ଦକ୍ଷିଣ ଏସୀୟ ରାଷ୍ଟ୍ର ‘ଥାଇଲାଣ୍ଡ’ ସରକାର ସମଲିଙ୍ଗୀ ବିବାହକୁ ଅନୁମତି ପ୍ରଦାନ କରିଛନ୍ତି। ରାଜା ମହା ବାଜିରାଲଙ୍ଗକୋର୍ଣ୍ଣଙ୍କ ଅନୁମୋଦନ ପରେ ସମଲିଙ୍ଗୀ ବିବାହ ଆଇନ ଏବେ ଆଇନରେ ପରିଣତ ହୋଇଛି। ୨୦୨୬ ଜାନୁଆରୀ ୨୨ରୁ ଦେଶରେ ଏହି ଆଇନ ଲାଗୁ ହେବ। ଦେଶର ଯେ କୌଣସି ସମଲିଙ୍ଗୀ ଦମ୍ପତି ଆଇନଗତ ଭାବେ ନିଜର ବିବାହ ପଞ୍ଜୀକରଣ କରିପାରିବେ। ଏହି ଆଇନରେ ସମଲିଙ୍ଗୀ ବିବାହକୁ ସ୍ୱୀକୃତି, ଆର୍ଥିକ ଏବଂ ଡାକ୍ତରୀ ଅଧିକାର ପ୍ରଦାନ କରାଯାଇଛି। ସମଲିଙ୍ଗୀ ଦମ୍ପତି ସନ୍ତାନ ଗ୍ରହଣ କରିବାରେ ସକ୍ଷମ ହେବେ। ସେମାନଙ୍କୁ ଉତ୍ତରାଧିକାର ଅଧିକାର ମଧ୍ୟ ମିଳିଛି। ସେହିପରି କାଗଜପତ୍ରରେ ଲିଙ୍ଗ ବଦଳରେ ଲିଙ୍ଗ ନିରପେକ୍ଷ ଶବ୍ଦ ଏବଂ ସ୍ୱାମୀ-ସ୍ତ୍ରୀଙ୍କ ସ୍ଥାନରେ ଲିଙ୍ଗ ନିରପେକ୍ଷ ଶବ୍ଦ ବ୍ୟବହାର କରାଯିବ।
ଜାନୁଆରି ୨୨ରୁ ଥାଇଲାଣ୍ଡରେ ଏହି ଆଇନ ଲାଗୁ ହେବ। ସେହିଦିନ ହଜାରେରୁ ଅଧିକ ସମଲିଙ୍ଗୀ ଦମ୍ପତିଙ୍କୁ ସାମୂହିକ ବିବାହ କରିବା ପାଇଁ ପ୍ରସ୍ତୁତି ମଧ୍ୟ ଚାଲିଛି। ବ୍ୟାଙ୍କକରେ ଏହି କାର୍ଯ୍ୟକ୍ରମ ଅନୁଷ୍ଠିତ ହେବ। ଗତ ଏକ ଦଶନ୍ଧି ଧରି ଥାଇଲାଣ୍ଡରେ ଏଲଜିବିଟିକ୍ୟୁ ସମ୍ପ୍ରଦାୟ ଏହି ଲଢେଇ ଲଢୁଛନ୍ତି। ୨୦୨୧ରେ ନେଦରଲ୍ୟାଣ୍ଡ ପ୍ରଥମେ ସମଲିଙ୍ଗୀ ବିବାହକୁ ସ୍ୱୀକୃତି ଦେଇଥିଲା। ବର୍ତ୍ତମାନ ବିଶ୍ୱର ୩୦ରୁ ଅଧିକ ଦେଶରେ ସମଲିଙ୍ଗୀ ବିବାହକୁ ବୈଧତା ମିଳିଛି। ଯଦି ଆମେ ଏସିଆ ବିଷୟରେ କହିବା ତେବେ ତାଇୱାନ ଏବଂ ନେପାଳ ପରେ ଥାଇଲାଣ୍ଡ ତୃତୀୟ ଦେଶ ହୋଇଛି।
୩୫ଟି ଦେଶରେ ସ୍ବୀକୃତି
କ୍ୟୁବା, ଆଣ୍ଡୋରା, ସ୍ଲୋଭେନିଆ, ଚିଲି, ସ୍ୱିଜରଲ୍ୟାଣ୍ଡ, କୋଷ୍ଟାରିକା, ଅଷ୍ଟ୍ରିଆ, ତାଇୱାନ , ଇକ୍ବେଡର, ବେଲଜିୟମ, ବ୍ରିଟେନ, ଡେନମାର୍କ, ଫିନଲ୍ୟାଣ୍ଡ, ଫ୍ରାନ୍ସ, ଜର୍ମାନୀ, ଆଇସଲ୍ୟାଣ୍ଡ, ଆୟର୍ଲାଣ୍ଡ, ଲକ୍ସେମବର୍ଗ, ମାଲ୍ଟା, ନରୱେ, ପର୍ତ୍ତୁଗାଲ୍, ସ୍ପେନ୍, ସ୍ୱିଡେନ, ମେକ୍ସିକୋ, ଦକ୍ଷିଣ ଆଫ୍ରିକା, ଆମେରିକା, କଲମ୍ବିଆ, ବ୍ରାଜିଲ୍, ଆର୍ଜେଣ୍ଟିନା, କାନାଡା, ନେଦରଲାଣ୍ଡ, ନିଉଜିଲାଣ୍ଡ, ପର୍ତ୍ତୁଗାଲ ଓ ଉରୁଗୁଏରେ ସମଲିଙ୍ଗୀ ବିବାହକୁ ଅନୁମତି ମିଳିଛି। ୨୦୦୧ ମସିହାରେ ସମଲିଙ୍ଗୀ ବିବାହକୁ ପ୍ରଥମେ ନେଦରଲ୍ୟାଣ୍ଡ ଆଇନଗତ ମାନ୍ୟତା ଦେଇଥିବାବେଳେ ତାଇୱାନ ହେଉଛି ଏହା କରିବାରେ ପ୍ରଥମ ଏସୀୟ ରାଷ୍ଟ୍ର। ୩୫ରୁ ୨୩ଟି ଦେଶ ଆଇନ ପ୍ରଣୟନ କରି ସମଲିଙ୍ଗୀ ଦମ୍ପତିଙ୍କୁ ବିବାହ କରିବାକୁ ଅନୁମତି ହୋଇଥିବାବେଳେ ଦଶଟି ଦେଶରେ ସେମାନେ କୋର୍ଟଙ୍କ ନିଷ୍ପତ୍ତି ମାଧ୍ୟମରେ ଏହି ଅଧିକାର ପାଇଛନ୍ତି।
ସୁପ୍ରିମକୋର୍ଟଙ୍କ ରାୟ
ସୁପ୍ରିମ୍କୋର୍ଟ ୨୦୧୮ ମସିହାରେ କହିଥିଲେ, ସମଲିଙ୍ଗୀ ସମ୍ପର୍କ ଅପରାଧ ନୁହେଁ। ତେଣୁ ଏହି ରାୟ ପରେ ମଧ୍ୟ କୌଣସି ସମଲିଙ୍ଗୀ ସମ୍ପର୍କ ଅପରାଧ ଶ୍ରେଣୀକୁ ଯିବ ନାହିଁ। ସମଲିଙ୍ଗୀ ବିବାହକୁ ସର୍ବୋଚ୍ଚ ନ୍ୟାୟାଳୟ ସ୍ବୀକୃତି ଦେଇ ନାହାନ୍ତି ସତ, କିନ୍ତୁ ଏହାକୁ ନେଇ କେନ୍ଦ୍ର ଓ ରାଜ୍ୟ ସରକାରଙ୍କୁ ଉପଯୁକ୍ତ ପଦକ୍ଷେପ ନେବାପାଇଁ ନିର୍ଦେଶ ଦେଇଛନ୍ତି। ଏହା ବି ଏକ ସ୍ବାଗତଯୋଗ୍ୟ ପଦକ୍ଷେପ। ସେମାନଙ୍କୁ ପୋଷ୍ୟ ସନ୍ତାନ ଗ୍ରହଣ ପାଇଁ ଅନୁମତି ମିଳିଛି। ବର୍ତ୍ତମାନ ସର୍ବୋଚ୍ଚ ନ୍ୟାୟାଳୟଙ୍କ ନିର୍ଦେଶରେ ଉଭୟ କେନ୍ଦ୍ର ଓ ରାଜ୍ୟ ସରକାର ଏ ସଂକ୍ରାନ୍ତରେ ଆଇନ ପ୍ରସ୍ତୁତ ପାଇଁ ଯଥାଶୀଘ୍ର କମିଟି ଗଠନ କରିବା କଥା।
କ’ଣ କହିଥିଲେ ଦୂତି ଚାନ୍ଦ
ସମଲିଙ୍ଗୀ ବିବାହ ନେଇ ଏକଦା ଦୌଡ଼ରାଣୀ ଦୂତି ଚାନ୍ଦ କହିଥିଲେ, ବିବାହ ଏକ ସାମାଜିକ ସ୍ବୀକୃତି। ଏହାଦ୍ବାରା ସ୍ବାମୀ ଓ ସ୍ତ୍ରୀ ପରସ୍ପରର ନିର୍ଭରଶୀଳ କ୍ଷେତ୍ରଭୁକ୍ତ ହୋଇଯାଆନ୍ତି। ଫଳରେ ସରକାରୀ ପେନ୍ସନ୍ ସୁବିଧା ହେଉ, ବା କୌଣସି ବୀମା ଓ ସ୍ବାସ୍ଥ୍ୟ କାର୍ଡର ସୁବିଧା; ସ୍ବାମୀଙ୍କ ପରେ ସ୍ତ୍ରୀ ବା ସ୍ତ୍ରୀଙ୍କ ପରେ ସ୍ବାମୀ ପାଇବାର ପ୍ରକ୍ରିୟା ସହଜ ଓ ସରଳ ହୋଇଥାଏ। ପରସ୍ପର ମିଶି ରହିବା ଦ୍ବାରା ହୁଏତ ଯୌବନାବସ୍ଥା ଆରାମରେ କଟିଯାଇପାରେ, କିନ୍ତୁ ଅସମୟରେ କିମ୍ବା ଜଣେ ସାଥୀଙ୍କ ଅନୁପସ୍ଥିତିରେ ଅନ୍ୟ ସାଥୀର କ’ଣ ହେବ! ସେ କ’ଣ ସାଥୀର ସମସ୍ତ ସରକାରୀ ଓ ବେସରକାରୀ ଦସ୍ତାବିଜର ଉତ୍ତରାଧିକାରୀ ହୋଇପାରିବେ! ଜଣେ ସମଲିଙ୍ଗୀ ସାଥୀ ସ୍ବାମୀ/ସ୍ତ୍ରୀ ଭଳି କ’ଣ ହସ୍ପିଟାଲ ଦସ୍ତାବିଜ୍ରେ କାମରେ ଆସିପାରିବେ! ବିବାହ ସ୍ବୀକୃତି ନ ମିଳିଲେ, ସମଲିଙ୍ଗୀ ଯୋଡ଼ିଙ୍କୁ ସାମାଜିକ ସୁରକ୍ଷା ମିଳିବା କ’ଣ ସମ୍ଭବ ହେବ! ଯେମିତି ବିବାହିତ ଦମ୍ପତିଙ୍କ ମଧ୍ୟରୁ ଜଣଙ୍କ ମୃତ୍ୟୁ ପରେ ଆର ଜଣକ ଆପେ ଆପେ ନିଜ ସାଥୀଙ୍କ ଘରବାଡ଼ି, ସମ୍ପତ୍ତିର ଉତ୍ତରାଧିକାରୀ ହୋଇପାରୁଛନ୍ତି, ସେମିତି ସୁବିଧା ବିବାହ ନ କଲେ କ’ଣ ସମଲିଙ୍ଗୀ ଯୋଡ଼ି ପାଇପାରିବେ! ସେଭଳି ନ ହେଲେ ଜୀବନ ସାରା ସାଥୀ ହୋଇ ରହିଥିବା ସମଲିଙ୍ଗୀ ସାଥୀଙ୍କ ଅଧିକାର କ୍ଷୁଣ୍ଣହେବ ନାହିଁ କି?
