ହଦଳୀ-ପତ୍ରରେ ଭରପୁର ଔଷଧୀୟ ଗୁଣ

0
111

ଭୁବନେଶ୍ୱର: ଖାଦ୍ୟର ବର୍ଣ୍ଣ ବୃଦ୍ଧି କରିବାରେ ‘ହଳଦୀ’ର ଯେତିକି ଭୂମିକା ରହିଛି, ତା’ଠାରୁ ସ୍ୱାସ୍ଥ୍ୟ ପାଇଁ ଅଧିକ ହିତକାରକ। କେବଳ ଖାଦ୍ୟ ଓ ରୋଗ ବ୍ୟତୀତ ହଳଦୀ ମନୁଷ୍ୟ ସଭ୍ୟତାର ସାଂସ୍କୃତିକ, ସାମାଜିକ ଓ ଆଥିର୍କ କ୍ଷେତ୍ରରେ ଗୁରୁତ୍ୱପୂର୍ଣ୍ଣ ଭୂମିକା ତୁଲାଉଛି। ହଜାର ହଜାର ବର୍ଷ ପୂର୍ବରୁ ହଳଦୀର ବ୍ୟବହାର ହୋଇ ଆସୁଛି। ଜନଜାତି ସଂପ୍ରଦାୟର ଲୋକେ ହଳଦୀ ଚାଷକୁ ପାରଂପରିକ ଭାବେ କରିଆସୁଛନ୍ତି। ଭାରତରେ ଯେତିକି ପରିମାଣରେ ହଦଳୀ ଚାଷ ହୋଇଥାଏ, ଏଥିରୁ ଓଡ଼ିଶାର ଯୋଗଦାନ ୨୧ ପ୍ରତିଶତ। ଓଡ଼ିଶାରେ ୨୪ ହଜାର ୭୩୩ ହେକ୍ଟର ଜମିରୁ ୫୯,୩୬୧ ଟନ୍‌ ହଳଦୀ ଉତ୍ପାଦିତ ହେଉଛି। ଏଥିରୁ ୧୧,୦୮୮ ହେକ୍ଟର ଜମିରୁ ପାଖାପାଖି ୫୦ ପ୍ରତିଶତ (୨୮,୮୨୮ ଟନ୍‌) କେବଳ କନ୍ଧମାଳ ଜିଲ୍ଲାରେ ହିଁ ଉତ୍ପାଦିତ ହେଉଛି। ଓଡ଼ିଶାର କନ୍ଧମାଳ ଜିଲ୍ଲାରେ ଏହି ହଳଦୀ ଚାଷ ଅଧିକ ହୋଇଥାଏ। କନ୍ଧମାଳର ହଳଦୀ ସାରା ଭାରତରେ ପ୍ରସିଦ୍ଧିଲାଭ କରିଛି।

କନ୍ଧମାଳ ଜିଲ୍ଲାର ଅନୁସୂଚିତ ଜନଜାତି ‘କନ୍ଧ’ ସଂପ୍ରଦାୟର ଲୋକେ ହଳଦୀ ଚାଷ ସହିତ ଅଧିକ ଜଡ଼ିତ। କନ୍ଧମାଳରେ ଯଦିଓ ରାଜ୍ୟର ସର୍ବାଧିକ ହଳଦୀ ଚାଷ ହେଉଛି, ଏହାର ପଛକୁ ରହିଛି କେରାପୁଟ ଜିଲ୍ଲା (୩୧୬୧ ହେକ୍ଟରରୁ ୭୭୬୧ ଟନ୍‌)। କନ୍ଧମାଳ ଜିଲ୍ଲାରେ ହଦଳୀ ଚାଷ ସହିତ ପ୍ରାୟ ୬୦,୦୦୦ ଚାଷୀଙ୍କ ଜୀବନ ପରୋକ୍ଷ ଓ ପ୍ରତକ୍ଷ୍ୟ ଭାବେ ଜଡ଼ିତ ରହିଛି। ସେହିପରି ହଳଦୀ ବ୍ୟବସାୟ ଲୋକଙ୍କର ଜୀବନଶୈଳୀକୁ ବଦଳାଇ ଦେଇଛି। ଗତବର୍ଷ କରୋନା ପାଇଁ ଯେତବେଳେ କନ୍ଧମାଳ ଜିଲ୍ଲାରେ ଲକ୍‌ଡାଉନ୍‌ ହୋଇଥିଲା, ଉଭୟ ଚାଷୀ ଓ ବ୍ୟବସାୟୀ ବ୍ୟାପକ କ୍ଷୟକ୍ଷତିର ସାମ୍ନା କରିଥିଲେ। କନ୍ଧମାଳ ବ୍ୟତୀତ କେନ୍ଦୁଝର ଜିଲ୍ଲା(୨୪୭୩ ହେକ୍ଟରରୁ ୫୩୪୩ ଟନ୍‌) ଓ ନୟାଗଡ଼ ଜିଲ୍ଲା (୧୨୨୪ ହେକ୍ଟରରୁ ୨୯୩୭ ଟନ୍‌)ରେ ମଧ୍ୟ ହଳଦୀ ଚାଷ କରାଯାଉଛି।  

କନ୍ଧମାଳ ହଳଦୀକୁ ଜିଆଇ ଟ୍ୟାଗ୍‌

କନ୍ଧମାଳର ହଳଦୀକୁ ଭୌଗଳିକ ଉତ୍ପତ୍ତି ବା ଜିଆଇ ମାନ୍ୟତା ମିଳିଛି। ଆଦିବାସୀ ଅଞ୍ଚଳରେ ଉତ୍ପାଦିତ ହେଉଥିବା ଏହି ହଳଦୀ ଜିଆଇ ରେଜିଷ୍ଟ୍ରେି କାର୍ଯ୍ୟାଳୟରୁ ସାର୍ଟିଫିକେଟ୍‌ ମିଳିଛି। କନ୍ଧମାଳ ଆପେକ୍ସ ସ୍ପେସିଜ୍‌ ଆସୋସିଏସନ୍‌ ଫର ମାର୍କେଟିଂ ବା କସମ୍‌ ପକ୍ଷରୁ ସେଣ୍ଟ୍ରାଲ ଟୁଲ ରୁମ୍‌ ଏଣ୍ଡ ଟ୍ରେନିଂ ସେଣ୍ଟର ବା ସିଟିଟିସି(ଆଇପିଏଫ୍‌ସି) ୨୦୧୮ରେ ଏଥିପାଇଁ ଆବେଦନ କରାଯାଇଥିଲା। ୨୦୧୯ ଏପ୍ରିଲ ୧ତାରିଖରେି ଜିଆଇ ମାନ୍ୟତା ମିଳିଥିବା ବେଳେ ଏହାର ସାର୍ଟିଫିକେଟ୍‌ ନଂ ରହିଛି ୩୪୪। କନ୍ଧମାଳ ହଳଦୀ ରାଜ୍ୟ ତଥା ଦେଶରେ ଉପଯୁକ୍ତ ମାର୍କେଟିଂ ହୋଇପାରିଛି। ଏହି ଜିଆଇ ମାନ୍ୟତା ଆସନ୍ତା ୨୦୨୮ ମସିହା ପର୍ଯ୍ୟନ୍ତ ବଜାୟ ରହିବ। ହଳଦୀ ଖରାପ ପରିବେଶରେ ମଧ୍ୟ ଭଲ ଉତ୍ପାଦନ ହେଉଥିବାରୁ ଏହାକୁ ଚାଷ କରୁଥିବା ଚାଷୀ କମ୍‌ କ୍ଷତିଗ୍ରସ୍ତ ହୋଇଥାଏ, ଯାହାକି କ୍ଷୁଦ୍ର ବା ନାମମାତ୍ର ଚାଷୀଙ୍କ ପାଇଁ ଏହା ସୁହାଇଥାଏ।

ହଳଦୀରେ ଔଷଧୀୟ ଗୁଣ

ହଳଦୀରେ ପ୍ରଚୁର ପରିମାଣରେ ଓଷଧୀୟ ଗୁଣ ରହିଛି। କ୍ୟାସର ଓ ହୃଦୟରୋଗକୁ ହଦଳୀ ଭଲ କରିବାରେ ବଡ଼ ଭୂମିକା ତୁଲାଇଥାଏ। ଚଳିତ ଶତାଦ୍ଦୀର ସବୁଠାରୁ ବଡ଼ ରୋଗ ‘କୋଭିଡ-୧୯’ କାଳରେ ହଳଦୀକୁ ରୋଗୀମାନେ ପ୍ରବଳ ବ୍ୟବହାର କରିଥିଲେ। ଲୋକେ ହଳଦୀକୁ କ୍ଷୀର ସହିତ ହଳଦୀ ପକାଇ ରାତିରେ ଶୋଇବା ପୂର୍ବରୁ ପିଉଥିଲେ। ହଳଦୀ ଦେଖିବାକୁ ସୁନାଭଳି ହଳଦିଆ ହଳଦୀରେ କୁରକୁମିନ୍‌, ଓଲେରେସିନ୍‌ ଓ ଭୋଲାଟାଇଲ ତେଲ ଭରି ରହିଛି। କନ୍ଧମାଳର ହଳଦୀ ଔଷଧୀୟ ବ୍ୟବହାରଠାରୁ ଆରମ୍ଭ କରି ପ୍ରସାଧାନ ସାମଗ୍ରୀ ପାଇଁ ରାଜ୍ୟରେ ଘରେ ଘରେ ପରିଚିତ ହୋଇପାରିଛି।  

ହଳଦୀ ପତ୍ରର ଚାହିଦା

ତେବେ ଅନେକ ସମୟରେ ହଳଦୀ ଚାଷୀ ନିଜ ଉତ୍ପାଦିତ ହଳଦୀର ଉପଯୁକ୍ତ ମୂଲ୍ୟ ପାଇପାରୁନାହାନ୍ତି ବୋଲି ଅଭିଯୋଗ ହୋଇଥାଏ। କିନ୍ତୁ ହଳଦୀରୁ ଉପଯୁକ୍ତ ଲାଭ ମିଳି ନ ପାରୁଥିବା ବେଳେ ଦିନକୁ ଦିନ ହଳଦୀ ପତ୍ରର ଚାହିଦା ବଢ଼ିବାରେ ଲାଗିଛି। ପ୍ରଥମାଷ୍ଟମୀ ଆସିଲେ ହଳଦୀ ପତ୍ର ଦରକାର ପଡ଼ିଥାଏ। ଏହାର ପ୍ରାୟ ଏକ ସପ୍ତାହ ପୂର୍ବରୁ ଚାଷୀମାନେ ହଦଳୀ ପତ୍ର ବିକ୍ରି କରିଥାନ୍ତି। କନ୍ଧମାଳରୁ ହଳଦୀ ପତ୍ର ଆଜିକାଲି କଟକ, ପୁରୀ, ଖୋର୍ଦ୍ଧା, ଯାଜପୁର, କେନ୍ଦ୍ରାପଡା, ଜଗତସିଂହପୁର, ଓ ଭୁବନେଶ୍ୱର ଯାଉଛି। ଉପକୂଳ ଜିଲ୍ଲାରେ ହଳଦୀ ପତ୍ରର ଚାହିଦା ଢେର ଥିବା ଯୋଗୁଁ କନ୍ଧମାଳ ଜିଲ୍ଲାର ହଳଦୀ ପତ୍ର ଚାହିଦା ମେଣ୍ଟାଉଛି। ହଳଦୀ ପତ୍ର ବ୍ୟବହାର କରି ପିଠା ପ୍ରସ୍ତୁତ କରି ପୂଜା କରାଯିବା ସହ ଖିଆଯାଏ। ହଳଦୀ ପତ୍ରର ଔଷଧୀୟ ଗୁଣ ଯୋଗୁଁ ଏହାକୁ ବ୍ୟବହାର କରାଯାଇଥାଏ।

Share the article

LEAVE A REPLY