Saturday, June 22, 2024
Homeମହାକାଶ ଗବେଷଣା ପାଇଁ ଭିସୁଟ ଏବଂ ଇସ୍ରୋ ମଧ୍ୟରେ ବୁଝାମଣା ପତ୍ର ସ୍ୱାକ୍ଷରିତ
Array

ମହାକାଶ ଗବେଷଣା ପାଇଁ ଭିସୁଟ ଏବଂ ଇସ୍ରୋ ମଧ୍ୟରେ ବୁଝାମଣା ପତ୍ର ସ୍ୱାକ୍ଷରିତ

ସମ୍ବଲପୁର: ବୀର ସୁରେନ୍ଦ୍ର ସାଏ ବୈଷୟିକ ବିଶ୍ବବିଦ୍ୟାଳୟରେ ଯୋଡ଼ିହେଲା ଆଉ ଏକ ଅଧ୍ୟାୟ। ଭାରତୀୟ ମହାକାଶ ଗବେଷଣା ସଙ୍ଗଠନ (ଇସ୍ରୋ) ଏବଂ ବୁର୍ଲା ସ୍ଥିତ ବୀର ସୁରେନ୍ଦ୍ର ସାଏ ବୈଷୟିକ ବିଶ୍ୱବିଦ୍ୟାଳୟ ମଧ୍ୟରେ ମହାକାଶ, ରକେଟ ନିର୍ମାଣ ପ୍ରଭୃତି ବିଷୟରେ ଗବେଷଣା ପାଇଁ ମଙ୍ଗଳବାର ଏକ ବୁଝାମଣା ପତ୍ର ସ୍ୱାକ୍ଷରିତ ହୋଇଛି। ଇସ୍ରୋର ଅଧ୍ୟକ୍ଷ ଡ. କେ. ଶିବନଙ୍କ ଉପସ୍ଥିତିରେ ଏହି ବୁଝାମଣା ପତ୍ର ସ୍ୱାକ୍ଷର କାର୍ଯ୍ୟକ୍ରମ ଭର୍ଚୁଆଲ ମାଧ୍ୟମରେ କରାଯାଇଥିଲା। ଡ. ଶିବନ ତାଙ୍କ ବକ୍ତବ୍ୟରେ ଗବେଷଣା କ୍ଷେତ୍ରରେ ଭିସୁଟର ଉତ୍କର୍ଷତାକୁ ପ୍ରଶଂସା କରିଥିଲେ। ବିଶ୍ୱବିଦ୍ୟାଳୟରେ ପ୍ରସ୍ତାବିତ ମହାକାଶ ଅନ୍ୱେଷଣ ଅନୁସନ୍ଧାନ କେନ୍ଦ୍ର ଛାତ୍ରଛାତ୍ରୀଙ୍କୁ ମହାକାଶ ସମ୍ପର୍କିତ ଅତ୍ୟାଧୂନିକ ଜ୍ଞାନକୌଶଳ ଉପଲବ୍ଧ କରାଇବାରେ ପ୍ରେତ୍ସାହିତ କରିବ ଓ ମହାକାଶ ଶିକ୍ଷା ବାବଦରେ ଅନୂକୁଳ ବାତାବରଣ ସୃଷ୍ଟି କରିବ ବୋଲି ଆଶା ପ୍ରକଟ କରିଥିଲେ। ଛାତ୍ରଛାତ୍ରୀମାନେ ଆଗକୁ ମହାକାଶ ଗବେଷଣା ଏବଂ ପ୍ରୟୋଗ ପାଇଁ ଅଧିକ ଆଗ୍ରହ ପ୍ରକାଶ କରିବେ। ଦେଶ ଏ କ୍ଷେତ୍ରରେ ଉଲ୍ଲେଖନୀୟ ପରିବର୍ତ୍ତନ ଆଗକୁ ଅଗ୍ରସର ହେଉଛି। ହେଲେ ଏଥିପାଇଁ ସବ-ସିଷ୍ଟମ ଓ ପ୍ରୋପୁଲସନର ବିକାଶ ସକାଶେ ଅଧିକ ଗବେଷଣା ଦରକାର ରହିଥିବା ଡ. ଶିବନ କହିଥିଲେ।

ଏହି ଅବସରରେ ରାଜ୍ୟ ଦକ୍ଷତା ବିକାଶ ଓ ବୈଷୟିକ ଶିକ୍ଷା ବିଭାଗର ସଚିବ ସଞ୍ଜୟ କୁମାର ସିଂହ କହିଲେ ଯେ, ସାଧାରଣତ ଗ୍ରାମୀଣ ଏବଂ ଛୋଟ ସହରର ଛାତ୍ରଛାତ୍ରୀଙ୍କ ଠାରୁ ଉଚ୍ଚମାନର ଉପାୟ ଏବଂ କୌଶଳ ଆସିଥାଏ। ଆମକୁ ଏହି ଦିଗ ପ୍ରତି ଗୁରତ୍ୱ ଦେବାକୁ ହେବ। ବିଭିନ୍ନ ଷ୍ଟାର୍ଟ-ଅପକୁ ସମୃଦ୍ଧ କରିବା ଏବଂ ପ୍ରୋତ୍ସାହିତ କରିବାରେ ଏହି ବିଶ୍ୱବିଦ୍ୟାଳୟର ପଦକ୍ଷେପ ବାବଦରେ ଉଲ୍ଲେଖ କରି ବିଭାଗୀୟ ସଚିବ ଶ୍ରୀ ସିଂହ ଏହି ମହାକାଶ ଗବେଷଣା ସମ୍ପର୍କିତ ପ୍ରକଳ୍ପ ପାଇଁ ଇସ୍ରୋ ଓ ଏହାର ଅଧ୍ୟକ୍ଷ ଡ. ଶିବନଙ୍କ ସହଯୋଗକୁ ପ୍ରଶଂସା କରିଥିଲେ। ଏହା ତରୁଣ ବୈଜ୍ଞାନିକମାନଙ୍କ ମଧ୍ୟରେ ରହିଥିବା ପ୍ରତିଭାକୁ ବିକଶିତ କରିବ ବୋଲି ସେ କହିଥିଲେ।

କାର୍ଯ୍ୟକ୍ରମରେ ଭିସୁଟ ବିଶ୍ୱବିଦ୍ୟାଳୟର କୁଳପତି ପ୍ରଫେସରବ ଡ. ଅଟଳ ଚୌଧୁରୀ ଇସ୍ରୋର ଦକ୍ଷତା ବିକାଶ କାର୍ଯ୍ୟକ୍ରମର ନିଦ୍ଦେର୍ଶକ ଡ. ପି ଭି ଭେଙ୍କିଟକ୍ରିଷ୍ଣା ପ୍ରମୁଖ ଏହି ଏମଓୟୁ ସ୍ୱାକ୍ଷର ସମାରୋହରେ ଯୋଗ ଦେଇଥିଲେ। ପୂର୍ବରୁ ଇସ୍ରୋର ଉପନିର୍ଦ୍ଦେଶକ ଡ. ବିଜନ ଦାସ ଛାତ୍ରଛାତ୍ରୀଙ୍କ ନିରନ୍ତର ଉଦ୍ୟମ ଓ ଇସ୍ରୋର ପ୍ରୋତ୍ସାହନ ବିଷୟରେ ସୂଚନା ଦେଇଥିଲେ। ସୂଚନା ଯୋଗ୍ୟ ଯେ, ଏହି ଏମ୍‌ଓୟୁ ସ୍ୱାକ୍ଷରିତ ହେବା ପରେ ବିଶ୍ୱିଦ୍ୟାଳୟରେ ବୀର ସୁରେନ୍ଦ୍ର ସାଏ ମହାକାଶ ଅନ୍ୱେଷଣ କେନ୍ଦ୍ର (ଭିଏସଏସଆଇସି) ବିକଶିତ କରାଯିବ। ଏଥିପାଇଁ ଇସ୍ରୋ ଏକକାଳୀନ ୫୦ ଲକ୍ଷ ଟଙ୍କାର ଅନୁଦାନ ପ୍ରଦାନ କରିବ। ଏଥିରେ ପରୀକ୍ଷଣ ସୁବିଧା, ପ୍ରକଳ୍ପ ନିର୍ମାଣ ଏବଂ ଗବେଷଣା କରାଯିବ ନିରନ୍ତର ଓ ସହନୀୟ ଉତ୍‌କ୍ଷେପଣ ଯାନ ବିକାଶ ଓ ଏହାର ମୂଲ୍ୟାୟନ, ରକେଟ ଉତକ୍ଷେପଣ ଓ ଏହାର ପ୍ରଭାବ ସହିତ ନିରାପତ୍ତା ବାବଦରେ ଇସ୍ରୋ ବୈଷୟିକ ପରାମର୍ଶ ପ୍ରଦାନ କରିବ। ଶ୍ରୀହରିକୋଟା, ଥୁମ୍ବା କିମ୍ବା ବାଲେଶ୍ୱରରେ ଥିବା ଉତ୍‌କ୍ଷେପଣ ଘାଟିରେ ସାଉଣ୍ଡିଙ୍ଗ ରକେଟ ପରୀକ୍ଷଣ ସୁବିଧା ଉପଯୋଗ କରିହେବ। ହେଲେ ଏହି ବିଶ୍ୱବିଦ୍ୟାଳୟରେ ଏହି ମହାକାଶ ଗବେଷଣା କେନ୍ଦ୍ର ପ୍ରକଳ୍ପର ଆବଶ୍ୟକ ସମାଧାନ ପାଇଁ ଇସ୍ରୋର ଗବେଷଣାଗାରରେ ରହିଥିବା ସୁବିଧାକୁ ରିହାତି କିମ୍ବା ବିନା ଶୁଳ୍କରେ ବ୍ୟବହାର କରିହେବ। ପ୍ରକଳ୍ପ କାର୍ଯ୍ୟରେ ନିୟୋଜିର ସୀମିର ସଂଖ୍ୟକ ଛାତ୍ରଛାତ୍ରୀଙ୍କୁ ଏହି ଆଧାରରେ ଇସ୍ରୋର ପରୀକ୍ଷାଗାରରେ ପ୍ରଶିକ୍ଷଣ ସୁବିଧା ମିଳିବ।

ଏହି ଅନ୍ୱେଷଣ କେନ୍ଦ୍ର (ଭିଏସଏସଆସି) ଏବଂ ବିଶ୍ୱବିଦ୍ୟାଳୟ ବିଶ୍ୱରେ ଏହି କ୍ଷେତ୍ରରେ ହେଉଥିବା ଅଗ୍ରଗତିର ଅନୁସନ୍ଧାନ କରି ତତସମ୍ପର୍କିତ ପ୍ରକଳ୍ପ ହାତକୁ ନେବ ଓ ଦେଶକୁ ମହାକାଶ ଗବେଷଣା କ୍ଷେତ୍ରରେ ସଫଳ କରିବା ଲକ୍ଷ୍ୟକୁ ସାର୍ଥକ କରିବାରେ କାର୍ଯ୍ୟ କରିବ। ଏଥିପାଇଁ ଇଲେକ୍ଟ୍ରିକାଲ ଓ ଇଇଇ, ମେକାନିକାଲ, ଯାନ୍ତ୍ରୀକ, ରସାୟନ ବିଜ୍ଞାନ, ମେଟେରୋଲୋଜି ଓ ମେଟାରିଆଲ ଆଦି ବିଭାଗରେ ଥିବା ପରୀକ୍ଷାଗାର ଏବଂ ଓାର୍କସପର ସୁବିଧାକୁ ରକେଟ ପ୍ରକଳ୍ପ ପାଇଁ ବ୍ୟବହାର କରିବାକୁ ସୁଯୋଗ ଦେବ। ସେହିପରି ଏହି ଦୁଇ ସଂଗଠନ ନିଜର ପରୀକ୍ଷା ଓ ଗବେଷଣାଗାର ସୁବିଧାକୁ ଇସ୍ରୋ ସଂଶ୍ଲିଷ୍ଟ ସେଲ, ମହାକାଶ ଅନୁସନ୍ଧାନ କେନ୍ଦ୍ର, ମହାକାଶ ସମ୍ବନ୍ଧିତ ଆଞ୍ଚଳିକ ଏକାଡ଼େମିକ କେନ୍ଦ୍ର ଦ୍ୱାରା ବ୍ୟବହାର ପାଇଁ ଉପଲବ୍ଧ କରାଇବେ। କେନ୍ଦ୍ର ଏବଂ ବିଶ୍ୱବିଦ୍ୟାଳୟ ମହାକାଶ ଓ ରକେଟ ବିଜ୍ଞାନ ସମ୍ପର୍କରେ ଅଗ୍ରଗତିକୁ ପରିପାଶ୍ୱର୍ ତଥା ଅଞ୍ଚଳରେ ଥିବା ଅନ୍ୟ ସଂସ୍ଥାନ ମାନଙ୍କରେ ସମ୍ପ୍ରସାରିତ କରିବେ ବୋଲି ବୁଝାମଣା ପତ୍ରରେ ଉଲ୍ଲେଖ ରହିଛି। ଏଠାରେ ଉଲ୍ଲେଖ କରାଯାଇପାରେ କି ଯେ, ବିଶ୍ୱବିଦ୍ୟାଳୟର ଆଇଡ଼ିଆ ଓ ଇନୋଭେସନ ସେଲର ଛାତ୍ରଛାତ୍ରୀ ମାନଙ୍କ ଦ୍ୱାରା ବିକଶିତ ଉପଗ୍ରହ ରକେଟ ଜାତୀୟ ଓ ଅନ୍ତର୍ଜାତୀୟ ସ୍ତରରେ ସୁନାମ ହାସଲ କରିବା ସହିତ ବିଭିନ୍ନ ରେକର୍ଡ ବୁକରେ ସ୍ଥାନିତ ହୋଇପାରିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ତାଙ୍କର ମନ କି ବାତ କାର୍ଯ୍ୟକ୍ରମେ ଏହି ଛାତ୍ରଛାତ୍ରୀଙ୍କ ଗବେଷଣା ବାବଦରେ ଅବତାରଣା କରିଥିଲେ। ଇସ୍ରୋର କୌଣସି ଶିକ୍ଷାନୁଷ୍ଠାନରେ ଏହି ଭଳି କାର୍ଯ୍ୟକ୍ରମରେ ସାମିଲ ହେବା ଏହା ପ୍ରଥମ ଅଟେ।

RELATED ARTICLES

LEAVE A REPLY

Please enter your comment!
Please enter your name here

Most Popular

Recent Comments