ଭୁବନେଶ୍ବର: ବିଶ୍ବ ତାପାୟନ ସମଗ୍ର ପୃଥିବୀବାସୀଙ୍କର ଚିନ୍ତା ବଢ଼ାଇଛି। କେବଳ ଏସୀୟ ଦେଶ ନୁହେଁ। ବରଂ ୟୁରୋପୀୟ ଦେଶଗୁଡ଼ିକରେ ମଧ୍ୟ ତାପମାତ୍ରା ବଢ଼ିଛି। ତେବେ ଭାରତରେ ଏହା ମାତ୍ରାଧିକ ବଢ଼ିଛି। ଓଡ଼ିଶାରେ ଚଳିତ ବର୍ଷ ତାପମାତ୍ରା ଏପର୍ଯ୍ୟନ୍ତ ୪୬ ଡିଗ୍ରି ଅତିକ୍ରମ କରିସାରିଛି। ଜନସଂଖ୍ୟା ବୃଦ୍ଧି ଯୋଗୁଁ, ଲୋକଙ୍କର ଆବଶ୍ୟକତା ପୂରଣ ପାଇଁ ବ୍ୟାପକ ପରିମାଣରେ କଳକାରଖାନା ଗଢ଼ିଉଠିବା ଓ ଯାନବାହନ ସଂଖ୍ୟା ବୃଦ୍ଧି ପାଇବା ସହିତ ଜଙ୍ଗଲ ଅବକ୍ଷୟ ଏହି ତାପମାତ୍ରା ବୃଦ୍ଧିର ଅନ୍ୟତମ କାରଣ ହୋଇପାରେ। ପରିବେଶ ସନ୍ତୁଳନ ହେଉ ନଥିବାରୁ କାଳବୈଶାଖୀ, ବନ୍ୟା, ବାତ୍ୟା, ଭୂମିକମ୍ପ ଆଦି ହେଉଛି, ଯେଉଥିରେ କି ଧନଜୀବନକୁ କ୍ଷତି ପହଞ୍ଚାଉଛି। କାଳବୈଶାଖୀ ଜନିତ ବଜ୍ରପାତରେ ଲୋକେ ଜୀବନ ହରାନ୍ତି। ସେହିପରି ଅଂଶୁଘାତ ମଧ୍ୟ ଅନ୍ୟତମ କ୍ଷତି ପହଞ୍ଚାଉଛି।
ଦକ୍ଷିଣ ଚୀନରେ ଗତ ୧ ତାରିଖ ଦିନ ପ୍ରବଳ ବର୍ଷା ହୋଇଛି। ଲଗାଣ ବର୍ଷା ଯୋଗୁଁ ଏକ ୬ ଲେନ୍ ବିଶିଷ୍ଟ ଜାତୀୟ ରାଜପଥର ପ୍ରାୟ ୬୦ ଫୁଟ ଦୀର୍ଘ ଅଂଶ ଭୁଶୁଡ଼ି ପଡ଼ିଛି। ଏଥିରେ ୪୮ ଜଣଙ୍କ ମୃତ୍ୟୁ ଘଟିଥିବା ନେଇ ମେଇଝୁ ସିଟି ପ୍ରଶାସନ ପକ୍ଷରୁ ଗଣମାଧ୍ୟମକୁ ସୂଚନା ଦିଆଯାଇଛି। ୨ ତାରିଖ ଭୋର ୨ଟାରେ ରାଜପଥର ୫୮.୭ ଫୁଟ ରାସ୍ତା ଧୋଇ ହୋଇଯାଇଥିଲା। ସେହି ସମୟରେ ରାସ୍ତାରେ ଥିବା ୨୩ଟି ଯାନବାହନ ଗର୍ତ୍ତ ଭିତରେ ପଶିଯାଇଥିଲା। ବର୍ଷାଯୋଗୁଁ ମାଟିଗୋଡ଼ି ଖସୁଥିବାରୁ ଉଦ୍ଧାର କାର୍ଯ୍ୟ ଆଶାନୁରୂପ ଆଗେଇ ପାରି ନଥିଲା। ମଧ୍ୟାହ୍ଣ ସୁଦ୍ଧା ୩୬ଜଣଙ୍କ ମୃତଦେହ ଉଦ୍ଧାର କରାଯାଇଥିବା ବେଳେ ପରବର୍ତ୍ତୀ ସମୟରେ କେତେକ ମୃତଦେହକୁ ଉଦ୍ଧାର କରାଯାଇଥିଲା। ୩୦ଜଣ ଆହତଙ୍କୁ ଚିକିତ୍ସା ନିମନ୍ତେ ନିକଟସ୍ଥ ଚିକିତ୍ସାଳୟକୁ ପଠାଯାଇଥିଲା।
ବାତ୍ୟା ପାଇଁ ଓଡ଼ିଶାର କ୍ଷତି
ଓଡ଼ିଶାର ବିକାଶରେ ବଡ଼ ବାଧକ ହେଉଛି ପ୍ରାକୃତିକ ବିପର୍ଯ୍ୟୟ। ଅତୀତରେ ଓଡ଼ିଶାର ଅର୍ଥନୀତିରେ ବନ୍ୟା, ବାତ୍ୟା ଓ ମହାବାତ୍ୟା ଘୋର ପ୍ରଭାବ ପକାଇଛି। ୧୯୯୯ ମହାବାତ୍ୟାରେ ପ୍ରାୟ ୧୦,୦୦୦ ଲୋକଙ୍କର ମୃତ୍ୟୁ ହୋଇଥିଲା ବୋଲି ଚର୍ଚ୍ଚା ହୋଇଥାଏ। ସେହିଭଳି ହଜାର ହଜାର କୋଟି ଟଙ୍କା କ୍ଷତି ହୋଇଥିବା ଅନୁମାନ କରାଯାଏ। ବିଗତ ୨ ଦଶନ୍ଧି ମଧ୍ୟରେ ରାଜ୍ୟରେ ଅନେକ ସମୟରେ ବାତ୍ୟା ହୋଇଛି। ସେଥିରୁ ୧୯୯୯ ମହାବାତ୍ୟା ସର୍ବାଧିକ କ୍ଷତିଗ୍ରସ୍ତ କରିଥିଲା। ସେହିପରି ଫାଇଲିନ, ହୁଡହୁଡକୁ ମଧ୍ୟ ଲୋକେ ଭୁଲି ନାହାନ୍ତି। ତେବେ ଗ୍ରୀଷ୍ମଋତୁରେ ହୋଇଥିବା ଓଡ଼ିଶାର ବହୁ ଜୀବନ ଯଦିଓ ବଞ୍ଚିଯାଇଥିଲା। ତଥାପି ଫନି ଯୋଗୁଁ ବହୁ କ୍ଷତି ହୋଇଥିଲା।
ଗ୍ରୀଷ୍ମରେ ବାତ୍ୟା ଫନି
ସାମୁଦ୍ରିକ ଝଡ଼ ଫନିକୁ ୫ ବର୍ଷ ପୂରଣ ହୋଇଛି। ୨୦୧୯ ମେ’ ୩ ତାରିଖ ପୂର୍ବାହ୍ଣରେ ଫନି ବିପର୍ଯ୍ୟୟ ସୃଷ୍ଟି କରିଥିଲା। ଘଣ୍ଟାପିଛା ପବନର ବେଗ ୧୭୫କିମି ଥିଲା। ଫନି ଯୋଗୁଁ ୧୧,୯୪୨ କୋଟି ଟଙ୍କାର ଜିନିଷପତ୍ର ନଷ୍ଟ ହୋଇଥିଲା। ଜଙ୍ଗଲ ଓ ପରିବେଶର ଅସୁନ୍ତଳ କାରଣ ଯୋଗୁଁ ଫନି ହୋଇଥିଲା। ସରକାରୀ ସୂତ୍ରରୁ କହୁାଯାଇଥିଲା ଯେ, ଫନିରେ ୬୪ ଜଣଙ୍କର ମୃତ୍ୟୁ ହୋଇଥିଲା। ୧୪୦,୦୦୦ ହେକ୍ଟର ଚାଷ ନଷ୍ଟ ହୋଇଥିଲା। ଫନିର ବର୍ଷେ ପରେ ବଙ୍ଗୋପସାଗରର ସୁନ୍ଦରବନରେ ବାତ୍ୟା ‘ଅମ୍ଫାନ’ ଆସିଥିଲା। ଏହା ଦ୍ବାରା ଯିଓ ବହୁଧନ ଜୀବନ ନଷ୍ଟ ହୋଇ ନଥିଲା, ତଥାପି ୪୪ ଲକ୍ଷ ଲୋକ ପ୍ରଭାବିତ ହୋଇଥିଲେ। ୨୦୨୧ ମସିହାରେ ବାତ୍ୟା ‘ୟାସ୍’ ଆସିଥିଲା। ଏଥିରେ ପଶ୍ଚିମବଙ୍ଗର ୬୦ ଲକ୍ଷ ଲୋକ ପ୍ରଭାବିତ ହୋଇଥିଲେ। ୬୧୦ କୋଟି ଟଙ୍କାର ଜିନିଷ ପତ୍ର କ୍ଷତି ପହଞ୍ଚାଇଥିଲା।
କାଳବୈଶାଖୀ, ଅଂଶୁଘାତ
ଗ୍ରୀଷ୍ମଋତୁରେ ଅନ୍ୟ ଏକ ବଡ଼ ବିପର୍ଯ୍ୟୟ ହେଉଛି କାଳବୈଶାଖୀ। କାଳ ବୈଶାଖୀ ଯୋଗୁଁ ପ୍ରତିବର୍ଷ ଭାରତରେ ଶହଶହ ଲୋକଙ୍କର ମୃତ୍ୟୁ ହେଉଛି। ଏଥିରେ ଓଡ଼ିଶାର ଲୋକ ମଧ୍ୟ ସାମିଲ ହେଉଛନ୍ତି। ଦିନ ସମୟରେ ଲୋକେ ନିଜନିଜ କାର୍ଯ୍ୟରେ ବ୍ୟସ୍ତଥିବା ବେଳେ କାଳବୈଶାଖୀ ହେଉଥିବାରୁ ଅଧିକ କ୍ଷତି ହେଉଛି। ସେହିପରି ଗ୍ରୀଷ୍ମଋତୁର ଅନ୍ୟତମ ମୃତ୍ୟୁର କାରଣ ହେଉଛି ଅଂଶୁଘାତ। ଚଳିତ ବର୍ଷ ରାଜ୍ୟରେ ଅଂଶୁଘାତଜନିତ ମୃତ୍ୟୁ ଅଭିଯୋଗ ୮ଟି ଆସିସାରିଛି। ଏଥିରେ ଖୋର୍ଦ୍ଧା, ଦେବଗଡ଼, ବଲାଙ୍ଗୀରରେ ୨ଟି ଲେଖାଏଁ ରହିଛି।
