ଭୁବନେଶ୍ବର: ଓଡ଼ିଶା କ୍ରିକେଟ୍ ଇତିହାସର ଅନ୍ୟଏକ ସ୍ମୁତିବହନ କରୁଥିବା ‘ବାରବାଟୀ ଷ୍ଟାଡିୟମ’କୁ ମାଟିରେ ମିଶାଇବା ପାଇଁ ରାଜ୍ୟ ସରକାର ଯୋଜନା କରୁଛନ୍ତି। ରୂପାନ୍ତରିତ ନାମରେ ଐତିହାସିକ କ୍ରିକେଟ୍ ଷ୍ଟାଡିୟମ୍କୁ ଭାଙ୍ଗି ଚୁରମାର କରିଦେବାକୁ ପ୍ରସ୍ତୁତ ହୋଇସାରିଛନ୍ତି। ପୁରୀରେ ଶ୍ରୀମନ୍ଦିର ପରିକ୍ରମା ପ୍ରକଳ୍ପ ନିର୍ମାଣ ପାଇଁ ଯେପରି ଶହଶହ ବର୍ଷର ମଠମନ୍ଦିର ଭାଙ୍ଗି ଦେଲେ ସେହିପରି ବାରବାଟୀ ଷ୍ଟାଡିୟମ୍କୁ ଭାଙ୍ଗି ନୂଆ ଫର୍ଦ୍ଦ ଲେଖିବେ। ଭବିଷ୍ୟତରେ ଯେପରି ଲୋକେ ନବୀନ ପଟ୍ଟନାୟକଙ୍କୁ ମନେ ରଖିବେ, ସେଥିପାଇଁ ଏହି ଷଡ଼ଯନ୍ତ୍ର କରିବାକୁ ରାଜ୍ୟ ସରକାର ଯୋଜନା କରୁଛନ୍ତି।
ବାରବାଟୀ ଷ୍ଟାଡିୟମ୍ ଭାଙ୍ଗି ଏଠାରେ ବିଶ୍ବସ୍ତରୀୟ କ୍ରିକେଟ୍ ଷ୍ଟାଡିୟମ ନିର୍ମାଣ କରିବାକୁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି। କିନ୍ତୁ ରାଜ୍ୟ ସରକାର ଜାଣିବାର କଥା ଯେ, ବାରବାଟୀ ଦୀର୍ଘ ଦଶନ୍ଧି ପୂର୍ବରୁ ବିଶ୍ବସ୍ତରୀୟ ହୋଇସାରିଛି। ଏଠାରେ ଭାରତ ବ୍ୟତୀତ ଶ୍ରୀଲଙ୍କା, ଇଂଲଣ୍ଡ, ୱେଷ୍ଟଇଣ୍ଡିଜ, କେନିଆ, ଜିମ୍ବାୱେ, ନ୍ୟୁଜିଲାଣ୍ଡ, ଦକ୍ଷିଣ ଆଫ୍ରିକା, ଅଷ୍ଟ୍ରେଲିଆ ଓ ପାକିସ୍ତାନ ଖଳାଳି କ୍ରିକେଟ୍ ମ୍ୟାଚ୍ ଖେଳିସାରିଛନ୍ତି। ବିଶ୍ବର କ୍ରିକେଟ୍ପ୍ରେମୀ ବାରବାଟୀକୁ ବହୁ ବର୍ଷରୁ ଜାଣି ସାରିଛନ୍ତି। ତେବେ ବିଶ୍ବସ୍ତରୀୟ ବାରବାଟୀକୁ ଆଉ କେଉଁ ପ୍ରକାରରେ ବିଶ୍ବସ୍ତରୀୟ କରିବେ ସେକଥା ବୁଝା ପଡୁନାହିଁ।
ରାଜ୍ୟ ସରକାରଙ୍କ ଲକ୍ଷ୍ୟ
ଓଡ଼ିଶା କ୍ରିକେଟ୍ ଆସୋସିଏସ୍ନ( ଓସିଏ), ବିସିସିଆଇ ଓ ରାଜ୍ୟ ସରକାରଙ୍କ ମିଳିତ ସହଯୋଗରେ ବାରବାଟୀ ଷ୍ଟାଡିୟମକୁ ସଂପୂର୍ଣ୍ଣ ଭାଂଗି ଦିଆଯାଇ ସେହି ସ୍ଥାନରେ ସମସ୍ତ ଅତ୍ୟାଧୁନିକ ସୁବିଧା ଥିବା ଏକ ବିଶ୍ବସ୍ତରୀୟ ଷ୍ଟାଡିୟମ ନିର୍ମାଣ କରାଯିବ। ଏହି ନିର୍ମାଣ କାମରେ ୬୦୦ କୋଟି ଟଙ୍କା ବ୍ୟୟ ବହେବ। ନୂତନ ଷ୍ଟାଡିୟମରେ ଏକକାଳୀନ ୬୦ ହଜାର ଦର୍ଶକ ବସି ମ୍ୟାଚ୍ ଦେଖିପାରିବେ। କ୍ରିକେଟ୍ ସହିତ ଅନ୍ୟ ଖେଳ ପ୍ରତି ମଧ୍ୟ ଧ୍ୟାନ ଦିଆଯିବ। ଷ୍ଟାଡିୟମକୁ ଲାଗି ୫ ତାରକା ହୋଟେଲ, ଅଫିସ କକ୍ଷ, ରାସ୍ତା ପାର୍କିଂ, ଦୋକାନ ଘର, ସପିଂ ମଲ୍ ଓ ଏକ ସ୍ପୋର୍ଟସ୍ କମ୍ପଲେକ୍ସର ବିକାଶ କରାଯିବ। ରାଜ୍ୟ ସରକାରଙ୍କ ୫-ଟି ରୂପାନ୍ତରୀକରଣ ଯୋଜନାରେ ଏହାକୁ ସାମିଲ କରି ନିର୍ମାଣ କରାଯିବ। ଆସନ୍ତା ସପ୍ତାହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହାର ଭିତ୍ତିପ୍ରସ୍ତର ସ୍ଥାପନ କରିବେ।
କ’ଣ କହିଲେ ଓସିଏ ସଂପାଦକ
ଓସିଏ ସଂପାଦକ ସଂଜୟ ବେହେରା କହିଛନ୍ତି, ଓସିଏର ଗତ ସାଧାରଣ ପରିଷଦ ବୈଠକରେ ପ୍ରଥମେ ଷ୍ଟାଡିୟମ ନବକଳେବର ପାଇଁ ନିଷ୍ପତ୍ତି ହୋଇଥିଲା। ଓସିଏ ପକ୍ଷରୁ ଏନେଇ ରାଜ୍ୟ ସରକାରଙ୍କୁ ଅବଗତ କରାଯାଇଥିଲା। ଏବେ ସରକାର ବାରବାଟୀ ଷ୍ଟାଡିୟମର ବିକାଶ ପାଇଁ ଆଗ୍ରହ ପ୍ରକାଶ କରିଛନ୍ତି। କ୍ରିକେଟ୍ ଓ ଅନ୍ୟ ଖେଳକୁ ଦୃଷ୍ଟିରେ ରଖି ଷ୍ଟାଡିୟମର ବିକାଶ କରାଯିବ। ରାଜ୍ୟରେ ଗୁଣାତ୍ମକ କ୍ରିକେଟ୍ କୋଚିଂର ମଧ୍ୟ ବ୍ୟବସ୍ଥା କରାଯିବ। ପ୍ରତିଯୋଗିତା ମନୋଭାବ ରଖିବା ଓ ପ୍ରତିଭାର ବିକାଶ ପାଇଁ ରାଜ୍ୟସ୍ତରୀୟ କ୍ରିକେଟ୍ ଏକାଡେମି ବିକାଶ କରିବା ସହିତ ରାଜ୍ୟସ୍ତରୀୟ କ୍ରିକେଟ୍ ଲିଗ୍ର ଆୟୋଜନ କରିବାକୁ କହିଥିଲେ। ମହିଳା କ୍ରିକେଟ୍ର ବିକାଶ ପାଇଁ ପୁରୀରେ ଏକ ମହିଳା କ୍ରିକେଟ ଏକାଡେମି ଖୁବ୍ଶୀଘ୍ର ଆରମ୍ଭ ହେବ। କଟକରେ ଥିବା କ୍ରିକେଟ ଏକାଡେମିର ମଧ୍ୟ ବିକାଶ କରାଯିବ। ବାରବାଟୀ ଷ୍ଟାଡିୟମରେ ୪୨ ହଜାର ସିଟ୍ ସାମର୍ଥ୍ୟ ରହିଛି। ନୂତନ ଷ୍ଟାଡିୟମ ନିର୍ମାଣ ହେଲେ ୬୦ ହଜାର ଦର୍ଶକ ବସିଲା ଭଳି ସାମର୍ଥ୍ୟ ରହିବ। ୧୯୫୨ ମସିହାରେ ଷ୍ଟାଡିୟମର ମୂଳଦୁଆ ପଡିଥିଲା। କାଳକ୍ରମେ ଏହାର ବିକାଶ ହୋଇଛି। ଏବେ ଷ୍ଟାଡିୟମର ଯେଉଁ ମୂଳ ଢାଞ୍ଚା ରହିଛି ସେଥିରେ ନବକଳେବର ବା ପୁନଃ ନିର୍ମାଣ କରିବା ଏକ ପ୍ରକାର ଅସମ୍ଭବ ଥିବାରୁ ଷ୍ଟାଡିୟମକୁ ସଂପୂର୍ଣ୍ଣ ଭାଙ୍ଗି ଏକ ନୂତନ ଷ୍ଟାଡିୟମ ନିର୍ମାଣ କରାଯିବାର ଯୋଜନା ହୋଇଛି।
ନୂଆ ଷ୍ଟାଡିୟମ ନିର୍ମାଣ ଅସୁବିଧା କେଉଁଠି?
ରାଜ୍ୟବାସୀ ବାରବାଟୀ ଷ୍ଟାଡିୟମକୁ ଭାଙ୍ଗି ସେଠାରେ ନୂଆ ଓ ଅତ୍ୟାଧୁନିକ କ୍ରୀଡ଼ା ପରିସର ଚାହୁଁ ନାହାନ୍ତି। ଏହି ଷ୍ଟାଡିୟମ୍ ଥାଇ କଟକରେ ହେଉ ବା ଭୁବନେଶ୍ବରରେ ଆହୁରି ଏକ ଷ୍ଟାଡିୟମ୍ କରାଗଲେ କିଛି ଅସୁବିଧା ନାହିଁ। ଏହାର ଯୁକ୍ତିଯୁକ୍ତ କଥା ହେଲା ଯେ, ଅନ୍ୟ ରାଜ୍ୟରେ ଏକାଧିକ କ୍ରିକେଟ୍ ଷ୍ଟାଡିୟମ ଅଛି। ମହାରାଷ୍ଟ୍ରର ମୁମ୍ବାଇ, ପୁନେ ଓ ନାଗପୁରରେ କ୍ରିକେଟ୍ ଷ୍ଟାଡିୟମ ରହିଛି। ସେହିପରି ଗୁଜରାଟରେ ଅହମଦାବାଦ ସମେତ ରାଜକୋଟ ଓ ଭଦୋଦରାରେ କ୍ରିକେଟ ଷ୍ଟାଡିୟମ ରହୁଛି। ରାଜ୍ୟ ସରକାର କ୍ରୀଡ଼ା ନେଇ ବଡ଼ବଡ଼ ଭାଷଣବାଜୀ କରୁଥିବା ବେଳେ ରାଜ୍ୟରେ ଅନ୍ୟ ଏକ ବୃହତ୍ କ୍ରିକେଟ୍ ଷ୍ଟାଡିୟମ୍ ନିର୍ମାଣ କଲେ ଅସୁବିଧା କେଉଁଠି? ୨୦୦୬ ମସିହାରେ ପଡ଼ୋଶୀ ଛତିଶଗଡ଼ର ରାଜଧାନୀ ରାୟପୁରରେ ୬୫ହଜାର ଦର୍ଶକ ବସିବା ଭଳି କ୍ରିକେଟ୍ ଷ୍ଟାଡିୟମ୍ ନିର୍ମାଣ ହୋଇଥିଲା। ଏଥି ପାଇଁ ୧୪୫ କୋଟି ଟଙ୍କା ବ୍ୟୟବରାଦ ରଖାଯାଇଥିଲା। ରାଜ୍ୟ ସରକାର ଅତ୍ୟାଧୁନିକ କ୍ରିକେଟ୍ ଷ୍ଟାଡିୟମ ପାଇଁ ୬୦୦ କୋଟି ଟଙ୍କା ବଜଟେ୍ ରଖିଛନ୍ତି। ତେଣୁ ସେତିକି ଟଙ୍କାରେ ଅନ୍ୟ ସ୍ଥାନରେ ଏକ ଷ୍ଟାଡିୟମ ନିର୍ମାଣ ହୋଇପାରିବ। ଅବଶ୍ୟ ବଜେଟ୍ରେ କିଛି ପରିବର୍ତ୍ତନ ଆସିପାରେ।
