Thursday, February 22, 2024
Homeହଜିଯାଉଛି ସ୍ମୁତି, ପ୍ରଭାବିତ ହେଉଛି ଜୀବନ
Array

ହଜିଯାଉଛି ସ୍ମୁତି, ପ୍ରଭାବିତ ହେଉଛି ଜୀବନ

ଭୁବନେଶ୍ବର: ସ୍ମୁତି ଅତୀତରେ ଦେଇଛି ବଡ଼ ଅନୁଭୂତି। ସ୍ମୁତିକୁ ନେଇ ଅନେକ ଲୋକ ବଞ୍ଚିବା ଶିଖିଛନ୍ତି। ସ୍ମୁତିକୁ ନେଇ ସାହିତ୍ୟ ମଜବୁତ ହୋଇଥାଏ। ଜୀବନ ଜିଇଁବାକୁ ବଡ଼ ଅନୁଭୁତି ଦେଇଥାଏ ସ୍ମୁତି। ଯେଉଁ ସ୍ମୁତି ଅତୀତ ହୋଇଯାଇଛି, ତାହା ଦିନେ କାନ୍ଦୁଥିବା ପିଲାର ମୁହଁରେ ହସ ଫୁଟାଇଥିଲା ତଥା ସମାଜ ଓ ସଭ୍ୟତାର ବିକାଶରେ ସହାୟକ ହୋଇଥିଲା। ସେହି ସ୍ମୁତିକୁ ବଞ୍ଚାଇବା ପାଇଁ ବ୍ୟକ୍ତିଗତ ସ୍ତରରେ ସମସ୍ତେ ଉଦ୍ୟମ କରିବା ଦରକାର। କିନ୍ତୁ ପ୍ରତ୍ୟେକ ଜିନିଷକୁ ବଞ୍ଚାଇ ରଖିବାର କେବଳ ବ୍ୟକ୍ତିଗତ ଉଦ୍ୟମ ସମ୍ଭବ ନୁହେଁ। ବରଂ ଏଥି ପାଇଁ ସମାଜ, ନେତା, ପ୍ରଶାସନ ଓ ସରକାରଙ୍କ ବଡ଼ ଭୂମିକା ରହିଛି।

ବର୍ଷକ ୧୨ ମାସ। ଏହାକୁ ୬ଟି ଋତୁରେ ଭାଗ କରାଯାଇଛି। କିନ୍ତୁ ଜଳବାୟୁ ପରିବର୍ତ୍ତନ କାରଣରୁ ଆଜିକାଲି କେବଳ ଗ୍ରୀଷ୍ଣ ଓ ବର୍ଷା ଋତୁ କେବଳ ଅନୁଭୂତ ହେଉଛି। ଏହା ମଧ୍ୟ ଠିକ୍‌ ସମୟରେ ନୁହେଁ। ଗ୍ରୀଷ୍ଣ ନିର୍ଦ୍ଧାରିତ ସମୟ ପୂର୍ବରୁ ଆସୁଥିଲା ବେଳେ ବର୍ଷା ଋତୁ ଢେର ବିଳମ୍ବରେ ହେଉଛି। ତେବେ ଶରତ, ହେମନ୍ତ, ଶୀତ ଓ ବସନ୍ତ ସଂକଟରେ ପଡ଼ିଛି କହିଲେ ଅତ୍ୟୁକ୍ତି ହେବ ନାହିଁ। ଫଗୁଣ ମାସରେ ଭୋର ସକାଳୁ ସୁଲୁସୁଲିଆ ପବନ, ହଳଦୀ ବସନ୍ତ ଉଡ଼ିବା ଏବଂ କୋଇଲିର କୁହୁକୁହୁ ଡାକ ଶୁଭୁନାହିଁ। ଜଳବାୟୁ ପରିବର୍ତ୍ତନ କାରଣରୁ ପୃଥିବୀ ଉପରେ ଏହାର ଘୋର ପ୍ରଭାବ ପଡୁଥିବା ପରିଲକ୍ଷିତ ହେଉଛି। ଜଳବାୟୁ ପରିବର୍ତ୍ତନ ହେବା କାରଣରୁ ସର୍ବାଧିକ ପ୍ରଭାବିତ ହେଉଛନ୍ତି ଚାଷୀମାନେ। ଚାଷରୁ ପୂର୍ବ ଭଳି ଆଉ ଫସଲ ଉପାର୍ଜନ ହେଉନାହିଁ। ବିନା ରସାୟନିକ ସାର ଓ ଔଷଧରେ ଫସଲ ଉପାର୍ଜନ କରିବା ସହଜ ନୁହେଁ।

ଉପକୂଳ ଗାଁକୁ ବିପଦ

ଜଳବାୟୁର ବିଶାଳ ପରିବର୍ତ୍ତନ ପ୍ରକୃତିର ସନ୍ତୁଳନ ଉପରେ ଘୋର ପ୍ରଭାବ ପକାଇଛି। ପରିବେଶ ଦ୍ରୁତଗତିରେ ବିଗିଡ଼ିବାରେ ଲାଗିଛି। ତାପମାତ୍ରା ବଢ଼ୁଥିବାବେଳେ ବାରମ୍ବାର ଲଘୁଚାପ ଓ ସାମୁଦ୍ରିକ ବାତ୍ୟା ଉପକୂଳ ଅଞ୍ଚଳର ଲୋକଙ୍କ ଜୀବନଉପରେ ପ୍ରଭାବ ପକାଉଛି। ଓଡ଼ିଶାର ଉପକୂଳିଆ ଗାଁଗୁଡ଼ିକ କ୍ଷୟକ୍ଷତିର ସାମ୍ନା କରୁଛି। ପ୍ରାକୃତିକ ବିପର୍ଯ୍ୟୟ ଯୋଗୁଁ ଲୋକଙ୍କର ଧନଜୀବନ ନଷ୍ଟ ହେଉଛି। ଉପକୂଳବର୍ତ୍ତୀ ଅଞ୍ଚଳରେ ରହୁଥିବା ଲୋକଙ୍କ ପାଇଁ ସମୁଦ୍ର ବିପଦର କାରଣ ସାଜିଛି। ସମୁଦ୍ର ଅଶାନ୍ତ ହୋଇ ଜନବସତି ଆଡ଼କୁ ମାଡ଼ି ଆସୁଛି। ଓଡ଼ିଶାର ଅନେକ ଗାଁକୁ ଏବେ ସମୁଦ୍ର ଟାର୍ଗେଟ କରିଛି। ଗଞ୍ଜାମ ଜିଲ୍ଲା ପୁରୁଣା ପୋଡ଼ମପେଟା ଗାଁ ଏଥିରେ ସାମିଲ ରହିଛି। ଗତବର୍ଷ ଜୁଆର ମାଡ଼ରେ ପୁରୁଣା ପୋଡ଼ମପେଟା ଗାଁର ଗୋଟିଏ ପରେ ଗୋଟିଏ ଘର ଧୋଇ ହୋଇ ସମୁଦ୍ର ଗର୍ଭରେ ଲୀନ ହୋଇଯାଇଥିଲା। ଏଥିପାଇଁ ଏହି ଅଞ୍ଚଳରେ ଜନବସତି ସମ୍ପୂର୍ଣ୍ଣ ପରିତ୍ୟାଗ କରିବାକୁ ପ୍ରଶାସନ ତରଫରୁ ଜନସାଧାରଣଙ୍କୁ ସୂଚନା ଦିଆଯାଇଥିଲା। ସୁନାପୁର ପର୍ଯ୍ୟନ୍ତ ପ୍ରାୟ ୬୦ କିମି ବେଳାଭୂମି ରହିଛି। ଗଞ୍ଜାମ ଜିଲ୍ଲାର ଖଲ୍ଲିକୋଟ, ଗଞ୍ଜାମ, ଛତ୍ରପୁର, ରଂଗେଇଲୁଣ୍ଡା ଓ ଚିକିଟି ବ୍ଲକ୍‌ ଉପକୂଳ ଅଞ୍ଚଳରେ ରହିଛି। ଜଳବାୟୁ ପରିବର୍ତ୍ତନ ଯୋଗୁଁ ବିଭିନ୍ନ ସମୟରେ ଦେଖା ଦେଉଥିବା ପ୍ରାକୃତିକ ଦୁର୍ବିପାକ ଯୋଗୁଁ ଉପକୂଳ ଅଞ୍ଚଳବାସୀ ବହୁ କ୍ଷତି ସହୁଛନ୍ତି।

ସଂକଟରେ କାରଖାନା

ରାଜ୍ୟର ଲକ୍ଷ ଲକ୍ଷ ଲୋକଙ୍କୁ ଦାନା ଯୋଗାଉଥିବା କାରଖାନାଗୁଡ଼ିକ ବନ୍ଦ ହୋଇଯାଇଛି। ଚୌଦ୍ବାର ସୂତାକଳ, ଆସିକା ଓ ନୟାଗଡ଼ ଚିନିକଳ ଭଳି ବଡ଼ବଡ଼ କାରଖାନା ଲୋକଙ୍କର ରୋଜଗାର ପାଇଁ ଉଦ୍ଦିଷ୍ଟ ଥିଲା। ଏଗୁଡ଼ିକର ରକ୍ଷଣାବେକ୍ଷ କରିପାରିଲେନି ସରକାର। ଫଳରେ ଏହା ଦୟନୀୟ ଅବସ୍ଥାରେ ପଡ଼ିଛି। କୋରାପୁଟ ଜିଲ୍ଲା ଜୟପୁରସ୍ଥିତ ‘କାଗଜ କଳ’ ହେଉଛି ଦକ୍ଷିଣ ଓଡ଼ିଶାର ଲୋକଙ୍କ ପାଇଁ ଅନ୍ୟତମ ବଡ଼ କାରଖାନା। ଏଠାରେ ୨ ହଜାରରୁ ଊର୍ଦ୍ଧ୍ବ ସ୍ଥାୟୀ, ଚୁକ୍ତିଭିତ୍ତିକ କର୍ମଚାରୀ କାମ କରନ୍ତି। ଆହୁରୁ ୮ ହଜାର ଲୋକ ପରୋକ୍ଷ ଭାବେ ଉପକୃତ ହୋଇଥାନ୍ତି। କ୍ଷୋଭର ବିଷୟ ହେଲା ଯେ, ୧୯୮୫ ମସିହାରୁ ଆରମ୍ଭ ହୋଇଥିବା ଏହି କାଗଜ କଳ ଏବେ ସଂକଟରେ ଦିନ କାଟୁଛି। ପରିଚାଳନାଗତ ତ୍ରୁଟି, କଞ୍ଚାମାଲ ଅଭାବ ସମସ୍ୟା ଏକ ଦଶନ୍ଧି ଧରି କାଗଜକଳର ଉତ୍ପାଦନରେ ବାଧକ ସାଜିଛି। ବାରମ୍ବାର ମାଲିକାନାରେ ପରିବର୍ତ୍ତନ, ରାଜ୍ୟ ସରକାରଙ୍କ ଅଣଦେଖା କାଗଜକଳର ସ୍ଥାୟିତ୍ବକୁ ନେଇ ସୃଷ୍ଟି କରିଛି ପ୍ରଶ୍ନବାଚୀ। ଜିଲ୍ଲାର ଏକ ମାତ୍ର ବେସରକାରୀ ଶିଳ୍ପ ପୂର୍ବ ସ୍ଥିତିକୁ ଫେରିବା ପାଇଁ ସଂଘର୍ଷ କରୁଥିବାରୁ ଶିଳ୍ପ ମାନଚିତ୍ରରୁ ଜୟପୁର ହଜିଯିବା ଭଳି ସମ୍ଭାବନା ସୃଷ୍ଟି ହୋଇଛି। ୨୦୧୬ ପରଠାରୁ କାଗଜକଳ ପରିଚାଳନାରେ ଅଚଳାବସ୍ଥା ଲାଗି ରହିଥିବାରୁ ଶହ ଶହ କର୍ମଚାରୀଙ୍କ ଭବିଷ୍ୟତ ଅନ୍ଧାର ଭିତରକୁ ଠେଲି ହୋଇଯାଇଛି।  

RELATED ARTICLES

LEAVE A REPLY

Please enter your comment!
Please enter your name here

Most Popular

Recent Comments