ମନ୍ଥର ଗତିରେ ସଜେଇ ହେଉଛି ରାଜ୍ୟର ପର୍ଯ୍ୟଟନସ୍ଥଳୀ

0
28

ଭୁବନେଶ୍ବର: ମଣିଷ ଅବସର ସମୟରେ ବୁଲିବାକୁ ଭଲ ପାଏ। ଏହି ବୁଲିବା ପାଇଁ ଭଲ ସ୍ଥାନ ଖୋଜେ, ଯେଉଁଠି କିଛି ଜିନିଷ ଦେଖିଲା ପରେ ନିଜକୁ ସାମାନ୍ୟ ଚିନ୍ତା ମୁକ୍ତ କରିପାରିବ। ମନରେ ହାଲୁକା ଚିନ୍ତା ଦୂର ହେବ। ଆରାମ ଲାଗିବ ଓ ଅନେକ କଥା ଜାଣିବ। ଏହି ସବୁ ପାଇବାକୁ ହେଲେ ପର୍ଯ୍ୟଟନ ସ୍ଥଳୀ ବୁଲିବା ଜରୁରୀ। କିନ୍ତୁ ପର୍ଯ୍ୟଟନ ସ୍ଥଳୀଗୁଡ଼ିକ ସେହିଭଳି ହୋଇଥିବା ଦରକାର। ବିଦେଶରେ ଓ ବିକଶତି ଦେଶଗୁଡ଼ିକରେ ଲୋକେ ପର୍ଯ୍ୟଟନ ସ୍ଥଳୀ ବୁଲିବାକୁ ଭଲ ପାଆନ୍ତି। ଏଥି ପାଇଁ ବିକଶିତ ଦେଶଗୁଡ଼ିକରେ ପର୍ଯ୍ୟଟନ ଭିତ୍ତିଭୂମିକୁ ସେହି ହିସାବରେ ସଜଡ଼ା ଯାଇଥାଏ।

ଆମେ ଦେଶର କଥା ଯଦି କହିବା, ଦକ୍ଷିଣ ଭାରତୀୟ ରାଜ୍ୟ, ଗୁଜରାଟ, ମଧ୍ୟପ୍ରଦେଶ, ଉତ୍ତର ଭାରତୀୟ ରାଜ୍ୟଗୁଡ଼ିକରେ ପର୍ଯ୍ୟଟନ କ୍ଷେତ୍ରକୁ ବହୁତ ଗୁରୁତ୍ବ ଦିଆଯାଇଥାଏ। କାରଣ ପର୍ଯ୍ୟଟନ ସ୍ଥଳୀକୁ ଆକର୍ଷଣୀୟ ଭାବେ ନିର୍ମାଣ କରିବା ଦ୍ବାରା ପ୍ରତିବର୍ଷ ଲକ୍ଷ ଲକ୍ଷ ଲୋକ ଆସିବାର ସମ୍ଭାବନା ଥାଏ। ଏହା ଦ୍ବାରା ସ୍ଥାନୀୟ ଲୋକଙ୍କର ରୋଜଗାର ବଢ଼ିଥାଏ। ସ୍ଥାନୀୟ ଲୋକ ଭଲ ଦି‘ ପଇସା ରୋଜଗାର କରିପାରନ୍ତି। ଓଡ଼ିଶାର ପର୍ଯ୍ୟଟନ ଭିତ୍ତି ବିକାଶ ମାମଲାରେ ବହୁତ ପଛୁଆ ପରିଲକ୍ଷିତ ହୋଇଥାଏ। ପୁରୀ ଶ୍ରୀମନ୍ଦିର, ଶ୍ରୀଲିଙ୍ଗରାଜ, ତାରାତାରିଣୀ ଭଳି କିଛି ସ୍ଥାନକୁ ଛାଡ଼ି ଦେଲେ ଅନ୍ୟ ସ୍ଥାନରେ ଆଖିଦୃଶିଆ ଉନ୍ନତି ହେଲା ଭଳି ମନେ ହୁଏ ନାହିଁ।

ମାଟିରେ ମିଶୁଛି ମଠ-ଧର୍ମଶାଳା

ଓଡ଼ିଶା ପର୍ଯ୍ୟଟନ କ୍ଷେତ୍ରର ପ୍ରାଣକେନ୍ଦ୍ର ହେଉଛି ଶ୍ରୀକ୍ଷେତ୍ର ପୁରୀ। ଏଠାରେ ଗତ ୩ ବର୍ଷ ହେଲା ଶ୍ରୀମନ୍ଦିରକୁ ସୁସଜ୍ଜିତ କରାଯାଇପାରିଛି। ପର୍ଯ୍ୟଟକଙ୍କୁ ଆକର୍ଷିତ କରିବା ପାଇଁ କୋଟି କୋଟି ଟଙ୍କା ଖର୍ଚ୍ଚ କରାଯାଇ ଭିତ୍ତିଭୂମିକୁ ଗଢ଼ା ଯାଇଛି। ଏବେବି ଶ୍ରୀମନ୍ଦିର ପରିକ୍ରମା ପକଳ୍ପ କାମ ଜାରି ରହିଛି। କିନ୍ତୁ କ୍ଷୋଭର ବିଷୟ ହେଲା ଯେ, ପୁରୀର ଅନ୍ୟତମ ପରିଚୟ ସୃଷ୍ଟି କରିଥିବା କିଛି ମନ୍ଦିର, ମଠ ଓ ତୀର୍ଥ ପୁଷ୍କରିଣୀ ବିନାଶ ହୋଇଛି। ଏକଦା ଏଠାରେ ୭ଶହ ମଠ ଥିଲା ବେଳେ ଏବେ ଏହା ୧୫୦ରେ ପହଂଚିଛି। ଉନ୍ନୟନ ମୂଳକ କାମ ଦେଖାଇ ପ୍ରଶାସନ ମଠ ଉପରେ ବୁଲ୍ଡୋଜର ଚଢ଼ାଯାଇଛି, ଯେଉଁଥି ପାଇଁ ସାଂସ୍କୃତିକ ପର୍ଯ୍ୟଟନ ସ୍ମୃତି ଗର୍ଭରେ ବିଲୀନ ହୋଇଯାଇଛି। ପ୍ରାଚୀନ ଧର୍ମଶାଳା ସମାଧି ନେଇଛି। ପାଠାଗାର ସଂସ୍କୃତି ହଜିଗଲାଣି।  

ସମଲେଶ୍ବରୀ ମନ୍ଦିର ସୌନ୍ଦର୍ଯ୍ୟୀକରଣ

ପଶ୍ଚିମ ଓଡ଼ିଶାର ଶିକ୍ଷା, ବାଣିଜ୍ୟ, ସ୍ବାସ୍ଥ୍ୟର ପ୍ରାଣ କେନ୍ଦ୍ର ହେଉଛି ସମ୍ବଲପୁର। ଏଠାରେ ମା’ ସମଲେଶ୍ବରୀଙ୍କୁ ବାଦ୍ ଦେଇ କୌଣସି ପରିକଳ୍ପନା କରିହେବ ନାହିଁ। ସାଂସ୍କୃତିକ ପ୍ରାଣ କେନ୍ଦ୍ର ‘ମା ସମଲେଶ୍ବରୀଙ୍କ ମନ୍ଦିର ଓ ଏହାର ପାରିପାର୍ଶ୍ବିକ ପରିବେଶର ବିକାଶ ପାଇଁ ରାଜ୍ୟ ସରକାର ୨୦୨୧-୨୨ ଆର୍ଥିକ ବର୍ଷରେ ୨୦୦ କୋଟି ଟଙ୍କା ଖର୍ଚ୍ଚ କରିବାର ଲକ୍ଷ୍ୟ ରଖିଛନ୍ତି। ମାତ୍ର କ୍ଷୋଭର ବିଷୟ ହେଲା ଯେ, ଏଠାରେ ନିର୍ମାଣ କାମ ଯେଉଁଭଳି ଭାବେ ମନ୍ଥର ଗତିରେ ଚାଲିଛି, ପୂରା ହେବାକୁ ବହୁ ବର୍ଷ ଲାଗିପାରେ। ସରକାରଙ୍କ ଯୋଜନା ଅନୁାସାରେ ସମଲେଶ୍ବରୀଙ୍କ ପୀଠ ତଥା ଆଖପାଖର ୧୦୮ ଏକର ଜମିରେ ବିକାଶ କରାଯିବ। ଏହି ଯୋଜନାରେ ମାଙ୍କ ମନ୍ଦିରର ସୌନ୍ଦର୍ଯ୍ୟକରଣ, ସ୍ଥାନୀୟ ଲୋକଙ୍କ ଆର୍ଥିକ ବିକାଶ ତଥା ପର୍ଯ୍ୟଟକ ଓ ଭକ୍ତ ମାନଙ୍କ ପାଇଁ ଏକ ଅନନ୍ୟ ଅନୁଭୂତି ହେବା ଉଦ୍ଦେଶ୍ୟରେ ଏହି ପ୍ରକଳ୍ପ କାର୍ଯ୍ୟ କରିବ। ସମଲେଇ ଯୋଜନା ମୁତାବକ ମାଙ୍କ ମନ୍ଦିର ଅଞ୍ଚଳ ୧୨ ଏକର ଜମି ଉପରେ ପ୍ରତିଷ୍ଠିତ । ଏଠାରୁ ଆସୁଥିବା ଭକ୍ତମାନେ ଯେଭଳି ସୁବିଧାରେ ମାଙ୍କର ଦର୍ଶନ କରିପାରିବେ, ସେଥିପାଇଁ ଧାଡି ପରିଚାଳନା ବ୍ୟବସ୍ଥା, ବିଭିନ୍ନ ଧାର୍ମିକ ଉତ୍ସବ ଅନୁଷ୍ଠାନ ପାଇଁ ସ୍ଥାନ ସହିତ ଭୋଗମଣ୍ଡପ ଓ ପୂଜୀରୀଙ୍କ ବିଶ୍ରାମଗୃହ ନିର୍ମାଣ କରାଯିବ ।

ଉଦଘାଟନ ପୂର୍ବରୁ ଭୂତକୋଠି

ସେପ୍ଟେମ୍ବର ୨୭ ତାରିଖରେ ପ୍ରତିବର୍ଷ ବିଶ୍ବ ପର୍ଯ୍ୟଟନ ଦିବସ ପାଳିତ ହେଉଛି। ରାଜ୍ୟ ସରକାର ଏହି ଦିନ ଆସିଲେ ବଡ଼ ଯୋଜନା କରନ୍ତି। ମାତ୍ର ସରକାରୀ ବାବୁମାନଙ୍କର ଆନ୍ତରିକତାର ଅଭାବ କାରଣରୁ ରାଜ୍ୟର ଅନେକଗୁଡ଼ି ପର୍ଯ୍ୟଟନସ୍ଥଳୀ ନିର୍ମାଣ କାମ ଶେଷ ହୋଇସାରିଥିଲେ ବି ତାହା ଲୋକଙ୍କ କାମକୁ ଆସିପାରୁ ନାହିଁ। ଏହାର ଜ୍ବଳନ୍ତ ଉଦାହରଣ ହେଉଛି, ଗଂଜାମ ଜିଲ୍ଲା ଗୋପାଳପୁରଠାରେ ନିର୍ମିତ ଇକୋ ରିଟ୍ରିଟ୍ ହବ୍। ୯ କୋଟି ଟଙ୍କାର ଏହି ପ୍ରକଳ୍ପ କାମ ଶେଷ ହୋଇଛି। ମାତ୍ର, ବର୍ତ୍ତମାନ ସୁଦ୍ଧା କାର୍ଯ୍ୟକାରୀ ହୋଇପାରି ନାହିଁ। ଏମିତକି, ଉଦ୍ଘାଟନ ହେବାପୂର୍ବରୁ ଏହା ଭୂତକୋଠିରେ ପରିଣତ ହେବାକୁ ବସିଲାଣି।

ପଛରେ ପଡ଼ିଛି ଆଦିବାସୀ କ୍ଷେତ୍ରର ପର୍ଯ୍ୟଟନ

ଆଦିବାସୀ ଅଧ୍ୟୁଷିତ ଅଞ୍ଚଳରେ ପର୍ଯ୍ୟଟନ ସ୍ଥଳୀଗୁଡ଼ିକ ଅଧିକ ଅବହେଳିତ ହୋଇଥାଏ। ମୟୂରଭଂଜ, ସୁନ୍ଦରଗଡ଼, କୋରାପୁଟ, କଳାହାଣ୍ଡି, ଗଜପତି ଆଦି ଜିଲ୍ଲାରେ ପ୍ରକୃତିର ଗନ୍ତାଘର ରହିଛି। ଏହି ଜିଲ୍ଲାରେ ଥିବା ପର୍ଯ୍ୟଟନ କ୍ଷେତ୍ରରେ ନିବେଶ କଲେ ଆକର୍ଷଣୀୟ ହୋଇପାରନ୍ତା। ମାତ୍ର ସରକାର ଓ ପ୍ରଶାସନର ଆନ୍ତରିକତାର ଅଭାବ କାରଣରୁ ଆଦିବାସୀ ଅଧ୍ୟୁଷିତ ଅଂଚଳରେ ପର୍ଯ୍ୟଟନ କ୍ଷେତ୍ରର ବକାଶ ହୋଇପାରୁ ନାହିଁ। ମୟୂରଭଞ୍ଜ ଜିଲ୍ଲାରେ ଶିମିଳିପାଳ ଜାତୀୟ ଉଦ୍ୟାନର ଭିତ୍ତିଭୂମିର ବିକାଶ ହୋଇ ପାରୁନଥିବାରୁ ଦିନକୁ ଦିନ ପର୍ଯ୍ୟଟକଙ୍କ ସଂଖ୍ୟା କମିବାରେ ଲାଗିଛି।

Share the article

LEAVE A REPLY