Wednesday, June 12, 2024
Homeମହାବିଦ୍ୟାଳୟରେ ଛାତ୍ରଛାତ୍ରୀଙ୍କୁ ମିଲିବ ‘ସଂସ୍କାର’ ଶିକ୍ଷା
Array

ମହାବିଦ୍ୟାଳୟରେ ଛାତ୍ରଛାତ୍ରୀଙ୍କୁ ମିଲିବ ‘ସଂସ୍କାର’ ଶିକ୍ଷା

ଭୁବନେଶ୍ୱର: ଶିକ୍ଷାର ମୂଳ ଉଦ୍ଦେଶ୍ୟ ହେଉଛି ବ୍ୟକ୍ତିର ଚରିତ୍ର ନିର୍ମାଣ କରିବା। ବ୍ୟକ୍ତିର ବ୍ୟକ୍ତିତ୍ୱକୁ ପରିପ୍ରକାଶ କରିବା ଅର୍ଥାତ ଅନ୍ଧାର ଭିତରେ ଜିଉଁଥିବା ମନୁଷ୍ୟକୁ ଆଲୋକ ଦେଖାଇବା। ସର୍ବୋପରି ମାନବିକତା ପ୍ରଦର୍ଶନ କରିବା ହେଉଛି ଶିକ୍ଷାର ଅନ୍ୟତମ ଲକ୍ଷ୍ୟ। ଉଚିତ୍‌ ଶିକ୍ଷା ମାଧ୍ୟମରେ ସମାଜର ବିକାଶ ସୁନିଶ୍ଚିତ। ସମାଜରେ ପରିବର୍ତ୍ତନ ଦେଖାଗଲେ ବିକାଶ ସୁନିଶ୍ଚିତ ହୋଇପାରିବ। ଆଧୁନିକ ଯୁଗରେ ଶିକ୍ଷା ବ୍ୟକ୍ତିଗତ ହୋଇଯାଉଛି। ଅଧିକାଂଶ କ୍ଷେତ୍ରରେ ଏହା ଅନ୍ୟର କାମରେ ଆସୁ ନଥିବା ପରିଲକ୍ଷିତ ହେଉଛି। ତେଣୁ ଆଜି ବି ଏଥିରେ ପରିବର୍ତ୍ତନ ଅଣାଯିବାର ଆବଶ୍ୟକତା ରହିଛି। ଏଥି ପାଇଁ ସମସ୍ତଙ୍କୁ ମିଳିମିଶି କାମ କରିବାକୁ ହେବ।

ଭାରତ ହେଉଛି ବିଶ୍ୱର ଅନ୍ୟତମ ପ୍ରାଚୀନ ଦେଶ। ଏଠାକାର ପରଂପରା, ସଂସ୍କୃତି, ସଂସ୍କାର ତଥା ଆଚରଣ-ବ୍ୟବହାରକୁ ବିଶ୍ୱର ବିକାଶିତ ଦେଶମାନେ ଗ୍ରହଣ କରନ୍ତି। ବହୁ ପୁରାତନ କାଳରୁ ଭାରତରେ ବରିଷ୍ଠ ମାନଙ୍କୁ ସମ୍ମାନ ଦିଆଯିବା ପରଂପରା ରହି ଆସିଛି। ବୟୋଜ୍ୟେଷ୍ଠ ଏବଂ ବରିଷ୍ଠ ମାନଙ୍କ ଶୁଭକାମନରେ କନିଷ୍ଠ ମାନଙ୍କର ବିକାଶ ହୋଇଥାଏ ବୋଲି ବିଶ୍ୱାସ ରହିଛି। ତେଣୁ ପ୍ରତ୍ୟେକ ପରିବାରରେ ପିଲମାନଙ୍କୁ ଛୋଟ ସମୟରୁ ସଂସ୍କାର ଦିଆଯାଇଥାଏ। ମାତ୍ର ଆଜିକାଲିର ପିଲା ବଡ଼ ହେଲେ ଏହାକୁ ଭୁଲିଯାଇ ପାଶ୍ଚ୍ୟାତ ସଭ୍ୟତାକୁ ଅନୁସରଣ କରୁଥିବା ଦେଖିବାକୁ ମିଳୁଛି।

ରାଜ୍ୟ ସରକାରଙ୍କ ଉଦ୍ୟମ

ମହାବିଦ୍ୟାଳୟର ପିଲାମାନଙ୍କ ଠାରେ ସଂସ୍କାର ଦେଖାଯାଉ ନଥିବା ରାଜ୍ୟ ସରକାର ଉପଲବ୍ଧି କରିଛନ୍ତି। ଯଦିଓ କମ୍‌ ପରିମାଣରେ ପିଲା ଭଲ ବ୍ୟବହାର ଦେଖାଇ ଥାନ୍ତି, ତଥାପି ଏମାନଙ୍କର ବିକାଶ ଜରୁରୀ ଅଛି। ଶିକ୍ଷା ମାଧ୍ୟମରେ ଦକ୍ଷତା ଓ ଜ୍ଞାନ ବଢ଼ାଇ ପାରିବା। କିନ୍ତୁ ଭଲ ଚରିତ୍ର ବିନା ଶିକ୍ଷାର ପରିପୂର୍ଣ୍ଣତା ହୋଇପାରିବା ନାହିଁ। ରାଜ୍ୟ ସରକାର ଏହା ହୃଦୟଙ୍ଗମ କରିଛନ୍ତି। ଏହା ସ୍ୱାଗତଯୋଗ୍ୟ ପଦକ୍ଷେପ। ଦକ୍ଷତା ଓ ଜ୍ଞାନ ସହିତ ଚରିତ୍ରକୁ ଭଲ ଭାବରେ ଗଢ଼ି ପିଲାମାନଙ୍କର ବ୍ୟକ୍ତିତ୍ୱକୁ ପରିପ୍ରକାଶ କରିବା ଲକ୍ଷ୍ୟ ନେଇ ଆଗାମୀ ଦିନରେ ମହାବିଦ୍ୟାଳୟ ଗୁଡ଼ିକରେ ‘ଯୁବ ସଂସ୍କାର’ କ୍ଲାସ ଆରମ୍ଭ କରିବାକୁ ଯାଉଛନ୍ତି। ରାଜ୍ୟ ସରକାରଙ୍କ ଉଚ୍ଚଶିକ୍ଷା ବିଭାଗର ପ୍ରମୁଖ ସଚିବ ସାସ୍ୱତ ମିଶ୍ର ଏନେଇ ସମସ୍ତ ସରକାରୀ ଓ ସରକାରୀ ଅନୁଦାନପ୍ରାପ୍ତ କଲେଜଗୁଡ଼ିକୁ ପତ୍ର ଲେଖିଛନ୍ତି।

ଚରିତ୍ର ନିର୍ମାଣ ଲକ୍ଷ୍ୟ

ମହାବିଦ୍ୟାଳୟରେ ପିଲମାନଙ୍କୁ ‘ଯୁବ ସଂସ୍କାର’ କ୍ଲାସ ଦେବା ପାଇଁ ସ୍ୱତନ୍ତ୍ର କୋଠରି ପ୍ରସ୍ତୁତ କରାଯିବ। ଏହି ସ୍ୱତନ୍ତ୍ର କୋଠରୀରେ ଅଡିଓ/ଭିଜୁଆଲ ପ୍ରଦର୍ଶନ ପାଇଁ ବ୍ୟବସ୍ଥା କରାଯିବ। ପିଲାମାନଙ୍କୁ ମାସକୁ ଥରେ ବିଭିନ୍ନ ପ୍ରସଙ୍ଗରେ ପ୍ରଶିକ୍ଷକମାନେ ଶିକ୍ଷା ଦେବେ।  ଜଣେ ବରିଷ୍ଠ ଶିକ୍ଷକଙ୍କ ନେତୃତ୍ୱରେ ୨ରୁ ୩ ଜଣ ଶିକ୍ଷକ ସଂସ୍କାରମୂଳକ ଶିକ୍ଷା ଦେବେ। ଶିକ୍ଷାଦାନ ପାଇଁ ଏନ୍‌ଏସ୍‌ଏସ୍‌, ଓ୍ଵାଇଆର୍‌ସି କାଉନ୍‌ସେଲର, ଏନ୍‌ସିସି ଅଫିସରଙ୍କୁ ମୁଖ୍ୟତଃ ଏହି କ୍ଲାସରେ ଦାୟିତ୍ୱ ଦିଆଯାଇପାରିବ। ପିଲାମାନେ ପାଠପଢ଼ି ସାରିଲା ପରେ ସେମାନେ ନିଜ ନିଜ କର୍ମକ୍ଷେତ୍ରରେ କେମିତି ଜଣେ ବ୍ୟବହାରିକ ମଣିଷ ହୋଇ କାମ କରିବେ, ଏହି  ‘ଯୁବ ସଂସ୍କାର’ କ୍ଲାସରେ ପରାମର୍ଶ ଦିଆଯିବ।  ମୋଟାମୋଟି ଭାବେ କହିବାକୁ ଗଲେ ପିଲାମାନଙ୍କର ଚରିତ୍ର ନିର୍ମାଣ କରାଯିବ।

ସଂସ୍କାର କ୍ଲାସର ବିଷୟ

ତମାଖୁ, ନିଶା ଏବଂ ମଦ୍ୟପାନ କିପରି ଶରୀର ପାଇଁ କ୍ଷତି ପହଞ୍ଚାଏ, ସେ ସଂପର୍କରେ ଅଡିଓ-ଭିଜୁଆଲ୍‌ ମାଧ୍ୟମରେ ‘ଯୁବ ସଂସ୍କାର’ କ୍ଲାସ ହେବ। ଦେଶାତ୍ମବୋଧ, ସ୍ୱାଧୀନତା ସଂଗ୍ରାମୀ, ଦାୟିତ୍ୱବୋଧ, ସାଧୁତା, ସ୍ୱଚ୍ଛତା, ମହାପୁରୁଷଙ୍କ ଜୀବନୀ ଉପରେ ପାଠ ପଢ଼ାଯିବ। ସେହିପରି ଅଭିଭାବକ, ବୟସ୍କ ଓ ବରିଷ୍ଠ ନାଗରିକଙ୍କୁ ସମ୍ମାନ ଉପରେ ଶିକ୍ଷା ଦିଆଯିବ। ଶିଶୁ, ମହିଳା, ଦିବ୍ୟାଙ୍ଗ, କିନ୍ନରଙ୍କୁ କିଭଳି ବ୍ୟବହାର କରାଯିବ, ସେନେଇ ମଧ୍ୟ ଶିକ୍ଷକମାନେ ପରାମର୍ଶ ଦେବେ।

RELATED ARTICLES

LEAVE A REPLY

Please enter your comment!
Please enter your name here

Most Popular

Recent Comments