Thursday, July 18, 2024
Homeସରକାରଙ୍କ ଦୃଷ୍ଟି ଅଢୁଆଳରେ ବୁଢୀଦର ପଞ୍ଚାୟତ ,ଯୋଜନା ବାଟବଣା, କାଗଜ କଲମରେ ଚାଲିଛି ସରକାରୀ ଯୋଜନା
Array

ସରକାରଙ୍କ ଦୃଷ୍ଟି ଅଢୁଆଳରେ ବୁଢୀଦର ପଞ୍ଚାୟତ ,ଯୋଜନା ବାଟବଣା, କାଗଜ କଲମରେ ଚାଲିଛି ସରକାରୀ ଯୋଜନା

ଯୋଜନା ପରେ ଯୋଜନା ଚାଲିଛି ଖର୍ଚ୍ଚ ମଧ୍ୟ ହେଉଛି କୋଟିକୋଟି ଟଙ୍କା । ହେଲେ ସୁଧୁରି ପାରୁନି ଆଦିବାସୀ ଓ ଦୁର୍ଗମ ଅଞ୍ଚଳରେ ବସବାସ କରୁଥିବା ଲୋକଙ୍କ ଅବସ୍ଥା । ସାମାଜିକ ଅର୍ଥନୈତିକ ପରିବର୍ତ୍ତନ କେବଳ ସରକାରଙ୍କ ସ୍ଲୋଗାନ ରେ ହିଁ ସୀମିତ ହୋଇ ରହିଯାଇଛି । କଳାହାଣ୍ଡି ଜିଲ୍ଲା ଜୁନାଗଡ ବ୍ଲକ ଅନ୍ତର୍ଗତ ବୁଢୀଦର ପଞ୍ଚାୟତର ଲଖନାପଡା, ବିଜ୍ରାଦର ଓ ବେହେରାଗୁଡା ଗାଁ ସ୍ୱାଧିନତାର ୭୧ ବର୍ଷପରେ ମଧ୍ୟ ବିକାଶର ଆଲୋକ ଦେଖିପାରିନାହାନ୍ତି । । ଜୁନାଗଡ ବ୍ଲକ ଅନ୍ତର୍ଗତ ବୁଢୀଦର ପଞ୍ଚାୟତ ଦୁର୍ଗମ ଅଞ୍ଚଳ ର ଏହି ୩ଟିଗାଁ କୁ ଆଜି ଯାଏଁ ସବୁଦିନିଆ ରାସ୍ତା ତ ଦୁରର କଥା ପାଦଚଲା ରାସ୍ତା ଟିଏ ମଧ୍ୟ ତିଆରି ହୋଇ ପାରିନାହି । ସରକାରଙ୍କ ସବୁ ଯୋଜନା ଏମାନଙ୍କ ପାଇଁ ଅପହଞ୍ଚ ହୋଇ ରହି ଯାଇଛି । ଜୁନାଗଡ ବ୍ଲକ ଠାରୁ ପ୍ରାୟ ୪୦ କିଲୋମିଟର ଦୂର ହୋଇଥିବାବେଳେ ବୁଢୀଦର ପଞ୍ଚାୟତରୁ ମାତ୍ର ୧୦କିମି ଦୁର ବଣ ପାହାଡ ମଧ୍ୟରେ ଲୁଚିରହି ଯାଇଛି ଏହି ତିନିଟି ଗାଁ । ଏହି ତିନିଟି ଗାଁର ସମସ୍ତେ ପ୍ରାୟ ଆଦିବାସୀ ହୋଇଥିବାବେଳେ ଲଖନାପଡାର ପ୍ରାୟ ଜନସଂଖ୍ୟା ୨୫୦ ଅଟନ୍ତି । ସେହିଭଳି ବିଜ୍ରାଦରଗାଁର ଜନସଂଖ୍ୟା ପ୍ରାୟ ୨୦୦ ଓ ବେହେରାଗୁଡା ଜନସଂଖ୍ୟା ପ୍ରାୟ ୧୫୦ ହୋଇଥିବାବେଳେ ସମସ୍ତେ ଗରୀବ ଶ୍ରେଣୀର ଅଧିବାସୀ ଅଟନ୍ତି । ଜଙ୍ଗଲ ଜାତ ଦ୍ରବ୍ୟ ସଂଗ୍ରହ କରିବା ଓ ପୋଡୁ ଚାଷ କରି ଏମାନେ ପରିବାର ପ୍ରତିପୋଷଣ କରିଥାନ୍ତି । ଏହି ତିନି ଗାଁ ପାଇଁ ପାଣି ଏକ ମହୌଷଧି ପାଲଟିଛି । ଟୋପେ ପାଣି ପାଇଁ ଯେଉଁଠି ଲୋକେ ଡହଳ ବିକଳ ହେଉଥିବାବେଳେ ଶିକ୍ଷା , ସ୍ୱାସ୍ଥ୍ୟ , ପାନୀୟଜଳ, ମୋବାଇଲ ନେଟୱାର୍କ, ଖାଦ୍ୟ ନିରାପତ୍ତା ଭଳି କାର୍ଯ୍ୟକ୍ରମ ସେମାନଙ୍କ ପାଇଁ ଅପହଞ୍ଚ ଅଟେ । ଏହି ଗାଁ ପାଇଁ ବିଜୁଳି ଆଲୁଅ ସାତ ସପନ । ସୁର୍ଯ୍ୟ ଦେବତା ହିଁ ଏମାନଙ୍କ ପାଇଁ ସାହା । ସଂଞ୍ଜ ନ ହେଉଣୁ ରାତ୍ରି ଭୋଜନ କରିନିଅନ୍ତି ଏମାନେ । ଗାଁ ସମସ୍ତ ପରିବାରକୁ ସରକାରୀ ଯୋଜନା ରେ କାମ ଯୋଗଇ ଦେବାକୁ ଜବ କାର୍ଡ ଦିଆଯାଇଛି । କେବଳ ଜବକାର୍ଡ ଦେଇ ସରକାର ପୁରାପୁରି ଭୁଲି ଯାଇଛନ୍ତି ସେମାନଙ୍କ ହାତକୁ କାମ ଦେବାକୁ । ୨୦୦୬-୦୭ ମସିହାରେ ଅଞ୍ଚଳବାସୀଙ୍କୁ ଜବକାର୍ଡ ଦିଆଯାଇଛି ହେଲେ ଆଜିକୁ ୧୨ବର୍ଷ ହେଲା ମନରେଗା ଯୋଜନାରେ କୌଣସି କାମ କରିନଥିବାବେଳେ ଜବକାର୍ଡରେ ମଧ୍ୟ ଉଲ୍ଲେଖ କରାଯାଇନାହିଁ । ଫଳରେ ଏହିଗାଁ ମାନଙ୍କରେ ମନରେଗା ଯୋଜନା ପ୍ରହସନ ପାଲଟିଛି । ଗମନା ଗମନ ସୁବିଧା ଅଭାବରୁ ଗାଁ କୁ ଆଜି ଯାଏଁ କୌଣସି ସରକାରୀ ବାବୁଙ୍କ ପାଦ ପଡିନାହି । ଗତ ୨୦୧୨-୧୩ ମସିହାରେ ଏହି ଲଖନାପଡାକୁ ତତ୍କାଳୀନ ଉପଜିଲ୍ଲାପାଳ ଗୌରୀ ପରାସର ଓ ତତ୍କାଳୀନ ବିଡିଓ ତ୍ରିଲୋଚନ ମହାନ୍ତି ଏହି ଗାଁରେ ପାଦଥାପି ଲୋକଙ୍କ ସମସ୍ୟା ବୁଝିଥିଲେ । ସ୍ୱାସ୍ଥ୍ୟ ସେବା କଣ ଏମାନେ ଜାଣି ନାହାନ୍ତି । ସାମାନ୍ୟ ରୋଗ ,ଜ୍ୱର ହେଲେ ଏମାନେ ଗୁଣିଗାରେଡି ଓ ଚେରିମୁଲି ହିଁ ଏମାନଙ୍କ ସାହା ଭରସା । ଚାରି ରୁ ପାଞ୍ଚ କିଲୋମିଟର ଜଙ୍ଗଲର ପାଦଚଲା ରାସ୍ତା ଥିବା ଯୋଗୁଁ କୌଣସି ଅଙ୍ଗନୱାଡି କିମ୍ବା ସ୍ୱାସ୍ଥ୍ୟ କର୍ମି ମଧ୍ୟ କେବେ କେମିତି ପାଦ ପକାନ୍ତି । ଯୋଜନା କଣ ଏସବୁ ବିଷୟରେ ଜାଣି ନାହାନ୍ତି ଏହି ଗାଁ ଲୋକେ । ସଚେତନତାର ଅଭାବ ଯୋଗୁଁ ଲୋକେ ଅନ୍ଧବିଶ୍ୱାସର ବଶବର୍ତ୍ତି ହୋଇଥାନ୍ତି ଗ୍ରାମବାସୀମାନେ । । କେବେ କେବେ ଜଙ୍ଗଲି ରାସ୍ତାରେ ଭାର ସାହାଯ୍ୟରେ ଆଣୁଥିବାବେଳେ ରାସ୍ତାରେ ଗର୍ଭବତୀ କିମ୍ବା ପ୍ରସୁତି ମୃତ୍ୟୁ ବରଣ କରୁଥିବା ନେଇ ଗ୍ରାମବାସୀ ପ୍ରକଶ କରିଛନ୍ତି । ଅଞ୍ଚଳବାସୀଙ୍କୁ ଜଙ୍ଗଲଜମି ପଟ୍ଟା ନମିଳିବାରୁ ସରକାରଙ୍କ ମୋ କୁଡିଆ, ବିଜୁ ପକ୍କାଘର,ଇନ୍ଦିରାଆବାସ, ପ୍ରଧାନମନ୍ତ୍ରୀ ଆବାସ ଯୋଜନା ପାଇବାରୁ ବଞ୍ଚିତ ହୋଇଛନ୍ତି । ଏହି ଦୁର୍ଗମ ଅଞ୍ଚଳର ଅଧିବାସୀ ମାନେ ମୁଖ୍ୟତଃ ଗୁରୁଜି , ମାଣ୍ଡିଆ, କୋଶଲା, କାନ୍ଦୁଲ, ସହ ବଣର ଫଳ ମୁଳ କନ୍ଦା , ଛତି , କରଡି ପ୍ରଭୃତି ବନଜାତ ଦ୍ରବ୍ୟରେ ସେମାନେ ଭୋକ ମେଣ୍ଟାଉଛନ୍ତି । ସେହିଭଳି ବାଉଁଶରେ ଟୋପା, କୁଲା, ଚାଙ୍ଗୁଡି ତିଆରି କରି ପରିବାର ପ୍ରତିପୋଷଣ କରିଥାନ୍ତି । ଏହି ଆଦିବାସୀ ରହୁଥିବା ଲଖନପଡା, ବିଜ୍ରାଦର ଓ ବେହେରାଗୁଡା ଗାଁକୁ ଯିବାକୁ ହେଲେ ଜଙ୍ଗଲୀ ପଦଚଲା ମାଇଲ ମାଇଲ ବାଟହିଁ ଏକ ମାତ୍ର ଭରସା । ବାଟକୁ ଦେଖିଲେ ହିଁ ଜଣାପଡେ ସରକାରୀ ଯୋଜନା ସବୁ କେମିତି ପାହାଡ ତଳୁ ହିଁ ମୁହଁ ମୋଡି ଫେରି ଯାଇଛି । ଏତେ ସବୁ ଅସୁବିଧା ଲାଗି ରହିଥିବା ଏହି ଅପହଞ୍ଚ ଗାଁ ପ୍ରତି ଦୃଷ୍ଟି ଦେବା ପରିବର୍ତ୍ତେ ସରକାର ବିକାଶର ଡିଣ୍ଡିମ ପିଟୁଛନ୍ତି । ଗାଁର ମୌଳିକ ସୁବିଧା ସହିତ ବିକାଶ ଓ ସାମାଜିକ , ଆର୍ଥିକ ଦିଗରୁ ଗାଁ ଲୋକଙ୍କୁ ସ୍ୱାବଲମ୍ବୀ କରାଯିବାକୁ ଯୋଜନାରେ ବ୍ୟବସ୍ଥା କରାଯାଇଛି ହେଲେ ବିକାଶ ଦୁର୍ଗମ ଅଞ୍ଚଳରେ ଥିବା ଏହି ୩ଟିଗାଁର ମଣିଷ ମାନଙ୍କୁ ବଞ୍ଚିବାର କିଞ୍ଚିତ ସହାୟତା ମଧ୍ୟ ମିଳିନାହି । ଭବିଷ୍ୟତରେ କେବେ ମିଳିବ କି ନାହି ତାହାବି ସନ୍ଦେହ ଅଟେ । ତେଣୁ ରାଜ୍ୟ ସରକାର ତୁରନ୍ତ ଏହି ତିନିଗାଁ ପ୍ରତି ସ୍ୱତନ୍ତ୍ର ଦୃଷ୍ଟି ଦେବାକୁ ସାଧାରଣରେ ଦାବୀ ହୋଇଛି ।

RELATED ARTICLES

LEAVE A REPLY

Please enter your comment!
Please enter your name here

Most Popular

Recent Comments