ନୂଆଦିଲ୍ଲୀ: ବିଶ୍ବର ଅଧିକାଂଶ ଦେଶରେ ସଂରକ୍ଷଣ ବ୍ୟବସ୍ଥା ରହିଛି। ଅନୁସୂଚିତ ଜାତି, ଅନୁସୂଚିତ ଜନଜାତି, ପଛୁଆ ବର୍ଗ, ସଂଖ୍ୟାଲଘୁ, ଦିବ୍ୟାଙ୍ଗ, ପ୍ରତିଭାବାନ ଖେଳାଳି, ସହିଦ ଯବାନଙ୍କ ସନ୍ତାନଙ୍କୁ ଅନେକ ଦେଶରେ ସଂରକ୍ଷଣ ବର୍ଗରେ ସାମିଲ କରିଥାନ୍ତି। ମାତ୍ର ଚାକିରିରେ ସଂରକ୍ଷଣ ନିୟମ ସମାଜର କିଛି ଲୋକଙ୍କୁ ଲାଭ ପହଞ୍ଚାଉଥିବା ଅଧିକ କ୍ଷତି ପହଞ୍ଚାଉଛି। ସଂରକ୍ଷଣ ବ୍ୟବସ୍ଥା ରହିବା ଠିକ୍ କଥା। କିନ୍ତୁ ଏଥିରେ ସର୍ତ୍ତ ରହିବା ମଧ୍ୟ ଜରୁରୀ। ସଂରକ୍ଷଣ ବ୍ୟବସ୍ଥାକୁ ଦୀର୍ଘକାଳୀନ ଲାଗୁ କରାଯିବା ଦ୍ବାରା ଅନେକ ଯୋଗ୍ୟ ପ୍ରାର୍ଥୀଙ୍କ ଜୀବନ ବିପଦଆଡ଼କୁ ଠେଲି ହୋଇଯାଉଛି। ଆନ୍ଦୋଳନ ଯୋଗୁଁ ବାଂଲାଦେଶରେ ବସ୍, ଟ୍ରେନ୍ ଓ ମେଟ୍ରୋ ସେବା ସ୍ଥଗିତ ରଖାଯାଇଛି। ହିଂସା ନିୟନ୍ତ୍ରଣ ପାଇଁ ସରକାର ମୋବାଇଲ ଇଣ୍ଟରନେଟ ସେବା ସ୍ଥଗିତ ରଖିଛନ୍ତି। ସ୍କୁଲ, କଲେଜ ସହିତ ମଦ୍ରାସା ମଧ୍ୟ ଅନିଶ୍ଚିତକାଳ ପାଇଁ ବନ୍ଦ କରିଛନ୍ତି। ପୂରା ଦେଶରେ ସେନାକୁ ରାଜରାସ୍ତାରେ ମୁତୟନ କରାଯାଇଛି।
ଜାତି ଆଧାରରେ ସଂରକ୍ଷଣ ବ୍ୟବସ୍ଥାରୁ ଲାଭ ଉଠାଉଥିବା ପରିବାର ବିଳାସମୟ ଜୀବନ ଜିଉଁଛନ୍ତି। ଅନ୍ୟପଟରେ ଅନେକ ପ୍ରତିଭାଶାଳୀ ବ୍ୟକ୍ତିଙ୍କୁ ଜୀବନସାରା ସଂଘର୍ଷ କରିବାକୁ ପଡୁଛି। ଭାରତ ସମେତ ଅନେକ ରାଷ୍ଟ୍ରରେ ସଂରକ୍ଷଣ ବ୍ୟବସ୍ଥା ରହିଛି। ଭାରତୀୟ ସଂରକ୍ଷଣ ବ୍ୟବସ୍ଥାରେ ଅନୁସୂଚୀତ ଜନତାତିର ପ୍ରାର୍ଥୀ ପ୍ରତିଯୋଗିତାମୂଳକ ପରୀକ୍ଷାରେ ୯ ପ୍ରତିଶତ ନମ୍ବର ଆଣି ସରକାରୀ ଚାକିରି କରୁଥିବା ବେଳେ ସାଧାରଣ ବର୍ଗର ପ୍ରାର୍ଥୀ ୮୦ ପ୍ରତିଶନ ନମ୍ବର ଥାଇ ମଧ୍ୟ ବେକାରୀ ହେବାକୁ ପଡୁଛି। ବିକଶିତ ରାଷ୍ଟ୍ରରେ ସଂରକ୍ଷଣ ଉଚ୍ଛେଦ ଅଥବା ଏଥିରେ ସଂଶୋଧନ କରାଯିବା ଉଚିତ।
ବାଂଲାଦେଶରେ କର୍ଫ୍ୟୁ
ଚାକିରିରେ ସଂରକ୍ଷଣ ବ୍ୟବସ୍ଥା ଉଚ୍ଛେଦ ନେଇ ବାଂଲାଦେଶରେ କିଛିଦିନ ହେଲା ଛାତ୍ରମାନେ ଆନ୍ଦୋଳନ ଜାରି ରଖିଛନ୍ତି। ବିରୋଧ ପ୍ରଦର୍ଶନ ଯୋଗୁଁ ଏପର୍ଯ୍ୟନ୍ତ ଶତାଧିକ ପ୍ରଦର୍ଶନକାରୀଙ୍କ ମୃତ୍ୟୁ ସାରି ଥିବା ବେଳେ ୨୫୦୦ରୁ ଊର୍ଦ୍ଧ୍ବ ଆହତ ଅଛନ୍ତି। ଅନ୍ୟପଟରେ ପ୍ରଦର୍ଶନ ଉଗ୍ରରୂପ ନେଇଥିବାରୁ ଶେଖ ହାସୀନଙ୍କ ନେତୃତ୍ବରେ ପରିଚାଳିତ ସରକାର ଆଇନ-ବ୍ୟବସ୍ଥାର ଚିନ୍ତାଜନକ ସ୍ଥିତିରେ ପହଞ୍ଚିଲା ପରେ ସ୍ଥିତି ନିୟନ୍ତ୍ରଣ ପାଇଁ ଦେଶବ୍ୟାପୀ କର୍ଫ୍ୟୁ ଜାରି କରିଛି।
ବାଂଲାଦେଶରେ ଭାରତୀୟ ସୁରକ୍ଷିତ
ବାଂଲାଦେଶରେ ପ୍ରଦର୍ଶନ ଯୋଗୁଁ ଭାରତ ମଧ୍ୟ ପ୍ରଭାବିତ ହୋଇଛି। ପଡ଼ୋଶୀ ରାଷ୍ଟ୍ର ହୋଇଥିବାରୁ ହଜାର ହଜାର ଭାରତୀୟମାନେ ବାଂଲାଦେଶରେ ମଧ୍ୟ ଅବସ୍ଥାପିତ ଅଛନ୍ତି। ଏଥିରେ ଛାତ୍ରଛାତ୍ରୀ ମଧ୍ୟ ସାମିଲ ଅଛନ୍ତି। ବାଂଲାଦେଶ ହିଂସା ନେଇ ନେଇ ଭାରତ ସରକାର କହିଛନ୍ତି ଏହା ଆଭ୍ୟନ୍ତରୀଣ ମାମଲା। ବିଦେଶ ମନ୍ତ୍ରାଳୟର ମୁଖପାତ୍ର ରଣଧୀର ଜୟସ୍ବାଲ କହିଛନ୍ତି, ବାଂଲାଦେଶରେ ୧୫୦୦୦ ଭାରତୀୟ ସୁରକ୍ଷିତ ଅଛନ୍ତି। ବିାଦେଶ ମନ୍ତ୍ରାଳୟର ମୁଖପାତ୍ର କହିଛନ୍ତି, ବାଂଲାଦେଶରେ ଜାରି ଥିବା ହିଂସା ତାଙ୍କର ଆଭ୍ୟନ୍ତରୀଣ ପ୍ରସଙ୍ଗ। ଭାରତୀୟ ନାଗରିକଙ୍କ ସୁରକ୍ଷା ଆମର ଦାୟିତ୍ବ। ଏତି ପାଇଁ ବିଦେଶ ମନ୍ତ୍ରୀ ସୁବ୍ରମଣ୍ୟମ ଜୟଶଙ୍କର ନଜର ରଖିଛନ୍ତି। ଭାରତ-ବାଂଲାଦେଶ ସୀମା ସ୍ଥିତ ବେନାପୋଲ-ପେଟ୍ରାପୋଲ, ଗେଡେ-ଦର୍ଶାନା ଓ ତ୍ରିପୁରାରେ ଅଖୌରା-ଅଗରତଲା କ୍ରସିଂ ଛାତ୍ରଛାତ୍ରୀ ଓ ଭାରତୀୟ ନାଗରିକଙ୍କ ପାଇଁ ଖୋଲି ଦିଆଯାଇଛି।
ବାଂଲାଦେଶରୁ ଫେରିଲେ ୭୭୮ ଛାତ୍ର
ବାଂଲାଦେଶରେ ପ୍ରଦର୍ଶନ ନେଇ ଭାରତୀୟ ବିଦେଶ ମନ୍ତ୍ରାଳୟ ସତର୍କ ରହିଛି। ବାଂଲାଦେଶରେ ୮୫୦୦ ଭାରତୀୟ ଛାତ୍ର ଅଛନ୍ତି। ଢାକାରେ ଭାରତୀୟ ଉଚ୍ଚାୟୋଗ ଦେଶ ଫେରିବାକୁ ଚାହୁଁଥିବା ଭାରତୀୟ ଛାତ୍ରଙ୍କୁ ପର୍ଯ୍ୟାପ୍ତ ସୁରକ୍ଷା ପ୍ରଦାନ କରିବା ପାଇଁ ସ୍ଥାନୀୟ ଅଧିକାରୀଙ୍କ ସହିତ ସମନ୍ବୟ କରୁଛନ୍ତି। ଦେଶବ୍ୟାପୀ କର୍ଫ୍ୟୁ ଓ ହିଂସା ଭିତରେ ବାଂଲାଦେଶରେ ଥିବା ୭୭୮ ଜଣ ଭାରତୀୟ ଛାତ୍ର ସ୍ୱଦେଶ ଫେରିଛନ୍ତି। ଢାକାସ୍ଥିତ ଦୂତାବାସ ଆଦିବାସୀ ଛାତ୍ରଛାତ୍ରୀଙ୍କ ପ୍ରତ୍ୟାବର୍ତ୍ତନ ଏବଂ ନିରାପତ୍ତା ସୁନିଶ୍ଚିତ କରିବା ପାଇଁ ୨୪ ଘଣ୍ଟିଆ ଗତିବିଧି ଉପରେ ନଜର ରଖିଛନ୍ତି। ଭାରତୀୟ ଉଚ୍ଚାୟୋଗ ୧୩ ଜଣ ନେପାଳି ଛାତ୍ରଛାତ୍ରୀଙ୍କୁ ସହଯୋଗ ପ୍ରଦାନ କରିଛନ୍ତି। ବର୍ତ୍ତମାନ ସୁଦ୍ଧା ୭୭୮ ଜଣ ଭାରତୀୟ ଛାତ୍ର ବିଭିନ୍ନ ସ୍ଥଳବନ୍ଦର ଦେଇ ଭାରତ ଫେରିଛନ୍ତି। ଏହାବ୍ୟତୀତ ପ୍ରାୟ ୨୦୦ ଛାତ୍ରଛାତ୍ରୀ ଢାକା ଓ ଚିଟାଗଙ୍ଗ ବିମାନବନ୍ଦର ଦେଇ ଘରକୁ ଫେରିଛନ୍ତି। ବାଂଲାଦେଶର ବିଭିନ୍ନ ବିଶ୍ୱବିଦ୍ୟାଳୟରେ ଅବଶିଷ୍ଟ ୪୦ରୁ ଅଧିକ ଛାତ୍ରଛାତ୍ରୀଙ୍କ ସହ ଢାକାସ୍ଥିତ ଭାରତୀୟ ହାଇକମିସନ ଏବଂ ଆସିଷ୍ଟାଣ୍ଟ ହାଇ କମିଶନ ନିୟମିତ ଯୋଗାଯୋଗରେ ଅଛନ୍ତି। ସେମାନଙ୍କ ଫେରିବା ପାଇଁ ମଧ୍ୟ ବ୍ୟବସ୍ଥା କରାଯାଉଛି। ଏଥିସହ ସେମାନେ ସମସ୍ତ ପ୍ରକାର ସହାୟତା ଯୋଗାଇ ଦେଉଛନ୍ତି ବୋଲି ମନ୍ତ୍ରାଳୟ ପକ୍ଷରୁ କୁହାଯାଇଛି ।
ବାଂଲାଦେଶରେ ସଂରକ୍ଷଣ ବ୍ୟବସ୍ଥା
ବାଂଲାଦେଶରେ ସ୍ବାଧୀନତା ସଂଗ୍ରାମୀଙ୍କ ପିଲାଙ୍କୁ ସରକାରୀ ଚାକିରିରେ ୩୦ ପ୍ରତିଶତ ସଂରକ୍ଷଣ ଦିଆଯାଉଛି। ମହିଳାଙ୍କ ପାଇଁ ୧୦ ପ୍ରତିଶତ ସଂରକ୍ଷଣ ବ୍ୟବସ୍ଥା ରହିଛି। ଏହା ବ୍ୟତୀତ ୧୦ ପ୍ରତିଶତ ସଂରକ୍ଷଣ ଭିନ୍ନଭିନ୍ନ ଜିଲ୍ଲା ପାଇଁ ନିର୍ଦ୍ଧାରିତ ହୋଇଛି। ଏଥନିକ ମାଇନରିଟି ଭଳି ସାନ୍ତାଳ, ପାଖୋ, ତ୍ରିପୁରୀ ଚକମା ଓ ଖାସିଙ୍କ ପାଇଁ ୬ ପ୍ରତିଶତ ସଂରକ୍ଷଣ ବ୍ୟବସ୍ଥା ରହିଛି। ହିନ୍ଦୁ ମାନଙ୍କ ପାଇଁ ଭିନ୍ନ ଭାବେ ସଂରକ୍ଷଣ ନାହିଁ। ମୋଟ ୫୬ ପ୍ରତିଶତ ସଂରକ୍ଷଣ ମାଧ୍ୟମରେ ଚାକିରି ଦିଆଯାଇଥାଏ। ମାତ୍ର ୪୪ ପ୍ରତିଶତ ମେଧା ତାଲିକାରୁ ଚୟନ କରାଯାଏ। ତେଣୁ ଆନ୍ଦେଳନ ତେଜୁଛି।