ସ୍ବାଧୀନତାର ସ୍ବପ୍ନ କେବେ ହେବ ସାର୍ଥକ?

0
34

ଭୁବନେଶ୍ବର: ଭାରତ ସ୍ବାଧୀନତା ପ୍ରାପ୍ତିର ୭୫ ବର୍ଷ ପୂରିଛି। ଆମେ ୭୬ତମ ସ୍ବାଧୀନତା ଦିବସ ପାଳନ କରିଛେ। ଏହି ୭୬ ବର୍ଷ କାଳ ଏକ ସାଧାରଣ କଥା ନୁହେଁ। ଏତିକି ସମୟରେ ଗୋଟିଏ ପରିବାରର ପ୍ରାୟ ୩ଟି ପିଢ଼ି ଅତିକ୍ରମ କରିଥାଏ। ଯଦି କୌଣସି ପରିବାରର ୩ଟି ପିଢ଼ିକୁ ଭଲଭାବରେ ଦେଖାଯିବ, ତା’ହେଲେ  ବହୁ ପରିବର୍ତ୍ତନ ଆସିଯାଇଥାଏ। ପ୍ରସଙ୍ଗକ୍ରମେ ଆମେ ଯେତେବେଳେ ରାଜ୍ୟ ଅଥବା ଦେଶର ଚିନ୍ତା କରିବା ତା’ହେଲେ ପରିବର୍ତ୍ତନ କାହିଁକି ହେବ ନାହିଁ।

୭୫ ବର୍ଷ ମଧ୍ୟରେ ଭାରତର ବହୁବିଧ ପରିବର୍ତ୍ତନ ହୋଇଛି। ବିକାଶର ସୀମା ଟପିଛି। ଯେଉଁ ଇଂରେଜମାନେ ଆମକୁ ଶାସନ କରୁଥିଲେ, ସେମାନେ ଆଜି ଭାରତୀୟଙ୍କୁ ସମ୍ମାନ ଦେଉଛନ୍ତି। ଇଂଲଣ୍ଡରେ ଭାରତୀୟମାନେ ବହୁତ ବଡ଼ ବଡ଼ ପଦବିରେ ବସିଛନ୍ତି। ଭାରତରେ ଜନ୍ମିତ ପ୍ରତିଭାମାନେ ଇଂଲଣ୍ଡର ପ୍ରଶାସକ ହୋଇଛନ୍ତି। କେବଳ ଇଂଲଣ୍ଡ ନୁହେଁ, ସମୃଦ୍ଧିଶୀଳ ଆମେରିକା ସମେତ ଅନ୍ୟ ଦେଶଗୁଡ଼ିକରେ ମଧ୍ୟ ଭାରତର ଯଥେଷ୍ଟ ସମ୍ମାନ ରହିଛି। ରୁଷିଆ, ଜାପାନ, କାନାଡା, ଦକ୍ଷିଣ ଆଫ୍ରିକା ଭଳି ଉନ୍ନତ ରାଷ୍ଟ୍ରମାନେ ଭାରତକୁ ସମ୍ମାନ ଜଣାଉଛନ୍ତି।

ବିଦେଶରେ ଭାରତର ପ୍ରଶଂସା

ଶିକ୍ଷା, ସ୍ବାସ୍ଥ୍ୟ, ଗମାନଗମନ, ଯୋଗାଯୋଗ, ସୂଚନା ପ୍ରଯୁକ୍ତିବିଦ୍ୟା, ପ୍ରତିରକ୍ଷା, ପ୍ରତିଟି କ୍ଷେତ୍ରରେ ଭାରତ ବିକାଶର ଶିଖରରେ ପହଞ୍ଚିଛି। ବିଶ୍ବର ବିକାଶରେ ଭାରତର ବୃହତ ଅବଦାନ ମଧ୍ୟ ରହୁଛି, ଯେଉଁଥି ପାଇଁ ବିଦେଶରେ ଭାରତର ଗାରିମା ରହିଛି। ତେବେ ସାମାଗ୍ରୀକ ଦୃଷ୍ଟି କୋଣରୁ ଯଦି ବିଦେଶୀ ରାଷ୍ଟ୍ର ସାମ୍ନାରେ ଭାରତ ଉନ୍ନତ ତେବେ ଆଞ୍ଚଳିକ ଦୃଷ୍ଟି କୋଣରୁ ଦେଖିବାକୁ ଗଲେ ସତ ବୋଲି ଲାଗି ନଥାଏ। ଧରନ୍ତୁ କୃଷି କ୍ଷେତ୍ରରେ ପଂଜାବ ଯେତିକି ବିକଶିତ ଓଡ଼ିଶା ବହୁତ ଗୁଣରେ ପଛରେ। ଶିଳ୍ପ ପାଇଁ ଓଡ଼ିଶା ତୁଳନାରେ ତାମିଲନାଡୁ ବହୁ ଆଗରେ। ହରିୟାଣାରେ ଯେଭଳି ଭାବେ ଦୁଗ୍ଧଜାତ ଦ୍ରବ୍ୟ ଉତ୍ପାଦନ ହେଉଛି, ତାହା ଓଡ଼ିଶାରେ ନାହିଁ। ଓଡ଼ିଶାରେ ଯଦିଓ ଖଣି ଓ ଖଣିଜ ସଂପଦ ପୂରି ରହିଛି, ତଥାପି ବିହାର ତୁଳନାରେ କମ। ଯଦି ଆମେ ଗୋଟିଏ ରାଜ୍ୟର ଚାହିଦା ଅନୁସାରେ ଜିନିଷ ପୂରା କରିବା ତାହେଲେ ସାମଗ୍ରିକ ବିକାଶ ହୋଇପାରିବ।

ସମାନ୍ତରାଳ ବିକାଶ ନାହିଁ

ଓଡ଼ିଶା ପରିପ୍ରେକ୍ଷିରେ କହିବାକୁ ଗଲେ ଏହା ଦେଶର ଅନ୍ୟତମ ଗରିବ ରାଜ୍ୟ ଭାବେ ଜଣାଶୁଣା। କେବଳ ଓଡ଼ିଶା ନୁହେଁ, ବରଂ ପଶ୍ଚିମବଙ୍ଗ, ଝାଡ଼ଖଣ୍ଡ, ବିହାର, ଛତିଶଗଡ଼, ମଧ୍ୟପ୍ରଦେଶ ଓ ଉତ୍ତର ପ୍ରଦେଶରେ ମଧ୍ୟ ଦେଶର ଅନ୍ୟ ରାଜ୍ୟ ତୁଳନାରେ ଗରିବୀ ସଂଖ୍ୟା ଅଧିକ। ଏହି ରାଜ୍ୟଗୁଡ଼ିକରେ ମୁଣ୍ଡପିଛା ଆୟ ବହୁତ କମ। ପଂଜାବ, ହରିୟାଣା, ତାମିଲନାଡୁ, ଆନ୍ଧ୍ରପ୍ରଦେଶ, କେରଳ, ତେଲେଙ୍ଗାନାରେ କୃଷି ଓ ଶିଳ୍ପର ସମସ୍ୟା ନଥିବାରୁ ଲୋକଙ୍କର ମୁଣ୍ଡପିଛା ଆୟ ଅଧିକ। କିନ୍ତୁ ଓଡ଼ିଶା କଥା ଯଦି କହିବା ତା’ହେଲେ ଆମେ ବହୁ ସଂକଟ ଦେଇ ଗତି କରୁଛେ। ଓଡ଼ିଶା ଏକ କୃଷି ପ୍ରଧାନ ରାଜ୍ୟ ହୋଇଥିଲେ ବି ମୋଟ ଜମିକୁ ପାଣିର ବ୍ୟବସ୍ଥା ନାହିଁ। ରାଜ୍ୟବାସୀ ବର୍ଷା ଜଳ ଉପରେ ନିର୍ଭରଶୀଳ।

୨୦୪୭ରେ ସ୍ୱପ୍ନ ସାକାର

ସ୍ୱାଧୀନତା ଦିବସ ଅବସରରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଦେଶବାସୀଙ୍କୁ ସମ୍ବୋଧିତ କରି କହିଛନ୍ତି ଯେ, ୨୦୪୭ ସୁଦ୍ଧା ଆମେ ଆମର ସ୍ୱାଧୀନତା ସଂଗ୍ରାମୀଙ୍କ ସ୍ୱପ୍ନକୁ ସମ୍ପୂର୍ଣ୍ଣ ରୂପେ ସାକାର କରିବୁ। ଅଗଷ୍ଟ ୧୫, ୧୯୪୭ରେ ଆମେ ଉପନିବେଶ ଶାସନର ଶିକୁଳି କାଟି ଦେଇଥିଲୁ। ସେହି ଶୁଭ ଦିନର ବାର୍ଷିକୀ ପାଳନ କରୁଥିବାବେଳେ ମୁଁ ସମସ୍ତ ସ୍ୱାଧୀନତା ସଂଗ୍ରାମୀଙ୍କୁ ସମ୍ମାନର ସହ ପ୍ରଣାମ ଜଣାଉଛି। ସେମାନେ ନିଜର ସବୁକିଛି ବଳିଦାନ ଦେଇଛନ୍ତି, ଯାହା ଦ୍ୱାରା ଆମେ ସମସ୍ତେ ଏକ ମୁକ୍ତ ଭାରତରେ ନିଶ୍ୱାସ ନେଇପାରିବା। ସେ କହିଛନ୍ତି ଯେ ଅଧିକାଂଶ ଗଣତାନ୍ତ୍ରିକ ଦେଶରେ ଭୋଟ୍ ଦେବାର ଅଧିକାର ପାଇବା ପାଇଁ ମହିଳାମାନଙ୍କୁ ଦୀର୍ଘ ସମୟ ଧରି ସଂଘର୍ଷ କରିବାକୁ ପଡୁଥିଲା, କିନ୍ତୁ ଆମ ଗଣତନ୍ତ୍ରର ଆରମ୍ଭରୁ ଭାରତ ସର୍ବଭାରତୀୟ ବୟସ୍କ ମତଦାନ ଗ୍ରହଣ କରିଥିଲା।  

Share the article

LEAVE A REPLY