ଭାରତର ପରମ ଶତ୍ରୁ କୁହାଯାଉଥିବା ପାକିସ୍ତାନ ଆତଙ୍କବାଦୀଙ୍କୁ ପ୍ରୋତ୍ସାହନ ଦେବାକୁ ନେଇ ବିଶ୍ବଦରବାରରେ ଚର୍ଚ୍ଚାକୁ ଆସିଥାଏ। ଆତଙ୍କବାଦୀ ଗତିବିଧି କାରଣରୁ ପାକିସ୍ତାନ ସହିତ ପଡୋଶୀ ରାଷ୍ଟ୍ରମାନେ ସଂପର୍କ ରଖିବାକୁ ଭଲ ପାଆନ୍ତି ନାହିଁ। କେବଳ ଏତିକି ନୁହେଁ ବିକଶିତ ରାଷ୍ଟ୍ରମାନେ ପାକିସ୍ତାନ ସହିତ ଛିଡ଼ା ହେବାକୁ ଆଗ୍ରହ ପ୍ରକାଶ କରନ୍ତି ନାହିଁ। ଏପରିକି ମିଳିତ ଜାତିସଂଘ ମଧ୍ୟ ଅନେକ ଥର ପାକିସ୍ତାନକୁ ବିଭିନ୍ନ ପ୍ରସଙ୍ଗରେ ଅଣଦେଖା କରିଛି। ପାକିସ୍ତାନର ଚିତ୍ର ଯଦିଓ ବିଦେଶରେ ସେତେଟା ଭଲ ନୁହେଁ, କିନ୍ତୁ ଆଭ୍ୟନ୍ତରଣରେ ଆଇନ୍କାନୁନ ବହୁତ ମଜୁଥିବା ଏକ ରିପୋର୍ଟ ପ୍ରକାଶ ପାଇଛି।
ପାକିସ୍ତାନରେ ବିଶ୍ବର ୨୪% କଏଦୀ
ପାକିସ୍ତାନରେ ସବୁଠାରୁ ଅଧିକ ଫାଶୀ ଦଣ୍ଡାଦେଶ ବ୍ୟବସ୍ଥା ରହିଛି। ସମଗ୍ର ବିଶ୍ୱରେ ମୃତ୍ୟୁଦଣ୍ଡାଦେଶ ଭୋଗୁଥିବା କଏଦୀଙ୍କ ମଧ୍ୟରୁ ୨୬ ପ୍ରତିଶତ ହେଉଛନ୍ତି କେବଳ ପାକିସ୍ତାନରେ। ଏକ ଏନଜିଓ ପକ୍ଷରୁ ପ୍ରକାଶିତ ଏକ ରିପୋର୍ଟରେ ଏହି ସୂଚନା ଦିଆଯାଇଛି। ଲିଗାଲ ଆକ୍ସନ ଗ୍ରୁପ୍ ଜଷ୍ଟିସ୍ ପ୍ରୋଜେକ୍ଟ ପାକିସ୍ତାନ (ଜେପିପି) ଏହାର ବାର୍ଷିକ ରିପୋର୍ଟରେ କହିଛି ଯେ ୨୦୨୪ରେ ମୋଟ ୬,୧୬୧ କଏଦୀଙ୍କୁ ମୃତ୍ୟୁଦଣ୍ଡାଦେଶ ଦିଆଯାଇଥିବା ବେଳେ ୨୦୨୩ରେ ଏହା ୬,୦୩୯ ଥିଲା। ୨୦୨୨ରେ ମୃତ୍ୟୁଦଣ୍ଡାଦେଶ ଭୋଗୁଥିବା ଲୋକଙ୍କ ସଂଖ୍ୟା ୩,୨୨୬ ଥିବା ବେଳେ ଏହି ସଂଖ୍ୟା ପୂର୍ବ ଟ୍ରେଣ୍ଡଠାରୁ ସମ୍ପୂର୍ଣ୍ଣ ବିପରୀତ।
ପଂଜାବରେ ୨୫୦୫ ଜଣଙ୍କୁ ଫାଶୀ
ଲାହୋରସ୍ଥିତ ଏହି ଏନଜିଓ ୨୨ତମ ବିଶ୍ୱ ମୃତ୍ୟୁଦଣ୍ଡ ବିରୋଧୀ ଦିବସ ଅବସରରେ ଏହାର ବାର୍ଷିକ ରିପୋର୍ଟର ତୃତୀୟ ସଂସ୍କରଣ ‘ପାକିସ୍ତାନରେ ମୃତ୍ୟୁଦଣ୍ଡ: ମୃତ୍ୟୁ ଦଣ୍ଡର ଡାଟା ବିଶ୍ଳେଷଣ’ ପ୍ରକାଶ କରିଛି। ପଞ୍ଜାବ ପ୍ରଦେଶରେ ସର୍ବାଧିକ ୨୫୦୫ ଜଣ କଏଦୀ ଥିବା ବେଳେ ଖାଇବର ପଖତୁନଖୱା ପ୍ରଦେଶରେ ୨୩୧୧ ଜଣ କଏଦୀ ଅଛନ୍ତି। ଜେପିପି ତଥ୍ୟରୁ ଏହା ମଧ୍ୟ ଜଣାପଡିଛି ଯେ ମୃତ୍ୟୁଦଣ୍ଡର ସର୍ବାଧିକ ବ୍ୟବହାର କରୁଥିବା ଦେଶମାନଙ୍କ ମଧ୍ୟରୁ ପାକିସ୍ତାନ ଅନ୍ୟତମ।
୨୦୦୪ରେ ୪,୫୦୦ ଲୋକଙ୍କୁ ଫାଶୀ
ଜେପିପି ରିପୋର୍ଟ ଅନୁଯାୟୀ ପାକିସ୍ତାନରେ ମୃତ୍ୟୁଦଣ୍ଡ ବିଶ୍ୱର ୧୩ ପ୍ରତିଶତ। ୨୦୦୪ ପରଠାରୁ ପାକିସ୍ତାନରେ ଅତି କମରେ ୪,୫୦୦ ଲୋକଙ୍କୁ ମୃତ୍ୟୁଦଣ୍ଡାଦେଶ ଦିଆଯାଇଥିବା ବେଳେ ପ୍ରତିଦିନ ଏକ ଅଦାଲତ ହାରାହାରି ଦଣ୍ଡାଦେଶ ଶୁଣାଇଛନ୍ତି। ସମଗ୍ର ବିଶ୍ୱରେ ଅଦାଲତ ଦ୍ୱାରା ମୃତ୍ୟୁଦଣ୍ଡାଦେଶ ପାଇଥିବା ପ୍ରତ୍ୟେକ ସପ୍ତମ ବ୍ୟକ୍ତି ଏବଂ ବିଶ୍ୱରେ ମୃତ୍ୟୁଦଣ୍ଡରେ ଥିବା ପ୍ରତ୍ୟେକ ଅଷ୍ଟମ ବ୍ୟକ୍ତି ହେଉଛନ୍ତି ପାକିସ୍ତାନୀ।
ମୃତ୍ୟୁଦଣ୍ଡ ସର୍ବାଧିକ ବ୍ୟବହୃତ
ରିପୋର୍ଟରେ କୁହାଯାଇଛି ଯେ ବିଶ୍ୱସ୍ତରରେ ମୃତ୍ୟୁଦଣ୍ଡର ସର୍ବାଧିକ ବ୍ୟବହାର କରୁଥିବା ଦେଶମାନଙ୍କ ମଧ୍ୟରୁ ପାକିସ୍ତାନ ଅନ୍ୟତମ, ଯାହା ଏକ ଚିନ୍ତାଜନକ ସଂଖ୍ୟା। ଏଥିରେ ତୁରନ୍ତ ସଂସ୍କାରର ଆବଶ୍ୟକତା ରହିଛି। ୨୦୧୯ ଡିସେମ୍ବର ପରଠାରୁ ପାକିସ୍ତାନ ମୃତ୍ୟୁଦଣ୍ଡ ଦେଇନାହିଁ, କିନ୍ତୁ ମୃତ୍ୟୁଦଣ୍ଡର ଅନ୍ୟତମ ବୃହତ୍ତମ ଉପଭୋକ୍ତା ବୋଲି ରିପୋର୍ଟରେ କୁହାଯାଇଛି। ୩୧ରୁ ଅଧିକ ଅପରାଧ ପାଇଁ ଫାଶୀ ଦଣ୍ଡର ବ୍ୟବସ୍ଥା ରହିଛି।
