Thursday, June 13, 2024
Homeହ୍ରାସ ପାଉଛି ଜଙ୍ଗଲ; ବଢୁଛି ତାପମାତ୍ରା
Array

ହ୍ରାସ ପାଉଛି ଜଙ୍ଗଲ; ବଢୁଛି ତାପମାତ୍ରା

ଭୁବନେଶ୍ବର: ରାଜ୍ୟରେ ଗ୍ରୀଷ୍ମ ଲହରି ଜାରି ରହିଛି। ଜଙ୍ଗଲରେ ନିଆଁ ଲାଗିଛି। ଶୁଖିଲା ପତ୍ର ପଡ଼ିଥିବାରୁ କମ ସମୟରେ ନିଆଁ ଚାରିଆଡେ ବ୍ୟାପିବାରେ ସହଜ ହେଉଛି। ଦେଖୁ ଦେଖୁ ନିଆଁ ବହୁଦୂର ପର୍ଯ୍ୟନ୍ତ ବ୍ୟାପିଯାଉଛି। ଜଙ୍ଗଲ ନିଆଁ ଲିଭାଇବାକୁ ବନ୍ୟ କମିଟି, ସରକାରୀ କର୍ମୀ ଥିଲେ ମଧ୍ୟ ସବୁସ୍ଥାନରେ ନିଆଁ ଲିଭାଇବା ସହଜ ହେଉନାହିଁ। ଶୁଖିଲା ଗଛ ସହଜରେ ଜଳିଯାଉଥିବା ବେଳେ କଞ୍ଚା ଗଛଗୁଡ଼ିକ ନିଆଁର ଝାସରେ ମରିଯାଉଛି। ବନାଗ୍ନି ଯୋଗୁଁ ବିଚରା ବନ୍ୟ ଜୀବଜନ୍ତୁମାନେ ଏଣେତେଣେ ପଳାୟନ କରୁଛନ୍ତି। ଜଙ୍ଗଲ ଭିତରେ ଝରଣା ଓ ଜଳସ୍ରୋତଗୁଡ଼ିକରେ ପାଣି ଅଭାବରୁ ପଶୁପକ୍ଷୀମାନେ ଅନ୍ୟଥାରେ ପ୍ରାଣ ହାରୁଛନ୍ତି।

ଜଙ୍ଗଲର ପରିମାଣ ହ୍ରାସ ପାଇବା, ମାତ୍ରାଧିକ ଯାନବାହନ ଚଳାଚଳ କରିବା, କଳକାରଖାନା ଗଢ଼ିଉଠିବା, ପକ୍କାଘର ସଂଖ୍ୟା ବଢ଼ିବା, ମାଟିଚାଳଘର ସଂଖ୍ୟା ହ୍ରାସ ପାଇବା କାରଣରୁ ତାପମାତ୍ରା ବଢ଼ିବାରେ ଲାଗିଛି। କେବଳ ସହର ନୁହେଁ। ବରଂ ଗ୍ରାମରେ ବସବାସ କରୁଥିବା ଲୋକେ ମଧ୍ୟ ପ୍ରବଳ ଖରାରେ ତ୍ରାହିତ୍ରାହି ଡାକୁଛନ୍ତି। ସକାଳ ୭ଟା ପରେ ସୂର୍ଯ୍ୟଦେବତାଙ୍କର ଆକ୍ରୋଶ ବଢ଼ିବାରେ ଲାଗୁଛି। ଅପରାହ୍ଣ ୪ଟା ପୂର୍ବରୁ ବାହାରକୁ ଯିବା ଅସହଜ ହେଉଛି। କହିବାକୁ ଗଲେ ବିନା ନିଆଁରେ ସହର ଜଳୁଛି। ସହରର କଂକ୍ରିଟ ରାସ୍ତାରେ ଗରମ ବାଷ୍ପ ବାହାରୁଛି, ଯେଉଁ ଝାସକି ଜନତାଙ୍କୁ ଡହଳବିକଳ କରୁଛି।

ଜଳୁଛି ଭୁବନେଶ୍ବର

ଭୁବନେଶ୍ବରସ୍ଥିତ ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ଦିଆଯାଇଥିବା ସୂଚନା ଅନୁସାରେ ଏପ୍ରିଲ ୨୦ ତାରିଖରେ ରାଜ୍ୟର ୨୮ଟି ସହରର ତାପମାତ୍ରା ୪୦ ଡିଗ୍ରି ଅଥବା ଏଥିରୁ ଅଧିକ। ୪୩.୯ ଡିଗ୍ରି ସହ ବୌଦ୍ଧ ସର୍ବାଧିକ ଉତ୍ତପ୍ତ ସହର ହୋଇଥିବା ବେଳେ ଦ୍ବିତୀୟରେ ଭୁବନେଶ୍ବର (୪୩.୨) ରହିଛି। ୧୦ ବର୍ଷ ପୂର୍ବରୁ ମେ’ ମାସରେ ଯେତିକି ତାପମାତା ରହୁଥିଲା, ଏପ୍ରିଲ ମାସରେ ଭୁବନେଶ୍ବରରେ ସେତିକି ରହୁଛି। ତାପମାତ୍ରା ବଢ଼ିବାର କାରଣ ହେଲା ଯେ, ସହରରେ ଜଳାଶୟଗୁଡ଼ିକରେ ପାଣି ରହୁନଥିବା ବେଳେ ଯାନବାହନ ଓ କୋଠା ସଂଖ୍ୟା ବଢ଼ିବାରେ ଲାଗିଛି। ଭୁବନେଶ୍ବରର ତାପାମାତ୍ରା ବଲାଙ୍ଗୀର ଜିଲ୍ଲା ଟିଟିଲାଗଡ଼, ଝାରସୁଗୁଡ଼ା ଓ ତାଳଚେରକୁ ଟପିଯାଉଛି।

ଅଭୟାରଣ୍ୟ କରିପାରୁନି ନିୟନ୍ତ୍ରଣ

ଓଡ଼ିଶାର ଘଞ୍ଚ ଜଙ୍ଗଲ ମୟୂରଭଂଜ ଜିଲ୍ଲାରେ ରହିଛି। ଏଠାରେ ବୃହତ୍ ଜଙ୍ଗଲ ଥିବାରୁ ଶିମିଳିପାଳ ଅଭୟାରଣ୍ୟ କରାଯାଇଛି। ତେବେ ଏହି ଅଭୟାରଣ୍ୟ ମଧ୍ୟ ବାରିପଦାବାସୀଙ୍କୁ ଆଶ୍ବସ୍ତି ଦେଉନାହିଁ। କାରଣ ଅଭୟାରଣ୍ୟର ଅବସ୍ଥାରେ ବହୁ ପରିବର୍ତ୍ତନ ଘଟିଛି। ଏଠାରେ ପୂର୍ବ ଭଳି ଗଛ ନାହିଁ। ଜଙ୍ଗଲରେ ନିଆଁ ଲାଗୁଛି। ଜଙ୍ଗଲ ମାଫିଆଙ୍କ କାରବାର ବଢ଼ିଛି। ଏପ୍ରିଲ ୨୦ ତାରିଖରେ ବାରିପଦାର ତାପମାତ୍ରା ୪୨ ଡିଗ୍ରି ଥିବା ବେଳେ ବୁଧବାର ୪୪.୫ ଡିଗ୍ରି ରେକର୍ଡ କରାଯାଇଥିଲା। ମଙ୍ଗଳବାର ୪୨.୨ ଡିଗି ଓ ସୋମବାର ୪୨.୨ ଡିଗ୍ରି ରେକର୍ଡ କରାଯାଇଥିଲା

ଜଳ ସମ୍ବଳର ସୁବିନିଯୋଗ ଦରକାର

ପାଣିପାଗ ବିଶେଷଜ୍ଞଙ୍କ କହିବା ଅନୁସାରେ ଜଳବାୟୁ ପରିବର୍ତ୍ତନ ତାପାମାତ୍ରାର ମୁଖ୍ୟ କାରଣ। କିଛି ବର୍ଷ ପୂର୍ବରୁ ନିୟମିତ ଭାବେ ବର୍ଷା ହେଉଥିଲା। କିନ୍ତୁ ଏବେ ଏଥିରେ ବ୍ୟତିକ୍ରମ ଦେଖାଯାଇଛି। ନିୟମିତ ଭାବେ ବର୍ଷା ନହେବାରୁ ମାଟିରୁ ଆଦ୍ରତା କମିଯାଉଛି। ଅପରପକ୍ଷେ ବେଳେ ବେଳେ ଅନାବଶ୍ୟକ ବର୍ଷା ହେଉଛି। ବର୍ଷା ଜଳ ସମୁଦ୍ରକୁ ବୋହି ଯାଉଛି। ପୋଖରୀଗୁଡ଼ିକ ପୋତି ହୋଇଯାଉଥିବା ବେଳେ ନଦୀ, ନାଳ ଓ ଝରଣାରୁ ପାଣି ନିର୍ଗତ ହେଉନାହିଁ। ତାପମାତ୍ରା ହ୍ରାସ କରିବାକୁ ହେଲେ ଜଳ ସମ୍ବଳକୁ ସଠିକ ଭାବେ ବିନିଯୋଗ କରିବାର ଆବଶ୍ୟକତା ରହୁଛି।

RELATED ARTICLES

LEAVE A REPLY

Please enter your comment!
Please enter your name here

Most Popular

Recent Comments