କେନ୍ଦ୍ର ନିକଟରେ ଓଡ଼ିଶାର ଏମ୍‌ଏସ୍‌ପି ଦର ବୃଦ୍ଧି ଦାବି

0
164

ଭୁବନେଶ୍ୱର: ଚଳିତ ମାସ ୯ ତାରିଖରେ କେନ୍ଦ୍ର ସରକାର ଧାନ ପାଇଁ କୁଇଣ୍ଟାଲ ପିଛା ସର୍ବନିମ୍ନ ମୂଲ୍ୟ ବୃଦ୍ଧି କରିଛନ୍ତି । କେନ୍ଦ୍ର ସରକାର ଦ୍ୱାରା ଘୋଷଣା ହୋଇଥିବା ଏମ୍‌ଏସ୍‌ପିରେ ଓଡ଼ିଶା ସରକାର ସନ୍ତୁଷ୍ଟ ନାହାନ୍ତି । ରାଜ୍ୟ ସରକାର ଧାନର ସର୍ବନିମ୍ନ ସହାୟକ ମୂଲ୍ୟ (ଏମ୍‌ଏସ୍‌ପି) ବୃଦ୍ଧି କରିବା ପାଇଁ କେନ୍ଦ୍ର ନିକଟରେ ଦାବି କରିଛନ୍ତି । ଏନେଇ ସାମ୍ବାଦିକ ସମ୍ମିଳନୀରେ କୃଷିମନ୍ତ୍ରୀ ଅରୁଣ ସାହୁ କହିଛନ୍ତି ଯେ, କେନ୍ଦ୍ର ଧାନ ପାଇଁ କୁଇଣ୍ଟାଲ ପିଛା ୨୯୩୦ ଟଙ୍କା ବୃଦ୍ଧି କରୁ ।

ସୂଚନାଯୋଗ୍ୟ, କେନ୍ଦ୍ର ସରକାର ସାଧାରଣ ଧାନ ପାଇଁ ସହାୟକ ମୂଲ୍ୟ କୁଇଣ୍ଟାଲ ପିଛା ୧୮୬୮ ଟଙ୍କାରୁ ୧୯୪୦ ଟଙ୍କାକୁ ବଢ଼ାଇଛନ୍ତି । ଗ୍ରେଡ-ଏ ଧାନ ପାଇଁ ଏମ୍‌ଏସ୍‌ପି ମୂଲ୍ୟ ୧୯୬୦ ଟଙ୍କା ବଢ଼ିଛି । ଓଡ଼ିଶା ସରକାର କହିଛନ୍ତି ଯେ, କେନ୍ଦ୍ର ଦ୍ୱାରା ବଢ଼ାଯାଇଥିବା ଏମ୍‌ଏସ୍‌ପି ଦର ରାଜ୍ୟର ଚାଷୀମାନଙ୍କୁ ସହାୟତା କରିବ ନାହିଁ । ତେଣୁ କେନ୍ଦ୍ର ଚାଷୀଙ୍କ ଆୟ ବୃଦ୍ଧି ଉପରେ ନଜର ଦେବା ଦରକାର । ଯଦି ଧାନ କୁଇଣ୍ଟାଲ ପିଛା ୨୯୩୦ ଟଙ୍କା କରାଯିବ, ତା’ହେଲେ ଚାଷୀମାନେ ୨୫ ପ୍ରତିଶତ ଲାଭ ପାଇପାରିବେ । ରାଜ୍ୟର ଚାଷୀମାନେ ବର୍ଷର ବିଭିନ୍ନ ସମୟରେ ପ୍ରାକୃତିକ ବିପର୍ଯ୍ୟର ସମ୍ମୁଖୀନ ହେଉଛନ୍ତି ।

ଖରିଫ ଚାଷ ଉପରେ ଅଧିକ ନିର୍ଭରଶୀଳ

ଓଡ଼ିଶା ଏକ କୃଷି ପ୍ରଧାନ ରାଜ୍ୟ । ଏଠାରେ ଧାନ ହେଉଛି ମୁଖ୍ୟ ଫସଲ । ଏତଦ ବ୍ୟତୀତ ରାଜ୍ୟର କିଛି ସ୍ଥାନରେ ମକା, ବାଜରା, ମାଣ୍ଡିଆ, ଡାଲିଜାତୀୟ ଫସଲ, ତୈଳ ଜାତୀୟ ଫସଲ ମଧ୍ୟ ଉତ୍ପାଦିତ ହୋଇଥାଏ । ଚିନାବାଦାମ, କପା, ଆଳୁ, ପିଆଜ, ଅଦା, ହଳଦୀ ଓ ପନିପରିବା ଚାଷ ମଧ୍ୟ ହେଉଛି । ରାଜ୍ୟରେ ୨ଟି ପର୍ଯ୍ୟାୟରେ ଚାଷ ହୋଇଥାଏ । ଜଳସେଚନର ସୁବିଧା କମ ଥିବାରୁ ରାଜ୍ୟର ଚାଷୀମାନେ ରବି ଋତୁରେ ଅଧିକ ଧାନ ଫସଲ କରୁଥିବା ବେଳେ ପାଣିର ବ୍ୟବସ୍ଥା ଥିବା ସ୍ଥାନରେ ରବି ଫସଲ ହେଉଛି ।

୪୪. ୫୫ ଲକ୍ଷ ହେକ୍ଟର ଜମିରେ ଧାନ ଚାଷ

ରାଜ୍ୟରେ ୬୧.୮୦ ଲକ୍ଷ ହେକ୍ଟରରେ ଚାଷ ହେଉଛି । ଏଥିରୁ ୨୯.୧୪ ଲକ୍ଷ ହେକ୍ଟର ଜମି ଉଚ୍ଚରେ ରହୁଛି । ୧୭.୫୫ ଲକ୍ଷ ହେକ୍ଟର ଜମି ମଧ୍ୟମ ଓ ୧୫.୧୧ ଲକ୍ଷ ହେକ୍ଟର ଜମି ନିମ୍ନ ସ୍ତରରେ ରହିଛି । ରାଜ୍ୟର ୪୧.୨୪ ଲକ୍ଷ ହେକ୍ଟର ଜମିରେ ଖରିଫ ଚାଷ ହେଉଥିବା ବେଳେ ମାତ୍ର ୩.୩୧ ଲକ୍ଷ ହେକ୍ଟର ଜମିରେ ରବି ଧାନ ଚାଷ ହେଉଛି ।

ଧାନ ଚାଷ ପ୍ରମୁଖ ବିକଳ୍ପ

ଓଡ଼ିଶାର ଚାଷୀମାନଙ୍କ ପାଇଁ ଧାନ ଚାଷ ହେଉଛି ମୁଖ୍ୟ ଫସଲ । ରାଜ୍ୟର କ୍ଷୁଦ୍ର ଚାଷୀ, ମଧ୍ୟମ ଚାଷୀ ଓ ବଡ଼ ଚାଷୀ ଅତି କମରେ ଧାନ ଚାଷ କରିଥାନ୍ତି । ଯେଉଁମାନଙ୍କର ନିଜସ୍ୱ ଜମି ନାହିଁ, ସେମାନେ ଭାଗଚାଷ କରି ଧାନ ଉପାର୍ଜନ କରିଥାନ୍ତି । ସବୁଠାରୁ ବଡ଼ କଥା ହେଲା ଯେ, ରାଜ୍ୟରେ ଜଳସେଚନର ଅଭାବ ଯୋଗୁଁ ମୋଟ ଚାଷର ଅଧିକ ଜମିରେ ରବି ଫସଲ ହୋଇପାରୁ ନାହିଁ । ଖରିଫ ଋତୁରେ ଚାଷୀମାନେ ଅଧିକ ଧାନ ଚାଷ କରିଥାନ୍ତି । ଜଳସେନର ସୁବିଧା ହୋଇପାରିଲେ ଡାଲି ଓ ତୈଳଜାତୀୟ ଫସଲ ମଧ୍ୟ ହୋଇପାରନ୍ତା । ଅନ୍ୟପଟରେ ବର୍ଷା ମଧ୍ୟ ଚାଷୀମାନଙ୍କର ପ୍ରବଳ କ୍ଷତି କରିଥାଏ । ପଶ୍ଚିମାଂଚଳରେ ବର୍ଷାଭାବ ଯୋଗୁଁ ଅନେକ ସମୟରେ ମରୁଡ଼ି ଯୋଗୁଁ ଚାଷୀମାନେ କ୍ଷତି ସହିଥାନ୍ତି । ଅନୁରୁପ ଭାବରେ ଉପକୂଳବର୍ତ୍ତୀ ଅଂଚଳରେ ବନ୍ୟା ଯୋଗୁଁ ଧାନ ଫସଲ ବ୍ୟାପକ ନଷ୍ଟ ହୋଇଥାଏ ।

Share the article

LEAVE A REPLY