ଶ୍ରାବଣରେ ଶିବ ଶରଣ

ଭୁବନେଶ୍ବର: ଶ୍ରାବଣ ମାସ ସାରା ଶିବଙ୍କ ବାର କହିଲେ କିଛି ଭୁଲ ହେବ ନାହିଁ। କାରଣ ଅନ୍ୟ ମାସ ତୁଳନାରେ ଏହି ମାସରେ ଶିବାଳୟଗୁଡ଼ିକ ଅଧିକ ଚଳଚଞ୍ଚଳ ରହିଥାଏ। ଏଥି ପାଇଁ ଶିବ ଭକ୍ତମାନେ ଶିବାଳୟରେ ଗହଳି ଲଗାଇଥାନ୍ତି। ଶ୍ରାବଣ ମାସର ପ୍ରଥମ ଦିନରେ ଗୁରୁବାର ଶିବାଳୟଗୁଡ଼ିକରେ ହର ହର ମହାଦେବ, ଶଙ୍କର ଭଗବାନ କି ଜୟ… ଶିବ ପଞ୍ଚାକ୍ଷରୀ ମନ୍ତ୍ର ଶୁଭିଛି। ଦ୍ବାଦଶ ଜ୍ୟୋର୍ତିଲିଙ୍ଗ ସ୍ଥଳୀରେ ନିଆରା ଭକ୍ତି ଭାବ ଦେଖାଯାଇଛି। ଝାଡ଼ଖଣ୍ଡର ଦେଓଘରସ୍ଥିତ ବାବା ବଦ୍ୟନାଥଙ୍କ ଠାରୁ ମଧ୍ୟପ୍ରଦେଶର ଉଜୈନସ୍ଥିତ ମହାକାଳେଶ୍ବର ମନ୍ଦିରରେ ହଜାର ହଜାର ଶିବ ଭକ୍ତଙ୍କର ଭିଡ଼ ପରିଲକ୍ଷିତ ହୋଇଛି।

ଉଜୈନର ମହାକାଳେଶ୍ବର ମନ୍ଦିର ଉତ୍ସାହର ସହିତ ଭକ୍ତଙ୍କ ପାଇଁ ଖୋଲିଛି। ବାବା ମହାକାଳେଶ୍ବର ଜ୍ୟୋର୍ତିଲିଙ୍ଗ ମନ୍ଦିରରେ ଶ୍ରାବଣର ପ୍ରଥମ ଦିନରେ ବ୍ୟାପକ ଭାବେ ଶ୍ରଦ୍ଧାଳୁଙ୍କ ସମାଗମ ହୋଇଥିଲା। ଶ୍ରଦ୍ଧାଳୁମାନେ ବାବାଙ୍କ ଭସ୍କ ଆରତୀ ନେବା ପାଇଁ ମନ୍ଦିରକୁ ପହଞ୍ଚି ଥିଲେ। ଭୋର ସକାଳ ୩ଟାରେ ବାବାଙ୍କ ମନ୍ଦିର ଦ୍ବାର ଖୋଳାଯାଇଥିଲା। ଏହା ପରେ ବାବାଙ୍କ ଉପରେ ଜଳାଭିଷେକ କରାଯାଇଥିଲା। ପରେ ପୁଣି କ୍ଷୀର, ଘିଅ, ଦହି, ଚିନି, ମହୁରୁ ପ୍ରସ୍ତୁତ ପଞ୍ଚାମୃତ ଅଭିଷେକ କରାଗଲା।

ଭକ୍ତ-ସେବାୟତ ପ୍ରସ୍ତୁତ

ଚଳିତ ବର୍ଷ ଶ୍ରାବଣ ମାସରେ ୪ଟି ସୋମବାର ପଡୁଛି। ଏଗୁଡ଼ିକ ହେଲା ଜୁଲାଇ ୧୭, ୨୪, ଅଗଷ୍ଟ ୧ ଓ ୮ ତାରିଖ। ଅଗଷ୍ଟ ୧୭ ତାରିଖ ଦିନ ଶ୍ରାବଣ ପୂର୍ଣ୍ଣିମା ଅବସରରେ ଶ୍ରାବଣ ଶରଣ ଶେଷ ହେବ। ତେବେ ପ୍ରଥମ ସୋମବାର ପାଇଁ କାଉଁଡିଆମାନେ ପ୍ରସ୍ତୁତ ହୋଇସାରିଛନ୍ତି। ଭାର, କଳଶ ଓ ଗେରୁଆ ବେଶ ସଜାଇ ସାରିଛନ୍ତି। ବିଗତ ୨ ବର୍ଷ ହେଲା କୋଭିଡ-୧୯ କାରଣରୁ କାଉଁଡିଆ ଯାତ୍ରା ଉପରେ କଟକଣା ଲାଗିଥିବାରୁ ଏଥର ଟିକେ ଅଧିକ ଉତ୍ସାହ ଦେଖାଯିବ। କେବଳ ଭକ୍ତ ନୁହଁନ୍ତି। ବରଂ ଭକ୍ତଙ୍କ ସେବା କରିବା ପାଇଁ ସେବାୟତମାନେ ମଧ୍ୟ ନିଜକୁ ଏବେଠାରୁ ପ୍ରସ୍ତୁତି ଆରମ୍ଭ କରିଦେଇଛନ୍ତି।

ଉତ୍ତରପ୍ରଦେଶ-ଉତ୍ତରାଖଣ୍ଡରେ ସ୍ବତନ୍ତ୍ର ପ୍ରସ୍ତୁତି

କାଉଡିଆଙ୍କ ଭକ୍ତିଭାବକୁ ଅଧିକ ମଜବୁତ କରିବା ପାଇଁ ଉତ୍ତର ପ୍ରଦେଶ ଓ ଉତ୍ତରାଖଣ୍ଡ ସରକାର ସ୍ବତନ୍ତ୍ର ପ୍ରସ୍ତୁତି କରିଛନ୍ତି। ଶ୍ରାବଣରେ କାଉଡିଆମାନେ ପାଦରେ ଚାଲିଚାଲି ଶହ ଶହ କିଲୋମିଟର ଯିବେ। ଉଭୟ ରାଜ୍ୟର ସରକାର ରାସ୍ତାର ଉଭୟ ପାଖରେ ମଦ-ମାଂସ ଦୋକାନ ଖୋଲିବା ଉପରେ କଟକଣା ଲାଗୁ କରିଛନ୍ତି। ରାସ୍ତାକଡ଼ର ଦୋକାନରେ ମଦମାଂସ ସମେତ ଅନ୍ୟ ଆପତ୍ତିଜନକ ସାମଗ୍ରୀ ବିକ୍ରି କରିପାରିବେ ନାହିଁ କାଉଡିଆ ଯାତ୍ରା ସମୟରେ କୌଣସି ପ୍ରକାରର ଅପ୍ରୀତିକର ଘଟଣା ଯେଭଳି ନ ଘଟେ, ସେଥିପାଇଁ ଜିଲ୍ଲା ପ୍ରଶାସନ ତରଫରୁ ଯାଞ୍ଚ କରିବାକୁ ନିଷ୍ପତ୍ତି ନିଆଯାଇଛି ।  

ଶ୍ରବଣ କୁମାର ପ୍ରଥମ କାଉଁଡିଆ

କାଉଁଡିଆ ଯାତ୍ରାକୁ ନେଇ ଅନେକ ଲୋକକଥା ରହିଛି। ଏଥିରୁ ଗୋଟିଏ ହେଉଛି ଶ୍ରବଣ କୁମାର ଉପାଖ୍ୟାନ। ତ୍ରେତୟା ଯୁଗରେ ଶ୍ରବଣ କୁମାର ନିଜର ମାତା-ପିତାଙ୍କ ଇଚ୍ଛା ପୂରଣ କରିବାକୁ କାଉଡିଆ ଯାତ୍ରା କରିଥିଲେ। ସେ ପିତା-ମାତାଙ୍କୁ ଭାରର ଉଭୟ ପାର୍ଶ୍ବରେ ବସାଇ ହରିଦ୍ବାର ନେଇକି ଯାଇଥିଲେ। ମାତା-ପିତାଙ୍କୁ ଶ୍ରବଣ କୁମାର ଗଙ୍ଗାରେ ସ୍ନାନ କରାଇଥିଲେ। ଫେରିବା ବାଟରେ ସେ ଗଙ୍ଗା ଜଳ ଆଣିକି ଆସିଥିଲେ। ସେ ନିଜ ପିତା-ମାତାଙ୍କ ସହିତ ଶିବଲିଙ୍ଗରେ ଗଙ୍ଗାଜଳାଭିଷେକ କରିଥିଲେ। ସେହିଦିନ ଠାରୁ କାଉଡିଆ ଯାତ୍ରା ଆରମ୍ଭ ହୋଇଛି। ଏହା ବ୍ୟତୀତ ଲୋକକଥା ଅନୁସାରେ ଭଗବାନ ପରଶୁରାମ ଗଡମୁକ୍ତେଶ୍ବରରୁ ଗଂଗାଜଳ ଆଣି ଶିବଲିଙ୍ଗରେ ଚଢ଼ାଇ ଥିଲେ। ସେହିଦିନଠାରୁ କାଉଡିଆ ଯାତ୍ରା ଆରମ୍ଭ ହୋଇଥିଲା।