ହରିୟାଣା ବିଧାନସଭା ନିର୍ବାଚନ ୨୦୨୪ର ଫଳାଫଳ ମଙ୍ଗଳବାର ଦିନ ପ୍ରକାଶ ପାଇଛି। ଫଳାଫଳରେ ବିଜେପି ସ୍ପଷ୍ଟ ସଂଖ୍ୟାଗରିଷ୍ଠତା ହାସଲ କରି କ୍ରମାଗତ ତୃତୀୟ ଥର ପାଇଁ ସରକାର ଗଢ଼ିବାର ରେକର୍ଡ ସୃଷ୍ଟି କରିଥିବା ବେଳେ କଂଗ୍ରେସକୁ ସବୁଠାରୁ ଅଧିକ ନିରାଶାର ସମ୍ମୁଖୀନ ହେବାକୁ ପଡ଼ିଛି। ନିର୍ବାଚନ ପୂର୍ବରୁ ଓ ମତଦାନ ପରେ ସମସ୍ତ ବିଶେଷଜ୍ଞ, ଏକ୍ଜିଟ୍ ପୋଲ୍ ଓ ଟିଭି କଂଗ୍ରେସକୁ ସ୍ପଷ୍ଟ ସଂଖ୍ୟାଗରିଷ୍ଠତା ମିଳିବ ବୋଲି ଦାବି କରୁଥିଲେ ମଧ୍ୟ ଫଳାଫଳ ଠିକ୍ ବିପରୀତ ଆସିଥିଲା। କଂଗ୍ରେସର ଆଗୁଆ ଉତ୍ସବ ପାଳନ ଯୋଗୁଁ ହୀନସ୍ତା ହେବାକୁ ପଡ଼ିଛି। ଅନେକ ରାଜନୈତିକ ଦଳ ରାହୁଲ ଗାନ୍ଧୀଙ୍କୁ ସମାଲୋଚନା କରିଛନ୍ତି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ଟାର୍ଗେଟ କରିଛନ୍ତି। ବିଦେଶରେ ଭାରତର ଭାବମୂର୍ତ୍ତିକୁ ଖରାପ କରୁଥିବା ଅଭିଯୋଗ କରି ଶାହ କହିଛନ୍ତି ଯେ ହରିଆଣାବାସୀ ରାହୁଲଙ୍କ ଏହି ବିଭାଜନକାରୀ ରଣନୀତିକୁ ପ୍ରତ୍ୟାଖ୍ୟାନ କରିଛନ୍ତି। ସାମାଜିକ ଗଣମାଧ୍ୟମ ‘ଏକ୍ସ’ ପୋଷ୍ଟରେ ଶାହ ଲେଖିଛନ୍ତି, କୃଷକ ଓ ସୈନିକଙ୍କ ଦେଶ ହରିୟାଣା ସେମାନଙ୍କ ଭୋଟ୍ ବ୍ୟାଙ୍କ ପାଇଁ ବିଦେଶ ଯାଇ ଦେଶକୁ ଅପମାନିତ କରୁଥିବା ଲୋକଙ୍କୁ ଉଚିତ୍ ଶିକ୍ଷା ଦେଇଛନ୍ତି। କଂଗ୍ରେସ ଦଳକୁ ବିଭାଜନକାରୀ ନୀତି ବୋଲି ବର୍ଣ୍ଣନା କରି ଗୃହମନ୍ତ୍ରୀ ଆହୁରି ଲେଖିଛନ୍ତି, ବୀରଭୂମି ହରିୟାଣାବାସୀଙ୍କୁ ସଲାମ। ଜାତି ଓ ଅଞ୍ଚଳ ଆଧାରରେ ଲୋକଙ୍କୁ ବିଭାଜନ କରୁଥିବା କଂଗ୍ରେସର ନକାରାତ୍ମକ ଓ ବିଭାଜନକାରୀ ରାଜନୀତିକୁ ବୀରଭୂମିବାସୀ ସମ୍ପୂର୍ଣ୍ଣ ପ୍ରତ୍ୟାଖ୍ୟାନ କରିବା ସହ ୧୦ ବର୍ଷ ମଧ୍ୟରେ ବିଜେପିର ବିକାଶ ଓ ଗରିବ କଲ୍ୟାଣର ଟ୍ରାକ୍ ରେକର୍ଡକୁ ବାଛିଛନ୍ତି। ହରିୟାଣା, ଗୁଜରାଟ, ମଧ୍ୟପ୍ରଦେଶ ଓ ଅନ୍ୟାନ୍ୟ ରାଜ୍ୟରେ ବାରମ୍ବାର ବିଜେପି ସରକାର ଗଠନ ହେଉ, ଏହା ଦର୍ଶାଉଛି ଯେ ମୋଦୀ ଜୀ ନେତୃତ୍ୱାଧୀନ ବିଜେପି ଭାରତୀୟ ରାଜନୀତିରେ ପ୍ରତିବାଦ ପରବର୍ତ୍ତୀ ରାଜନୀତିର ଏକ ନୂଆ ଯୁଗ ଆରମ୍ଭ କରିଛି।
ଜମ୍ମୁ କଶ୍ମୀର ନେଇ କ’ଣ କହିଲେ?
ଜମ୍ମୁ-କଶ୍ମୀରବାସୀ ଚଳିତ ବିଧାନସଭା ନିର୍ବାଚନରେ ବିଜେପିକୁ ସର୍ବାଧିକ ଭୋଟ୍ ଦେଇଛନ୍ତି ଏବଂ ଇତିହାସରେ ଏପର୍ଯ୍ୟନ୍ତ ବିଜେପିକୁ ସର୍ବାଧିକ ଆସନ ଦେଇଛନ୍ତି। ଏଥିପାଇଁ ମୁଁ ଜମ୍ମୁ-କଶ୍ମୀରବାସୀଙ୍କୁ ହୃଦୟରୁ କୃତଜ୍ଞତା ଜଣାଉଛି। ମୋଦୀଙ୍କ ନେତୃତ୍ୱରେ ବିଜେପି ଜମ୍ମୁ-କଶ୍ମୀରର ବିକାଶ ଓ ନିରାପତ୍ତା ପାଇଁ ପ୍ରତିଶ୍ରୁତିବଦ୍ଧ। ଜମ୍ମୁ-କଶ୍ମୀରକୁ ଆତଙ୍କମୁକ୍ତ କରିବା ଏବଂ ଦେଶର ଅନ୍ୟାନ୍ୟ ଅଞ୍ଚଳ ଭଳି ଏହାର ବିକାଶ କରିବା ବିଜେପିର ସର୍ବୋଚ୍ଚ ପ୍ରାଥମିକତା। କଂଗ୍ରେସ ଶାସନରେ ଜମ୍ମୁ-କଶ୍ମୀରରେ, ଯେଉଁଠି ପ୍ରତିଦିନ କେବଳ ଆତଙ୍କବାଦ ଶାସନ କରୁଥିଲା ଏବଂ ଗଣତନ୍ତ୍ରକୁ ହତ୍ୟା କରାଯାଉଥିଲା, ସେଠାରେ ବିଜେପି ଶାସନରେ ଗଣତନ୍ତ୍ରର ପର୍ବକୁ ପୂରା ଗୌରବ ଓ ଶାନ୍ତିର ସହ ପାଳନ କରାଯାଇଥିଲା। ଜମ୍ମୁ-କଶ୍ମୀରବାସୀ ମଧ୍ୟ ୧୯୮୭ ବିଧାନସଭା ନିର୍ବାଚନକୁ ମନେ ପକାଉଛନ୍ତି, ଯେତେବେଳେ କଂଗ୍ରେସ ଖୋଲାଖୋଲି ଭାବେ ଜାଲିଆତି କରିଥିଲା ଏବଂ ଗଣତନ୍ତ୍ରକୁ ଉପହାସ କରିଥିଲା। ସେହି କାଶ୍ମୀର ଉପତ୍ୟକାରେ ଏବେ ଗଣତନ୍ତ୍ର ପୁନରୁଦ୍ଧାର ହୋଇଛି। ବିନା ଆତଙ୍କବାଦ ଓ ଆତଙ୍କରେ ଲୋକମାନେ ନିଜ ପ୍ରତିନିଧିଙ୍କୁ ନିର୍ବାଚିତ କରିଛନ୍ତି।
କେଜ୍ରିୱାଲଙ୍କ ପ୍ରତିକ୍ରିୟା
ଆମ୍ ଆଦମୀ ପାର୍ଟିର ଆବାହକ ଅରବିନ୍ଦ କେଜ୍ରିଓ୍ଵାଲ କହିଛନ୍ତି ଯେ ନିର୍ବାଚନ ଫଳାଫଳର ସବୁଠାରୁ ବଡ଼ ଶିକ୍ଷା ହେଉଛି ଯେ କେହି କେବେ ବି ଅତ୍ୟଧିକ ଆତ୍ମବିଶ୍ୱାସ କରିବା ଉଚିତ୍ ନୁହେଁ। ଆପ୍ କାଉନସିଲରମାନଙ୍କୁ ସମ୍ବୋଧିତ କରି କେଜ୍ରିୱାଲ କହିଛନ୍ତି, ଦେଖନ୍ତୁ ହରିୟାଣାରେ ନିର୍ବାଚନର ଫଳାଫଳ କ’ଣ। ସବୁଠାରୁ ବଡ ଶିକ୍ଷା ହେଉଛି ନିର୍ବାଚନରେ କେହି ଅତ୍ୟଧିକ ଆତ୍ମବିଶ୍ୱାସ ରଖନ୍ତୁ ନାହିଁ । ନିର୍ବାଚନକୁ ହାଲୁକା ଭାବେ ନେବା ଉଚିତ ନୁହେଁ। ପ୍ରତ୍ୟେକ ନିର୍ବାଚନ ଓ ପ୍ରତ୍ୟେକ ଆସନ କଷ୍ଟକର। ହରିୟାଣାରେ ଆସନ ବୁଝାମଣାକୁ ନେଇ ମତଭେଦ ଯୋଗୁଁ ଆପ୍ କଂଗ୍ରେସ ସହ ନିର୍ବାଚନ ପୂର୍ବରୁ ମେଣ୍ଟ କରିବାରେ ବିଫଳ ହୋଇଥିଲା। ଶିବସେନା ନେତ୍ରୀ ପ୍ରିୟଙ୍କା ଚତୁର୍ବେଦୀ କହିଛନ୍ତି ଯେ ଆସନ୍ତା ମାସରେ ହେବାକୁ ଥିବା ମହାରାଷ୍ଟ୍ରରେ ହରିୟାଣା ନିର୍ବାଚନ ଫଳାଫଳର କୌଣସି ପ୍ରଭାବ ପଡ଼ିବ ନାହିଁ।
ସିପିଆଇ ସାଧାରଣ ସମ୍ପାଦକ ଡି ରାଜା କହିଛନ୍ତି ଯେ ହରିୟାଣା ନିର୍ବାଚନ ଫଳାଫଳ ଉପରେ କଂଗ୍ରେସ ଗମ୍ଭୀରତାର ସହ ଆତ୍ମସମୀକ୍ଷା କରିବା ଉଚିତ ଏବଂ ମହାରାଷ୍ଟ୍ର ଏବଂ ଝାଡ଼ଖଣ୍ଡରେ ଆଗାମୀ ନିର୍ବାଚନରେ ବିରୋଧୀ ମେଣ୍ଟ ‘ଇଣ୍ଡିଆ’ର ସମସ୍ତ ସହଯୋଗୀଙ୍କୁ ଏକାଠି କରିବା ଉଚିତ୍।
ମୁଁ ବ୍ୟଥିତ: ଯୋଗେନ୍ଦ୍ର ଯାଦବ
ରାଜନୈତିକ ବିଶେଷଜ୍ଞ ଯୋଗେନ୍ଦ୍ର ଯାଦବ ମଧ୍ୟ କଂଗ୍ରେସର ବିଜୟ ଦାବି କହିଛନ୍ତି, ହରିୟାଣାର ଫଳାଫଳ ଦେଖି ମୁଁ ଆଶ୍ଚର୍ଯ୍ୟ। କଂଗ୍ରେସର ସାମ୍ବାଦିକ ସମ୍ମିଳନୀ ଦେଖି ମୁଁ ବ୍ୟଥିତ। ଯାହା ଘଟିଲା ସେ ନେଇ ଚାରିଆଡ଼େ ଥିବା ବନ୍ଧୁଙ୍କ ଠାରୁ କଲ୍ ଓ ମେସେଜ ଆସୁଛି। କ’ଣ ହେଲା ମୁଁ ମଧ୍ୟ ଜାଣେ ନାହିଁ । ଗତ ଏକ ମାସ ଧରି ମୁଁ କହୁଥିଲି ଯେ ମୁଁ ଆସନର ପୂର୍ବାନୁମାନ କରିବି ନାହିଁ, କିନ୍ତୁ ମୁଁ ଅନେକ ଥର କହିଛି ଯେ କଂଗ୍ରେସ ସ୍ପଷ୍ଟ ଭାବରେ ଆଗୁଆ ଅଛି ଏବଂ ଏହାର ସରକାର ଗଠନ ହେବ। ଏପରିକି ଫଳାଫଳ ଆସିବା ଦିନ ଆରମ୍ଭରେ ସମସ୍ତ ଚ୍ୟାନେଲରେ କଂଗ୍ରେସ କେତେ ଦୂର ଯିବ ସେନେଇ ଆଲୋଚନା ହେଉଥିଲା।
