ବିଚିତ୍ର ଶିକ୍ଷା ବ୍ୟବସ୍ଥା, ୯୩% ରେଜଲ୍ଟରେ ବି ମିଳୁନି ସିଟ୍‌

0
93

ଭୁବନେଶ୍ୱର: ଆମ ଦେଶର ଶିକ୍ଷା ବ୍ୟବସ୍ଥା ବିଚିତ୍ର । ଅଦ୍ଭୁତ ଶିକ୍ଷା ବ୍ୟବସ୍ଥା ଯୋଗୁଁ ବିଦ୍ୟାର୍ଥୀଙ୍କ କ୍ୟାରିୟର ଓ ଜୀବନ ପ୍ରତି ବାଧା ସୃଷ୍ଟି ହେଉଛି । ଅନେକଙ୍କୁ ଶତପ୍ରତିଶନ ନମ୍ବର ରଖିଥିଲେ ବି କଲେଜରେ ନାମ ଲେଖାଇବା ପାଇଁ ଅନୁମତି ମିଳି ନଥାଏ । ଅପରପକ୍ଷେ ୫୦ ପ୍ରତିଶତ ନମ୍ବର ରଖିଥିବା ଛାତ୍ରଛାତ୍ରୀଙ୍କୁ ପାଠ ପଢ଼ିବାରେ ସୁଯୋଗ ମିଳିଥାଏ । କେବଳ ପାଠପଢ଼ା କ୍ଷେତ୍ରରେ ନୁହେଁ । ବରଂ ଚାକିରି କ୍ଷେତ୍ରରେ ମଧ୍ୟ ସମାନ ଅବସ୍ଥା । ଏଥି ପାଇଁ ହେଉଛି ସଂରକ୍ଷଣ ବ୍ୟବସ୍ଥା । ଦେଶରେ ସଂରକ୍ଷଣ ବ୍ୟବସ୍ଥା ଯୋଗୁଁ ଲକ୍ଷ ଲକ୍ଷ ଛାତ୍ରଛାତ୍ରୀଙ୍କ ଭବିଷ୍ୟତ ଅନ୍ଧକାର ଭିତରକୁ ଠେଲି ହୋଇଯାଉଛି । ସ୍ୱଦେଶର କଲେଜରେ ପାଠ ପଢ଼ିବା ପାଇଁ ସୁଯୋଗ ନ ମିଳିଲେ ବିଦେଶରେ ଯିବାକୁ ପଡୁଛି । ସେଠାରେ ଅସୁବିଧାର ସମ୍ମୁଖୀନ ହେବାକୁ ମଧ୍ୟ ପଡୁଛି । ଦରକାର ପଡିଲେ ଜୀବନ ହରାଇବାକୁ ହେଉଛି । ଯେପରିକି କର୍ଣ୍ଣାଟକର ଛାତ୍ର ୟୁକ୍ରେନ୍‌ରେ ରୁଷିଆ ଆକ୍ରମଣରେ ପ୍ରାଣ ହାରିଛନ୍ତି ।

ଭାରତ ସରକାର ପ୍ରତିଟି କ୍ଷେତ୍ରରେ ଅନୁସୂଚିତ ଜାତି, ଅନୁସୂଚିତ ଜନଜାତି, ପଛୁଆ ବର୍ଗ, ମହିଳା ଓ ଦିବ୍ୟାଙ୍କମାନଙ୍କ ପାଇଁ ପାଠପଢ଼ା ଠାରୁ ଆରମ୍ଭ କରି ଚାକିରି କ୍ଷେତ୍ରରେ ସଂରକ୍ଷଣ ବ୍ୟବସ୍ଥା କରିଛନ୍ତି । ଏହା ଠିକ୍ କଥା । କିନ୍ତୁ ଏହାର ମଧ୍ୟ ସୀମା ରହିବା ଉଚିତ । ଗୋଟିଏ ମହାବିଦ୍ୟାଳୟର ଜଣେ ଛାତ୍ରକୁ ନାମ ଲେଖାଇବାକୁ ହେଲେ ଅତିକମରେ ୯୦ ପ୍ରତିଶତ ଦରକାର ପଡୁଥିଲେ, ସେଠାରେ ଅନୁସୂଚିତ ଜନଜାତିର ଛାତ୍ର ପାଇଁ ଆବଶ୍ୟକ ହେଉଛି ମାତ୍ର ୫୦ ପ୍ରତିଶତ । ତେଣୁ ଜାତି ସଂରକ୍ଷଣ ନାଁରେ ଏଭଳି ଆକାଶ-ପାତାଳ ପାର୍ଥକ୍ୟକୁ ବୁଦ୍ଧିଜୀବୀ ମହଲରେ ଗ୍ରହଣ ହୋଇପାରୁ ନାହିଁ । କାରଣ ଅବହେଳାର ସାମ୍ନାକରୁଥିବା ପିଲାଙ୍କ ପାଇଁ ବିପଦ ଆସୁଥିବା ଦେଖାଯାଇଛି । ପାଠପଢ଼ା କ୍ଷେତ୍ରରେ ପିଲାଙ୍କ ଦକ୍ଷତାକୁ ମପାଯିବା କଥା । ଯଦି ସଂରକ୍ଷଣ ଦେଉଛନ୍ତି, ଯୋଗ୍ୟ ପିଲାଙ୍କୁ ଚୟନ କରି ସେମାନଙ୍କର ନାମଲେଖା ଫି’ ହ୍ରାସ କଲେ ମଧ୍ୟ ଭଲ ହୋଇପାରନ୍ତା ।

ଯୋଗ୍ୟତାକୁ ଦିଆଯାଉନି ସମ୍ମାନ

ଶିକ୍ଷା ଓ ସ୍ୱାସ୍ଥ୍ୟ କ୍ଷେତ୍ରରେ କାର୍ଯ୍ୟରତ ବ୍ୟକ୍ତିଙ୍କ ଯୋଗ୍ୟତାକୁ ଧ୍ୟାନ ଦିଆଯିବା ଦରକାର । କାରଣ ସଂରକ୍ଷଣ ନାଁରେ ଚାକିରି ପାଉଥିବା ବ୍ୟକ୍ତିମାନଙ୍କର ଦ୍ୱାରା ଆଗାମୀ ପିଢ଼ି ଖୁବ ପ୍ରଭାବିତ ହେଉଛି । ରାଜ୍ୟ ସରକାର ୨୦୦୮ ମସିହାରେ ସଂରକ୍ଷଣ ନାଁରେ ଅନୁସୂଚିତ ଜାତି ଓ ଜନଜାତି ସଂପ୍ରଦାୟର ହଜାର ହଜାର ପିଲାଙ୍କୁ ଶିକ୍ଷକ ଚାକିରିରେ ଭର୍ତ୍ତି କରିଥିଲେ । ଆଜିକାଲି ଭଳି ସେହି ସମୟରେ ପ୍ରବେଶିକା ପରୀକ୍ଷା ଅଥବା ବ୍ୟକ୍ତିର ପ୍ରତିଭାକୁ ଆଧାର କରି ଚାକିରି ଦିଆଯାଇ ନଥିଲା । ରାଜ୍ୟ ସରକାର ସଂରକ୍ଷଣ ନାଁରେ ଆଖି ବନ୍ଦ କରିଦେଇ ମାଟ୍ରିକ ପରୀକ୍ଷାରେ ୩୫ ପ୍ରତିଶତ ନମ୍ବର ରଖିଥିବା ପିଲାଙ୍କୁ ମଧ୍ୟ ଶିକ୍ଷକ ପଦବିରେ ଚାକିରି ଦେଇଥିଲେ । ସେହି ସମୟରେ ଶିକ୍ଷକ ଚାକିରି ଜୀବନ ଆରମ୍ଭ କରିଥିବା ଅନେକ ଠିକ୍ ଭବେ ଉଡାଜାହାଜର ଇଂରାଜୀ ଶବ୍ଦ ଉଚ୍ଚାରଣ ଅଥବା ଲେଖିପରନ୍ତି ନାହିଁ । କିନ୍ତୁ ସେମାନଙ୍କୁ ମୋଟା ଦରମା ମିଳୁଛି । ସେହିପରି ସ୍ୱାସ୍ଥ୍ୟ କ୍ଷେତ୍ରରେ ଯଦି ଦକ୍ଷତାଯୁକ୍ତ କର୍ମଚାରୀ ନରହିବେ, ତା’ହେଲ ରୋଗୀଙ୍କ ଅବସ୍ଥା କ’ଣ ହେବ?

ୟୁକ୍ରେନ୍‌ରେ ଭାରତୀୟ ଛାତ୍ର ମୃତ

କର୍ଣ୍ଣାଟକର ଛାତ୍ର ନବୀନଙ୍କ ମଙ୍ଗଳବାର ରୁଷିଆର ଆକ୍ରମଣରେ ମୃତ୍ୟୁ ହୋଇଛି । ତାଙ୍କୁ ଭାରତୀୟ କଲେଜରେ ସ୍ଥାନ ନମିଳିବାରୁ ମେଡିକାଲ ପାଠ ପଢ଼ିବା ପାଇଁ ୟୁକ୍ରେନ୍ ଯାଇଥିଲେ । ସେ ଖାରକିଭରେ ଏକ ମେଡିକାଲ କଲେଜରେ ପଢୁଥିଲେ । ଗତ ୨୪ ତାରିଖ ଠାରୁ ରୁଷିଆ ଓ ୟୁକ୍ରେନରେ ଯୁଦ୍ଧ ଚାଲିଥିବାରୁ ଲୋକେ ସେଠାରେ ସୁରକ୍ଷିତ ସ୍ଥାନରେ ରହୁଛନ୍ତି । ଭାରତୀୟ ଛାତ୍ର ନବୀନ ମଧ୍ୟ ପ୍ରାଣ ବଞ୍ଚାଇବା ପାଇଁ ଏକ ବଙ୍କରରେ ରହୁଥିଲେ । କିନ୍ତୁ ମଙ୍ଗଳବାର ଦିନ ସକାଳୁ ସେ ଭୋଜନ ଓ ଅତ୍ୟାବଶ୍ୟକ ସାମଗ୍ରୀ ଆଣିବାକୁ ଯାଇଥିବା ବେଳେ ରୁଷିଆର ଗୁଳିମାଡ଼ର ଶିକାର ହୋଇଥିଲେ ।  

ମେଡିକାଲ ଶିକ୍ଷା ଉପରେ ପ୍ରଶ୍ନ

ପୁଅ ନବୀନ ଶେଖରପ୍ପାଙ୍କୁ ହରାଇବା ପରେ ବାପା ଭାରତୀୟ ଶିକ୍ଷା ବ୍ୟବସ୍ଥା ନେଇ ପ୍ରଶ୍ନ ଛିଡ଼ା କରିଛନ୍ତି । ଡାକ୍ତର ହେବା ସ୍ୱପ୍ନ ନେଇ ପୁଅ ଏମବିବିଏସ ପଢ଼ିବା ପାଇଁ ୟୁକ୍ରେନ୍ ଯାଇଥିଲା । ନବୀନଙ୍କ ବାପା କହିଛନ୍ତି ଯେ, ପିୟୁସିରେ ନବୀନଙ୍କୁ ୯୭ ପ୍ରତିଶତ ନମ୍ବର ମିଳିଥିଲା । କିନ୍ତୁ ରାଜ୍ୟରେ ତାଙ୍କ ପୁଅଙ୍କୁ ଏକ ମେଡିାକଲ ସିଟ୍ ମିଳିପାରି ନଥିଲା । ଆହୁରି ମଧ୍ୟ କହିଛନ୍ତି ଯେ, ଭାରତରେ ମେଡିକାଲ ପାଠ ପଢ଼ିବା ପାଇଁ କୋଟି ପରିମାଣରେ ଟଙ୍କା ଖର୍ଚ୍ଚ କରିବାକୁ ପଡୁଛି । କିନ୍ତୁ ବଦେଶରେ ଭାରତର ତୁଳନାରେ କମ୍ ଟଙ୍କାରେ ମେଡିକାଲ ଶିକ୍ଷା ମିଳିପାରୁଛି ।

Share the article

LEAVE A REPLY