ଭୁବନେଶ୍ୱର: କିଛି ମାସ ହେବ ରାଜ୍ୟ ସରକାର ଐତିହାସିକ ତଥା ଧାର୍ମିକ ସ୍ଥଳୀର ବିକାଶ ପାଇଁ କାମ ଆରମ୍ଭ କରିଦେଇଛନ୍ତି। ଶ୍ରୀକ୍ଷେତ୍ର ପୁରୀ ଓ ଭୁବନେଶ୍ୱରର ଏକାମ୍ରକ୍ଷେତ୍ରରେ ଭିତ୍ତିଭୂମି ବିକାଶ କରାଯାଉଛି। ସମ୍ବଲପୁରରେ ମା’ ସମଲେଶ୍ୱରୀ ମନ୍ଦିରର ବିକାଶ ପାଇଁ ଯୋଜନା ପ୍ରସ୍ତୁତି ଆରମ୍ଭ ହୋଇଯାଇଥିବା ବେଳେ ପଶ୍ଚିମ ଓଡ଼ିଶାର ଅନ୍ୟ ୨ଟି ପ୍ରସିଦ୍ଧ ଆଧ୍ୟାତ୍ମିକ ଓ ପର୍ଯ୍ୟଟନ କ୍ଷେତ୍ର ହରିଶଙ୍କର ଓ ନୃସିଂହନାଥ ମନ୍ଦିରର ଉନ୍ନତି ପାଇଁ ସରକାର ଚିନ୍ତା କରିଛନ୍ତି। ସରକାରଙ୍କ ଚିନ୍ତା ଫଳବତି ହେଲେ ଏହି ୨ଟି ସ୍ଥାନରେ ପ୍ରାକୃତିକ ସୌନ୍ଦର୍ଯ୍ୟ ଭରପୁର ଥିବାରୁ ଏଠାରେ ପ୍ରତିଦିନ ହଜାର ହଜାର ପର୍ଯ୍ୟଟକଙ୍କ ଭିଡ଼ ଲାଗି ରହିବ।
ରାଜ୍ୟର ଏହି ପ୍ରସିଦ୍ଧ ପର୍ଯ୍ୟଟନସ୍ଥଳ ହରିଶଙ୍କର ଓ ନୃସିଂହନାଥ ଗୋଟିଏ ପାହାଡ଼ ‘ଗନ୍ଧମାର୍ଦ୍ଧନ’ରେ ଥିବାରୁ ଏଠାରେ ସରକାର ‘ଇକୋ-ଟୁରିଜମ୍’ କ୍ଷେତ୍ରରେ ବିକାଶ କରିବାକୁ ମନ ବଳାଇଛନ୍ତି। ଆଉ ଯଦି ଏହି କାମ ସଫଳତାର ସହିତ ସଂପନ୍ନ ହୁଏ, ତା’ହେଲେ ଏଠାରେ ପର୍ଯ୍ୟଟକଙ୍କ ସଂଖ୍ୟା ବଢ଼ିବ। ଏଥି ସହିତ ଓଡ଼ିଶା, ଛତିଶଗଡ଼ ଓ ଝାଡ଼ଖଣ୍ଡ ରାଜ୍ୟରୁ ପର୍ଯ୍ୟଟକଙ୍କ ସଂଖ୍ୟା ବଢ଼ିବ। ଏହି ୨ଟି ସ୍ଥାନରେ ପର୍ଯ୍ୟଟକଙ୍କ ପାଇଁ ଭିତ୍ତିଭୂମିର ବିକାଶ ହେଲେ ସ୍ଥାନୀୟ ଲୋକଙ୍କ ପାଇଁ ରୋଜଗାର ମଧ୍ୟ ସୃଷ୍ଟି ହେବ ବୋଲି ଆଶା କରାଯାଉଛି।
ବିକାଶ ପାଇଁ ସରକାରଙ୍କ ଚିନ୍ତା
ହରିଶଙ୍କର ଓ ନୃସିଂହନାଥକୁ ଇକୋ-ଟୁରିଜମ୍ ପରିଣତ କରିବା ପାଇଁ ବୁଧବାର ମୁଖ୍ୟ ଶାସନ ସଚିବ ସୁରେଶ ମହାପାତ୍ର, ୫-ଟି ସଚିବ ଭି.କେ. ପାଣ୍ଡିଆନ, ପୂର୍ବତନ ମୁଖ୍ୟ ଶାସନ ସଚିବ ତଥା ପଶ୍ଚିମ ଓଡ଼ିଶା ବିକାଶ ପରିଷଦର ଅଧ୍ୟକ୍ଷ ଅସିତ ତ୍ରିପାଠୀ, ମୁଖ୍ୟମନ୍ତ୍ରୀଙ୍କ ପ୍ରମୁଖ ସଚିବ ଭିନିଲ କ୍ରିଷ୍ଣନଙ୍କ ଗସ୍ତ କରିଥିଲେ। ହରିଶଙ୍କର ପର୍ଯ୍ୟଟକଙ୍କ ପାଇଁ ଚୁମ୍ବକ ପାଲଟିବ ବୋଲି ଶ୍ରୀ ତ୍ରିପାଠୀ କହିଥିଲେ। ଶ୍ରୀ ତ୍ରିପାଠୀଙ୍କ ଏହି ପଦିଏ କଥାରେ ପଶ୍ଚିମଓଡ଼ିଶାବାସୀ ମନେରେ ଅନେକ ଆଶା ବାନ୍ଧି ଦେଇଛନ୍ତି। ଖାଲି ଦେଖିବାକୁ ରହିଲା ଯେ, କାମ କେବେ ହେଉଛି।
ହରିଶଙ୍କରରୁ ନୃସିଂହନାଥକୁ ଯୋଡ଼ିବ ସଡ଼କ ପଥ
ଶ୍ରୀ ତ୍ରିପାଠୀ ଗଣମାଧ୍ୟମକୁ କହିଛନ୍ତି, ହରିଶଙ୍କର ଓ ନୃସିଂହନାଥକୁ ଯେପରି ଆହୁରି ଅଧିକ ଭକ୍ତ ଓ ପର୍ଯ୍ୟଟକ ଆସିବେ ସେଥିପ୍ରତି ରାଜ୍ୟ ସରକାର ଧ୍ୟାନ ଦେଇଛନ୍ତି। ଏହାକୁ ଇକୋ-ଟୁରିଜମରେ ପରିଣତ କରାଯିବା ସହିତ ହରିଶଙ୍କର – ନୃସିଂହନାଥକୁ ବିଭକ୍ତ କରୁଥିବା ପର୍ବତ ଉପରେ ଏକ ରାସ୍ତା ତିଆରି କରାଯିବ। ଫଳରେ ଏହା ଓଡ଼ିଶାର ଏକ ଅନନ୍ୟ ପର୍ଯ୍ୟଟନସ୍ଥଳୀରେ ପରିଣତ ହେବା ସହିତ ପର୍ଯ୍ୟଟକମାନଙ୍କ ପାଇଁ ଓଡ଼ିଶାର ଚୁମ୍ବକ ହୋଇ ରହିବ। ରାଜ୍ୟ ସରକାରଙ୍କ ବରିଷ୍ଠ ଅଧିକାରୀମାନେ ହରିଶଙ୍କର ମନ୍ଦିର, ଭୋଗ ମଣ୍ଡପ, ଝରଣା ଓ ଅନ୍ୟ ସ୍ଥାନ ବୁଲି ଦେଖିଥିଲେ। ସେମାନେ ମନ୍ଦିରର ମୁଖ୍ୟ ଫାଟକ ସାମନାରେ ଥିବା ମଣ୍ଡପରେ ପ୍ରସ୍ତାବିତ ଭିତ୍ତିଭୂମି ପାଇଁ ପ୍ରସ୍ତୁତ ହୋଇଥିବା ମ୍ୟାପ ରଖି ଆଲୋଚନା କରିଥିଲେ।
ସ୍ଥାନୀୟ ଲୋକଙ୍କ ରୋଜଗାର ବଢ଼ିବ
ହରିଶଙ୍କର ଶୈବପୀଠର ବିକାଶ କଥା ଯେତେବେଳେ ଉଠୁଛି ସେହି ସମୟରେ ପ୍ରଥମେ ଏଠାକୁ ସଂଯୋଗ କରୁଥିବା ସଡ଼କକୁ ଗୁରୁତ୍ୱ ଦିଆଯିବାର ଅଛି। ଖପ୍ରାଖୋଲରୁ ହରିଶଙ୍କରକୁ ଏକ ଭଲ ରାସ୍ତା, ପ୍ରତିଦିନ ବସ ସେବା, ପାହାଡ଼ରେ ଇକୋ ଟୁରିଜମ ପାଇଁ କଟେଜର ବ୍ୟବସ୍ଥା, ଲଘୁ ବନଜାତ ଦ୍ରବ୍ୟ ସଂଗ୍ରହ ଓ ବିକ୍ରି ବ୍ୟବସ୍ଥା କରାଯିବାର ଆବଶ୍ୟକତା ରହିଛି। ଏହି ସବୁ କାମ ହେଲେ ସ୍ଥାନୀୟ ଲୋକେ ବ୍ୟବସାୟ କରିପାରିବେ। ଲୋକେ ବ୍ୟବସାୟ କରି ଆତ୍ମନିର୍ଭରଶୀଳ ହେବା ସହ ପର୍ଯ୍ୟଟକ ସୁବିଧା ପାଇପାରିବେ।
ହରିଶଙ୍କରରୁ ନୃସିଂହନାଥ ଦୁର୍ଗମ ପଥ
ହରିଶଙ୍କରରୁ ନୃସିଂହନାଥ ସଡ଼କ ପଥରେ ଯିବା ପାଇଁ ପ୍ରାୟ ୩୫ କିଲୋମିଟର ଯିବାକୁ ପଡ଼େ। କିନ୍ତୁ ପାହାଡ଼ ଦେଇ ଚାଲିଚାଲି ଗଲେ ଏହାର ଲମ୍ବ ୧୮ କିଲୋମିଟର। ଦୁର୍ଗମ ରାସ୍ତା, ପଥୁରିଆ ଓ ବିପଦ ରାସ୍ତା ଅତିକ୍ରମ କରିବା ପାଇଁ ପ୍ରାୟ ୧୨ ଘଣ୍ଟା ଲାଗିଥାଏ। ନୃସିଂହନାଥଙ୍କ ପବିତ୍ର ଚତୁର୍ଦ୍ଦଶୀ ତିଥିରେ ଦର୍ଶକ, ପର୍ଯ୍ୟଟକମାନେ ଏହି ଦୁର୍ଗମ ରାସ୍ତା ଅତିକ୍ରମ କରି ନୃସିଂହନାଥ ଠାରୁ ହରିଶଙ୍କର ପହଂଚିଥାଆନ୍ତି। ଛତିଶଗଡ଼ର ଅଧିକାଂଶ ପର୍ଯ୍ୟଟକ ଏହି ଦୁଃସାହସିକ କାମ କରିଥାନ୍ତି।
