୟବସ୍ଥା ହୋଇଥିଲା। ଟିକେଟ ବ୍ରିକ୍ରି ହୋଇଥିବା ୱେବସାଇଟ୍ ଲାଇଭ୍ ହୋଇଯିବା ପରେ ଅଳ୍ପ ସମୟ ମଧ୍ୟରେ ଶେଷ ହୋଇଯାଇଥିଲା।
ଅଫ୍ଲାଇନ୍ରେ ମାତ୍ର ୧୨ ହଜାର ଟିକେଟ ବିକ୍ରି ହୋଇଥିଲା। ତେଣୁ ହଜାର ହଜାର କ୍ରିକେଟ୍ପ୍ରେମୀଙ୍କୁ ନିରାଶ ହେବାକୁ ପଡ଼ିଥିଲା। ଶେଷରେ ଟିକେଟ ପାଇ ନଥିବା ଲୋକେ ଏବେ ଟିଭି ଦେଖିବା ପାଇଁ ଶ୍ରେଷ୍ଠ ସାହାରା ମନେକରିଥିଲେ। ଐତିହାସିକ ବାରବାଟୀରେ ଦର୍ଶକଙ୍କ କ୍ଷମତା ହେଉଛି ୪୮ ହଜାର। ଏଥିରୁ ସାଧାରଣ ଦର୍ଶକଙ୍କ ପାଇଁ ପାଖାପାଖି ୨୦ ହଜାର ଟିକେଟ ସଂରକ୍ଷିତ ରହୁଥିବା ବେଳେ ବାକି ସବୁ ବିସିସିଆଇ, ଓଡ଼ିଶା କ୍ରିକେଟ ଆସୋସିଏସନ, ଓସିଏ ସଂବନ୍ଧିତ କିକେଟ ଟିମ୍, ଭିଆଇପି, ମିଡିଆ କର୍ମୀଙ୍କ ପାଇ ଥାଏ। ତେଣୁ ସମସ୍ତଙ୍କୁ କ୍ରିକେଟ ଦେଖିବାର ସୁଯୋଗ ମିଳିପାରି ନଥାଏ।
ଖେଳାଳିଙ୍କୁ ଦେଖିବା ପାଇଁ ଭିଡ଼
ଓଡ଼ିଶାର ଯୁବପିଢ଼ି କ୍ରିକେଟ ପାଇଁ ପାଗଳ କହିଲେ କିଛି ଭୁଲ ହେବ ନାହିଁ। ଏହାର ଜ୍ବଳନ୍ତ ଉଦାହରଣ ଗତ ୧୦ ତାରିଖରେ ଦେଖିବାକୁ ମିଳିଛି। ଉଭୟ ଭାରତ ଓ ଦକ୍ଷିଣ ଆଫ୍ରିକା ଟିମ୍ ଯେତେବେଳେ ଭୁବନେଶ୍ବର ବିଜୁ ପଟ୍ଟନାୟକ ବିମାନବନ୍ଦରରେ ପହଞ୍ଚି ଥିଲେ, ଖେଳାଳିଙ୍କୁ ଦେଖିବା ପାଇଁ ହଜାର ହଜାର ଦର୍ଶକ ସେଠାରେ ପହଞ୍ଚି ଯାଇଥିଲେ। କିନ୍ତୁ କଡ଼ା ସୁରକ୍ଷା ବ୍ୟବସ୍ଥା ଯୋଗୁଁ ପ୍ରଶଂସକମାନେ ଖେଳାଳିଙ୍କ ନିକଟତର ହୋଇପାରି ନଥିଲେ। ଖେଳାଳିମାନଙ୍କୁ ନେଇ ବସ ଯେତେବେଳେ ହୋଟେଲ ଅଭିମୁଖେ ବାହାରିଥିଲା, ରାସ୍ତାରେ ହଜାର ହଜାର ପ୍ରଶଂସକ ଖେଳାଳିଙ୍କୁ ଦେଖିବା ପାଇଁ ଛିଡ଼ା ହୋଇଥିଲେ। ସେହିପରି ପ୍ରଶଂସକମାନେ ହୋଟେଲ ଠାରୁ ଆରମ୍ଭ କରି ବାରବାଟୀ ଷ୍ଟାଡିୟମ ପର୍ଯ୍ୟନ୍ତ ଖେଳାଳିଙ୍କ ଆଗମନ ଓ ପ୍ରସ୍ଥାନ ମାର୍ଗରେ ଭିଡ ଲଗାଇଥିଲେ। ଖେଳାଳିଙ୍କୁ ଦେଖିବା ପାଇଁ ମୟୂରଭଂଜ ଓ ମାଲକାନଗିରୁ ପ୍ରଶଂସକମାନେ ଭୁବନେଶ୍ବର-କଟକ ପହଞ୍ଚିଥିଲେ।
ଅନ୍ତର୍ଜାତୀୟ କ୍ରିକେଟ ମ୍ୟାଚ ସଂକଟ
ଓଡ଼ିଶା ହେଉଛି କ୍ରୀଡ଼ାର ରାଜଧାନୀ ବୋଲି ରାଜ୍ୟ ସରକାର ସବୁବେଳେ କହିଆସୁଛନ୍ତି। ବିଗତ ଦିନରେ ଏଠାରେ ଜାତୀୟ ଅନ୍ତର୍ଜାତୀୟ ସ୍ତରୀୟ କ୍ରୀଡ଼ା ପ୍ରତିଯୋଗିତାର ଆୟୋଜନ ହୋଇଛି। ସଫଳତା ମଧ୍ୟ ମିଳିଛି ଓ ଏଥି ପାଇଁ ଓଡ଼ିଶା ପୁରସ୍କୃତ ହୋଇଛି। ଅନ୍ୟ ଖେଳ ତୁଳନାରେ କ୍ରିକେଟର ଚାହିଦା ଅଧିକ ଥିବାରୁ ଏଠାରେ ଯଦି ବର୍ଷକୁ ଅତିକମରେ ୨ଟି ଅନ୍ତର୍ଜାତୀୟ କ୍ରିକେଟ ମ୍ୟାଚର ଆୟୋଜନ ହୁଅନ୍ତା, ତାହେଲେ ଦର୍ଶକଙ୍କୁ କ୍ରିକେଟ ଟିକେଟ ପାଇବାରେ ଅସୁବିଧା ହୁଅନ୍ତା ନାହିଁ। ୨ରୁ ୩ ବର୍ଷ ପରେ ଯାଇ ଏକ ମ୍ୟାଚର ଆୟୋଜନ ହେଉଥିବାରୁ ଦର୍ଶକ କ୍ରିକେଟ ଦେଖିବା ପାଇଁ ବିକଳ ହେଉଛନ୍ତି। ଫଳରେ ଟିକେଟରେ ଅସାଧୁ ଉପାୟ ଅବଲମ୍ବନ କରାଯାଉଥିବା ଅଭିଯୋଗ ହେଉଛି। ଅନ୍ଲାଇନ ଠାରୁ ଆରମ୍ଭ କରି ଅଫଲାଇନ୍ ପର୍ଯ୍ୟନ୍ତ ଟିକେଟର କଳାବଜାରୀ ହେଉଛି। ତେବେ ଓଡ଼ିଶାର ଲୋକେ କ୍ରିକେଟକୁ ଏତେ ଭଲ ପାଉଥିଲେ ଥିଲେ ମଧ୍ୟ ଆୟୋଜକ ଏଥି ପ୍ରତି ଦୃଷ୍ଟି ଦେଉନାହାନ୍ତି।
ଟିକେଟର କଳାବଜାରୀ
ବାରବାଟୀର ଟିକେଟ ବ୍ୟାପକ କଳାବଜାରୀ ହୋଇଛି। କଳା ବଜାରରେ ୭୦୦ ଟଙ୍କା ମୂଲ୍ୟର ଟିକେଟ ୩୦୦୦ରୁ ୪୦୦୦ ଟଙ୍କାରେ ବିକ୍ରି ହୋଇଛି। ଅଫଲାଇନ୍ ଟିକେଟ ଯେଉଁ ଦିନ ବିକ୍ରି ହୋଇଥିଲା, କାଉଣ୍ଟର ଆଗରେ ଏଭଳି ମହିଳାମାନେ ଥିଲେ ଯେ, ସେମାନଙ୍କ ମଧ୍ୟରୁ ଜଣେ କହୁଥିଲେ ଭାରତ-ପାକିସ୍ତାନ ମଧ୍ୟରେ ମ୍ୟାଚ ଖେଳାଯାଉଛି। ସେହିପରି ଆଉ ଜଣେ ମହିଳା ଗଣମାଧ୍ୟମକୁ କହୁଥିଲେ, ଭାରତୀୟ କ୍ରିକେଟ ଅଧିନାୟକ ରାହୁଲ ଗାନ୍ଧୀ। ତେବେ ପ୍ରଶାସନ ଏହି ଯେଉଁ ଅବସ୍ଥାକୁ ଗୁରୁତର ସହିତ ନଜର ଦେଉନାହିଁ। କଟକର ବସ୍ତି ଅଞ୍ଚଳରେ ରହୁଥିବା ମହିଳାମାନେ ଟିକେଟ ବିକ୍ରି ହେବାର ୧୨ ଘଣ୍ଟା ଆଗରୁ ଆସି ଲାଇନରେ ରହୁଛନ୍ତି। ଏମାନେ କିଛି ଦଲାଲଙ୍କ ମାଧ୍ୟମରେ ଟିକେଟ କିଣିଛନ୍ତି।
ପାସ୍ ଟିକେଟ କଳାବାଜାରୀ?
କଳାବଜାରୀ କରୁଥିବା ଲୋକଙ୍କ ହାତରେ ଯାହାକୁ ଯେତେ ଟିକେଟ। ତେଣୁ ଟିକେଟ୍ ସରିଯାଇଥିବାବେଳେ ପୁଣି ଏତେ ସଂଖ୍ୟକ ଆସିଲା କେମିତି? କେଉଁଠୁ ପାସ୍ ଆଣି ତାହାକୁ ଚଢାଦରରେ ବିକାଯାଉଛି? କେଉଁ ଭିଆଇପିମାନଙ୍କୁ ଓସିଏ ପାସ୍ ଆଗୁଆ ବାଣ୍ଟି ଦେଇଛି ଯେ ସେମାନଙ୍କ ପାସ୍ ଏବେ କଳାବଜାର ହେଉଛି? ସାମାଜିକ ଗଣମାଧ୍ୟମରେ ଟିିକେଟ୍ ପାଇଁ ଯୋଗାଯୋଗ କରିବାକୁ ଫୋନ୍ ନମ୍ବର ଦେଉଥିବା ଲୋକଙ୍କ ପଛରେ କାହା ହାତ ରହିଛି? ଏଭଳି ଅନେକ ପ୍ରଶ୍ନ ଏବେ ଓସିଏ ଏବଂ ପୁଲିସ, ପ୍ରଶାସନକୁ କାଠଗଡ଼ାରେ ଛିଡା କରି ଦେଇଥିବାବେଳେ ସାଧାରଣ କ୍ରିକେଟ୍ ପ୍ରେମୀଙ୍କ ମଧ୍ୟରେ ଏହାକୁ ନେଇ ତୀବ୍ର ପ୍ରତିକ୍ରିୟା ସୃଷ୍ଟି ହୋଇଛି।
