ଭୁବନେଶ୍ବର: ଡିଜିଟାଲ ମିଡିଆର ବିକାଶ ହେଉଛି। ବିଗତ ୧୦ ବର୍ଷ ମଧ୍ୟରେ ଏହା ଆଗକୁ ବଢ଼ିଛି। ଅପରପକ୍ଷେ କରୋନ ମହାମାରୀ ପରଠାରୁ ମୁଦ୍ରିତ ଗଣମାଧ୍ୟମର ଲୋକପ୍ରିୟତା ହ୍ରାସ ପାଇଛି। ଅତ୍ୟାଧୁନିକ ଯୁଗରେ ଡିଜିଟାଲ ମିଡିଆ ମାଧ୍ୟମରେ ପ୍ରଚାର ଶ୍ରେଷ୍ଠ ମାଧ୍ୟମ ପାଲଟିଛି। ଡିଜିଟାଲ ମିଡିଆର ଅନ୍ୟତମ ମାଧ୍ୟମ ହେଉଛି ସୋସିଆଲ ମିଡିଆ। ପ୍ରଚାର ପାଇଁ ମୁଦ୍ରିତ ମାଧ୍ୟମ ତୁଳନାରେ ଡିଜିଟାଲ ମିଡିଆ ପାଠକ ଓ ଗ୍ରାହକଙ୍କ ନିକଟରେ ଶୀଘ୍ର ପହଞ୍ଚି ପାରୁଛି। ଆର୍ଥିକ ଦୃଷ୍ଟିରୁ ମଧ୍ୟ ଡିଜିଟାଲ ମିଡିଆରେ ଖର୍ଚ୍ଚ କମ ହେଉଛି। ସବୁଠୁ ବଡ଼ କଥା ହେଲା ଡିଜିଟାଲ ପ୍ରଚାର ଦ୍ବାରା ଯୁବପିଢ଼ିଙ୍କ ନିକଟତର ସହଜ ହୋଇପାରୁଛି। ସରକାର, ପ୍ରଶାସନ, ବ୍ୟକ୍ତିଗତସ୍ତରରେ ଡିଜିଟାଲ ପ୍ରଚାର ବଳିଷ୍ଠ ମାଧ୍ୟମ ହେଉଛି। କେନ୍ଦ୍ର ସରକାର ଡିଜିଟାଲ ମିଡିଆ ନୀତି ମଧ୍ୟ ଆରମ୍ଭ କରିଥିବା ବେଳେ ଏହାକୁ ପୂର୍ଣ୍ଣାଙ୍ଗ ରୂପରେ ଲାଗୁ କରିପାରି ନାହାନ୍ତି।
ନିର୍ବାଚନ ପ୍ରଚାର ହେଉ ବା ପର୍ବପର୍ବାଣୀ ସମୟରେ ନେତାମାନେ ଉଭୟ ଡିଜିଟାଲ ଓ ସୋସିଆଲ ମିଡିଆରେ ଜୋରଦାର ପ୍ରଚାର କରନ୍ତି। ଏହାରି ମାଧ୍ୟମରେ ଲୋକଙ୍କର ନିକଟତର ହେବାକୁ ପ୍ରୟାସ କରିଥାନ୍ତି। ମୁଦ୍ରିତ ମାଧ୍ୟମରେ ଦେଉଥିବା ବିଜ୍ଞାପନକୁ ମଧ୍ୟ ଡିଜିଟାଲ ଓ ସୋସିଆଲ ମିଡିଆ ଜରିଆରେ ପ୍ରଚାର କରନ୍ତି। କିନ୍ତୁ କ୍ଷୋଭର କଥା ଯେ, ସେହି ନେତାମାନଙ୍କୁ ନେଇ ଯଦି କୌଣସି ଜଟିଳ ଖବର ପ୍ରକାଶ ପାଇଥାଏ, ସେମାନେ ଏହାକୁ ସହଜରେ ଗ୍ରହଣ କରିପାରନ୍ତି ନାହିଁ। ଏତିକି ବେଳେ କୁହନ୍ତି ଡିଜିଟାଲ ଓ ସୋସିଆଲ ମିଡିଆର କୌଣସି ସତ୍ୟତା ନାହିଁ। ସଂକଟ ସମୟରେ ମୁଦ୍ରିତ ଗଣମାଧ୍ୟମକୁ ଗୁରୁତ୍ବ ଦେଇଥାନ୍ତି।
ସମୟ ବଞ୍ଚାଉଛି ଡିଜିଟାଲ-ସୋସିଆଲ ମିଡିଆ
ମାତ୍ର ଏବେବି ସୋସିଆଲ ମିଡିଆ ସମାଜର ସବୁ ବର୍ଗରେ ଗ୍ରହଣୀୟ ହୋଇପାରି ନାହିଁ। କିନ୍ତୁ ସୋସିଆଲ ମିଡିଆ ମାଧ୍ୟମରେ ଅନେକ ଘଟଣା ଉଜାଗର ହୋଇପାରୁଛି। ଲୁଚିଯାଉଥିବା ଅନେକ ଘଟଣା ସୋସିଆଲ ମିଡିଆ ମାଧ୍ୟମରେ ଡିଜିଟାଲ ଗଣମାଧ୍ୟମ ଦେଇ ଉନ୍ମୋଚନ ହେଉଛି। ଡିଜିଟାଲ ମିଡିଆରୁ ତଥ୍ୟ କପି କରାଯାଇ ମୁଦ୍ରିତ ମାଧ୍ୟମକୁ ଆସୁଛି। ସରକାରମାନେ ମଧ୍ୟ ଯେତେବେଳେ ନିଜର ଯୋଜନା ସଂପର୍କରେ ପାରଂପରିକ ଡିଜିଟାଲ ମିଡିଆ ଇଣ୍ଟରନେଟ-ଇମେଲ ବ୍ୟବହାର କରିବା ସହିତ ହ୍ବାଟ୍ସଅପ୍, ୟୁଟ୍ୟୁବ୍ ଭଳି ସୋସିଆଲ ମିଡିଆର ସହାୟତାରେ ଗଣମାଧ୍ୟମ ପାଖକୁ ବିଜ୍ଞପ୍ତି ପ୍ରେରଣ କରନ୍ତି। ଡିଜିଟାଲ ଓ ସୋସିଆଲ ମିଡିଆ ଲୋକଙ୍କର ସମୟ ବଞ୍ଚାଇ ଦେଉଛି।
ଉତ୍ତର ପ୍ରଦେଶରେ ନୂଆ ମିଡିଆ ନୀତି
ଯୋଗୀ ସରକାର ଡିଜିଟାଲ ମିଡିଆ ପଲିସି ଖୁବ୍ ଶୀଘ୍ର ଆଣିବାକୁ ଯାଉଛନ୍ତି। ଉତ୍ତର ପ୍ରଦେଶ ରାଜ୍ୟର ଡିଜିଟାଲ ମିଡିଆ ନୀତିକୁ କ୍ୟାବିନେଟ ଅନୁମୋଦନ କରିଛି। ମଙ୍ଗଳବାର କ୍ୟାବିନେଟ୍ ବୈଠକରେ ଉପସ୍ଥାପିତ ପ୍ରସ୍ତାବ ଅନୁଯାୟୀ ସରକାରଙ୍କ ଯୋଜନା ଓ ଉପଲବ୍ଧି ସମ୍ବନ୍ଧୀୟ ବିଷୟବସ୍ତୁ ପ୍ରସାରଣ ପାଇଁ ଇଣ୍ଟରନେଟ୍ ମିଡିଆ ପ୍ଲାଟଫର୍ମ ଏକ୍ସ, ଫେସବୁକ୍, ଇନଷ୍ଟାଗ୍ରାମ ଏବଂ ୟୁଟ୍ୟୁବ୍ରେ ବିଜ୍ଞାପନ ଦେବାର ବ୍ୟବସ୍ଥା କରାଯାଇଛି। ଏକ୍ସ, ଫେସବୁକ, ଇନଷ୍ଟାଗ୍ରାମ ଓ ୟୁଟ୍ୟୁବର ଆକାଉଣ୍ଟଧାରୀଙ୍କୁ ଗ୍ରାହକ ଓ ଫଲୋଅର୍ସ ଆଧାରରେ ୪ଟି ବର୍ଗରେ ବିଭକ୍ତ କରାଯିବ। ସରକାର ସେମାନଙ୍କୁ ତାଲିକାଭୁକ୍ତ କରି ବିଜ୍ଞାପନ ଦେବେ। ଏହି ନୀତି ଅନୁଯାୟୀ ଏକ୍ସ, ଫେସବୁକ ଓ ଇନଷ୍ଟାଗ୍ରାମର ଆକାଉଣ୍ଟଧାରୀ ଓ ଇନଫ୍ଲୁଏନ୍ସରଙ୍କୁ ୪ଟି ବର୍ଗ ଅନୁଯାୟୀ ମାସିକ ୫, ୪, ୩ ଓ ୨ ଲକ୍ଷ ଟଙ୍କା ଦିଆଯିବ। ସେହିପରି ୟୁଟ୍ୟୁବରେ ଭିଡିଓ, ସର୍ଟସ ଓ ପୋଡକାଷ୍ଟ ପାଇଁ ଆକାଉଣ୍ଟଧାରୀଙ୍କୁ ୪ଟି ବର୍ଗ ଅନୁଯାୟୀ ମାସିକ ୮, ୭, ୬ ଓ ୪ ଲକ୍ଷ ଟଙ୍କା ଦିଆଯିବ। ଆପତ୍ତିଜନକ, ଅଶ୍ଳୀଳ, ଅଶ୍ଳୀଳ ଓ ଦେଶ ବିରୋଧୀ ବିଷୟବସ୍ତୁ ପରିବେଷଣ କରିଥିବା ସମ୍ପୃକ୍ତ ଆକାଉଣ୍ଟଧାରୀଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସ୍ପଷ୍ଟ କରାଯାଇଛି।
ଓଡ଼ିଶା ସରକାରଙ୍କ ଆଭିମୁଖ୍ୟ
ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ରାଜ୍ୟରେ ସାମ୍ବାଦିକମାନଙ୍କୁ ପଂଜୀକୃତ କରିବା ନୀତି ଉପରେ ବଡ଼ ତଥ୍ୟ ଉପସ୍ଥାପନ କରିଛନ୍ତି। ଗୃହରେ ବିଧାୟକ ରମେଶ ଚନ୍ଦ୍ର ବେହେରାଙ୍କ ପ୍ରଶ୍ନରେ ଉତ୍ତର ରଖିଛନ୍ତି। ରାଜ୍ୟରେ ସାମାଜିକ ଗଣମାଧ୍ୟମକୁ ବ୍ୟବସ୍ଥିତ କରିବା ତଥା ସେଥିରେ କାର୍ଯ୍ୟରତ ସାମ୍ବାଦିକମାନଙ୍କୁ ପଂଜିକୃତ କରିବା ପାଇଁ ନିଦ୍ଦିଷ୍ଟ ନୀତି ପ୍ରଣୟନ କରିବା ନେଇ ପ୍ରଶ୍ନରେ ସେ କହିଛନ୍ତି, ସୋସିଆଲ ମିଡିଆ ସାମ୍ବାଦିକମାନଙ୍କ ପାଇଁ ସରକାରଙ୍କ କୌଣସି ନୀତି ନାହିଁ। କିନ୍ତୁ ୱେବ୍ ମିଡିଆ ପାଇଁ ରାଜ୍ୟ ସରକାର ୱେବ ମିଡିଆ ପଲିସି ପ୍ରଣୟନ କରିଛନ୍ତି।
