ଭୁବନେଶ୍ବର: ୨୦୦୯ ସାଧାରଣ ନିର୍ବାଚନ ହେଉ କି ୨୦୧୪। ସେହି ସମୟରେ ଓଡ଼ିଶାର ଜନତାଙ୍କ ହୃଦୟରେ ଥିଲେ ନବୀନ ପଟ୍ଟନାୟକ। ୨୦୧୯ ସାଧାରଣ ନିର୍ବାଚନରେ ବିଜୟ ହାସଲ କରିବା ପାଇଁ ଅଣଓଡ଼ିଆ ଅଧିକାରୀମାନେ ଗୋଟି ଚାଳନା କରି ସଫଳ ହୋଇଥିଲେ। ଏକଥା ବାହାର ଲୋକ ଜାଣି ପାରି ନଥିଲେ। ମାତ୍ର ୨୦୨୦ ପରଠାରୁ ସରକାରର ଅସଲ ଆଭିମୁଖ୍ୟ ଧୀରେଧୀରେ ପଦାକୁ ଆସିବାରେ ଲାଗିଲା। ରାଜ୍ୟ ସରକାରଙ୍କ ତତ୍କାଳୀନ ଅଧିକାରୀ ତଥା ବର୍ତ୍ତମାନର ଅଘୋଷିତ କ୍ଷମତାପ୍ରାପ୍ତ ବ୍ୟକ୍ତି ଜଣକ କାର ଛାଡ଼ି ହେଲିକପ୍ଟରରେ ଉଡୁଛନ୍ତି। ଫଳରେ ରାଜ୍ୟବାସୀଙ୍କ ଅଜସ୍ର ରାଜସ୍ବ ହାନୀ ହେଉଛି। ଯେଉଁ ରାଜ୍ୟର ଲୋକ କାମଧନ୍ଦା ନପାଇ ଦାଦନ ଖଟିବାକୁ ବାହାରକୁ ଯାଉଛନ୍ତି, ସେମାନଙ୍କର ଟଙ୍କାରେ ଜଣେ ଅଣଓଡ଼ିଆ ନବୀନ ପଟ୍ଟନାୟକଙ୍କ ନାମରେ ମନମୁଖୀ ଶାସନ ଚଳାଇଛି, ତାହା ଆଉ କାହାରିକୁ ଅଜଣା ନାହିଁ।
ବିଗତ ବର୍ଷେ ହେଲା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଲୋକପ୍ରିୟତା ହ୍ରାସ ପାଇଛି। ବିଜ୍ଞାପନ ଦେଇ ସରକାର ଯଦିଓ ପ୍ରମୁଖ ଗଣମାଧ୍ୟମର ମୁହଁ ବନ୍ଦ କରିଦେଉଛନ୍ତି, ତଥାପି ସାମାଜିକ ଗଣମାଧ୍ୟମ ବ୍ୟବହାରକାରୀଙ୍କ ମଧ୍ୟରୁ ଅର୍ଦ୍ଧରୁ ଅଧିକ ନବୀନ ଅଥବା ବିଜେଡିକୁ ପସନ୍ଦ କରୁନାହାନ୍ତି। ଡିଜିଟାଲ ଯୁଗରେ ସାମାଜିକ ଗଣମାଧ୍ୟମର ମୁହଁକୁ ବନ୍ଦ କରିପାରୁ ନାହାନ୍ତି ସରକାର। ଯଦିଓ ବିଭିନ୍ନ ଯୋଜନା ମାଧ୍ୟମରେ ସରକାର ଲୋକଙ୍କୁ ଆକର୍ଷିତ କରିବାକୁ ଏକାଧିକ ପଦକ୍ଷେପ ନେଇଛନ୍ତି, ତଥାପି ଶିକ୍ଷିତ ଓ ବୁଦ୍ଧିଜୀବୀ ସରକାରଙ୍କ ଅସଲ ଭାବମୂର୍ତ୍ତି ଜାଣିସାରିଛନ୍ତି। ଏପରିକି ବିଜେଡି ନେତାମାନେ ଯଦିଓ ଖୋଲାଖୋଲି କହିପାରୁ ନାହାନ୍ତି, ତଥାପି ସେମାନଙ୍କ ମଧ୍ୟରୁ ଅନେକଙ୍କ ଦଳ ପ୍ରତି ଆନ୍ତରିକତା ପୂର୍ବ ଭଳି ନାହିଁ। ବିଗତ ଦିନରେ ରାଜ୍ୟ ସରକାରଙ୍କ ବିଭିନ୍ନ କାର୍ଯ୍ୟକ୍ରମରେ ସ୍ଥାନୀୟ ଲୋକ ପ୍ରତିନିଧିଙ୍କୁ ଅଣଦେଖା କରାଯିବା ଏହାର ମୂଳ କାରଣ ହୋଇପାରେ।
ବାସ୍ତବ ରୂପାନ୍ତର କେବେ?
ବିଗତ ୨୪ ବର୍ଷ ହେଲା କ୍ଷମତାରେ ଥାଇ ମଧ୍ୟ ନବୀନ ପଟ୍ଟନାୟକଙ୍କୁ ଲୋକେ ଆନ୍ତରିକତାର ସହିତ ଭଲ ପାଉନାହାନ୍ତି ବୋଲି କୁହାଯିବାରେ ଅସୁବିଧା ନାହିଁ। କାରଣ ବିଜେଡି ସରକାର ଦୁଇ ଦଶନ୍ଧିରୁ ଅଧିକ ସମୟ ପର୍ଯ୍ୟନ୍ତ କ୍ଷମତାରେ ରହିଥିଲେ ସୁଦ୍ଧା ରାଜ୍ୟରେ ସମସ୍ୟା ଭରି ରହିଛି। ଶିକ୍ଷା ଓ ସ୍ବାସ୍ଥ୍ୟ କ୍ଷେତ୍ରରେ ରୂପାନ୍ତରୀଣ ନାମରେ ରଂଗବୋଳା କାର୍ଯ୍ୟ ଜାରି ରହିଛି। ବିଦ୍ୟାଳୟର କୋଠା ଅଛି। କିନ୍ତୁ ଶିକ୍ଷକ ନାହାନ୍ତି। ଯଦିଓ ଶିକ୍ଷକ ଅଛନ୍ତି, ସେମାନଙ୍କ ମଧ୍ୟରୁ ଅନେକଙ୍କ ଜ୍ଞାନ ଅନୁସାରେ ନିମ୍ନମାନର। ପ୍ରତି ଜିଲ୍ଲାରେ ୬ ମହଲା ବିଶିଷ୍ଟ ଡାକ୍ତରଖାନା ରହିଛି। କିନ୍ତୁ ତାହା ରେଫରାଲ ହସ୍ପିଟାଲରେ ପରିଣତ ହେଉଛି। ସାଧାରଣ ଜ୍ବର, କାଶ ପାଇଁ ସେହିଭଳି ହସ୍ପିଟାଲ ଯୋଗ୍ୟ। ରୋଗ ଛଡ଼ାଇପାରନ୍ତି ନାହିଁ ଡାକ୍ତର। ଛତୁ ଫୁଟିଲା ଭଳି ମେଡିକାଲ କଲେଜ ନିର୍ମାଣ ହୋଇଛି। ବଡ଼ଧରଣରେ ରୋଗ ହେଲେ ଲୋକଙ୍କୁ ଏସ୍ସିବି ଅଥବା ଏମ୍ସ ଉପରେ ନିର୍ଭର କରିବାକୁ ପଡ଼ିଥାଏ।
୬ଷ୍ଠ ଥର କ୍ଷମତାର ଲୋଭ
କ୍ଷମତାଲୋଭୀ ବିଜେଡି ସରକାର ୬ଷ୍ଠ ଥର କ୍ଷମତାକୁ ଆସିବା ପାଇଁ ହାତ ଖୋଲି ଦେଇଛି। ସାଧାରଣ ନିର୍ବାଚନ ପୂର୍ବରୁ ବିଜେଡି ‘ମାଗଣା’ ଯୋଜନା ବର୍ଷା କରୁଛି। ଭୋଟ୍ ଧରିବାକୁ ବିଜେଡି ସରକାରର ଫ୍ରି ସ୍କିମ୍ ଜାଲ ବିଛାଇଛି। ସବୁ ଭତ୍ତା ୫୦୦ ଟଙ୍କା ବୃଦ୍ଧି କରିବା ପରେ କେନ୍ଦୁପତ୍ର ତୋଳାଳୀଙ୍କୁ ୫୦ ପ୍ରତିଶତ ବୋନସ ଦେବେ ବୋଲି ଘୋଷଣା କରିଛନ୍ତି। ସେହିପରି ଖାଦ୍ୟ ସୁରକ୍ଷା ହିତାଧିକାରୀଙ୍କୁ ହଜାରେ ଟଙ୍କାର ସହାୟତା ଓ ମାଗଣାରେ ୨ଟି ଲେଖାଏଁ ଝୋଟ ବ୍ୟାଗ୍। ବେକାର ଯୁବକଯୁବତୀମାନଙ୍କୁ ‘ସ୍ୱୟମ୍’ ଯୋଜନାରେ ବିନା ସୁଧରେ ୧ ଲକ୍ଷ ଟଙ୍କା ଯାଏ ଋଣ ପରେ ଆଉ ଆଜି ଯୁକ୍ତତିନି ଓ ପିଜି ଛାତ୍ରଛାତ୍ରୀଙ୍କୁ ନୂଆ ଓ’ ଶିକ୍ଷାବୃତ୍ତିରେ ବର୍ଷକୁ ୯ରୁ ୧୦ ହଜାର ଟଙ୍କାର ଯାଏ ସହାୟତା ଘୋଷଣା। ପୁଣି ୩୦୦ କୋଟି ଟଙ୍କାର କର୍ପସ ଫଣ୍ଡ ଗଠନ କରି ଛାତ୍ରଛାତ୍ରୀଙ୍କୁ ନୂଆ ମ୍ୟାଜିକ ସ୍ମାର୍ଟ କାର୍ଡ ବଣ୍ଟନ।
ମମତା ଯୋଜନା
ରାଜ୍ୟ ସରକାର ଗର୍ଭବତୀଙ୍କ ପାଇଁ ‘ମମତା’ର ସହାୟତା ରାଶି ବୃଦ୍ଧି କରିଛନ୍ତି। ଗର୍ଭବତୀମାନେ ୫ ହଜାର ବଦଳରେ ୧୦ ହଜାର ଟଙ୍କା ଲେଖାଏଁ ପାଇବେ। ୨୦୨୩ ଅଗଷ୍ଟ ମାସରୁ ସମସ୍ତ ଯୋଗ୍ୟ ହିତାଧିକାରୀଙ୍କୁ ଏହି ବର୍ଦ୍ଧିତ ରାଶି ପିଛିଲା ଭାବେ ମିଳିବ। ରାଜ୍ୟ ସରକାର ଉପଭୋକ୍ତ ବିଦ୍ୟୁତ ବିଲ ହ୍ରାସ କରିଛନ୍ତି। ପ୍ରତ୍ୟେକ ସ୍ଲାବରେ ସରକାର ବିଦ୍ୟୁତ୍ ଦର ୧୦ ପଇସା ହ୍ରାସ କରିଛନ୍ତି। ନିର୍ବାଚନ ଆଚରଣ ବିଧି ଲାଗୁ ହେବା ପୂର୍ବରୁ ଗୋଟିଏ ପରେ ଗୋଟିଏ ମାଗଣା ଯୋଜନା ଘୋଷଣା କରିବା ପାଇଁ କସରତ ଚଳାଇଛନ୍ତି ରାଜ୍ୟ ସରକାର।
କଳାକାର ଯୋଜନା
‘ମୁଖ୍ୟମନ୍ତ୍ରୀ କଳାକାର ସହାୟତା ଯୋଜନା’ରେ କଳାକାର ସହାୟତା ରାଶି ମାସିକ ୧୨୦୦ରୁ ୨୦୦୦ ଟଙ୍କାକୁ ବୃଦ୍ଧି କରିଛନ୍ତି। ଯେଉଁ କଳାକାରମାନଙ୍କର ବୟସ ୮୦ ବର୍ଷରୁ ଊର୍ଦ୍ଧ୍ବ ହୋଇଥିବା ସେମାନଙ୍କୁ ୨୫୦୦ ଟଙ୍କା ମିଳିବ ବୋଲି କହିଛନ୍ତି। ଚଳିତ ଫେବ୍ରୁଆରି ୨୦ରୁ ୨୫ ତାରିଖ ଭିତରେ ବର୍ଦ୍ଧିତ ରାଶି ମିଳିବ। ରାଜ୍ୟରେ ଏବେ ୫୦,୦୦୦ କଳାକାରମାନଙ୍କୁ ଏପର୍ଯ୍ୟନ୍ତ ମାସିକ ୧୨୦୦ ଟଙ୍କା ଲେଖାଏଁ ପ୍ରଦାନ କରାଯାଉଥିଲା। ବର୍ତ୍ତମାନ ଏହି ଯୋଜନାରେ ୩୦୦୦୦ ନୂଆ କଳାକାର ଯୋଡ଼ି ହେବେ। ଫଳରେ ଧାର୍ଯ୍ୟ ଲକ୍ଷ୍ୟ ୮୦,୦୦୦ରେ ପହଞ୍ଚିବ। କଳାକାରମାନେ ଡିବିଟି ମାଧ୍ୟମରେ ସହାୟତା ରାଶି ପାଇପାରିବେ।
ନବୀନଙ୍କ ଜନତାଙ୍କ ସମର୍ଥନ କେତେ?
ନବୀନଙ୍କ ଶାସନକୁ ନେଇ ୪୩ ପ୍ରତିଶତ ଲୋକ ଅସନ୍ତୁଷ୍ଟ ଥିବା ବେଳେ ୩୧ ପ୍ରତିଶତ ଆଂଶିକ ସନ୍ତୁଷ୍ଟ ଅଛନ୍ତି। ବିଭିନ୍ନ ଜାତୀୟ ସଂସ୍ଥାର ସର୍ଭେ ଆକଳନ କରୁଛି, ଆସନ୍ତା ନିର୍ବାଚନରେ ବିଜେଡି ଉପରେ ଭାରି ପଡିପାରେ ବିଜେପି। ସବୁଠୁ ବଡ଼ କଥା ହେଲା, ଏସବୁ ମାଗଣା ଯୋଜନା ବାବଦକୁ ସରକାରୀ ତହବିଲରୁ କୋଟି କୋଟି ଖର୍ଚ୍ଚ କରିବେ ସରକାର। ଭତ୍ତା ବୃଦ୍ଧି ଯୋଗୁ ବାର୍ଷିକ ୩ ହଜାର ୬୮୩ କୋଟି, ପିଡିଏସ୍ ହିତାଧିକାରୀଙ୍କୁ ୧୦୦୦ ଟଙ୍କା ଓ ମାଗଣା ବ୍ୟାଗ୍ ପାଇଁ ଖର୍ଚ୍ଚ କରିବେ ୧୨୭୩ କୋଟି ଟଙ୍କା। ଅର୍ଥନୀତି ବିଶେଷଜ୍ଞଙ୍କ ମତରେ ରାଜ୍ୟ ସରକାର ନିର୍ବାଚନକୁ ଦୃଷ୍ଟିରେ ରଖି ଏତେ ଟଙ୍କା ଏକାଥରେ ଖର୍ଚ୍ଚ କରିବା ଅପେକ୍ଷା ଦୀର୍ଘମିଆଦି ଭାବେ ଗରିବ କଲ୍ୟାଣରେ ଖର୍ଚ୍ଚ କଲେ ଭଲ ହୋଇଥାଆନ୍ତା। ଆଜିର ଶିକ୍ଷତ ଯୁଗରେ ଲୋକେ ସରକାରଙ୍କ ଉଦ୍ଦେଶ୍ୟ ଜାଣିପାରୁଛନ୍ତି।
