Sunday, February 25, 2024
Home୮୭ ବର୍ଷରେ ଓଡ଼ିଶା: ଭାଷଣ ବେଶୀ, ବିକାଶ କମ
Array

୮୭ ବର୍ଷରେ ଓଡ଼ିଶା: ଭାଷଣ ବେଶୀ, ବିକାଶ କମ

ଭୁବନେଶ୍ବର: ସ୍ବତନ୍ତ୍ର ପ୍ରଦେଶ ଗଠନ ହେଲା ପରେ ଓଡ଼ିଶା ୮୭ତମ ଜନ୍ମବାର୍ଷିକୀ ପାଳନ କରିଛି। ଓଡ଼ିଶା ଦିବସ କେବଳ ଓଡ଼ିଶାରେ ସୀମତ ରହିନାହିଁ। ଦେଶର ରାଜଧାନୀ ଠାରୁ ଆରମ୍ଭ କରି ଅନ୍ୟ ପ୍ରମୁଖ ସହରରେ ମଧ୍ୟ ଏହି ପର୍ବ ପାଳନ ହୋଇଛି। ବିଦେଶରେ ରହୁଥିବା ଓଡ଼ିଆ ମଧ୍ୟ ଉତ୍କଳ ଦିବସକୁ ମନେ ପକାଇଛନ୍ତି। ସହରରୁ ଗାଁ ଯାଏଁ ଚାରିଆଡେ ମହାପୁରୁଷଙ୍କୁ ଶ୍ରଦ୍ଧାଞ୍ଜଳି ଦିଆଯାଇଛି। ତାଙ୍କର ଯୋଗଦାନକୁ ନେତା ଓ ପ୍ରଶାସନିକ ଅଧିକାରୀ ମନେ ପକାଇଛନ୍ତି। ନେତାମାନେ ସ୍ବପ୍ନ ଦେଖାଇଛନ୍ତି। ଅଧିକାରୀମାନେ ବଡ଼ବଡ଼ ଭାଷଣବାଜି କରିଛନ୍ତି। ଏହି ସମୟ ଅବଧି ମଧ୍ୟରେ ଓଡ଼ିଶା ତିନିଟି ପିଢ଼ିର ଲୋକଙ୍କୁ ଦେଖିଛି। କିନ୍ତୁ କ୍ଷୋଭର ବିଷୟ ହେଲା ଯେ, ଆଜି ଓଡ଼ଆଙ୍କୁ ଓଡ଼ିଆ ଚିହ୍ନିପାରୁ ନାହିଁ।

ଠିକ୍ ୮୭ ବର୍ଷ ତଳେ ଓଡ଼ିଶା ଏକ ଭାଷାଭିତ୍ତିକ ସ୍ବତନ୍ତ୍ର ପ୍ରଦେଶ ରୂପେ ଜନ୍ମଲାଭ କରିଥିଲା। ଏହା ଆଧୁନିକ ଓଡ଼ିଶା ଇତିହାସର ସବୁଠାରୁ ସ୍ମରଣୀୟ ଘଟଣା। ଷୋଡ଼ଶ ଶତାବ୍ଦୀର ଦ୍ବିତୀୟାର୍ଦ୍ଧରୁ ଓଡ଼ିଶା ରାଜନୈତିକ ବିପର୍ଯ୍ୟୟ ଦେଇ ଗତି କରିଆସୁଥିଲା। ଓଡ଼ିଶାର କବି ଓ ଲେଖକଙ୍କର ସାହିତ୍ୟ ସାଧନା ଅବ୍ୟାହତ ରହିଥିବାରୁ ଓଡ଼ିଆ ଭାଷା-ସଂସ୍କୃତି ତିଷ୍ଠି ରହିଥିଲା। କ୍ଷୋଭର ବିଷୟ ହେଲା ଯେ, ଓଡ଼ିଶା ୮୭ ବର୍ଷର ରାଜ୍ୟ ହୋଇଥିଲେ ବି ସଶକ୍ତ ହୋଇପାରି ନାହିଁ। ଆମେ ଆମର ପଡୋଶୀ ରାଜ୍ୟରେ ଗରିବ ବୋଲି ପ୍ରଥମେ ପରିଚିତ ହୋଇଥାଉ। ପଡୋଶୀ ରାଜ୍ୟ, ଛତିଶଗଡ଼ ଓ ଝାଡ଼ଖଣ୍ଡ ନୂଆ କରି ଗଠିତ ହୋଇଥିଲେ ବି ବିକାଶ କ୍ଷେତ୍ରରେ ସେମାନେ ଆମଠାରୁ ବହୁ ଆଗରେ।  

୧୭ ଜିଲ୍ଲାର ସ୍ଥିତି

୧୯୯୩ ମସିହାରେ ଓଡ଼ିଶାର ନବକଳେବର ହେଲା। ନୂତନ ଭାବେ ୧୭ଟି ଜିଲ୍ଲା ଜନ୍ମ ନେଲା। ମୋଟ ଜିଲ୍ଲା ସଂଖ୍ୟାକୁ ୩୦କୁ ବୃଦ୍ଧି ହେଲା। ୧୭ଟି ଜିଲ୍ଲା ଅନୁଗୁଳ, ବରଗଡ଼, ଦେବଗଡ଼, ଝାରସୁଗୁଡ଼ା, ନୂଆପଡ଼ା, ସୋନପୁର, ବୌଦ୍ଧ, ନୟାଗଡ଼, ଖୋର୍ଦ୍ଧା, ଜଗତସିଂହପୁର, ଯାଜପୁର, କେନ୍ଦ୍ରାପଡ଼ା, ଭଦ୍ରକ, ଗଜପତି, ରାୟଗଡ଼ା, ନବରଂଗପୁର ଓ ମାଲକାନଗିରି  ବୟସ ଏବେ ୩୦ ବର୍ଷ ହୋଇସାରିଛି। ଅର୍ଥାତ ଏହି ଜିଲ୍ଲାଗୁଡ଼ିକ ଯୁବାବସ୍ଥାରେ ପହଞ୍ଚିଛି। ହେଲେ ଯୁବ ପ୍ରତିଭା ଭଳି ନୂତନ ଜିଲ୍ଲାଗୁଡ଼ିକରେ ବିକାଶ ହୋଇପାରିନାହିଁ। ସ୍ବତନ୍ତ୍ର ଜିଲ୍ଲା ଗଠନକୁ ୩୦ ବର୍ଷ ପୂରିଛି। ହେଲେ ଏବେ ଜିଲ୍ଲା କ’ଣ ପାଇଛି ବୋଲି ସାଧାରଣରେ ପ୍ରଶ୍ନ ଉଠିଛି। ଶିକ୍ଷା, ଶିଳ୍ପ, ସ୍ବାସ୍ଥ୍ୟ, କୃଷି, କର୍ମ ନିଯୁକ୍ତିରୁ ଆରମ୍ଭ କରି ଭିତ୍ତିଭୂମି ପର୍ଯ୍ୟନ୍ତ ସବୁ କ୍ଷେତ୍ରରେ ଏବେ ବି ପଛରେ ପଡ଼ିଥିବା କୁହାଯାଉଛି।  

କେମିତି ଚାଲିଛି ଶାସନ ବ୍ୟବସ୍ଥା

ବହୁ ପୁରାତନ ରାଜ୍ୟ ଓଡ଼ିଶାର ବିକାଶ ଯେଉଁଭଳି ହେବା କଥା ତାହା ହୋଇପାରି ନାହିଁ। କେବଳ ଧାନ ଛଡ଼ା ଅନ୍ୟ କୃଷିଜାତ ସାମଗ୍ରୀ ଉତ୍ପାଦନ ନୈରାଶ୍ୟଜନକ କହିଲେ ଭୁଲ ହେବ ନାହିଁ। ଜମି, ଜଙ୍ଗଳ, ଜଳ, ଖଣିରେ ଭରପୁର ଓଡ଼ିଶାର ପ୍ରାକୃତିକ ସମ୍ବଳକୁ ସୁବିନିଯୋଗ କରାଯାଇପାରୁ ନାହିଁ। ଦାଦନ ଏକ ପ୍ରମୁଖ ସମସ୍ୟା ପାଲଟିଛି। ରାଜ୍ୟରେ ରୋଜଗାର ସମ୍ଭାବନା ନଥିବାରୁ ଲକ୍ଷ ଲକ୍ଷ ଓଡ଼ିଆ ବାହାର ରାଜ୍ୟରେ ଦାଦନ ଖଟୁଛନ୍ତି। ସ୍ବାଭିମାନ ଓଡ଼ିଶାକୁ ପଡୋଶୀମାନେ ଖାତିର କରୁ ନାହାନ୍ତି। ଏହାର ଜ୍ବଳନ୍ତ ଉଦହାରଣ ହେଉଛି କୋଟିଆ ଓ ମହାନଦୀ ପ୍ରସଙ୍ଗ। ରାଜ୍ୟରେ ଆଇନଶୃଙ୍ଖଳା ବ୍ୟବସ୍ଥା ବିପର୍ଯ୍ୟସ୍ତ ହୋଇପଡ଼ିଛି। ଦିନ ଦ୍ବିପ୍ରହରରେ ମନ୍ତ୍ରୀଙ୍କୁ ପୁଲିସ କର୍ମୀ ଗୁଳି କରୁଛନ୍ତି। ହତ୍ୟା ଅଭିଯୁକ୍ତଙ୍କ ମୃତହେଦ ଜେଲରୁ ଉଦ୍ଧାର ହେଉଛି। ମହିଳା ସୁରକ୍ଷିତ ନୁହଁନ୍ତି। ଚୋରି, ଡକାୟତି, ରାହାଜନୀ ବଢ଼ିଚାଲିଛି। ପରବର୍ତ୍ତୀ ୧୩ ବର୍ଷରେ ଓଡ଼ିଶା ହୀରକ ଜୟନ୍ତୀ ପାଳନ କରିବ। କିନ୍ତୁ ସମୃଦ୍ଧ ଓ ସଶକ୍ତ ସ୍ବପ୍ନ ହୋଇ ରହିଯିବ ବୋଲି ଆଶଙ୍କା କରାଯାଉଛି।

ଓଡ଼ିଶାକୁ ଶୁଭେଚ୍ଛା

ରାଷ୍ଟ୍ରପତି ଦ୍ରୌପଦୀ ମୁର୍ମୁ ଓଡ଼ିଶା ଦିବସ ଅବସରରେ ମୁଁ ପ୍ରିୟ ଦେଶବାସୀଙ୍କୁ ବିଶେଷକରି ଓଡିଶାବାସୀଙ୍କୁ ହାର୍ଦିକ ଅଭିନନ୍ଦନ ଜଣାଉଛି। ପ୍ରଚୁର ପ୍ରାକୃତିକ ସମ୍ପଦ ଏବଂ ଦକ୍ଷ ଓ କର୍ମଠ ଲୋକଶକ୍ତି ଆଧାରରେ ଓଡ଼ିଶା ,ଆମ  ଅର୍ଥବ୍ୟବସ୍ଥାର ଗ୍ରୋଥ୍ ଇଞ୍ଜିନ ହେବାର ସାମର୍ଥ୍ୟ ବହନ କରେ। ମୁଁ ଓଡ଼ିଶାର ଭାଇ ଓ ଭଉଣୀ ମାନଙ୍କ ଉଜ୍ଜ୍ବଳ ଭବିଷ୍ୟତ କାମନା କରୁଛି ବୋଲି କହିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଭାଷାରେ ଏହି ଦିନ ଆମ ଦେଶର ପ୍ରଗତିରେ ଓଡ଼ିଶା, ଓଡିଆ ଜନସାଧାରଣ ଏବଂ ସଂସ୍କୃତିର ସମୃଦ୍ଧ ଅବଦାନକୁ ଜାଣିବାର ଅବସର । ଓଡ଼ିଶାବାସୀଙ୍କ ଉତ୍ତମ ସ୍ୱାସ୍ଥ୍ୟ ଏବଂ ସମୃଦ୍ଧି କାମନା କରୁଛି । ଓଡ଼ିଶା ଦିବସ ଅବସରରେ ସମସ୍ତଙ୍କୁ ଆନ୍ତରିକ ଶୁଭେଚ୍ଛା ଓ ଅଭିନନ୍ଦନ। ସ୍ୱତନ୍ତ୍ର ଓଡ଼ିଶା ପ୍ରଦେଶ ଗଠନର ବରେଣ୍ୟ ସାଧକମାନଙ୍କୁ ଏହି ଅବସରରେ ମୋର ସମ୍ମାନ ଜଣାଉଛି। ଆସନ୍ତୁ ଓଡ଼ିଆ ଜାତିର ଅସ୍ମିତା ଓ ସ୍ଵାଭିମାନକୁ ବଜାୟ ରଖି ଏକ ନୂଆ ଓଡ଼ିଶା, ଉଚ୍ଚାକାଂକ୍ଷୀ ଓଡ଼ିଶା ଗଠନ ଦିଗରେ ସଙ୍କଳ୍ପବଦ୍ଧ ହୋଇ ଆଗକୁ ବଢିବା।

ମେଟ୍ରୋ ପ୍ରକଳ୍ପ

ଉତ୍କଳ ଦିବସରେ ରାଜ୍ୟ ସରକାର ଭୁବନେଶ୍ବର, କଟକ, ଖୋର୍ଦ୍ଧା ଓ ପୁରୀ ସହରବାସୀଙ୍କୁ ମେଟ୍ରୋ ଟ୍ରେନ୍ ସ୍ବପ୍ନ ଦେଖାଇଛନ୍ତି। ଏହି ସ୍ବପ୍ନ ଆଜିର ନୁହେଁ। ୨୦୧୯ ସାଧାରଣ ନିର୍ବାଚନ ପୂର୍ବରୁ ମଧ୍ୟ ମେଟ୍ରୋ ରେଲ ସଂପର୍କରେ ରାଜ୍ୟ ସରକାର ଭାଷଣବାଜୀ କରିଥିଲେ। ଭୁବନେଶ୍ବର-କଟକ-ପୁରୀ-ଖୋନର୍ଦ୍ଧାକୁ ମେଟ୍ରୋ ଟ୍ରେନ୍ ସଂଯୋଗ କରିବ। ମେଟ୍ରୋ ଟ୍ରେନ ଗଡ଼ିବା ପାଇଁ ସୁବିଧା ଅଛି କି ନାହିଁ, କେଉଁଠୁ କେଉଁଠିକି ମେଟ୍ରୋ ଟ୍ରେନ ଗଡିବ, ସେଥିପାଇଁ କ’ଣ କ’ଣ ଆବଶ୍ୟକ ତାହା ନେଇ ପୁଙ୍ଖାନୁପୁଙ୍ଖ ଆଲୋଚନା ହୋଇଛି। ମୁଖ୍ୟ ଶାସନ ସଚିବ ପ୍ରଦୀପ ଜେନା, ୫-ଟି ସଚିବ ଭି. କାର୍ତ୍ତିକେୟନ ପାଣ୍ଡିଆନ୍, ଉନ୍ନୟନ କମିଶନର ଅନୁ ଗର୍ଗ, ପରିବହନ ସଚିବ ଉଷା ପାଢ଼ୀ, ଗୃହ ଓ ନଗର ଉନ୍ନୟନ ବିଭାଗର ସଚିବ ଜି ମାଥିଭାଥାନନ୍, ଆଇଟି ପ୍ରମୁଖ ସଚିବ ମନୋଜ ମିଶ୍ର ଓ ପୁଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ ଆଲୋଚନା କରିଛନ୍ତି। ଅନ୍ୟପଟରେ ଭୁବନେଶ୍ବରରେ ମେଟ୍ରୋ ରେଳ ସପକ୍ଷରେ କେନ୍ଦ୍ର ସରକାର ନଥିଲା ବେଳେ ରାଜ୍ୟ ସରକାର କେମିତି ଏହା ପୂରା କରିପାରିବେ ଦେଖିବାକୁ ରହିଲା।

RELATED ARTICLES

LEAVE A REPLY

Please enter your comment!
Please enter your name here

Most Popular

Recent Comments