Sunday, February 25, 2024
Homeସାର ଅଭାବରେ ଚାଷୀ ଅତିଷ୍ଠ
Array

ସାର ଅଭାବରେ ଚାଷୀ ଅତିଷ୍ଠ

ଭୁବନେଶ୍ବର: ଖରିଫ ଋତୁ ଚାଲିଛି। ଧାନ ବିହୁଡ଼ା କାମ ଜାରି ଥିବା ବେଳେ କିଛି ସ୍ଥାନରେ ତଳି ରୁଆ କାମ ଆରମ୍ଭ ହୋଇଯାଇଛି। ଜୁନ ମାସରେ ନିଅଣ୍ଟିଆ ବର୍ଷା ଚାଷୀଙ୍କୁ ବାଧା ଦେଇଥିଲା ବେଳେ ଜୁଲାଇ ମାସର ବର୍ଷା ସାମାନ୍ୟ ଆଶ୍ବସ୍ତି ପ୍ରଦାନ କରିଛି। କିନ୍ତୁ ଚାଷୀମାନେ ଏବେ ସାରକୁ ନେଇ ଅସୁବିଧାର ସାମ୍ନା କରୁଛନ୍ତି। ସରକାରଙ୍କ ବଣ୍ଟନ ବ୍ୟବସ୍ଥା, ହୋଲସେଲ୍ ଦୋକାନୀଙ୍କ ଦାଦାଗିରିରେ ସାଧାରଣ ଚାଷୀଙ୍କ ଜୀବନ ଅସ୍ତବ୍ୟସ୍ତ ହୋଇଯାଇଛି। ସରକାରୀ ବ୍ୟବସ୍ଥାରେ ଚାଷୀଙ୍କୁ ସମୁଦ୍ରକୁ ଶଙ୍ଖେ ଭଳି ସାର ମିଳୁଛି। ସେହିପରି ହୋଲସେଲ୍ ଦୋକାନରେ ସାର ବସ୍ତାର ମୂଲ୍ୟ ତୁଳନାରେ ଚଢ଼ା ଦରରେ ବିକ୍ରି କରାଯାଉଛି। ବିରୋଧ କଲେ ବି କେହି ଶୁଣୁ ନାହାନ୍ତି।

ଚାଷୀଙ୍କ ଜୀବନ ସହ ଖେଳ ଚାଳିଛି କହିଲେ କିଛି ଭୁଲ ହେବ ନାହିଁ। ୟୁରିଆ ସାରକୁ ନେଇ ବ୍ୟାପକ ଦୁର୍ନୀତି ଚାଳିଛି। କୋରାପୁଟ ଜିଲ୍ଲା ଜୟପୁରରେ ଆଧାରକାର୍ଡ ପିଛା ଚାଷୀଙ୍କୁ ମିଳୁଛି ୨ବସ୍ତା ୟୁରିଆ ମିଳୁଛି। ଏଥି ପାଇଁ ଚାଷୀମାନେ ଆରସିଏମଏସ୍, ଲ୍ୟାମ୍ପ ଓ ଡିଲରଙ୍କ ନିକଟରେ ଭୋର ସକାଳୁ ଲମ୍ବା ଲାଇନ୍ ଲଗାଇ ଅପେକ୍ଷା କରୁଛନ୍ତି। ଚାଷୀଙ୍କୁ ଆଧାରକାର୍ଡ ନେଇକି ଗଲେ ୟୁରିଆ ସାର୍ ମିଳିବ ବୋଲି କୃଷି ବିଭାଗ ପକ୍ଷରୁ କୁହାଯାଇଛି। ବିତରଣ ଓ ବିକ୍ରୟ ଏଜେନ୍ସିଗୁଡିକ ଜମିର ପରିମାଣ ବଦଳରେ ଆଧାରକାର୍ଡର ଜେରକ୍ସ ରଖିବା ସହ ଗୋଟିଏ ଆଧାରକାର୍ଡ ବାବଦକୁ ୨ଟି ୟୁରିଆ ବସ୍ତା ଦେଉଛନ୍ତି। ଯେଉଁ ଚାଷୀମାନେ ଅଧିକା ଜମି ଚାଷ କରୁଛନ୍ତି, ସେମାନଙ୍କୁ ସାର ପାଇଁ ଅଧିକ ହଇରାଣ ହେବାକୁ ପଡୁଛି।

ମାଲକାନଗିରିରେ ୟୁରିଆ ସାର ସଂକଟ

ରାଜ୍ୟରେ ଚାଷୀମାନଙ୍କ ଦୁର୍ଦ୍ଦଶା ଆଜିର ନୁହେଁ। ବର୍ଷ ବର୍ଷ ଧରି ଚାଷୀଙ୍କ ସମସ୍ୟାର ସମାଧାନ ହୋଇପାରି ନାହିଁ। ଏବେ ଖରିଫ ଋତୁ ଚାଲିଥିବାରୁ ଚାଷୀଙ୍କୁ ଆବଶ୍ୟକ ପଡୁଛି ସାର, ଯାହାକି ରାଜ୍ୟସାରା ସଂକଟ ଦେଖାଯାଇଛି। ସାର ଦୋକାନୀ ଏବଂ ହୋଲସେଲର ଦୋକାନୀମାନଙ୍କ ଦାଦାଗିରି ବଢିଥିବାରୁ ଚାଷୀମାନଙ୍କର ଅସୁବିଧା ହୋଇଛି। ମାଲକାନଗିରି ଜିଲ୍ଲାରେ ଗତ କିଛି ଦିନ ହେଲା ସାର ଦୋକାନୀ ଏବଂ ହୋଲସେଲରମାନେ ଚାଷୀ ଯେଉଁ ସାର ମାଗିଲେ ତାହା ଦେଉ ନାହାନ୍ତି। ଅର୍ଥାତ କୃଷକମାନେ ୟୁରିଆ ସାର ମାଗୁଥିଲେ ଦୋକାନୀ ଗ୍ରୋମର(ଡିଏପି) ଏବଂ ଜିପ୍ଟିମାଇଟ ପ୍ଲସର ୨୫ କିଲୋ ବ୍ୟାଗ ଧରାଇ ଦେଉଛନ୍ତି। ଏହି ସାର କୃଷକମାନଙ୍କୁ ଦରକାର ନଥିବା ବେଳେ ସେମାନେ ଏହାକୁ ନେବାକୁ ଅମଙ୍ଗ ହେଉଛନ୍ତି।

ଭଦ୍ରକରେ ବି ସାର ଅଭାବ

ସେହିଭଳି ଭଦ୍ରକ ଜିଲ୍ଲାରେ ସାର ଯୋଗାଣରେ ଅଭାବ ଦେଖା ଦେଇଛି। ଚଳିତ ବର୍ଷ ବିଳମ୍ବିତ ବର୍ଷା ଯୋଗୁଁ ଚାଷ କାର୍ଯ୍ୟ ଘୋର ପ୍ରଭାବିତ ହୋଇଛି। ଚାଷୀ ଚାଷ କାମ ପାଇଁ ବାହାରି ଥିବା ବେଳେ ସରକାର ସାର ଯୋଗାଣକୁ ମନ୍ଥର କରିଦେଇଥିବା ଅଭିଯୋଗ ହୋଇଛି। ସରକାରଙ୍କର ବିହନ ନିଗମ ବିହନ ଯୋଗାଣରେ ବିଫଳ ହୋଇଥିଲା ବେଳେ ସାରର କୃତ୍ରିମ ଅଭାବ ଚାଷଙ୍କ କଷ୍ଟକୁ ବଢ଼ାଇ ଦେଇଛି। ତେଣୁ ଏବେ ଚାଷୀ ଚିନ୍ତାରେ ପଡ଼ିଯାଇଛି ଚଳିତବର୍ଷ ଅନିୟମିତ ବର୍ଷା ଯୋଗୁଁ ଜିଲ୍ଲାରେ ଖରିଫ ଧାନ ଚାଷ ବିଳମ୍ବିତ ହୋଇଛି। ସମୁଦାୟ ଜମିର ମାତ୍ର ୧୫ ପ୍ରତିଶତ ଜମିରେ ବୁଣାବୁଣି ହୋଇଥିବା ବେଳେ ୮୫ ପ୍ରତିଶତ ଜମି ରୋଇବାକୁ ଅପେକ୍ଷା କରିଛି। ଡିଏପି ଏବଂ ପଟାସ ସାରର ଉତ୍କଟ ଅଭାବ ଏବଂ କଳା ବଜାରୀ ଚାଷୀକୁଳଙ୍କୁ ଚିନ୍ତାରେ ପକାଇଛି। ସରକାରୀ ଡିପୋରେ ଏହି ସାର ମିଳୁନଥିବା ବେଳେ ସାର କଳା ବଜାରୀ ଏହାର ଫାଇଦା ଉଠାଉଛନ୍ତି। ଚାଷୀଙ୍କୁ ଖୋଲା ବଜାରରେ ଏହାକୁ ବସ୍ତାପିଛା ୩୦୦ ରୁ ୪୦୦ ଟଙ୍କା ଅଧିକ ଦର ଦେଇ କ୍ରୟ କରିବାକୁ ପଡୁଛି।

RELATED ARTICLES

LEAVE A REPLY

Please enter your comment!
Please enter your name here

Most Popular

Recent Comments