Saturday, May 25, 2024
Homeଖବରଶ୍ରୀମନ୍ଦିରରେ ଶାଳୀନତାପୂର୍ଣ୍ଣ ପୋଷାକ

ଶ୍ରୀମନ୍ଦିରରେ ଶାଳୀନତାପୂର୍ଣ୍ଣ ପୋଷାକ

ଭୁବନେଶ୍ବର: ବିଶ୍ବ ପ୍ରସିଦ୍ଧ ଶ୍ରୀମନ୍ଦିରରେ ଭକ୍ତଙ୍କ ପୋଷାକ ପରିଧାନରେ ଶାଳୀନତା ଆସିବ। ଭକ୍ତମାନେ ଶାଳୀନତାପୂର୍ଣ୍ଣ ପୋଷାକ ପିନ୍ଧି ଶ୍ରୀଜିଉଙ୍କ ଦର୍ଶନ କରିବେ। ଦେଶର ଅନ୍ୟ କିଛି ଜଣାଶୁଣା ମନ୍ଦିର ପରି ପୁରୀ ଶ୍ରୀମନ୍ଦିରକୁ ମଧ୍ୟ ଭକ୍ତମାନେ ଆଉ ଅଶ୍ଲୀଳତା ଦେଖାଯାଉଥିବା ପୋଷାକ ପିନ୍ଧି ପ୍ରବେଶ କରିପାରିବେ ନାହିଁ। ଶ୍ରୀମନ୍ଦିର ପ୍ରଶାସନ ଏଥି ପାଇଁ ପ୍ରକ୍ରିୟା ଆରମ୍ଭ କରିଦେଇଛି। ପ୍ରାଥମିକ ପର୍ଯ୍ୟାୟରେ ପ୍ରଶାସନ ମଙ୍ଗଳବାର ଠାରୁ ବ୍ୟାପକ ସଚେତନାତାମୂଳକ ଅଭିଯାନ ଆରମ୍ଭ କରିଦେଇଛି। ଏହି ପ୍ରକ୍ରିୟା ଆଗାମୀ ଡିସେମ୍ବର ୩୧ ଯାଏଁ ଜାରି ରହିବ। ନୂଆବର୍ଷର ପହିଲାରୁ ନିୟମ କଡ଼ାକଡ଼ି କରାଯିବ।

ଶ୍ରୀମନ୍ଦିର ବିଶ୍ବର ଅନ୍ୟତମ ପ୍ରସିଦ୍ଧ ଆଧ୍ୟାତ୍ମିକ ସ୍ଥଳୀ ହୋଇଥିବାରୁ ଏଠାରେ ଶାଳୀତନା ପ୍ରତି ସମସ୍ତେ ନମ୍ର ଭାବ ରଖିବା ଉଚିତ। ସରକାର, ପ୍ରଶାସନ, ସେବାୟତ ଓ ଭକ୍ତମାନେ ଏହି ଚିନ୍ତାଧାରା ରଖିଲେ ଓଡ଼ିଶାର ସୁନାମ ଆସିବ। ଏଠାକୁ ବାହାରୁ ଆସୁଥିବା ଭକ୍ତମାନେ ଓଡ଼ିଶାର ବ୍ୟବସ୍ଥାକୁ ପ୍ରଶଂସା କରିବେ ନିଶ୍ଚୟ। ତେଣୁ ଏହି କାମରେ ସର୍ବୋପରି ସମସ୍ତେ ସହଯୋଗ କରିବାର ଆବଶ୍ୟକତା ରହିଛି। ଶ୍ରୀମନ୍ଦିରରେ ଭକ୍ତଙ୍କ ପୋଷାକରେ ଶାଳୀନତା ଆଣିବା ନିଶ୍ଚିତ ରୂପେ ସ୍ବାଗତଯୋଗ୍ୟ ପଦକ୍ଷେପ। କିନ୍ତୁ ଏତଦ ବ୍ୟତୀତ ଆହୁରି ଅନେକ ସଂସ୍କାର ଆଣିବାର ଆବଶ୍ୟକତା ରହିଛି। ପ୍ରବଳ ଭିଡ଼ ଯୋଗୁଁ ଏଠାରେ ବିଶୃଙ୍ଖଳା ଦେଖିବାକୁ ମିଳିଥାଏ। ବାହାର ଆସୁଥିବା ଭକ୍ତମାନେ ଏଠାକାର ବ୍ୟବସ୍ଥା ନେଇ ପ୍ରଶ୍ନବାଚୀ କରିଥାନ୍ତି। ତେଣୁ ଡ୍ରେସ କୋଡ ଭଳି ଅନ୍ୟ ରାଜ୍ୟର ଧର୍ମାନୁଷ୍ଠାନଗୁଡ଼ିକରେ ଶୃଙ୍ଖଳିତ ଦର୍ଶନ ପାଇଁ କିଭଳି ବ୍ୟବସ୍ଥା କରାଯାଇଛି, ସେଥି ପ୍ରତି ମଧ୍ୟ ଦୃଷ୍ଟି ଦେବାର ଆବଶ୍ୟକତା ରହିଛି।

ବୈଠକରେ ନିଷ୍ପତ୍ତି

ଶ୍ରୀମନ୍ଦିର ମୁଖ୍ୟ ପ୍ରଶାସକ ରଞ୍ଜନ କୁମାର ଦାସଙ୍କ ଅଧ୍ୟକ୍ଷତାରେ ଶ୍ରୀମନ୍ଦିର କାର୍ଯ୍ୟାଳୟ ସମ୍ମିଳନୀ କକ୍ଷରେ ନୀତି ସବ୍କମିଟି ବୈଠକରେ ଛତିଶାନିଯୋଗ ନାୟକ ଜନାର୍ଦ୍ଦନ ପାଟ୍ଟଯୋଶୀ ମହାପାତ୍ର, ଭିତରଚ୍ଛ ଭବାନୀ ମହାପାତ୍ର, ଶ୍ରୀମନ୍ଦିର ପରିଚାଳନା କମିଟିର ୫ ସେବାୟତ ପ୍ରତିନିଧି ଦୁର୍ଗାପ୍ରସାଦ ଦାସମହାପାତ୍ର, ଅନନ୍ତ ତିଆଡ଼ି, ମାଧବ ମହାପାତ୍ର, ମାଧବ ପୂଜାପଣ୍ଡା ସାମନ୍ତ, ଜଗନ୍ନାଥ କର, ରାଧାବଲ୍ଲଭ ମଠ ମହନ୍ତ ରାମକୃଷ୍ଣ ଦାସମହାରାଜ, ନୀତି ସବ୍କମିଟି ସଦସ୍ୟ ରାମଚନ୍ଦ୍ର ଦାସମହାପାତ୍ର ପ୍ରମୁଖ ଉପସ୍ଥିତ ଥିଲେ। ବୈଠକ ପରେ ମୁଖ୍ୟ ପ୍ରଶାସକ ଶ୍ରୀ ଦାସ କହିଥିଲେ, ଶ୍ରୀମନ୍ଦିର ଏକ ଧାର୍ମିକ ସ୍ଥାନ। ଏହା କେଉଁ ପାର୍କ କି ସମୁଦ୍ର କୂଳ ନୁହେଁ। ଲୋକେ ଏଠାକୁ ଧାର୍ମିକ ଭାବନା ନେଇ ଆସୁଛନ୍ତି। ଏଣୁ ୧୨ ବର୍ଷ ବୟସରୁ ଅଧିକ ବୟସର ଯେଉଁ ଭକ୍ତମାନେ ମହାପ୍ରଭୁଙ୍କ ଦର୍ଶନ ପାଇଁ ଆସୁଛନ୍ତି, ସେମାନଙ୍କ ପୋଷାକ ପରିଧାନରେ ଶାଳୀନତା ଅଣାଯିବ। ଭକ୍ତମାନେ ଯେଭଳି ହାଫ୍ ପ୍ୟାଣ୍ଟ, ଚିରାଫଟା ପୋଷାକ ପିନ୍ଧି ଶ୍ରୀମନ୍ଦିରକୁ ପ୍ରବେଶ ନ କରନ୍ତି, ତାଉପରେ କଡ଼ା ନଜର ରଖାଯିବ।  

ବାହାର ରାଜ୍ୟର ବ୍ୟବସ୍ଥା

ତାମିଲନାଡୁର ପ୍ରସିଦ୍ଧ ରାମେଶ୍ବର, ମଦୁରାଇର ମୀନାକ୍ଷୀ ମନ୍ଦିର, କେରଳର ପଦ୍ମନାଭସ୍ବାମୀ ମନ୍ଦିର, ସବରୀମାଳା, ଆନ୍ଧ୍ରପ୍ରଦେଶର ତିରୁପତିର ବାଲାଜୀ, ଆନ୍ନାଭରମର ସତ୍ୟନାରାୟଣ ସ୍ବାମୀ ଓ ବିଶାଖାପାଟଣାର ସୀମାଞ୍ଚଳମରେ ମଧ୍ୟ ପୁରୀ ମନ୍ଦିର ଭଳି ଭକ୍ତଙ୍କର ପ୍ରବଳ ଗହଳି ଲାଗିଥାଏ। ମାତ୍ର ପ୍ରବଳ ଗହଳି ସତ୍ତ୍ବେ ସେଠାରେ ସୁବ୍ୟବସ୍ଥା ଥିବା ଯୋଗୁଁ ଦଳଚକାଟାର ସମ୍ଭାବନା କମ ଥାଏ। ଦର୍ଶକମାନେ ଠାକୁରଙ୍କ ନିକଟକୁ ପହଞ୍ଚିବା ପାଇଁ ଯେଉଁ ଭଳି ବେରିକେଡ ଭିତରେ ଯାଇଥାନ୍ତି, ପୁରୀରେ ସେହିଭଳି ବ୍ୟବସ୍ଥା ହୋଇପାରି ନାହିଁ। ସେଠାରେ ଭକ୍ତମାନେ ଦୁଇରୁ ୩ ଘଣ୍ଟା ଧରି ଲାଇନ୍ରେ ଛିଡ଼ା ହେଲେ ମଧ୍ୟ ଜଣାପଡ଼ି ନଥାଏ। ଭକ୍ତମାନେ ନିଜେ ଶୃଙ୍ଖଳିତ ରହିବା ସହିତ ଅନ୍ୟମାନଙ୍କ ସୁବିଧା ପ୍ରତି ମଧ୍ୟ ଯତ୍ନବାନ ହୋଇଥାନ୍ତି। କିନ୍ତୁ ପୁରୀର ଅବସ୍ଥା ଭିନ୍ନ।

ସ୍ବାଗତଯୋଗ୍ୟ ପଦକ୍ଷେପ

ଶ୍ରୀମନ୍ଦିରରେ ଶାଳୀନତାପୂର୍ଣ୍ଣ ପୋଷାକକୁ ବୁଦ୍ଧିଜୀବୀ ମହଲରେ ସ୍ବାଗତ କରାଯାଇଛି। ସାମାଜିକ ଗଣମାଧ୍ୟମ ଫେସ୍ବୁକ୍ରେ ପ୍ରଣବ ପ୍ରକାଶ ନାୟକ ନାମରେ ଜଣେ ବ୍ୟକ୍ତି ଲେଖିଛନ୍ତି, ଆମ ଘରମାନଙ୍କରେ ମା ଓ ମହିଳାମାନେ ସଂଧ୍ୟା କି ପୂଜା କଲାବେଳେ ପୂଜାଶାଢ଼ି ପିନ୍ଧନ୍ତି। ସେମିତି ଗାଆଁରେ କିଛି ବିଶେଷ ପୂଜା କି ଘର ପ୍ରତିଷ୍ଠା କି ଅଷ୍ଟମ ପ୍ରହରୀ ହେଲେ ପୁରୁଷମାନେ ବି ଧୋତି, ଗଞ୍ଜି ଆଦି ପରିଧାନ କରନ୍ତି। ଶ୍ରୀମନ୍ଦିର ଓଡ଼ିଆ ଜାତିର ସର୍ବଶ୍ରେଷ୍ଠ ତଥା ପବିତ୍ରତମ ଆରଧ୍ୟସ୍ଥଳ। ଏଣୁ ମହାପ୍ରଭୁ ଜଗନ୍ନାଥଙ୍କ ପୂଜା ପଇଁ ଗଲାବେଳେ ଅନୁରୂପ ସଂସ୍କାର ସ୍ବାଗତଯୋଗ୍ୟ ପଦକ୍ଷେପ। ଆମକୁ ମନେ ରଖିବାକୁ ହେବ ଯେ, ପୁରୀ ଗୋଆ ନୁହେଁ। ଏହା ଏକ ଧାର୍ମିକ ସ୍ଥଳୀ। କେବଳ ପର୍ଯ୍ୟଟନ ସ୍ଥଳୀ ନୁହେଁ। ଆମକୁ ଉଭୟଙ୍କ ମଧ୍ୟରେ ଏକ ସ୍ପଷ୍ଟ ସୀମାରେଖା ଟଣିବାର ଘୋର ଆବଶ୍ୟକତା ରହିଛି। କ୍ରମଶଃ ଭୟଙ୍କର ପାଲଟିଥିବା ସାମାଜିକ ଅଧୋପତନ ରୋକିବାକୁ ଉଭୟ ସରକାର୍ ଓ ବୁଦ୍ଧିଜୀବୀ ଆଗକୁ ଆସିବା ଦରକାର। ଜନକାଶୀ ବଡ଼ପଣ୍ଡା ଲେଖିଛନ୍ତି, ଆମେ ଓଡିଆମାନେ ଫୁଲପ୍ୟାଣ୍ଟ/ଟ୍ରାଉଜର/ଧୋତି/ମଠା/ପାଟ ସହ ସାର୍ଟ/ପଞ୍ଜାବୀ/ଉତ୍ତରୀୟ ପିନ୍ଧିବା ଓ ମହିଳାମାନେ ଶାଢ଼ି/ଚୁଡିଦାର-ପଞ୍ଜାବି/ ଫୁଲପ୍ୟାଣ୍ଟ-ସାର୍ଟ/ପୁରା ପୋଷାକ ପିନ୍ଧି ଶ୍ରୀମନ୍ଦିର ଯିବା। ପିଲାଙ୍କୁ ମଧ୍ୟ ଫୁଲପ୍ୟାଣ୍ଟ-ସାର୍ଟ ଭଳି ପୁରାପୋଷାକ ପିନ୍ଧାଇବା। ଆମ ଦେଖାଦେଖି ଅନ୍ୟମାନେ ବି ସେପରି କରିବେ।

RELATED ARTICLES

LEAVE A REPLY

Please enter your comment!
Please enter your name here

Most Popular

Recent Comments