ପୁଣି ଇତିହାସ ରଚିଲେ ନୀରଜ ଚୋପ୍ରା

0
22

ଭୁବନେଶ୍ବର: ଭାରତର ଷ୍ଟାର ଆଥଲେଟ୍ ନୀରଜ ଚୋପ୍ରା ବିଶ୍ୱ ଆଥଲେଟିକ୍ ଚାମ୍ପିଅନ୍ଶିପରେ ଇତିହାସ ରଚିଛନ୍ତି। ତାଙ୍କର କ୍ରଡା ଜୀବନ ଇତିହାସରେ ଆଉ ଏକ ପୃଷ୍ଠା ଯୋଡ଼ି ହୋଇଯାଇଛି। ଏହା ପୂର୍ବରୁ ସେ ଗତ ଅଗଷ୍ଟ ୭ ତାରିଖ ଦିନ ଟୋକିଓ ଅଲିମ୍ପିକ୍ସରେ ଜାଭ୍ଲିନ୍ରେ ସ୍ବର୍ଣ୍ଣ ପଦକ ଜିତି ଟ୍ରାକ୍ ଓ ଫିଲ୍ଡ ଇଭେଣ୍ଟରେ ସଫଳତା ହାସଲ କରିବାରେ ଭାରତର ୧୨୫ ବର୍ଷର ସ୍ବପ୍ନକୁ ସାକାର କରିଥିଲେ। ନୀରଜ ଚୋପ୍ରାଙ୍କୁ ଦେଶ ଆଜି ଗର୍ବ କରୁଛି। ନୀରଜ ଚୋପ୍ରା ଦେଶର ସୁନା ପୁଅ ହୋଇଯାଇଛନ୍ତି। ଦେଶ ପାଇଁ ଗୋଟିଏ ପରେ ଗୋଟିଏ ସୁନାମ ଆଣି ପାରୁଛନ୍ତି।

ଆମେରିକାରେ ଅନୁଷ୍ଠିତ ବିଶ୍ୱ ଆଥଲେଟିକ୍ ଚାମ୍ପିଅନ୍ଶିପରେ ନୀରଜ ଚୋପ୍ରା ପୁରୁଷ ଜାଭଲିନ୍ ଫାଇାନଲରେ ୨ୟ ସ୍ଥାନ ଅଧିକାର କରିଛନ୍ତି। ସେ ଚତୁର୍ଥ ଥର ୮୮.୧୪ ମିଟର ଜାଭଲିନ ଫିଙ୍ଗି ରୌପ୍ୟପଦକ ଆଣିଛନ୍ତି। ଏହି ପ୍ରତିଯୋଗିତାରେ ମୋଟ ୩୪ ଜଣ ପ୍ରତିଯୋଗୀ ଅଂଶଗ୍ରହଣ କରିଥିଲେ। ଏମାନଙ୍କୁ ୨ଟି ଭାଗରେ ବିଭକ୍ତ କରାଯାଇଥିଲା। ପ୍ରତ୍ୟେକ ଗ୍ରୁପରୁ ୧୨ ଜଣ ଶ୍ରେଷ୍ଠ ଖେଳାଳିଙ୍କୁ ଫାଇନାଲ ଇଭେଣ୍ଟରେ ଜାଭଲିନ ଫିଙ୍ଗିବାକୁ ସୁଯୋଗ ମିଳିଥିଲା। ପ୍ରତିଯୋଗିତାର ୨ୟ କ୍ରମରେ ରହି ନୀରଜ ଭାରତୀୟଙ୍କ ମୁହଁରେ ହସ ଫୁଟାଇଛନ୍ତି। ସେ ୧୯ ବର୍ଷ ପରେ ଦେଶକୁ ପଦନ ଆଣିଛନ୍ତି।  

ଅଲିମ୍ପିକ୍ସ ସ୍ବର୍ଣ୍ଣ ପଦକ

ନୀରଜ ଚୋପ୍ରା ଭାରତର ୧୨୫ ବର୍ଷର ସ୍ବପ୍ନକୁ ପୂରଣ କରିଥିଲେ। ଅଲିମ୍ପିକ୍ସରେ ଦୌଡ଼କୁଦ ଆୟୋଜନରେ ଭାରତକୁ ଗୋଟିଏ ବି ପଦକଟି ମିଳି ନଥିଲା ବେଳେ ନୀରଜ ଚୋପ୍ରା ଏହି ସ୍ବପ୍ନକୁ ପୂରା କରି କୋଟି କୋଟି ଭାରତୀୟଙ୍କ ହୃଦୟ ଜିତିଥିଲେ। ୧୯୨୦ ମସିହାରେ ଭାରତ ପ୍ରଥମ ଥର ବେଲ୍ଜିୟମରେ ଆୟୋଜିତ ସମର ଅଲିମ୍ପିକ୍ସରେ ଭାଗ ଅଂଶଗ୍ରହଣ କରିଥିଲା। ୫ ଜଣିଆ ଦଳରେ ଟ୍ରାକ୍ ଓ ଫିଲ୍ଡରେ ୩ ଓ କୁସ୍ତିରେ ୨ ଜଣ ଖେଳିଥିଲେ। ଅଲିମ୍ପିକ୍ସରେ ୨୦୨୧ ଅଗଷ୍ଟ ୭ ତାରିଖରେ ଜାଭଲିନ୍ ଥ୍ରୋ ଫାଇନାଲରେ ମୋଟ ୧୨ ଜଣ ଜାଭଲିନ୍ ଫିଙ୍ଗାଳି ଭାଗ ନେଇଥିଲେ। ଭାରତୀୟ ଖେଳାଳି ନୀରଜ ଚୋପ୍ରା ଆରମ୍ଭରୁ ହିଁ ଭଲ ପ୍ରଦର୍ଶନ କରିଥିଲେ ଆଉ ନିଜର ପ୍ରଥମ ପ୍ରୟାସରେ ସେ ୮୭.୦୩ ମିଟର ଫିଙ୍ଗିଥିଲେ। ଏହାପରେ ଦ୍ୱିତୀୟ ପ୍ରୟାସରେ ମଧ୍ୟ ସେ ୮୭.୫୮ ମିଟର ଫିଙ୍ଗିଥିଲେ, ଯାହା ତାଙ୍କୁ ମେଡାଲ ଜିତିବାରେ ବେଶ ସହାୟକ ହୋଇଥିଲା।

ଓଡ଼ିଶାର ହାତ

ଟୋକିଓ ଅଲିମ୍ପିକ୍ସ-୨୦୨୧ ଜାଭେଲିନ୍ ଥ୍ରୋରେ ସ୍ବର୍ଣ୍ଣ ଜିତିଥିବା ନୀରଜ ଚୋପ୍ରାଙ୍କର ସଫଳତା ପଛରେ ବି ଓଡ଼ିଶାର ବି ହାତ ଥିଲା। ଅଲିମ୍ପିକ୍ସ ମଇଦାନକୁ ଓହ୍ଲାଇବା ପୂର୍ବରୁ ନୀରଜ ଦୀର୍ଘ ଦୁଇ ମାସ ଧରି ଭୁବନେଶ୍ବରସ୍ଥିତ କଳିଙ୍ଗ ଷ୍ଟାଡିୟମରେ ରହି ଅଭ୍ୟାସ କରିଥିଲେ। କରୋନା କଟକଣା ପାଇଁ ଯେତେବେଳେ ନୀରଜଙ୍କର ଅଭ୍ୟାସ ବାଧାପ୍ରାପ୍ତ ହୋଇଥିଲା ସେତେବେଳେ ଓଡ଼ିଶା ସରକାର କଳିଙ୍ଗ ଷ୍ଟାଡିୟମରେ ନୀରଜ ଏବଂ ଜାଭେଲିନ୍ ଥ୍ରୋ ଦଳକୁ ଅଭ୍ୟାସ ପାଇଁ ବିଶ୍ବସ୍ତରୀୟ ଭିତ୍ତିଭୂମି ଯୋଗାଇ ଦେଇଥିଲେ। ସେହିଦିନର ସେହି ସହାୟତା ନୀରଜଙ୍କ ଅଲିମ୍ପିକ୍ସରେ ସ୍ବର୍ଣ୍ଣ ପଦକ ଜିତିବାରେ ଏକ ପ୍ରକାର ସହାୟକ ହୋଇଛି କହିଲେ କିଛି ଭୁଲ ହେବନାହିଁ। ସୂଚନାଯୋଗ୍ୟ, ନୀରଜ ଚୋପ୍ରା ଏସିଆନ୍ ଆଥଲେଟିକ୍ସ ଚାମ୍ପିଅନସିପ୍-୨୦୧୭ରେ କଳିଙ୍ଗ ଷ୍ଟାଡିୟମ ଆସିଥିଲେ। ମୁଖ୍ୟମନ୍ତ୍ରୀଙ୍କ ସହ ଫଟୋ ଉଠାଇଥିଲେ ଏବଂ ଟୋକିଓ ଅଲିମ୍ପିକ୍ସ ପୂର୍ବରୁ ଅଭ୍ୟାସ କରିଥିଲେ।

ଆଥଲେଟିକ୍ ରେ ଅଂଜୁ

ଆଥଲେଟିକ୍ ଚମ୍ପିଅନ୍ଶିପରେ ଭାରତକୁ ପ୍ରଥମ ପଦକ ଆଣିଥିଲେ ଅଂଜୁ ବବି ଜର୍ଜ। ୨୦୦୩ ମସିହାରେ  ପ୍ୟାରିସରେ ଅନୁଷ୍ଠିତ ବିଶ୍ବ ଚମ୍ପିଅନ୍ଶିପରେ ଆଥଲେଟ ଅଂଜୁ ବବି ଜର୍ଜ ଲଙ୍ଗ ଜମ୍ପରେ ଭାରତ ପାଇଁ କାଂସ୍ୟ ପଦକ ଆଣିଥିଲେ। ସେ ପ୍ରତିଯୋଗିତାରେ ୬.୭୦ ମିଟର ଡେଇଁଥିଲେ। କେରଳର କୋଟାୟମ ଜିଲ୍ଲା ଚଙ୍ଗାନାସେରିର ଝିଅଙ୍କ ପରେ ଭାରତକୁ ବିଶ୍ୱ ଆଥଲେଟିକ ଚାମ୍ପିଅନଶିପରେ ଆଉ ପଦକ ମିଳି ନଥିଲା। କିନ୍ତୁ ନୀରଜ ଚୋପ୍ରା ପୁଣି ଥରେ ଇତିହାସ ରଚିବା ସହିତ ଆଗାମୀ ଯୁବପିଢ଼ିଙ୍କ ପାଇଁ ଉଦାହରଣ ସାଜିବା ସହିତ ନୂଆ ଆଶା ସଂଚାର କରିଛନ୍ତି। ସୂଚନାଯୋଗ୍ୟ, ବିଶ୍ବ ଆଥଲେଟିକ୍ ଚାମ୍ପିଅନଶିପ ପ୍ରଥମ ଥର ୧୯୮୩ ମସିହାରେ ଆୟୋଜିତ ହୋଇଥିଲା ଏବଂ ସେହିଦିନ ଠାରୁ ଭାରତ ସ୍ୱର୍ଣ୍ଣପଦକ ପାଇଁ ଆଶା ରଖିଛି।

Share the article

LEAVE A REPLY