ଘାଟିକୁ ଶାନ୍ତି ଫେରୁଛି। ଜମ୍ମୁ କଶ୍ମୀରରେ ସେହି ଦିନ ଆସିଛି, ଯାହାକୁ ସମସ୍ତେ ଉତ୍ସୁକତାର ସହ ଅପେକ୍ଷା କରିଛନ୍ତି। ଧାରା ୩୭୦ ଉଚ୍ଛେଦ ପରେ ଜମ୍ମୁ କଶ୍ମୀରରେ ପ୍ରଥମ ଥର ପାଇଁ ବିଧାନସଭା ନିର୍ବାଚନ ହେଉଛି। ବିଧାନସଭା ନିର୍ବାଚନର ପ୍ରଥମ ପର୍ଯ୍ୟାୟରେ ଭୋଟ୍ ବୁଧବାର ଆରମ୍ଭ ହୋଇଯାଇଛି। ଏଥି ପାଇଁ ଜମ୍ମୁ-କଶ୍ମୀରରେ ଲୋକଙ୍କ ଭିଡ଼ ଜମିଥିଲା।ଦକ୍ଷିଣ କାଶ୍ମୀରର ରାମବନ, ଡୋଡା ଓ କିସ୍ତୱାର ଏବଂ ଜମ୍ମୁ ଡିଭିଜନର ମତଦାନ କେନ୍ଦ୍ରରେ ସକାଳୁ ଲମ୍ବା ଧାଡ଼ି ଦେଖିବାକୁ ମିଳିଥିଲା।
ଭୋଟ ପାଇଁ ଲୋକଙ୍କର ଆଗ୍ରହ ବଢ଼ିଛି ବୋଲି କୁହାଯିବ। କାରଣ ବୁଧବାର ବିଳମ୍ବିତ ସନ୍ଧ୍ୟା ସୁଦ୍ଧା ଭୋଟ୍ ସଂଖ୍ୟା ୬୧.୧୩ ପ୍ରତିଶତରେ ପହଞ୍ଚିଥିଲା। ସୋପିଆନରେ ୫୩.୫୪ ପ୍ରତିଶତ ଓ ପୁଲୱାମା ଜିଲ୍ଲାରେ ୪୬.୦୩ ପ୍ରତିଶତ ମତଦାନ ହୋଇଥିବା ବେଳେ ୨୦୦୮ ପରଠାରୁ ହୋଇଥିବା ୪ଟି ଲୋକସଭା ଓ ୩ଟି ବିଧାନସଭା ନିର୍ବାଚନରେ ମତଦାନ ହାର ରେକର୍ଡ ଭାଙ୍ଗିଛି। ମୁଖ୍ୟ ନିର୍ବାଚନ ଅଧିକାରୀ ପାଣ୍ଡୁରଙ୍ଗ କେ ପୋଲେ କହିଛନ୍ତି ଯେ ରାଜ୍ୟରେ ସ୍ଥିତିରେ ଉନ୍ନତି ଯୋଗୁଁ ମତଦାନ ହୋଇଛି।
୨୫ରେ ଦ୍ବିତୀୟ ପର୍ଯ୍ୟାୟ ମତଦାନ
ସେପ୍ଟେମ୍ବର ୨୫ରେ ଦ୍ୱିତୀୟ ପର୍ଯ୍ୟାୟ ଏବଂ ଅକ୍ଟୋବର ୧ରେ ତୃତୀୟ ତଥା ଅନ୍ତିମ ପର୍ଯ୍ୟାୟ ମତଦାନ ହେବ। ୧୦ ବର୍ଷ ପରେ ହେବାକୁ ଥିବା ବିଧାନସଭା ନିର୍ବାଚନରେ ପରିବେଶ ସମ୍ପୂର୍ଣ୍ଣ ବଦଳିଯାଇଛି। ନା ଆତଙ୍କବାଦୀ ହିଂସା, ନା ବିଚ୍ଛିନ୍ନତାବାଦୀ ନିର୍ଦ୍ଦେଶ । ଯେଉଁ ୨୪ଟି ନିର୍ବାଚନ ମଣ୍ଡଳୀରେ ମତଦାନ ହୋଇଥିଲା ସେଥିମଧ୍ୟରୁ ତ୍ରାଲକୁ ଏକଦା ଆତଙ୍କବାଦର ଗଡ଼ କୁହାଯାଉଥିଲା। ବିସ୍ଥାପିତ କାଶ୍ମୀରୀ ହିନ୍ଦୁମାନଙ୍କ ମଧ୍ୟରେ ଭୋଟକୁ ନେଇ ଉତ୍ସାହ ଦେଖିବାକୁ ମିଳିଥିଲା। ଉପତ୍ୟକାର ୧୬ଟି ଆସନରେ ମାତ୍ର ୩୦ ପ୍ରତିଶତ ଲୋକ ଭୋଟ୍ ଦେଇଥିଲେ। ଜମ୍ମୁ, ଉଧମପୁର ଓ ଦିଲ୍ଲୀରେ ୨୪ଟି ସ୍ୱତନ୍ତ୍ର ମତଦାନ କେନ୍ଦ୍ର ରହିଛି।
ପ୍ରଚାର ବେଳେ କ’ଣ କହିଲେ ମୋଦୀ
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି, ଜମ୍ମୁ କଶ୍ମୀର ଯୁବପିଢ଼ି ଏବେ ଆଉ ହାତରେ ପଥରେ ନୁହେଁ। ବରଂ ଖାତା-କଲମ ନେଇ ଯାଉଛନ୍ତି। କଶ୍ମୀରର ଅଗ୍ରଗତିରେ କଶ୍ମୀରୀ ପଣ୍ଡିତଙ୍କ ଭୂମିକା ଗୁରୁତ୍ବପୂର୍ଣ୍ଣ। କଶ୍ମୀରର ଐତିହ୍ୟ ସହ ପଣ୍ଡିତ ସମ୍ପ୍ରଦାୟର ଗଭୀର ସମ୍ପର୍କ ରହିଛି। ଏନସି(ନ୍ୟାସନାଲ କନଫେରେନ୍ସ), ପିଡିପି ଏବଂ କଂଗ୍ରେସକୁ ତିନୋଟି ବିଶିଷ୍ଟ ରାଜବଂଶର ଆତ୍ମ-ସେବା ରାଜନୀତି କଶ୍ମୀର ହିନ୍ଦୁମାନଙ୍କୁ ସେମାନଙ୍କ ଘରୁ ବିସ୍ଥାପିତ କରିଛି। ଜମ୍ମୁ କଶ୍ମୀରରେ ଶିଖମାନେ ହିଂସା ଏବଂ ଅତ୍ୟାଚାର ସହିଛନ୍ତି। ତିନି ପ୍ରମୁଖ ରାଜନୈତିକ ଦଳ ହିନ୍ଦୁ ଏବଂ ଶିଖ ସମୁଦାୟଙ୍କ ପ୍ରତି ଅନ୍ୟାୟ କରିଛନ୍ତି।
ଭୋଟରଙ୍କୁ ଉତ୍ସାହିତ କଲେ ମୋଦୀ
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଜମ୍ମୁ-କଶ୍ମୀର ଉପରାଜ୍ୟପାଳ ମନୋଜ ସିହ୍ନା ମଧ୍ୟ ସକାଳେ ଭୋଟରଙ୍କୁ ଶୁଭେଚ୍ଛା ଜଣାଇବା ସହିତ ଉତ୍ସାହିତ କରିଥିଲେ। ଜମ୍ମୁ-କଶ୍ମୀର ବିଧାନସଭା ନିର୍ବାଚନର ପ୍ରଥମ ପର୍ଯ୍ୟାୟ ଆରମ୍ଭ ହେଉଥିବାବେଳେ ମୁଁ ଭୋଟରମାନଙ୍କୁ ଅଧିକ ସଂଖ୍ୟାରେ ଭୋଟ୍ ଦେବା ଏବଂ ଗଣତନ୍ତ୍ରର ପର୍ବକୁ ସୁଦୃଢ଼ କରିବାକୁ ଅନୁରୋଧ କରୁଛି ବୋଲି ମୋଦୀ କହିଥିଲେ। ମତଦାନ ପରେ ୨୧୯ ଜଣ ପ୍ରାର୍ଥୀଙ୍କ ରାଜନୈତିକ ଭାଗ୍ୟ ଇଭିଏମରେ ବନ୍ଦ ହୋଇଛି। ସେଥିମଧ୍ୟରୁ ପିଡିପି ଅଧ୍ୟକ୍ଷା ମେହବୁବା ମୁଫତିଙ୍କ ଝିଅଙ୍କ ନାମ ବିଜବେହରାରୁ, କଂଗ୍ରେସର ପୂର୍ବତନ ରାଜ୍ୟ ସଭାପତି ଜିଏ ମୀରଙ୍କ ନାମ ଉଲ୍ଲେଖନୀୟ।
ଜମ୍ମୁ କଶ୍ମୀରରେ ମୋଦୀଙ୍କ ରାଲି
ଜମ୍ମୁ-କଶ୍ମୀରରେ ଦ୍ୱିତୀୟ ପର୍ଯ୍ୟାୟ ମତଦାନ ହେବ। ଏଭଳି ସ୍ଥିତିରେ ରାଜନୈତିକ ଦଳର ନେତାମାନେ ଜୋରସୋରରେ ନିର୍ବାଚନୀ ରାଲିକୁ ସମ୍ବୋଧିତ କରୁଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗୁରୁବାର ଶ୍ରୀନଗର ଓ କଟରାରେ ନିର୍ବାଚନୀ ରାଲିକୁ ସମ୍ବୋଧିତ କରିଛନ୍ତି। ଦିନ ପ୍ରାୟ ୧୨ଟାରେ ଶ୍ରୀନଗରର ଶେର-ଏ-କଶ୍ମୀର କ୍ରିକେଟ ଷ୍ଟାଡିୟମରେ ପ୍ରଧାନମନ୍ତ୍ରୀ ମୋଦୀ ଏକ ନିର୍ବାଚନୀ ରାଲିକୁ ସମ୍ବୋଧିତ କରିଛନ୍ତି। ଏହାପରେ ସେ ଅପରାହ୍ନରେ କଟ୍ରାସ୍ଥିତ ଶ୍ରୀ ମାତା ବୈଷ୍ଣୋ ଦେବୀ ଶ୍ରାଇନ୍ ବୋର୍ଡ କ୍ରୀଡ଼ା ପରିସରରେ ପ୍ରଧାନମନ୍ତ୍ରୀ ମୋଦୀ ଆଉ ଏକ ରାଲିକୁ ସମ୍ବୋଧିତ କରିଛନ୍ତି। ଉପତ୍ୟକାରେ ଚାଲିଥିବା ବିଧାନସଭା ନିର୍ବାଚନ ପାଇଁ ଏହା ହେଉଛି ପ୍ରଧାନମନ୍ତ୍ରୀ ମୋଦୀଙ୍କ ପ୍ରଥମ ନିର୍ବାଚନୀ ରାଲି। ଏହା ପୂର୍ବରୁ ସେ ସେପ୍ଟେମ୍ବର ୧୪ରେ ଜମ୍ମୁର ଡୋଡାରେ ବିଜେପି ପାଇଁ ଏକ ସାଧାରଣ ସଭାକୁ ସମ୍ବୋଧିତ କରିଥିଲେ।
୨୪ ଆସନରେ ମତଦାନ
ପ୍ରଥମ ପର୍ଯ୍ୟାୟ ମତଦାନ ୭ଟି ଜିଲ୍ଲାର ୨୪ଟି ବିଧାନସଭା ଆସନରେ ହୋଇଛି। ପମ୍ପୋର, ତ୍ରାଲ, ପୁଲୱାମା, ରାଜପୋରା, ଜୈନାପୋରା, ସୋପିଆନ, ଡିଏଚ ପୋରା, କୁଲଗାମ, ଦେବସର, ଡୋରୁ, କୋକେରନାଗ (ଏସଟି), ଅନନ୍ତନାଗ ପଶ୍ଚିମ, ଅନନ୍ତନାଗ, ଶ୍ରୀଗୁଫୱାରା-ବିଜବେହରା, ସାଙ୍ଗୁସ-ଅନନ୍ତନାଗ ପୂର୍ବ, ପହଲଗାମ, ଇନ୍ଦ୍ରୱାଲ, କିସ୍ତୱାର, ପଦ୍ଦାର-ନାଗସେନି, ଭଦରୱାହ, ଡୋଡା, ଡୋଡା ପଶ୍ଚିମ, ରାମବନ ଏବଂ ବନିହାଲ ଆସନରେ ମତଦାନ ହୋଇଛି।
