ଭୁବନେଶ୍ୱର: ରାଜ୍ୟର ତାପମାତ୍ରା ୪୫ ଡିଗ୍ରି ସେଲ୍ସିୟସ ନିକଟତର ହୋଇଛି। ସକାଳ ୮ଟା ପରେ ଘରୁ ବାହାରକୁ ବାହାରିବା ଅସହଜ ହେଉଛି। ଅପରାହ୍ନ ୪ଟା ପୂର୍ବରୁ ଘରୁ ଗୋଡ଼ କାଢ଼ିବାକୁ ମନ ଲାଗୁନାହିଁ। ଏପ୍ରିଲ ମାସ ଶେଷ ହୋଇ ନଥିବା ବେଳେ, ଆଗାମୀ ମେ’ ମାସ ସାରା ଖରାରେ ସିଝିବ ରାଜ୍ୟ। ଗ୍ରୀଷ୍ମ ଲହରି ବଢ଼ି ଚାଲିଥିବା ବେଳେ ରାଜ୍ୟର ରାସ୍ତାଘାଟରେ ଯାତାୟତ କରୁଥିବା ଲୋକଙ୍କ ପାଇଁ ଆବଶ୍ୟକ ପରିମାଣରେ ପାନୀୟ ଜଳର ବ୍ୟବସ୍ଥା କରାଯାଇପାରି ନାହିଁ। ସର୍ବସାଧାରଣସ୍ଥଳରେ ପିଇବା ପାଣିର ବ୍ୟବସ୍ଥା କରିବା ପାଇଁ ସରକାର ହେଉ କି ସ୍ଥାନୀୟ ପ୍ରଶାସନର ଚିନ୍ତା ନାହିଁ। ଏଥି ପାଇଁ କିଛି ସ୍ଥାନରେ ଅଭିଯୋଗ ହେଉଥିଲେ ବି ଏହାକୁ ଶୁଣିବାକୁ କେହି ନାହାନ୍ତି। ମୟୂରଭଂଜ, କେନ୍ଦୁଝର, ସୁନ୍ଦରଗଡ଼, ଝାରସୁଗୁଡ଼ା, ନୂଆପଡ଼ା, ବଲାଙ୍ଗୀର ଆଦି ଜିଲ୍ଲାରେ ଜଳ କଷ୍ଟ ଅଧିକ ଦେଖିବାକୁ ମିଳିଥାଏ।
ବିଗତ କିଛି ବର୍ଷ ପୂର୍ବରୁ ଆପଣମାନେ ଦେଖିଥିବେ ଗ୍ରୀଷ୍ମ ଋତୁରେ ରାସ୍ତାରେ ଯାଉଥିବା ଲୋକଙ୍କ ପିଇବା ପାଇଁ ପାଣିର ବ୍ୟବସ୍ଥା କରୁଥିଲେ। ସରକାରଙ୍କ ପରାମର୍ଶରେ ସ୍ଥାନୀୟ ପ୍ରଶାସନର ନିର୍ଦ୍ଦେଶରେ ଗ୍ରାମାଞ୍ଚଳରେ ପଞ୍ଚାୟତ ଓ ସହରାଞ୍ଚଳରେ ପୌରପାଳିକା ମାଧ୍ୟମରେ ଜଳଛତ୍ର ଖୋଲାଯାଉଥିଲା। ଲୋକଙ୍କ ପାଇଁ ନୂଆ ମାଠିଆ ପାଣି ରଖାଯାଉଥିଲା। ଏଥି ପାଇଁ ଜଣେ/ଦୁଇ ଜଣଙ୍କୁ ନିୟୋଜିତ କରାଯାଉଥିଲା। ପଥଚାରୀଙ୍କୁ ଅତିକମ୍ରେ ୫ରୁ ୧୦ କିଲୋମିଟର ଯିବା ରାସ୍ତାରେ ପାଣି ମିଳିଯାଉଥିଲା। ରାସ୍ତାକଡ଼ରେ ଛାଇ ତଲେ ଜଳଛତ୍ରରେ ବସି କିଛି ସମୟ ଅଟକିଯିବାର ସୁଯୋଗ ମିଳି ଯାଉଥିଲା। ଗ୍ରୀଷ୍ମଦିନରେ ଆଜିକାଲି ରାସ୍ତାକଡ଼ରେ ଆଉ ଜଳଛତ୍ର ଦେଖାଯାଉ ନାହିଁ। ପାନୀୟ ଜଳର ଉପଯୁକ୍ତ ବ୍ୟବସ୍ଥା ନେଇ ଉଭୟ କେନ୍ଦ୍ର ଓ ରାଜ୍ୟ ସରକାର ବାହାଦୂରୀ ମାରୁଛନ୍ତି। କିନ୍ତୁ ଦୁର୍ଗମ ଅଞ୍ଚଳରେ ଲୋକେ ପାଣି ପାଇଁ କିଭଳି ଡହଳ ବିକଳ ହେଉଛନ୍ତି, ଅତି ନିକଟରୁ ଦେଖିଲେ ଯାଇ ବିଶ୍ୱାସ ହେବ। ଖରାଦିନ ଆସିଲେ ଜଳାଶୟରୁ ପାଣି ଶୁଖିଯାଉଥିବାରୁ ଗାଁ-ଗଣ୍ଡାରେ ଲୋକେ ଗାଧୋଇବା ପାଇଁ ବହୁତ ହଇରାଣ ହୋଇଥାନ୍ତି। ଯେଉଁ ଗାଁରେ ନଳକୂପଗୁଡ଼ିକ ଅଚାନକ ଅଚଳ ହୋଇଯାଏ, ସେହିଭଳି ସମୟରେ ଜନସାଧାରଣ ପାଣି ପାଇଁ ବହୁତ କଷ୍ଟ ସହ୍ୟ କରନ୍ତି। ସର୍ବସାଧାରଣ ପାଇଁ ଗାଧୋଇବା ବ୍ୟବସ୍ଥା ନିଥିବା ସ୍ଥାନରେ ସମସ୍ୟାର ସାମ୍ନା କରିବାକୁ ହୋଇଥାଏ।
୩୦୦ ଲୋକଙ୍କ ପାଇଁ ୧ ନଳକୂପ
ଲୋକଙ୍କୁ ପିଇବା ପାଣି ଯୋଗାଇଦେବାକୁ ସରକାର ବିଭିନ୍ନ ଯୋଜନା କରୁଥିବା ବେଳେ ଏହାର ବାସ୍ତବତା ସମ୍ପୂର୍ଣ୍ଣ ଅଲଗା। ଗଜପତି ଜିଲ୍ଲା ଗୁମ୍ମା ବ୍ଲକର ଗିରା ଗାଁ ଲୋକେ ପାଣି ପାଇଁ ଦୁଇ କିଲୋମିଟର ପାହାଡ଼ ଚଢୁଛନ୍ତି। ଗିରା ଗାଁର ଲୋକେ ୨ କିଲୋମିଟର ପାହଡ଼ ଚଢିବା ପରେ ଝରଣାରୁ ପାଣି ସଂଗ୍ରହ କରିଥାନ୍ତି। ଗାଁର ମହିଳାମାନେ କଦଳୀ ବାସୁଙ୍ଗା ସାହାଯ୍ୟ ସଂଗ୍ରହ କରି ଏହାକୁ ପାନୀୟ ଜଳ ରୁପେ ବ୍ୟବହାର କରୁଛନ୍ତି। ଏହି ଗାଁରେ ୩ଶହରୁ ଅଧିକ ଲୋକ ବସବାସ କରୁଥିବା ଏମାନଙ୍କ ପାଇଁ ମାତ୍ର ଗୋଟିଏ ନଳକୂପ ରହିଛି। ଗ୍ରାଭିଟି ଫ୍ଲୋ ମାଧ୍ୟମରେ ଜଳ ଯୋଗାଣ ନେଇ ବ୍ୟବସ୍ଥା ହୋଇଛି ହେଲେ ଏହା କାର୍ଯ୍ୟକାରୀ ହୋଇନାହିଁ।
କେମିତି ଚାଲିଛି ବସୁଧା ଯୋଜନା
କେନ୍ଦ୍ରାପଡା ଜିଲ୍ଲା ରାଜକନିକା ବ୍ଲକ ଅନ୍ତର୍ଗତ ଅବଦୁଲପୁରୁ ଗାଁରେ ପାଣି ପାଇଁ ରାତି ୩ଟାରୁ ଲମ୍ବା ଲାଇନ ଦେଉଛନ୍ତି ମହିଳା। ଗାଁରେ ୩ ବର୍ଷ ହେଲା ବସୁଧା ଯୋଜନାରେ ବୋରିଙ୍ଗ କରାଯାଇ ମଟର ବସିଛି। ପାଇପ ବିଛାଯାଇଛିି। କିନ୍ତୁ ଦୁଃଖର ବିଷୟ ହେଲା ଯେ, ଏପର୍ଯ୍ୟନ୍ତ ଲୋକଙ୍କୁ ପାଣି ମିଳିପାରି ନାହିଁ। ଏହି ଗାଁରେ ମଧ୍ୟ ଗୋଟିଏ ନଳକୂପ ଉପରେ ୩୦୦ ଶହରୁ ଊର୍ଦ୍ଧ୍ୱ ପରିବାର ନିର୍ଭର କରୁଛନ୍ତି। ପ୍ରଶାସନ ନିକଟରେ ପାଣି ପାଇଁ ବାରମ୍ବର ଗୁହାରି କଲେ ବି ଲାଭ ହେଉନାହିଁ। ବିଶୁଦ୍ଧ ପାଣି ପାଇଁ ସରକାର ବସୁଧା ଯୋଜନା ଆରମ୍ଭ କରିଥିବା ବେଳେ ଏହି ଯୋଜନା ଲୋକଙ୍କ ନିକଟରେ କିଭଳି ପହଂଚୁଛି ତାହା ଏହି ଦୃଶ୍ୟରୁ ଜଣାପଡୁଛି।
ନଦୀ ପାଣିରେ ହୋଇଥାଏ ରୋଷେଇ
ପାଣିର ସମସ୍ୟା ଗଜପତି କି କେନ୍ଦ୍ରାପଡ଼ା ନୁହେଁ। ବରଂ ରାଜ୍ୟର ଅନ୍ୟ ସ୍ଥାନରେ ମଧ୍ୟ ଏଭଳି ସମସ୍ୟା ଲାଗି ରହିଛି। କୋରାପୁଟ ଜିଲ୍ଲା ନାରାୟଣପାଟଣା ଅନ୍ତର୍ଗତ ପଞ୍ଚାୟତର ଖାରିକଣା ଗାଁରେ ୩୦ ପରିବାର ମଧ୍ୟ ଜଳକଷ୍ଟ ପାଉଛନ୍ତି। ପ୍ରାୟ ଦେଢ଼ଶହ ଲୋକ ରହୁଥିବା ଏହି ଗାଁରେ ବିଶୁଦ୍ଧ ପାଣି ମିଳିପାରେ ନାହିଁ। ଗାଁରେ ଗୋଟିଏ ମାତ୍ର ନଳକୂପ ରହିଥିଲା ବେଳେ ଆଇରନ୍ ମିଶ୍ରିତ ପାଣି ବାହାରୁ ଥିବାରୁ ପିଇବା ଅନୁପଯୋଗୀ ହୋଇପଡ଼ିଛି। ଉପଯୁକ୍ତ ପାନୀୟ ଜଳର ବ୍ୟବସ୍ଥା ପାଇଁ ଅନେକ ଥର ପଞ୍ଚାୟତ ଠାରୁ ଆରମ୍ଭ କରି ବ୍ଲକ୍ ପ୍ରଶାସନକୁ ଜଣାଇଲେ ମଧ୍ୟ କେହି ଗୁରୁତ୍ୱ ଦେଉନାହାନ୍ତି। ଗ୍ରାମବାସୀ ବାଧ୍ୟ ହୋଇ ଗାଁ ଠାରୁ କିଛି ଦୂରରେ ବୋହି ଯାଇଥିବା ନଦୀରୁ ପାଣି ସଂଗ୍ରହ କରି ବ୍ୟବହାର କରୁଛନ୍ତି।
