ଭୁବନେଶ୍ବର: ଭାରତ ୭୪ତମ ସାଧାରଣତନ୍ତ୍ର ତଥା ଗଣତନ୍ତ୍ର ଦିବସ ଉତ୍ସାହର ସହିତ ପାଳନ କରିଛି। କଶ୍ମୀରର ଲାଲଛକ ଠାରୁ କନ୍ୟାକୁମାରୀ ପର୍ଯ୍ୟନ୍ତ ଗଣତନ୍ତ୍ର ଦିବସ ଅବସରରେ ତ୍ରିରଙ୍ଗା ଉଡ଼ିଛି। ସୀମା ଠାରୁ ସମୁଦ୍ର ପର୍ଯ୍ୟନ୍ତ ଗର୍ବର ସହିତ ତ୍ରିରଙ୍ଗାର ଝଲକ ଦେଖିବାକୁ ମିଳିଛି। ରାଷ୍ଟ୍ରୀର ରାଜଧାନୀ ନୂଆଦିଲ୍ଲୀ ଠାରୁ ଆରମ୍ଭ କରି ଦେଶର ପଲ୍ଲୀରେ ମଧ୍ୟ ଜାତୀୟତା ଭାବ ସୃଷ୍ଟି ହୋଇଛି। ଗଣତନ୍ତ୍ର ଦିବସ ଅବସରରେ ଜାତୀୟ ପତାକା ଉତ୍ତୋଳନ କରି ମୁଖ୍ୟ ଅତିଥିମାନେ ବିକାଶ ନେଇ ବଡ଼ବଡ଼ ଭାଷଣବାଜି କରିଛନ୍ତି। ପ୍ରଭାବଶାଳୀଙ୍କ ହାତରେ ଗଣତନ୍ତ୍ରର କ୍ଷମତା ରହୁଛି। ସାଧାରଣ ଜନତା ଏଠାରେ ଅବହେଳିତ, ନଷ୍ପେସିତ ଓ ଉପେକ୍ଷିତ।
ସେହିପରି ନୂଆଦିଲ୍ଲୀର କର୍ତ୍ତବ୍ୟପଥ ସମେତ ରାଜ୍ୟଗୁଡ଼ିକର ରାଜଧାନୀରେ ମଧ୍ୟ ଉତ୍ସାହର ସହିତ ରାଜ୍ୟସ୍ତରୀୟ ୭୪ତମ ଗଣତନ୍ତ୍ର ଦିବସ ପାଳିତ ହୋଇଯାଇଛି। କର୍ତ୍ତବ୍ୟପଥରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଜାତୀୟ ପତାକା ଉତ୍ତୋଳନ କରିଥିଲେ। ରାଜ୍ୟସ୍ତରରେ ରାଜ୍ୟପାଳମାନେ ଏହି କାମ କରିଥିଲେ। ପତାକା ଉତ୍ତୋଳନ ପରେ ଚିତାକର୍ଷକ ପରେଡ୍ ଅନୁଷ୍ଠିତ ହୋଇଥିଲା। ସେହିପରି ଦେଶର ସାମରିକ ପରାକ୍ରମ ପ୍ରଦର୍ଶିତ ହୋଇଥିଲା। ସ୍ବଦେଶୀ ଜ୍ଞାନ କୌଶଳରେ ନିର୍ମିତ ଯୁଦ୍ଧାସ୍ତ୍ରକୁ ଏଥିରେ ସାମିଲ କରାଯାଇଥିଲା। ଦେଶର ବିଭିନ୍ନ କୋଣର କଳାର ବିଭବକୁ ଭାରତ ସମେତ ପୂରା ବିଶ୍ବବାସୀ ଦେଖିଥିଲେ। ଶୌର୍ଯ୍ୟ ଓ ସଂସ୍କୃତିର ଅପୂର୍ବ ଝଲକ ମଧ୍ୟ ଦେଖାଯାଇଥିଲା।
ଅଗ୍ରଗତି ହାସଲ କରିଛୁ: ରାଷ୍ଟ୍ରପତି
ସାଧାରଣତନ୍ତ୍ର ଦିବସ ପୂର୍ବ ସନ୍ଧ୍ୟା ରାଷ୍ଟ୍ରପତି ଦ୍ରୌପଦୀ ମୁର୍ମୁ କହିଥିଲେ ଯେ, ବିଶ୍ବର ଅନ୍ୟତମ ପ୍ରାଚୀନ ସଭ୍ୟତା ଭାରତର ସମ୍ବିଧାନ ମାନବିକ ଦର୍ଶନ ଏବଂ ନିକଟ ଅତୀତରେ ବିକାଶ ଲାଭ କରିଥିବା ନୂଆ ଚିନ୍ତାଧାରା ଦ୍ବାରା ଅନୁପ୍ରାଣିତ। ଡ. ବିଆର୍ ଆମ୍ବେଦକର, ଯାହାଙ୍କ ନେତୃତ୍ବରେ ସମ୍ବିଧାନ ପ୍ରଣୟନ କମିଟି ଗଠନ ହୋଇଥିଲା, ତାଙ୍କ ନିକଟରେ ଦେଶ ସର୍ବଦା କୃତଜ୍ଞ ରହିବ। ଭାରତ ଆଜି ବିଶ୍ବର ପ୍ରମୁଖ ଅଭିବୃଦ୍ଧି ହାସଲକାରୀ ଅର୍ଥନୀତିରେ ପରିଣତ ହୋଇଛି। ମହିଳା ସଶକ୍ତୀକରଣ ଏବଂ ଲିଙ୍ଗଗତ ସମାନତା ଆଉ କେବଳ ସ୍ଳୋଗାନ ହୋଇ ରହିନାହିଁ। ଏ କ୍ଷେତ୍ରରେ ଆମେ ଯଥେଷ୍ଟ ଅଗ୍ରଗତି ହାସଲ କରିଛୁ। ଭାରତ ଜି-୨୦ର ସଭାପତିତ୍ବ ପଦବିରେ ରହିବା ନେଇ ରାଷ୍ଟ୍ରପତି କହିଛନ୍ତି ଭାରତର ଗଣତନ୍ତ୍ର ଏବଂ ବହୁପାକ୍ଷିକ ବ୍ୟବସ୍ଥା ସଂପର୍କରେ ପ୍ରଚାର କରିବା ସହିତ ଏକ ସୁନ୍ଦର ବିଶ୍ବ ଏବଂ ଉତ୍ତମ ଭବିଷ୍ୟତ ଗଠନ ଲାଗି ଏହା ଏକ ସୁଯୋଗ ଆଣିଛି।
କହିବା ଓ କରିବା ଭିତରେ ପାର୍ଥକ୍ୟ
‘ଗଣତନ୍ତ୍ର ଲୋକଙ୍କ ପାଇଁ, ଲୋକଙ୍କ ଦ୍ବାରା ଓ ଗଣତନ୍ତ୍ର ଲୋକଙ୍କର‘ ଏହି ଶ୍ଲୋଗାନର ସତ୍ୟରେ ପରିଣତ ହେଉନାହିଁ। ଗଣତନ୍ତ୍ରରେ ଦିବସ ଅବସରରେ ସରକାରୀ ପଦାଧିକାରୀ ଓ ନେତାମାନେ ଯାହା କହୁଛନ୍ତି, ବାସ୍ତବରେ ଦେଶର ଅବସ୍ଥା ଅବିକଳ ତାହା ନୁହେଁ। ଉଦାହରଣ ସ୍ବରୂପ ସହରର ମୁଖ୍ୟ ରାସ୍ତା ଯେମିତି ଚିକ୍ଣିଆ ହେଇଛି, ମୁଖ୍ୟ ରାସ୍ତାଠାରୁ ଯେତେବେଳେ ଖସିବେ, ଆବଡ଼ାଖାବଡ଼ା ରାସ୍ତାରେ ଝୁଣ୍ଟିପଡ଼ିବେ। କେବଳ ରାସ୍ତା କଥା ନୁହେଁ, ସରକାରଙ୍କ ପ୍ରତିଟି କାମ ସେହିଭଳି। ଯଦିଓ ଭିନ୍ନତା ମଧ୍ୟରେ ଏକତାର ପ୍ରତୀକ ଭାରତ କୁହାଯାଉଛି। ବାସ୍ତବ ପରିସ୍ଥିତି ଅଲଗା। ଲକ୍ଷାଧିକ ଟଙ୍କା ଦରମା ପାଉଥିବା କର୍ମଚାରୀ ନିମ୍ନସ୍ତରର କର୍ମଚାରୀଙ୍କୁ ମଣିଷ ଭଳି ବ୍ୟବହାର ମଧ୍ୟ କରନ୍ତି ନାହିଁ। ସେହିପରି ସରକାରୀ କାର୍ଯ୍ୟାଳୟର ପିଅନ ନିଜକୁ ବଡ଼ବାବୁ ମନେ କରନ୍ତି। ସାଧାରଣ ନାଗରିକଙ୍କ ଭଲ ବ୍ୟବହାର ଦେଖାନ୍ତି ନାହିଁ। ଜିଲ୍ଲା ଓ ଉପଖଣ୍ଡ ସ୍ତରରେ ବାବୁଙ୍କ ଭାଉ ସୀମା ଟପିଗଲାଣି। ଦେଶରେ ଗୋଟିଏ ଧନୀକ ରହୁଥିବା ବେଳେ ଅନ୍ୟ ଗୋଷ୍ଠୀ ଖାଇବାକୁ ପାଉନାହାନ୍ତି। ଲକ୍ଷ ଲକ୍ଷ ଲୋକଙ୍କର ବାସଗୃହ ନାହିଁ। ତେଣୁ ସେମାନଙ୍କୁ ଯାଯାବର ଜୀବନ ଜିଇଁବାକୁ ପଡ଼ିଥାଏ।
ଦ୍ରାରିଦ୍ୟ ସମସ୍ୟା ଦୂର କେବେ?
ସେହିଭଳି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି, ଆମ ସମ୍ବିଧାନ ଏକ ଆଦର୍ଶ ସମ୍ବିଧାନ। ଏହା ଆମ ଗଣତନ୍ତ୍ରର ଆତ୍ମା । ଏକ ମହାନ ଦେଶର ନାଗରିକ ଭାବରେ ଆମର ସକଳ ଶକ୍ତିର ଆଧାର ହେଉଛି ଆମର ସମ୍ବିଧାନ। ବିଶ୍ବକପ୍ ହକିର ମାହୋଲ ଏବେ ସାରା ରାଜ୍ୟକୁ ଉତ୍ସବ ମୁଖର କରିଛି। ସାରା ବିଶ୍ବର ନଜର ଏବେ ଓଡ଼ିଶା ଉପରେ ରହିଛି। ମୁଖ୍ୟମନ୍ତ୍ରୀ ଆମ ରାଜ୍ୟର ଦୁର୍ବଳତାକୁ ପ୍ରକାଶ କରିନାହାନ୍ତି। ସେ କେବେ ବି କହି ନାହାନ୍ତି ଯେ, ‘ଓଡ଼ିଶାରୁ ଆଉ କେତେ ବର୍ଷ ଲୋକଙ୍କୁ ଦାଦନ ଖଟି ଯିବାକୁ ପଡ଼ି। ଆଳୁ, ପିଆଜ, ଅଣ୍ଡା, ଫଳ, ମାଛ ପ୍ରଚୁର ପରିମାଣରେ ଉତ୍ପାଦନ ହେବ। ଆମେ ବାହାରକୁ ରପ୍ତାନୀ କରିବା। ସେହିପରି ରାଜ୍ୟରୁ ବେକାରୀ ସମସ୍ୟର ମୂଳୋତ୍ପାଟନ ହେବ।‘
