Tuesday, April 16, 2024
Homeଖବରବୀରମହାରାଜପୁରକୁ ଅଣଦେଖା

ବୀରମହାରାଜପୁରକୁ ଅଣଦେଖା

ଭୁବନେଶ୍ବର: ରାଜ୍ୟ ସରକାର ବୀରମହାରାଜପୁରକୁ ଏନ୍‌ଏସି ଘୋଷଣା କରିଛନ୍ତି। ଏକଥା ସତ। କିନ୍ତୁ ବିରୋଧୀଙ୍କ ସ୍ବର ଉଠିବା, ବୁଦ୍ଧିଜୀବୀଙ୍କ ସମାଲୋଚନା ଓ ନିର୍ବାଚନ ହାରିବା ଭୟରେ। ଶିକ୍ଷା ଓ ସ୍ବାସ୍ଥ୍ୟ ଭଳି ପ୍ରଶାସନିକସ୍ତରରେ ଅବହେଳା କରିଥିବାରୁ ସ୍ଥାନୀୟ ଅଞ୍ଚଳରେ ତୀବ୍ର ଅସନ୍ତୋଷ ଦେଖାଯାଇଛି। ବୀରମହାରାଜପୁର ପ୍ରତି ରାଜ୍ୟ ସରକାରଙ୍କ ବୈମାତୃକ ମନୋଭାବକୁ ନେଇ ରାଜନୈତିକ, ବୁଦ୍ଧିଜୀବୀ ଓ ଶିକ୍ଷାବିତ୍‌ ମହଲରେ ତୀବ୍ର ନିନ୍ଦା କରାଯାଉଛି। ଉଭୟ କଂଗ୍ରେସ ଓ ବିଜେପି ରାଜ୍ୟ ସରକାରଙ୍କୁ ତୀବ୍ର ନିନ୍ଦା କରି ସ୍ଥାନୀୟ ବିଧାୟକ ପଦ୍ମନାଭ ବେହେରାଙ୍କ କୁଶପୁତ୍ତଳିକା ଦାହ କରିଛନ୍ତି।  

ବର୍ତ୍ତମାନ ପରିପ୍ରେକ୍ଷୀରେ ବୀରମହାରାଜପୁର ସହରର କଳେବର ଯେଉଁଭଳି ରହିଛି କଟକ କଟକ ଜିଲ୍ଲାର ବଡ଼ମ୍ବା, ନରସିଂହପୁର‌, ନିଆଳି ହେଉ କି ଯାଜପୁର ଜିଲ୍ଲାର ‌ପାଣିକୋଇଲି ତୁଳନାରେ କମ୍‌ ନୁହେଁ। ଜନସାଧାରଣଙ୍କ ଦାବି, କ୍ରମବର୍ଦ୍ଧିଷ୍ଣୁ ଜନସଂଖ୍ୟା, ବିକାଶ ଓ ଅର୍ଥନୈତିକ ଅଭିବୃଦ୍ଧିକୁ ଦୃଷ୍ଟିରେ ରଖି ସରକାର ବୀରମହାରାଜପୁରକୁ ଏନ୍‌ଏସି ‌କରିବାର ଉଚିତ୍‌ ଥିଲା। ସୁବର୍ଣ୍ଣପୁର ଜିଲ୍ଲାର ସୋନପୁର ବିଧାନସଭା ନିର୍ବାଚନ ମଣ୍ଡଳୀରେ ଗୋଟିଏ ମ୍ୟୁନିସିପାଲିଟି (ସୋନପୁର) ଓ ଦୁଇଟି ଏନ୍‌ଏସି (ବିନିକା ଓ ଡୁଙ୍ଗୁରିପାଲି) ଥିବା ବ‌େଳେ ଆନ୍ଦୋଳନ ପରେ ବୀରମହାରାଜପୁରକୁ ଏନ୍‌ଏସି ମାନ୍ୟତା ଦେଇଛନ୍ତି। ବିଭିନ୍ନ ସଂଗଠନ ତରଫରୁ ଅତୀତରେ ବୀରମହାରାଜପୁର ସହରର ଲୋକସଂଖ୍ୟା ୧୪ ହଜାର ଦର୍ଶାଇ ଆବେଦନ କରିଥିଲେ। କିନ୍ତୁ ସରକାର ରବିବାର ଯେତେବେଳେ ୩୪ଟି ନୂଆ ଏନ୍‌ଏସି ଗଠନ କଲେ ସେହି ସମୟରେ ବୀରମହାରାଜପୁରକୁ ଗୁରୁତ୍ବର ସହିତ ନେଇ ନଥିଲେ। 

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶନିବାର ଦିନ (୨୦୨୪ ଫେବ୍ରୁଆରି ୨୪)ରେ ରାଜ୍ୟରେ ୩୪ଟି ନୂତନ ବିଜ୍ଞାପିତ ଅଞ୍ଚଳ ପରିଷଦ (ଏନ୍ଏସି) ଗଠନ ପାଇଁ ନିଷ୍ପତ୍ତି ନେଇଥିଲେ। ରାଜ୍ୟ ସରକାର ଏଥିରେ ବୀରମହାରାପୁରକୁ ସାମିଲ କରି ନଥିଲେ। ଓଡ଼ିଶାରେ ଏପର୍ଯ୍ୟନ୍ତ ମୋଟ୍ ୫୮ଟି ଉପଖଣ୍ଡ ରହିଛି। କିନ୍ତୁ ବୀରମହାରାଜପୁର ହେଉଛି ଏଭଳି ଏକ ଉପଖଣ୍ଡ ଯେଉଁଠି ପୌରଶାସନ ବ୍ୟବସ୍ଥା ନଥିଲା। ସହର ଭଳି ଦେଖାଯାଉଥିଲେ ମଧ୍ୟ ବୀରମହାରାଜପୁରକୁ ୪ଟି ପଞ୍ଚାୟତ ଅଧୀନରେ ଭାଗ କରାଯାଇଥିଲା।

କ’ଣ କହିଲେ ନେତା?

୩୪ ତାଲିକାରେ ବୀରମହାରାଜପୁରକୁ ସାମିଲ କରା ନଯିବା ପରେ ନେତାମାନେ ପ୍ରତିକ୍ରିୟା ଦେଇଥିଲେ। ବିଧାୟକ ପଦ୍ମନାଭ ବେହେରା କହିଥିଲେ, ବୀରମହାରାଜପୁରକୁ ଏନ୍‌ଏସି ମାନ୍ୟତା ବ୍ୟକ୍ତିଗତ ଭାବେ ବହୁତ ଦିନରୁ ଦାବି କରିଆସୁଛି। ବିଧାନସଭା ଅଧିବେଶନରେ ଗତବର୍ଷ ସେପ୍ଟେମ୍ବର ୩୦ ତାରିଖରେ ଏନେଇ ପ୍ରଶ୍ନ କରିଥିଲି। ସେହି ସମୟରେ ବୀରମହାରାଜପୁରକୁ ଏନ୍ଏସି ମାନ୍ୟତା ମିଳିବ ବୋଲି ବିଭାଗୀୟ ମନ୍ତ୍ରୀ ମଧ୍ୟ ଉତ୍ତର ରଖିଥିଲେ। କିନ୍ତୁ ବୀରମହାରାଜପୁରକୁ ଏନ୍‌ଏସି ଘୋଷଣା କରାଯାଇ ନଥିବାରୁ ମୋତେ ବ୍ୟଥିତ କରିଛି। ବିଜେପିର ବିଧାୟକ ପ୍ରାର୍ଥୀ ତଥା ରାଜ୍ୟ କାର୍ଯ୍ୟକାରିଣୀ ସଦସ୍ୟ ଇଂ ରଘୁନାଥ ଜଗଦଲାଙ୍କ କହିବା ଅନୁସାରେ ବୀରମହାରାଜପୁରକୁ ଏନ୍‌ଏସି ଘୋଷଣା ନକରିବାର ଅର୍ଥ ରାଜ୍ୟ ସରକାରଙ୍କ ବୈମାତୃକ ମନୋଭାବ। ଏଥିପାଇଁ ସ୍ଥାନୀୟ ବିଧାୟକଙ୍କର ଆନ୍ତରିକତା ନାହିଁ। କଂଗ୍ରେସରୁ ପୂର୍ବତନ ବିଧାୟକ ବିନୋଦ ପାତ୍ର କହିଛନ୍ତି, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୨୦୨୪ର ସବୁଠାରୁ ବଡ଼ ପରିହାସ କରିଛନ୍ତି। ବୀରମହାରାଜପୁର ଉପଖଣ୍ଡକୁ ଏନ୍‌ଏସି ଘୋଷଣା ନକରି ସ୍ଥାନୀୟ ଅଞ୍ଚଳବାସୀଙ୍କୁ ବିଦ୍ରୁପ କରିଛନ୍ତି।  

ଶିକ୍ଷା, ସ୍ବାସ୍ଥ୍ୟ, ପର୍ଯ୍ୟଟନ କ୍ଷେତ୍ରରେ ଅବହେଳା

ଶିକ୍ଷା, ସ୍ବାସ୍ଥ୍ୟ ଓ ପର୍ଯ୍ୟଟନ କ୍ଷେତ୍ରରେ ମଧ୍ୟ ବୀରମହାରାଜପୁର ଅଞ୍ଚଳ ଅବହେଳିତ। ବୀରମହାରାଜପୁର ମହାବିଦ୍ୟାଳୟ ୧୯୮୧ ମସିହାରେ ସ୍ଥାପନା ହୋଇଥିଲା। ୪୫ ବର୍ଷ ମଧ୍ୟରେ ସରକାର ଏହି ମହାବିଦ୍ୟାଳୟକୁ ଏପର୍ଯ୍ୟନ୍ତ ସଂପୂର୍ଣ୍ଣ ସରକାରୀ କରିପାରିଲେ ନାହିଁ। ସେହିପରି ବୀରମହାରାଜପୁର ଅଞ୍ଚଳରେ ଲକ୍ଷାଧିକ ଲୋକ ରହୁଥିବା ବେଳେ ଉପଖଣ୍ଡ ଡାକ୍ତରଖାନାରେ ମାତ୍ର ୬ ଜଣ ଡାକ୍ତର ଅଛନ୍ତି। ତାହା ପୁଣି ଏକ ରେଫରାଲ ହସ୍‌ପିଟାଲ ପାଲଟିଛି। କିଛି ଦିନ ପୂର୍ବରୁ ସହର ଉପକଣ୍ଠରେ ଜଣେ ଲୋକଙ୍କର ମୃତଦେହ ଠାବ ହୋଇଥିଲା। ସ୍ଥାନୀୟ ଡାକ୍ତରଖାନାରେ ଶବ ବ୍ୟବଚ୍ଛେଦ ହୋଇ ନପାରିବାରୁ ସୋନପୁରରୁ ଡାକ୍ତରୀ ଟିମ୍‌ ଆସି ଏହି କାମ କରିଥିଲେ। ସାମାନ୍ୟ ଥଣ୍ଡା ଓ କାଶ ପାଇଁ ଏହି ହସ୍‌ପିଟାଲ ଉଦ୍ଦିଷ୍ଟ ବୋଲି ଲୋକେ କୁହନ୍ତି। ମହାପ୍ରଭୁ ଜଗନ୍ନାଥଙ୍କର ଅନ୍ୟ ଏକ ଧାମ ହେଉଛି ପାତାଳି ଶ୍ରୀକ୍ଷେତ୍ର। ଏଠାରେ ଭିତ୍ତିଭୂମିର ଯେଉଁଭଳି ବିକଶିତ ହେବା କଥା ତାହା ହୋଇପାରିଲା ନାହିଁ। ଛଲିଆ ପାହାଡ଼ରେ ରୋପ୍‌ୱେ ସ୍ବପ୍ନ ଅଧାରେ ରହିଗଲା। ହରିହର‌ଯୋର ଡ୍ୟାମ୍‌ ନିକଟରେ ବୃହତ୍‌ ଉଦ୍ୟାନ ଦୁଇ ଦଶନ୍ଧି ପରେ ମଧ୍ୟ ନିର୍ମାଣ ହୋଇପାରିଲା ନାହିଁ କି ଏଠାରୁ ବାମପାର୍ଶ୍ବ କେନାଲ ପ୍ରତିଶ୍ରୁତି ପୂରଣ ହୋଇପାରିଲା ନାହିଁ।

ସଂକ୍ଷେପରେ ବୀରମହାରାଜପୁର

ସୁବର୍ଣ୍ଣପୁର ଜିଲ୍ଲାର ବୀରମହାରାଜପୁର ଉପଜିଲ୍ଲା ୨ଟି ବ୍ଲକକୁ ନେଇ ଗଠିତ। ୧୯୯୩ ମସିହା ଏପ୍ରିଲ ୧ ତାରିଖରେ ବୀରମହାରାଜପୁର ଉପଖଣ୍ଡର ମାନ୍ୟତା ପାଇଥିଲା। ୨୦୧୧ ଜନଗଣନା ଅନୁସାରେ ବୀରମହାରାଜପୁର ତହସିଲ ଅଧୀନରେ ୨ଟି ବ୍ଲକ(ବୀରମହାରାଜପୁର ୧୫ଟି ପଞ୍ଚାୟତ ଓ ଉଲୁଣ୍ଡା ୧୭ଟି ପଞ୍ଚାୟତ)ର ୩୨ଟି ପଞ୍ଚାୟତରେ ୧ ଲକ୍ଷରୁ ଊର୍ଦ୍ଧ୍ବ ଲୋକ ବସବାସ କରନ୍ତି। ବୀରମହାରାଜପୁର, ଉଲୁଣ୍ଡା ଓ ବିନିକା ବ୍ଲକକୁ ନେଇ ବୀରମହାରାଜପୁର ବିଧାନସଭା ନିର୍ବାଚନ ଗଠିତ ହୋଇଛି। ମୁଖ୍ୟ ସହରକୁ ହିଲୁଙ୍ଗ, ଚମ୍ପାମାଳ, ଉଫୁଲା ଓ ବାଗବର ପଞ୍ଚାୟତ ଅଧୀନରେ ରଖାଯାଇଛି। 

RELATED ARTICLES

LEAVE A REPLY

Please enter your comment!
Please enter your name here

Most Popular

Recent Comments