ଉପବାସରେ ଥିଲେ ବି ସର୍ବଧର୍ମ ପ୍ରାର୍ଥନାରେ ସାମିଲ ରହୁଥିଲେ ଗାନ୍ଧିଜୀ

0
447

ନୂଆଦିଲ୍ଲୀ: ଆଜି ଶହିଦ ଦିବସ । ଆଜି ଭଳି ଦିନ (ଜାନୁଆରୀ ୩୦)ରେ ମହାତ୍ମା ଗାନ୍ଧୀଙ୍କ ତିରୋଧାନ ହୋଇଥିଲା । ପ୍ରାର୍ଥନା ସଭା ଚାଲିଥିଲା ବେଳେ ନାଥୁରାମ ଗଡସେଙ୍କ ବନ୍ଧୁକର ଗୁଳିରେ ଶହିଦ ହୋଇଯାଇଥିଲେ ବାପୁଜୀ । ଉପସ୍ଥିତ ଜନତାଙ୍କ ମୁହଁରୁ ପାଟି ଫିଟୁ ନଥିଲା । ଘଟଣାସ୍ଥଳ ସ୍ତବ୍ଧ ପାଲଟିଯାଇଥିଲା । ଯେଉଁ ମହାନ ପୁରୁଷଙ୍କ ଉଦ୍ୟମ ଯୋଗୁଁ ଦେଶ ସ୍ୱାଧୀନ ହେଲା, ସେହି ଦେଶ ଉପଯୁକ୍ତ ସମ୍ମାନ ଦେବା ବଦଳରେ ଗୁଳି ଚୋଟ ଦେଲା ।

ବିଶ୍ୱକୁ ପ୍ରେରଣା ଦେଲେ ଗାନ୍ଧିଜୀ

ଗାନ୍ଧୀ ଆଜି ଯଦି ବଂଚି ନାହାନ୍ତି, କିନ୍ତୁ ତାଙ୍କର ଆଦର୍ଶ, ବାଣୀ ଶହ ଶହ ବର୍ଷ ପାଇଁ ଆଗାମୀ ପିଢ଼ିର ଲୋକଙ୍କୁ ପ୍ରେରଣା ଯୋଗାଇବ । ସତ୍ୟ, ଅହିଂସା ଓ ନ୍ୟାୟର ପୂଜାରୀ ଥିଲେ ଜାତିର ପିତା ମହାତ୍ମା ଗାନ୍ଧୀ । ନିଜର ଦୃଢ଼ ମନୋବଳ ଯୋଗୁଁ ସେ ଦେଶକୁ ବିଦେଶୀ ଶାସକମାନଙ୍କ ଠାରୁ ସ୍ୱାଧୀନ କରିପାରିଥିଲେ । ଗାନ୍ଧିଜୀଙ୍କ ବିଚକ୍ଷଣ ବୁଦ୍ଧ ଆଗରେ ବ୍ରିଟିଶ ଶାସକମାନେ ପରାଜିତ ହୋଇ ଶେଷରେ ସ୍ୱଦେଶ ଫେରିଯାଇଥିଲେ । ଗାନ୍ଧିଜୀଙ୍କୁ ସୁଚିନ୍ତା ଲାଗି ସେ ଆଜି ସମଗ୍ର ବିଶ୍ୱ ପାଇଁ ଆଦର୍ଶ ଓ ପ୍ରେରଣା ପାଲଟିଛନ୍ତି । ସାରା ବିଶ୍ୱରେ ଗାନ୍ଧୀଙ୍କ ଚିନ୍ତାଧାରାକୁ ଗ୍ରହଣ କରାଯାଉଛି । ନିଜ ଅଧିକାର ପାଇବା ପାଇଁ ଗାନ୍ଧିଜୀ ଶାନ୍ତିପୂର୍ଣ୍ଣ ଭାବେ ଆନ୍ଦୋଳନ କରିବାକୁ ପସନ୍ଦ କରୁଥିଲେ । ତାହା ଅସହଯୋଗ ଆନ୍ଦୋଳନ ହେଉ ଅଥବା ଆଇନ୍ ଅମାନ୍ୟ ଆନ୍ଦୋଳନ ହେଉ । ସେହିଭଳି ଭାରତ ଛାଡ଼ ଆନ୍ଦୋଳନ ଥିଲା ଗାନ୍ଧିଜୀଙ୍କ ଅନ୍ୟତମ ବଡ଼ ଅସ୍ତ୍ର ।

ଉପବାସ ଲାଗି ଦୁର୍ବଳ ହୋଇଯାଇଥିଲେ ଗାନ୍ଧିଜୀ

ଆନ୍ଦୋଳନ ବ୍ୟତୀତ ଅନଶନକୁ ମଧ୍ୟ ଗାନ୍ଧିଜୀ ଖୁବ ଗୁରୁତ୍ୱ ଦେଉଥିଲେ । ଅନେକ ସମୟରେ ସେ ଆମରଣ ଅନଶନ ମଧ୍ୟ କରିଥିଲେ । ସ୍ୱାଧୀନତା ଆନ୍ଦୋଳନ ସମୟରେ ସେ ବହୁ ଥର ଉପବାସ ମଧ୍ୟ ରହିଥିଲେ । ଗାନ୍ଧିଜୀ ଶେଷ ଥର ପାଇଁ ୧୯୪୮ ମସିହା ଜାନୁଆରୀ ୧୩ରୁ ୧୮ ତାରିଖ ମଧ୍ୟରେ ଉପବାସ କରିଥିଲେ । ଏହି ଉପବାସ ସମୟରେ ଗାନ୍ଧିଜୀ ଦୁର୍ବଳ ହୋଇଯାଇଥିଲେ । କିନ୍ତୁ ଏହା ସତ୍ତ୍ୱେ ବି ସର୍ବଧର୍ମ ପ୍ରାର୍ଥନା ସଭାରେ ସକ୍ରିୟ ଭାବେ ଉପସ୍ଥିତ ରହୁଥିଲେ । ବର୍ଷ ୧୯୪୮ ମସିହା ଜାନୁଆରୀ ୨୯ ତାରିଖରେ ହୋଇଥିବା ପ୍ରାର୍ଥନା ସଭାରେ ଏମ୍‌ଏସ୍ ସୁବୁଲକ୍ଷ୍ମୀ ଭଜନ ଶୁଣାଇଥିଲେ । ସେଦିନ ସୁନ୍ଦରଲାଲ ବହୁଗୁଣା ମଧ୍ୟ ଦିଲ୍ଲୀରେ ଉପସ୍ଥିତ ଥିଲେ । ଗାନ୍ଧିଜୀ ଶହିଦ ହେବା ପରେ ଜାନୁଆରୀ ୩୧ ତାରିଖରେ ତାଙ୍କର ଶବଯାତ୍ରା ତିସ ଜାନୁଆରୀ ମାର୍ଗରେ ଯାଇଥିଲା । ସେଦିନ ହଜାର ହଜାର ଲୋକଙ୍କ ଆଖିରୁ ଲୁହ ବାହାରି ପଡୁଥିଲା ।

କାନ୍ଦି ପକାଇଥିଲେ କିଙ୍ଗସଲେ ଓ ଲୁଥର

ଗାନ୍ଧିଜୀଙ୍କ ଦ୍ୱାରା ପ୍ରେରିତ ହୋଇ ପରବର୍ତ୍ତୀ ସମୟରେ ତିସ ଜାନୁଆରୀ ମାର୍ଗକୁ ଆସିଥିବା ଲୋକେ ମଧ୍ୟ କାନ୍ଦିପକାଉଥିଲେ । ‘ଗାନ୍ଧୀ’ ଫିଲ୍ମରେ ଗାନ୍ଧୀ ବେନ୍ କିଙ୍ଗସଲେ ପ୍ରଥମ ଥର ୧୯୮୦ ମସିହାରେ ଯେତେବେଳେ ଗାନ୍ଧୀ ସ୍ମୃତିସ୍ଥଳକୁ ପହଂଚିଥିଲେ, ନିଜର ଲୁହକୁ ଅଟକାଇ ପାରିନଥିଲେ । କାରଣ ସେହିଠାରେ ହିଁ ବାପୁଜୀଙ୍କୁ ଗୁଳି କରାଯାଇଥିଲା । ଏକଦା ମେରିଡିୟନ ହୋଟେଲରେ ଖଦି କୁର୍ତ୍ତା-ପାଇଜାମା ପିନ୍ଧି କିଙ୍ଗସଲେ କହିଥିଲେ ଯେ, ସେ ଜାଣି ପାରି ନଥିଲେ ଯେ, ତାଙ୍କ ଆଖିରୁ ଲୁହ କାହିଁକି ବାହାରି ପଡ଼ିଥିଲା । ସେ ଅଟକାଉ ନଥିଲେ । ଆମେରିକାରେ କୃଷ୍ଣକାୟଙ୍କ ଅଧିକାର ପାଇଁ ଲଢ଼େଇ ଜାରି ରଖିଥିବା ମାର୍ଟିନ ଲୁଥର କିଙ୍ଗଙ୍କର ମଧ୍ୟ ସମାନ ଦଶା ହୋଇଥିଲା । ମାର୍ଟିନ ଲୁଥର କିଙ୍ଗ ୧୯୫୯ ମସିହାରେ ନିଜର ପତ୍ନୀଙ୍କ ସହି ରାଜଘାଟ ଓ ଗାନ୍ଧୀ ସ୍ମୃତିସ୍ଥଳକୁ ପହଂଚିଥିଲେ । ଗାନ୍ଧିଜୀଙ୍କ ପ୍ରତିମୂର୍ତ୍ତୀ ଦେଖି ନିଜର ଲୁହକୁ ସେ ଅଟକାଇ ପାରିନଥିଲେ । ମାର୍ଟିନ ଲୁଥର କିଙ୍ଗ କହୁଥିଲେ ଗାନ୍ଧିଜୀ ମୋର ପଥପ୍ରଦର୍ଶକ ।

Share the article

LEAVE A REPLY